Génesis 29

Ti Jacobe c'ot ta Harán

1Ti Jacobe laj stam batel sbe, bat ta banomil ti oy ta sloq'ueb c'ac'ale.

2Ti ta osiltique, laj yil oy jun joc' ti lamal ta xcux yo'ntonic oxch'ac chijetic ta sts'ele. Ta xtal yuch'ic vo' ti chon bolometic bu taje. Macal ta jun muc' ta pech-pech ton ti sti'e. 3Yu'un c'alal ta stsob sba talel scotol ti chijetic teye, jech ti jq'uel-chijetique ta sloq'uesic ti ton smacoj ti joq'ue yo' jech ta xac'beic yuch' vo' ti xchijique. Mi laj une, ta smaquic comel lec sti' ti joq'ue 4Ti Jacobe xi laj sjac'be ti jq'uel-chijetique:

—¿Bu liquemoxuc talel, jchi'iltac?

—Liquemuncutic talel ta Harán —xiic.

5Xi laj xcha'jac' ti Jacobe:

—¿Mi xavojtiquinic ti Labane, xnich'on ti Nacore?

—Xcojtiquincutic —xiic.

6Xi lic sjac'olan ti Jacobe:

—¿Mi jech to oyic xana'?

Xi laj staq'uic ti jq'uel-chijetique:

—Lec oy ma' ti Labane. Q'uelo avil, le' xtal xchi'uc xchij ti Raquel ti ja' yantsil nich'one.

7Va'i un, ti Jacobe xi laj yale:

—Toyol to c'ac'al. Sob to mi ta xich' xa lapel ti chijetique. ¿C'u cha'al mu xavac'beic xch'a vo' yuch' yo' jech xu' to chba avaq'uic ve'uc?

8Ti stuquique xi laj staq'uique:

—Mu to stac'. Yo' xu' ta xcac'becutic vo' yuch' ti chijetique, yu'un ba'yel ta stsob sba talel scotol ti chijetique yo' jech scotolic ta sloq'uesbeic smac joc' ti jq'uel-chijetique.

9C'alal jech yacal ta xlo'ilajique, ja' o vul xchi'uc xchijtac stot ti Raquele, yu'un ja' jq'uel-chij. 10Va'i un, ti Jacob c'alal laj yil ti chijetic yu'un ti Labán ti ja' sjuntote, jech ti stuque, ta ora no'ox bat sloq'ues ti ton smacoj ti joq'ue. Lic yac'be yuch' vo' ti chijetique. 11Laj un, buts' xut xch'a ti c'alal bat xchi'in ta lo'ile, x'oc'olet xa liquel. 12C'alal laj xchap lec ti ja' squerem ol Rebeca ti Jacobe, ti ja' sjun nich'on ti Labane, jech ti Raquele bat ta anil, ba yalbe ya'i ti stote.

13Ti c'alal laj ya'i Labán sc'oplal ti Jacobe, squerem ol ti xchi'il ta voq'uele, loc' batel ta anil. Bat snup talel ta be. Laj smey. Sbuts' xch'a c'otel lic xchi'in ta lo'il, laj yic' batel ta sna. Laj taj une, ti Jacobe lic xchap scotol ti c'usi c'ot ta pasele. 14Va'i un, ti Labane xi lic yale: “Ta melel ti vo'ote, jun ti jch'ich'eltique.”

Ti Jacobe ta stoj ta abtel ti Raquele xchi'uc ti Leae

Jech ti Jacobe, jun u com ta stojol ti Labane. 15C'alal ech' va'i sjalile, ja' yu'un un, ti Labane xi laj yale:

—Ac'o mi solel cuts' calal jbatic unbi, mu xloc' venta ti ch'abal jutebuc ta xapas canal ti jech ta xa'abtej cu'une. Ja' lec albun ca'i c'u yepal ta xac'an ti atojol cac'tique.

16Va'i un, ti Labane xi s'elan oy chib yantsil nich'on: Ti vixile, Lea ti sbie. Yan ti muquile, Raquel ti sbie. 17Yu'un ti Leae, jelel jutuc yutsil ti sbec' sate. Ja'uc ti Raquele, c'upil sba sat yelov ta sjunul ti spat xocone. 18Jech ti Jacobe, ic'bil c'ot yo'nton yu'un ti Raquele. Jech o xal xi laj staq'ue:

—Ta sventa ti amuquil tseb Raquele, ta xi'abtej vucub jabil ta atojol —xi.

19Va'i un, ti Labane xi laj staq'ue:

—Ja' lec vo'ot ta xcac'bot. Altic mi ta xic' yan. Coman li' ta jtojole.

20Ja' yu'un un, ti Jacobe abtej vucub jabil ta sventa ti Raquele. Ti stuque mu jaluc laj ya'i, yu'un juteb ta yo'nton. 21C'alal laj sta ti vucub jabile, ti Jacobe xi laj yalbe ya'i ti Labane:

—Ac'bun ti cajnile, yu'un ta xquic' xa jbacutic. Yu'un ts'aqui xa ti sc'ac'alil c'u sjalil cac'oj que ta xi'abtej ta sventae.

22Ja' yu'un un, ti Labane laj stsob talel ti yuts' yalaltaque yo' jech ta sq'uelic ti lecomajel ta xich' pasele. 23Ja'uc ta ac'ubaltic une, ja' laj yac' ti Leae. Jech ti Jacobe vay xchi'uc. 24Ja' jech xtoc ti Labane laj yac'be jun smosov ti Leae, ti Zilpa sbie yo' jech ta xc'ot ta yajtunel. 25C'alal sacub ta yoc'omale, jech ti Jacobe laj yojtiquin ja' vay xchi'uc ti Leae. Jech o xal un, xi bat svul ti Labane:

—¿C'u cha'al jech laj apasbun? ¿C'u cha'al laj alo'laun? ¿Mi mu ja'uc li'abtej avu'un ta sventa ti Raquele?

26Va'i un, ti Labane xi laj staq'ue:

—Ti li'e, mu jechuc jtalelcutic ba'yel ta xmalij ti muquile. 27Li'e, c'otuc xch'a ta pasel avu'un xemunail ti lecomajel xchi'uc ti Leae. Va'i un, mi laj une, ta xlic cac'bot ti Raquele mi ta xavac' ave ati' ta xa'abtej yan vucub jabil ta jtojole.

28Jech ti Jacobe, toj c'otel ta yo'nton. C'alal tsuts yu'un xemunail ti lecomajel xchi'uc ti Leae, jech ti Labane laj yac'be yic' ti Raquele. 29Va'i un, ti Labane laj yac'be jun smosov ti Raquel ti Bilha sbie yo' jech ta xtun yu'un. 30Ti Jacobe laj yic' sbaic xchi'uc ti Raquele. Ic'bat yo'nton ta j'ech'el, ja' peq'uel c'ot sc'oplal yu'un ti Leae. Mu'yuc xa ta alel yu'un mi ta to x'aq'ue abtejuc vucub jabil yu'un ti Labane.

Xnich'nabtac ti Jacobe

31C'alal laj yil Dios bajbil ti Lea yu'un ti Jacobe, laj spas ta stojol ti ac'o ayanuc ti yalabe. Yan ti Raquele c'ot yu'un ta jun machero ants. 32Ja'uc ti Leae lic xchi'in yol. Ayan jun squerem, Rubén#Ti biil Rubene, “at o'nton laj yilun”, xi ta xal smelol ti ta hebreo c'ope. laj yac'be sbi, yu'un xi laj yale: “Ti Diose laj yil ti oyun ta vul-o'ntone. Jech o xal avi tana li' une, yal to jc'uxubinel yu'un ti jmalale.”

33Ts'acal to ti Leae ayan yan squerem, Simeón#Ti biil Simeone, “laj yilun”, xi ta xal smelol ti ta hebreo c'ope. laj yac'be sbi, yu'un xi laj yale: “Ti Diose laj yil ti bajbilune. Jech o xal laj yac'bun jun jquerem xtoc.”

34Laj to no'ox yil jun squerem xtoc, Leví#Ti biil Levie, “mu tuch'baj ta o'ntonal”, xi ta xal smelol ti ta hebreo c'ope. laj yac'be sbie, yu'un xi laj yale: “Avi tana li' une, mu xa xt'ol liquel ta jtojol ti jmalale, yu'un oy xa oxib squerem cu'un.”

35Ti Lea xtoque laj to yil jun squerem, Judá#Ti biil Judae, “lequil-c'optael”, xi ta xal smelol ti ta hebreo c'ope. laj yac'be sbi, yu'un xi laj yale: “Avi tana li'e, ta jlequil-c'opta ti Diose.” Laj ti va'i yepal taj une, paj xi ta alajel yu'un.

Currently Selected:

Génesis 29: TZC00

Highlight

Copy