Génesis 38
38
Ti Judae xchi'uc ti Tamare
1Ti jech ora taje, jech ti Judae laj xch'ac sbaic ta naclej xchi'uc ti xchi'iltac ta voq'uele. Bat xchi'in ta naclej jun vinic ti Hirá sbie, ti nacal ta jteclum Adulame. 2Ti bu taje, c'ot ta sat jun stseb yantsil nich'on jun cananeo vinic ti Súa sbie. Laj yic' sbaic xchi'uc, lic xchi'in yol yu'un. 3C'alal xchi'inoj xa yol yu'un ti antse, laj yilbe sat jun squerem, Er laj yac'be sbi. 4Lic no'ox xchi'in yol yu'un xtoc. Laj yilbe sat jun squerem, Onán laj yac'be sbi. 5Laj to no'ox yil yan squerem xtoc, Sela laj yac'be sbi. Ja' o voc' c'alal oy ta Quezib ti Judae.
6Ti Judae laj sa'be yajnil ti Er ti ja' sbanquilal nich'one. Laj yic' jun ants ti Tamar sbie. 7Ja' no'ox un, ti Diose mu lecuc laj yil c'u s'elan stalel ti Ere. Ja' yu'un un, laj xtuch'be xcuxlej. 8Va'i un, ti Judae xi laj yalbe ti Onane:
—Ic'bo yajnil ti anima abanquile. Yu'un ja' jech sta o ti mu'ilote yo' jech ta x'ayan snitilultac ti anima abanquile.#Dt 25.5-6.
9Ja' no'ox un, ti Onane sna'oj lec ma'uc yu'un ta xc'ot ti xnich'on ta xlic ayanuque. Jech o xal ti c'alal ta xchi'inbe ta jujun velta yajnil ti anima sbanquile, laj yac'be yipal c'uxi mu xchi'in yol yu'un yo' jech mu x'ayan snitilul ti anima sbanquile. 10Jech ti Diose mu lecuc laj yil ti jech ta spas ti Onane. Jech o xal un, laj xtuch'be xcuxlej ec. 11Va'i un, ti Judae xi laj yalbe ti yalib Tamar sbie:
—Jech to va'bunan ta me'unal ants ta sna ti atote, ja' to mi sta sva'lej ti jnich'on Selae.
Yu'un ti Judae, teq'uel c'ot ta yo'nton xu' ta xcham ec ti Sela ti ja' xnich'on jech c'u cha'al laj chamuc ti sbanquiltaque. Jech o xal ti Tamare bat nacluc yu'un ta sna ti stote.
12Ech' xa ox c'uc sjaliluc un, cham yajnil ti Judae, yantsil nich'on ti Súae. C'alal ech' xa ox at o'ntonal yu'un me'inal ti Judae, bat ta jteclum Timnat bu ta xloc'bat stsotsil xchijtaque. Xchi'inoj batel ti adulamita vinic ti Hirá sbie, yu'un lec xil sbaic xchi'uc. 13C'alal laj ya'i ti Tamar batem ta sloq'uel stsotsil xchij ta Timnat ti smu'alibe, 14laj sjelta ti slapoj to ox c'u'il sventa me'onal antse. Laj smac ta chajal poc' ti sate yo' jech mu x'ojtiquinat. Bat xchotan sba ta sti'il jteclum Enaim bu x'ech' sbelel ti Timnate. Jech laj spas, yu'un laj yil vinic xa ti Selae. Ac'o mi jech un, yu'un mu'yuc to ac'bil yic'.
15C'alal laj yil ti Judae, laj snop ti ja' jun ants sna' sbolomalin sbae, yu'un smacoj ti sate. 16Va'i un, laj spajes sba ta xanobal. Nopaj batel ta sts'el ti antse. Mi ja'uc jutebuc sna' ja' yalib ti xi laj yalbee:
—¿Mi xac'an xijbat jliqueluc le'e?
Xi laj stac' ti antse:
—¿C'usi stojol ta xavac'bun taj une?
17Xi laj stac' ti Judae:
—Ta jtacbot talel jcotuc jtentsun ti oy cu'une.
Xi laj stac' ti antse:
—Lec oy, ac'bun comel ta rental ti c'usi oy avu'une. Ja' to ta jsutesbot ti mi laj atacbun talel ti c'usi laj avale.
18Xi laj sjac' ti Judae:
—¿C'usi ta xac'an ti ta jcomtsanbot une?
Xi laj stac' ti antse:
—Ac'bun comel asello xchi'uc yaq'uil, xchi'uc ti avaxton teye.
Jech ti Judae laj yac'. Laj sc'upin sbaic. Laj xchi'in yol yu'un. 19Ts'acal to un, ti Tamare bat sloq'ues ti smacobil sate. Lic xcha'lap ti c'u'il sventa me'onal antse.
20Ta sjalil to un, ti Judae laj stac batel ti tentsune. Ja' laj yich' batel ti adulamita vinic ti lec xil sbaique yo' jech ta sutesbat talel ti c'usi yac'oj ta rentale. Ja' no'ox un, ti buch'u tacbil batele mu'yuc xa tey laj sta. 21Ja' yu'un un, ti bu taje, xi lic sjac'olanbe ti viniquetique:
—Ta jac' ava'yejic, ¿mi xana'ic bu oy ti ants sna' sbolomalin sba ti liquem talel ta Enaim ti li' to ox oy ta sti' bee?
Xi laj staq'uique:
—Li'e, mu'yuc bu xquilcutic o junuc ants ti sna' sbolomalin sbae.
22Va'i un, sut batel bu oy ti Judá ti xi c'ot yale:
—Mu'yuc laj jta ta sa'el ti antse. Ja' jech xtoc laj yalbeicun ti viniquetic teye ti mu'yuc la bu xilic o junuc ants ti sna' sbolomalin sbae.
23Ti Judae xi laj staq'ue:
—Comuc o xchi'uc ti c'usi laj yich'e yo' mu xtal jlo'iltaeltic yu'un. Yavil laj jtacbe batel ti jtentsune, ja' no'ox un, mu'yuc xata. 24Ech'em xa ox oxibuc u c'alal xi tal albatuc ti Judae:
—Ti avalib Tamare laj xa xchi'in ta vayel yan viniquetic. Avi tana un, oy xa yol yu'unic.
Xi tsots c'opoj ti Judae:
—¡Jochic loq'uel talel. Chiq'uic ta c'oc'!
25C'alal ta xa xjochat loq'uel ti antse, xi laj yal c'alal laj stac'be mantal ti smu'alibe: “Yajval ti c'usitic li' oye, ja' ti buch'u laj yac'bun ti cole. Ja' yu'un un, ojtiquino avil lec buch'u yu'un ti seyo xchi'uc ti yaq'uile, xchi'uc ti vaxton li' xtoque.” 26C'alal laj yojtiquin Judá ti ja' yu'untaque, xi laj yale: “Oy stuq'uil c'usi laj spas ti stuque. Ja'uc ti vu'une, mu lecuc libat. Yu'un mu'yuc laj cac'be yic' ti jquerem Selae.” Jech j'ech'el mu'yuc xa bu laj xchi'in ta vayel ti antse. 27C'alal sta yorail laj svoq'ues yol ti Tamare, vach tal. 28C'alal ta xa xvoc' talele, oy jun yu'unic ba'yel jelav talel ti sc'obe. Ja' yu'un ti jvet'ome laj xchucbe tsajal ilera ta sc'ob ti xi laj yale: “Li'e, ja' ba'yel.” 29Ja'uc ti olol une, laj smuts ochel ti sc'obe. Ja' ba'yel voc' talel ti yane. Jech o xal ti jvet'ome laj yac'be sbi Fares.#Ti biil Farese, “xch'ic sba loq'uel”, xi ta xal smelol ti ta hebreo c'ope. Yu'un xi laj yale: “¡Vi to no'ox s'elan laj avut aba ti ba'yel lavoc' talele!” 30Ts'acal to un, voc' talel ti jun chucul tsajal ilera ta sc'ob, Zara laj yac'be sbi.
Currently Selected:
Génesis 38: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000