Génesis 31
31
Ti Jacobe ta snopilan c'u s'elan ta xjatav loq'uel ta stojol ti Labane
1Ti Jacobe laj ya'i ti xi ta xalolanic xnich'nab ti Labane: “Scotol ti c'usi ja' yu'un ti jtotique, ja' laj yich' ti Jacobe. Jech o xal pas xa ta jc'ulej.” 2Jech ti Jacobe laj yil xtoc ti mu xa lecuc sat ta xq'uelat yu'un ti Laban jech c'u cha'al ta ba'yel to oxe. 3Ja' yu'un un, ti Jacobe xi albat yu'un ti Diose: “Sutan batel bu oy ti yosil ti atot ame'e, bu oy xtoc ti avuts' avalaltaque. Vu'un ta jchi'inot batel.”
4Jech ti Jacobe laj sta ta iq'uel ti Raquele xchi'uc ti Leae, ti ac'o baticuc bu ta sq'uel ti xchije. 5Xi laj yalbe ya'iique:
—Laj xa quil mu xa jechuc ta xiyilun ti atotic jech c'u cha'al ta ba'yele. Ja'uc ti Dios yu'un ti jtote, li' ono'ox xchi'inojune. 6Ti vo'oxuque xana'ic lec li'abtej ono'ox ta stojol ti atotic c'u yepal xu' cu'une. 7Jech ti stuque laj xa slo'laun. Yu'un sjelilan ono'ox ti jtojole. Manchuc mi jech ta spas un, yu'un ti Diose mu xiyac'un ta ilbajinel. 8Yu'un c'alal xi ta xalilan ti Labane: ‘Ja' ta jtojot o xchi'uc ti pinto chijetique’, va'i un, scotol yalab ti me' chijetique, naca pintotic chlaj voc'uc. Ti c'alal xi ta xale: ‘Ja' ta jtojot o xchi'uc ti basastic spintoale’, scotol ti yalabtac ti me' chijetique, naca basastic chlaj voc'uc. 9Ja' yu'un un, c'ot ta pasel pojbat yu'un Dios ti xchijtaque yo' jech laj yac'bun.
10“Oy jun c'ac'al ja' o liquem sjolic ta xcuchumaj ti chijetique, ja' o laj quil ta jvaich ti xcajte-cajte no'ox ti tot tentsunetic ta sba me' tentsunetic ja'ic ti polajtic spintoale, ti pintotique, ti basastic spintoale. 11Ti ta jvaich taje, laj quil laj sbiiltasun ti yaj'ánjel Diose, ti xi laj jtac'bee: ‘¿C'usi ta xaval?’ 12Va'i un, ti ánjele xi laj yalbune: ‘Tuc'ulano avil lec. Ti tot tentsunetic ta xcuchumta ti me' tentsunetique, ja' pintotic xchi'uc basastic spintoale. Yu'un laj xa quil scotol ti c'usi ta spasbot ti Labane. 13Yu'un vu'un Diosun ti laj cac' jba iluc ta Betel ti bu laj at'uj ta sva'anel ti tone, xchi'uc ti laj avalbun ti oy c'usi ta xavac'bune.#Gn 28.18-22. Batic un. Chapano aba. Loc'an batel li'e. Sutan batel ta banomil ti bu lavoq'ue.’ ”
14Ja' yu'un un, ti Raquele, ti Leae xi laj staq'uique:
—Ti vu'uncutique mu xa xu' ta xcalcutic ma' ti oy to jrextocutic ta sna ti jtotcutique. 15Yu'un ti stuque ma'uc xa xnich'onuncutic ta xa'i. Laj xa xchonuncutic. Ja' xa spasob canal ta xa'i ti jech laabtej ta stojeluncutic yo' laj avic'uncutique. 16Scotol sc'ulejal jtotcutic ti pojbat yu'un ti Diose, ta melel ja' cu'untic xchi'uc ti calab jnich'nabtique. Ja' yu'un un, paso scotol jech c'u cha'al laj yalbot ti Diose.
Ti Jacobe ta xloc' batel ti ta Padán-arame
17Ja' yu'un un, ti Jacobe lic xchapan sba yo' jech ta sut batel ta Canaán bu nacal ti stote, ja' ti Isaaque. Laj scajanan muyel ta camello ti xnich'nabe, ti yajniltaque. 18Laj stsob scotol ti c'usi x'ayan yu'une. Laj stam batel sbe xchi'uc ti chon bolometic yu'un ti laj stoj ta abtel ta Padán-arame. 19C'alal ja' o loq'uem batel ta sloc'bel stsotsil xchij ti Labane, jech ti Raquele ja' o lic yelc'anbe sdiostac ti stote. 20Ja' jech c'ot ta pasel yu'un ti Jacobe ti laj slo'la ti arameo vinic Labane, ja' ti mu'yuc laj yalbe ta xloc' batele. 21Va'i un, mucul jatav loq'uel xchi'uc scotol ti c'usi oy yu'une. Ta ora no'ox laj xtuch' jelavel ti uc'um Eufratese. Jelavic batel c'alal to vitstic yu'un Galaad.
Ti Jacobe xbat lubiatuc ta be yu'un ti Labane
22Ta yoxibal xa ox c'ac'al un, ja' o laj ya'i ti Labane jatav xa loq'uel ti Jacobe. 23Ja' yu'un un, xvoletic no'ox batel xchi'uc yuts' yalal ta slubiel ta be. Ta yucubal to c'ac'al, laj staic ta lubiel ta vitstic yu'un Galaad. 24Ja' no'ox un, ti ta ac'ubaltique, laj yac' sba iluc ti Dios ta xvaich ti arameo vinic Labane, ti xi i'albate: “A'yio ava'i, mu me ta jajeteluc xac'opon ti Jacobe.”
25Va'i un, ti Labane c'ot sta ta lubiel ta be ti Jacobe ta vitstic yu'un Galaade, ti bu vololique. C'ot svol sbaic ec xchi'uc yuts' yalaltac ti Labane.
26Ja' yu'un un, xi c'ot svulilan ti Jacobe:
—¿C'usi laj apas? ¿C'u cha'al laj alo'laun? Avic'ojan talel ti cantsiquil nich'nabe jech c'u cha'al junuc jchuqueletic ti ic'bil ta xbatic yu'un ti j'ac'-letoe. 27¿C'u cha'al jatvil laloc' talel? Laj alo'laun. Mi ja'uc oy c'usi avalojbun comel. Ti lajuc avalbune, lec ta vob, ta arpa, ta música, ta tampol, xijmuyubaj ta jch'ac jbatic ti jechuque. 28Mi ja'uc laj avac' jc'oponan jbuts' talel ti jtsebtaque, ti jmamobtaque. Co'ol s'elan chuvajot, mu'yuc smelol ti c'usi laj apase. 29Xu' c'usi jpas ta atojol acotolic ti jechuque. Ja' no'ox le' une, ti ta ac'ubaltique, xi s'elan laj sc'oponun ti Dios yu'un ti atote: “A'yio ava'i, mu me xjajetuc xac'opon ti Jacobe.” 30Yu'un ti jech juteb ta avo'nton ta xasut ava'i ta yosil ti atote, jech o xal labat ono'ox ava'uc un. Ja' no'ox un, ¿c'u cha'al laj avelc'an talel ti jdiostaque?
31Ja' yu'un un, ti Jacobe xi laj stac'be ti Labane:
—Lijatav ta atojol yu'un lixi'. Laj jnop ti ta xatsatsal poj comel ti avantsiquil nich'nabe. 32Ti mi oy buch'u junucal cu'uncutic li' snac'oj ti adiostaque, ¡ac'o chamuc! Ti cuts' calaltique, xi s'elan xu' ta xcomic ta rexticoale: Ja' yu'un un, albun ca'i mi oy c'usi ja' avu'un ti quich'ojbot talele. Ich'o sutel.
Ja' no'ox un, ti Jacobe mu sna' ti ja' yelc'anoj talel diosetic ti Raquele.
33Jech ti Labane och batel bu spasoj yaxibalna ti Jacobe. Ts'acal to un, och batel bu oy ti Leae, xchi'uc xtoc bu oy ti chib me' mosoviletique. Ja' no'ox un, mu'yuc laj sta ti diosetique. C'alal loc' batel bu yaxibalna ti Leae, och batel bu oy ti Raquele. 34Va'i un, ti Raquele laj stsac ti diosetique. Laj snet'u lec ta smonturail camello. Choti ta sba. Ti Labane ech' yo'nton ta xchajel ta sa'el scotol ti bu oyique, mu'yuc laj sta. 35Ja' yu'un un, ti Raquele xi laj yale:
—Mu xa'ilin, tot, ti jech mu xitotse, yu'un yacal to ta xquil u.
Va'i un, c'alal mu'yuc laj sta ta sa'el sdiostac ti Labán ti ech' yo'nton xchajel ta sa'ele, 36jech ti Jacobe tsotsic xa ye xi xvulvun liquel ta stojol ti Labane:
—¿C'usi chopol laj jpas? ¿C'usi jmul ya'yel ti jech juteb xa ta avo'nton tal alubiun ta bee? 37Laj achaj ta sa'el scotol ti c'usi x'ayan cu'une. ¿Mi laj ata ti c'usi loq'uem talel ta yut anae? ¡Lamano talel li' ta sba ta sat ti avuts' avalaltaque, ta sba ta sat ti cuts' calaltaque, yo' jech xu' ta xalic buch'u stamojbe ti stuq'uil cu'untique! 38Ti jtob (20) jabil li'abtej ta atojole, mi ja'uc jcotuc laj syales yol ti achije, ti atentsune. Mi ja'uc jcotuc achij laj jti' oy ta acorral. 39Mu bac'niuc ti tey no'ox ta xlaj o c'op ti milbil xa ta jti'oval chon jcuchojbot talel ti chon bolom avu'une, yu'un ta ono'ox jtojbot ti bu ta xlaje. Yan mi oy bu ta xelc'anic ti achij ta c'ac'altic mi ta ac'ubaltique, laj no'ox avac'bun jtoj. 40Ti ta c'ac'altique, mu x'ech' ta xca'i ti c'oq'ue. Ti ta ac'ubaltique, mu x'ech' ta xca'i ti sique. ¡Jvic'oj jsat yu'un ti vayel ta j'ech'ele! 41Yu'un ti jtob (20) jabil ti li'abtej ta anae, xi s'elan laj jbain ta spasel: Ta sventa ti chib avantsil nich'one, li'abtej chanlajuneb (14) jabil. Yan ta sventa ti chon bolometic avu'une, li'abtej vaquib (6) jabil. Xlic xcaj laj ajelilanbun ti jtojole. 42Ti manchucuc xchi'inojun ti Dios yu'un ti Abrahame, ti Dios ti yich'oj ta muc' ti jtot Isaaque, ta melel, jmeyoj coc jc'ob laj atacun loq'uel. Ja' no'ox le' une, ti Diose laj yilbun ti jme'inale, ti c'u s'elan li'abtej ta atojole. Ja' yu'un un, ti ta ac'ubaltique, tsots laj svulot.
Ti Jacob xchi'uc ti Labane ta spasic jun trate
43Ja' yu'un un, ti Labane xi laj stac'be ti Jacobe:
—Ti chib tsebetique, ja' jtsebtac. Ti ololetique, ja' jmamobtac. Ti chijetique, ja' cu'un. ¡Scotol ti c'u yepal ta xavil li'e, ja' cu'un! Ac'o mi jech un, ¿c'usi xa xu' ta jpas ta stojol ti jtsebtac tana une xchi'uc ta stojol yalabic laj yilique? 44Jech o xal un, la' li'e, jpastic jun jtratetic ta xtun yo' ta xac' ta na'el ti c'u s'elan xquil jbatique.
45Jech ti Jacobe laj stam jbej ton, laj sva'an jech c'u cha'al junuc oy. 46Xi laj yalbe xtoc ti yuts' yalaltaque:
—¡Tsobic talel tonetic!
Scotolic laj stsobic ti tone, laj svolanic lec. Ti bu busul ti tone, tey ive'ic. 47Ti bu taje, “Jegar Sahadutá”, xi laj yac'be sbi ta sc'op stuc ti Labane. Yan ti Jacobe laj yac'be sbi “Galaad”.#Ti sbi Jegar Sahadutae, xchi'uc ti sbi Galaade, “buslej trato”, xi ta xal smelol ti ta arameo c'ope, xchi'uc ti ta hebreo c'ope.
48Ja' yu'un un, ti Labane xi laj yale:
—Ti jbus ton li' tanae, ja' ta xc'ot ta rextico cu'untic.
Jech o xal ti bu taje, laj sbiin Galaad. 49Ja' jech xtoc laj sbiin Mizpa,#Ti sbi Mizpae, “ti yavil yac'obil satile”, xi ta xal smelol ti ta hebreo c'ope. yu'un xi laj yal ti Labane:
—Ti jchibaltic li'e, Dios ac'o yac' talel sat ta jtojoltic ti slajeb li' ta xquilbe jba ti jsatique. 50Ja' yu'un un, mi ta xlic avutilan ti jtsebtaque, mi ta xlic asa' yan avajnil c'alal oy ta atojol ti jtsebtaque, ac'o mi mu'yuc rextico cu'untic, yu'un ja' ta xc'ot ta rextico cu'untic stuc ti Diose.
51Va'i un, ti Labane xi to lic yalolanbe ti Jacobe:
—A'yio ava'i, ti jbus ton li'e, xchi'uc ti jbej va'al ta o'lol cu'untique, 52le' une, ja' me cajrexticotic ta svules ta joltic yo' jech mu xquilbajin jbatique. Laj sc'oplal xu' ta xijelavotic bu ti jts'actic ta jujun tale. 53Ac'o xijyich'otic ta venta stuc ti Dios yu'un ti amuc'tot Abrahame xchi'uc ti dios yu'un ti jmuc'tot Nacore.
Jech ti Jacobe laj yal ta jamal ta sba ta sat Dios ti yich'oj ta muc' ti Isaac ti ja' stote. 54Ts'acal to un, ti Jacobe laj smil matanal ta vits. Laj yic' ta ve'el ti yuts' yalaltaque. Scotolic ve'ic, ech' yu'unic ti ac'ubal ta vitse.
55C'alal sacub xa talel ti osil ta yoc'omale, lic ti Labane yo' ta sc'oponan comel ti stsebtaque, ti ta sbuts' comel ti smamobtaque. Ts'acal to un, c'alal laj yalbe ti tsotsicuc comele, sut batel ta slumal.
Currently Selected:
Génesis 31: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
