Génesis 12

Ta xc'oponat tal yu'un Dios ti Abrame

1Oy jun c'ac'al, xi albat yu'un Dios ti Abrame: “Ictao comel ti avosil abanomile, ti avuts' avalaltaque, xchi'uc sna ti atote yo' jech ta xabat ta banomil ti bu ta xcac'bot avile.#Hch 7.2-3; Heb 11.8. 2Yu'un ta sventa ti anitilultaque, ta xlic c'oticuc cu'un ta jun muc' ta lum. Ta jts'uiltasot yo' jech ich'bilot ta muc' ta xac'ot, ja' sliqueb c'uxubinel ta xac'ot yu'unic ta sventa ti yane. 3Ti buch'utic lec ti c'usitic oy ta ye ta sti'ic ta atojole, naca c'uxubinel oy ta que ta jti' ta stojolic ec. Yan ti buch'utic naca chopol ti c'usitic oy ta ye ta sti'ic ta atojole, oy ta que ta jti' ti chopol sc'oplalic cu'un eque. Yu'un ja' ta aventa ta staic c'uxubinel ti lec que jti' ta stojol ta jujuchop scotol ti jnaclejetic ta banomile.”#Hch 3.25; Gá 3.8.

4Jech ti Abrame loc' batel ta Harán jech c'u cha'al albat yu'un ti Diose. Ti c'alal jech loc' batele, yich'oj xa ox vo'lajuneb xchanvinic (75) jabil yo' jech ta xbat nacluc ta Canaán banomil. 5Va'i un, laj yic' batel ti Sarai ti ja' yajnile, xchi'uc ti Lot ti ja' sjun-nich'one, xchi'uc scotol ti c'usi x'ayan yu'une, xchi'uc ti svinictac ti laj sta ta Harane yo' ta xc'otic ta Canaán banomil. 6Jech ti Abrame ech' xani jelavel c'u sjamlej ti banomile, ja' to ti c'uxi c'ot ta Siquem bu oy ti ch'ul tulan yu'un ti Moree. Yu'un ja' nacalic ti cananeoetic ta banomil taje. 7Ti bu taje, laj yac' sba iluc ti Diose, ti xi laj yale: “Ti banomil li'e, ja' ta xcac'be yich' ti anitilultaque.”#Hch 7.5; Gá 3.16.

Va'i un, ti Abrame laj sva'an jun altar ta sventa yich'obil ta muc' ti Diose, yu'un laj yac' sba iluc ta stojol. 8Ts'acal to un, bat ta muc'tiquil vitstic ti oy ta yeloval sloq'ueb c'ac'al yu'un ti jteclum Betele. Ti bu taje, laj sva'an ti yaxibalnae. Ti Betele, ta smaleb c'ac'al oy bu laj sva'an ti yaxibalnae. Yan ti jteclum Haie, ta stuq'uil sloq'ueb c'ac'al oy yu'un. Ti bu taje, ti Abrame lic sva'an jun altar yan velta. Laj sta ta na'el ti Diose. 9Ts'acal to un, laj stam batel sbe ta c'un-c'un ta yosilal Néguev.

Ti Abrame bat ta Egipto

10Ti ta banomil taje, lic ayanuc muc' ta vi'nal. Jech o xal ti Abrame bat nacluc ta Egipto c'uc sjaliluc, yu'un ch'abal xa c'usi ta sta ta lajesel ti bu nacale. 11C'alal ta xa xc'otic ta Egiptoe, ti Abrame xi laj yalbe ti Sarai ti ja' yajnile: “A'yio ava'i ti jc'ope, yu'un jna' lec ti c'upil sba antsote. 12C'alal ta xilot ti egipcioetique, xi ta xalique: ‘Ti ants le'e, ja' yajnil ti vinique.’ Va'i unbi, ta xismilic. Ja'uc ti vo'ote, mu xasmilic yu'un ta xayiq'uic. 13Ja' yu'un un, yo' lec ta xc'ot ta jtojol, yo' mu xismilicun ta acoje, avocoluc, alo ti jchi'il jbatic no'ox ta voq'uele.”#Gn 20.2; 26.7.

14C'alal c'ot ta Egipto ti Abrame, jech ti egipcioetique, toj c'upil sba laj yilic ti Saraie. 15C'alal yilic ec yaj'abteltac ti faraón ajvalil yu'un ti Egiptoe, bat yalbeic ya'i ti c'upil sba ti ants taje. Va'i un, laj yiq'uic batel ta sna ti faraone.

16Ti jech c'upil sba ti Saraie, jech o xal ti faraone lec laj xc'uxubin ti Abrame. Laj sq'uelanbe chijetic, vacaxetic, mosovil viniquetic antsetic, burroetic, xchi'uc camelloetic. 17C'u stu un, ti faraone xchi'uc ti c'u yepal oy ta snae, busanbatic talel chopol vocol ta stojolic yu'un Dios ta scoj ti Saraie. 18Jech o xal ti faraone laj stac ta iq'uel ti Abrame, ti xi laj yalbee: “¿C'u cha'al jech laj apasbun? ¿C'u cha'al mu laj avalbun ca'i ja' avajnil ti ants li'e? 19Yu'un laj aval ti ja' achi'il ta voq'uele. Ti vu'une laj quic' yo' ta xcajnilan. Li' oye, batan, ic'o batel.” 20Ja' yu'un un, ti faraone laj yalbe ya'i ti svinictaque ac'o loc'uc batel yu'unic ta Egipto xchi'uc ti yajnile, xchi'uc c'usi x'ayan yu'un ti Abrame.

Currently Selected:

Génesis 12: TZC00

Highlight

Copy