Ester 3
3
Sc'oplal ti Mardoqueo yu'un ti Amane
1Ech' c'uc sjaliluc un, ti ajvalil Asueroe lic yac'be yich' cajal yabtel ti Amán xnich'on ti Hamedatae, snitilul ti Agage, ti c'ot ta banquilal yu'un scotol yaj'abteltac ti ajvalile. 2Scotol ti jtuneletic yu'un ti ajvalil ti oy ta snae, ta snijan squejan sbaic ta stojol ti Amán c'alal ta x'ech'ic ta sts'elique, mi ta xc'otic ta stojolique, yu'un ja' jech yaloj mantal ti ajvalile. Ti Mardoqueoe mu jechuc laj spas.
3Va'i un, yaj'opisialtac ti ajvalile, laj sjac'beic ti Mardoqueoe c'u cha'al mu xc'ot ta pasel yu'un smantal ti ajvalile. 4Jun sc'opic xjac'lajetic xchi'uquic jujun c'ac'al. Co'ol s'elan ma'uc no'ox ta x'albate. Va'i un, bat xchapbeic ya'i ti Amane yo' jech ta xvinaj mi staoj yav jech ta staq'uilan ti Mardoqueoe, yu'un yaloj xa ti ja' jun judio vinique. 5C'alal laj yil ti Amán ti mu'yuc ta snijan squejan sba ta stojol c'alal ta x'ech'e, soquet xa sjol xchi'uc. 6Ti albil xa ya'i bu liquem talel sts'unubal ti Mardoqueoe, laj snop ti mu xloc' venta mi ja' no'ox ta xilbeic svocol ti stuque. Lic sa'olanic smelol c'uxi ta tubbel sc'oplal ti judíoetic ti nacalic bu c'alal smacoj ti Asueroe.
Smantalil c'u s'elan ta tubbel sc'oplal ti judioetique
7Ta sba u yu'un ti jabile, ti u sbiinoj Nisane, ti ja' xlajchebal (12) xa jabil stic'lej ta ajvalil ti Asueroe, lic sq'uelic yorail,#Est 9.24-26. ta stojol Amán, ta sventa yo' jech ta sna'ic c'usi c'ac'alil, c'usi ual ta xc'ot ta pasel yu'unic ti c'usi nopbile. Vinaj ti ta xc'ot ta yoxlajunebal (13) c'ac'al yu'un xlajchebal (12) ue, ta yual ti sbiinoj Adare. 8Va'i un, ti Amane xi laj yalbe ti ajvalil Asueroe:
—Ta scotol ti jteclumetic c'u yepal smacoj ti Jcuch abtele, oy jun mu jechuc ta spas jech c'u cha'al ta spas ti yane. Yan o ti mantaletic oy yu'une. Mu xco'olaj xchi'uc jech c'u cha'al ti yan jteclumetique. Mu xich' ta muc' c'u s'elan yaloj mantal ti Jcuch abtele. Ch'ayel xal o ti q'uelbil no'ox nacalic ti jteclum bu c'alal smacoj ti Jcuch abtele. 9Le' une, mi lec ta xa'i ti Jcuch abtele, pucuc batel mantal ta yalel ti yich'icuc tsutsesel ta j'ech'ele. Ta xcac' ec lajuneb yuclajunvinic ta mil (330,000) kilo plata ta yoc ta sc'ob ti buch'utic sbainojic ta sq'uelel ti sq'uejleb taq'uin yu'un ti ajvalile.
10Va'i ti ajvalile laj snit loq'uel ti yixtolal sc'obe. Laj yac'be ti Amán ti yajcontra ti judioetique, 11ti xi laj yalbee:
—Mu tsotsuc sc'oplal ta xavac' ti platae. Paso ta stojol ti jteclum taje, ti c'usi lec ta xava'ie.
12Ta yoxlajunebal (13) sc'ac'alil ti sliqueb u yu'un ti jabile, laj yich'ic tael ta iq'uel ti jts'ibajometic yu'un ti ajvalile. Lic sts'ibaic ti mantaletic laj yal ti Amane yo' jech ta staquic batel ta stojol ti ajvaliletique, ti jujuchop ti sc'opic ti buyuc no'ox nacalique, xchi'uc ta stojolic ajvaliletic yu'un ti jujun muc'tic lume. Ti mantaletic taje, laj yich' ts'ibael ta jpoc vun ti ta xlo'ilaj ta sc'op stuquic ti jujuchop bu oyique, xchi'uc ti jteclume, ti yac'oj spirma ta sventa ti ajvalil Asueroe, ti yich'oj seyo ta sventa seyo ti ajvalile. 13Ta ora no'ox, laj staquic batel ta sventa ti j'ac'-vunetic ta stojol scotol ti bu c'alal ich'bilic ta ventae. Ti vun taje ta xal ti ta jun no'ox c'ac'ale, ac'o yich' tsutsesel ta j'ech'el scotol ti judioetique, mu'yuc ta alel mi querem to, mi molic xa, mi ololetic, mi antsetic. Ac'o yu'ninbeic scotol ti c'usitic oy yu'unique. Ti sc'ac'alil ti chapanbil taje, ja' ta yoxlajunebal (13) c'ac'al yu'un ti slajchebal (12) ue, ja' ti u ti sbiinoj Adare. 14Ti xcha'pocal vun yu'un ti mantal taje, co'ol s'elan c'ot yu'unic ti oy c'usi tsots sc'oplal albile, yo' jech ta x'ac'bat sna'ic scotol ti buyuc no'ox oyique, xchi'uc ti jteclumetique, yo' jech chapalicuc xa ti jech c'ac'al taje. 15Jech ti j'ac'-vunetique loq'uic batel ta spuquel ta sventa smantal ti ajvalile. Ti ts'ibabil mantal taje, lic ta steclumal Susa. Yan ti ajvalile xchi'uc ti Amane, jun yo'nton chotol ta x'uch'obajic. Ja'uc ti jnaclejetic ta Susae mu stac' a'yeluc ta xa'iic yu'un ti va'i s'elan taje.
Currently Selected:
Ester 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000