Génesis 33
33
Ti Jacob xchi'uc ti Esaue ta slajesbe sba yo'ntonic
1C'alal laj yil ti Jacob stsobetic xa talel Esaú xchi'uc ti jvoc' (400) ta vo' svinictaque, laj xch'acanan batel ti ololetic c'u yepal yu'un ti Leae, ti Raquele, xchi'uc yolic ti chib me' mosoviletique. 2Ja' laj yac' ta jba'be ti me' mosoviletic xchi'uc ti yalabique. Laj xtoc un, laj snaban batel ta patil ti Leae xchi'uc ti yalabtaque. Ta slajeb un, laj snaban batel ti Raquele xchi'uc ti Josee. 3Jech ti Jacobe jelav batel. Snupilan xa banomil laj squejan sba batel vucub velta, ja' to ti c'uxi c'ot ta sts'el ti xchi'il ta voq'uele. 4Va'i un, ti Esaue bat snup ta be ta anil. Laj smey. Laj sbajbe spat. Laj sbuts'. Co'ol oc' xchibalic. 5Ts'acal to un, ti Esaue laj yil ti oy antsetic xchi'uc ti ololetique. Xi laj sjaq'ue:
—Le'e, ¿buch'utic?
Xi laj stac' ti Jacobe:
—Ja' xnich'nabtac ti avajtunel ac'bat yu'un ti Diose.
6Jech ti me' mosoviletique xchi'uc ti yalabique nopajic batel. Snupilan xa banomil c'ot squejan sbaic. 7Ts'acal to un, nopaj batel ti Lea xchi'uc ti yalabtaque. Lic squejan sbaic xnupuletic xa c'otel ec. Ta slajeb un, nopaj batel ti Josee xchi'uc ti Raquele. Lic squejan sbaic xnupuletic xa c'otel ec. 8Va'i un, ti Esaue ta ora no'ox xi laj sjaq'ue:
—¿C'usi smelol avu'un ti jech yepal c'usitic laj jnupan ta bee?
Xi laj stac' ti Jacobe:
—Ja' ta sventa ac'o lecubuc avo'nton ta jtojol.
9Xi laj stac' ti Esaue:
—Mo'oj unbi, cuni chi'il ta voq'uel, mu jc'an. Yu'un ti vu'un eque, oy ep cu'un. Ja' yu'un, q'uelo tuc'ulano atuc ti c'usitic ja' avu'une.
10Ja' no'ox un, ti Jacobe xi mu xlaj yo'nton ta vulvunele:
—Mu xapas jech, avocoluc, ich'bun ti amotone yo' jech ta jta ti lec xquil jbatique. Ja' yu'un un, tsacbun ti amoton ta xcac'bote. Yu'un ti jech laj quil asate, co'ol s'elan ja' laj quil stuc ti Dios ya'yele, ja' ti lec ich'bil ta muc' lic'ot avu'une. 11Jech o xal un, avocoluc, tsacbun ich'bun ti amoton quich'ojbot talele. Yu'un ti Diose laj spasun ta jc'ulej ti jech oy cu'une.
Ti jech mu xlaj yo'nton ta vocoletel ti Jacobe, jech o xal ti Esaue laj stsac ti matanale. 12Ja' yu'un un, xi laj yale:
—Lec oy un cha'e, jtam batel jbetic. Vu'un ta xijelav ta jba'be avu'unic —xi.
13Va'i un, ti Jacobe xi laj staq'ue:
—Cuni chi'il ta voq'uel, xana' lec, ti ololetique mu'yuc to yipal yu'unic. Yu'un sc'an ta jnop lec xtoc ta sventa ti chijetique, xchi'uc ti me' vacaxetic oy yolique. Yu'un mi lubtsajic ta bee, xu' ta xchamic ta jun no'ox c'ac'al scotol ti chijetique. 14Ja' lec, jelavan batel. Ti vu'une ja' ta xcoquinbe talel yoc ti jchijtaque, ti ololetic ti xc'uletic batel ta jba'be cu'une. Ja' to ta xc'ot jtaot ta Seir.
15—Jechuc —xi laj stac' ti Esaue—. Mi xu' xava'ie, ta jcomtsanbot jayibuc jvinictac ti xchi'inojun talele.
Ja' no'ox un, ti Jacobe xi laj staq'ue:
—¡Mo'oj, avocoluc! ¿C'u cha'al ta xavich' avocol cu'un?
16Ti jech c'ac'al taje, sut batel ta Seir ti Esaue. 17Yan ti Jacobe bat ta Sucot. Laj smeltsan sna, xchi'uc laj smeltsanbe lambil yanal te' yaxib ti chon bolometic yu'une. Jech o xal ti bu taje, laj yac'be sbiin Sucot.#Ti sbi Sucote, “axibal yanal te'”, xi ta xal smelol ti ta hebreo c'ope.
18Va'i un, ti Jacobe mu'yuc c'usi laj snuptan, lec c'ot ta Canaán c'alal loc' batel ta Padán-aram. Laj slaman sba ta yeloval jteclum Siquem. 19Laj sman jsep osil ti laj stoj vo'vinic (100) ta sep taq'uine,#Jos 24.32; Jn 4.5. ti ja' laj smanbe xnich'nabtac ti Hamore, stot ti Siqueme. Laj smeltsan yaxibalna. 20Ts'acal to un, laj sva'an jun altar, laj yac'be sbi El-elohé-israel.#Ti sbi El-Elohe-Israele, “Ti Diose, ja' Dios yu'un ti Israele”, xi ta xal smelol ti ta hebreo c'ope.
Currently Selected:
Génesis 33: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
