Efesios 4
4
Ta sventa ti Ch'ul Espíritue lijc'ot ta jun
1Ja' yu'un un, ti vu'un tiq'uilun ta chuquel ta sventa ti Cajvaltique, ta jc'anboxuc vocol ta atojolic, ti tuc'ulano abaic jech c'u cha'al laj snop ac'oplalic ti Dios c'alal laj staoxuc ta iq'uele. 2Nijetan chimetanic no'ox. Oyuc slequilal avo'ntonic. Oyuc smuc'ul syail xc'uxul avo'ntonic ta sts'icbel abaic ta jujun tal.#Col 3.12-13. 3Ti jech lamajem ti o'ntonale, ti mu'yuc c'usi jna'tic jcotoltique, ja' ac'beic yipal ta spasel ta sventa ti Ch'ul Espíritue yo' mu xyanij ti jol o'ntonale. 4Yu'un jun xa oyoxuc ta stojol ti Cristoe. Jun no'ox ti Ch'ul Espíritu avich'ojique, jech c'u cha'al jun no'ox ti spatobil avo'ntonic la'ac'batic ti c'alal laj staoxuc ta iq'uel ti Diose. 5Mu'yuc xa yan, jun no'ox ti Cajvaltique, jun no'ox ti Buch'u c'otem ta avo'ntonic ta xch'unele, jun no'ox ti ich'ob vo'e. 6Yu'un jun no'ox ti Diose, ti ja' Totil cu'untic jcotoltique, sbainojotic jcotoltic, oy ta jtojol jcotoltic.
7Ja'uc le'e, jeltos ti jbijiltic ti c'u s'elan ac'bilotic ta jujun tal jech c'u cha'al laj sc'an stuc ti Cristoe. 8Jech o xal un, ti ch'ul c'ope xi ta xale:
“C'alal muy batel ta vinajele, yic'ojan batel ti jchuqueletique
xchi'uc laj yac'be sbijil ti jnaclejetique.”#Sal 68.18.
9¿C'usi xa ono'ox smelol ta xal ti “muy batele”? Ja' ta xac' ta na'el ti ba'yel yal talel li' ta banomile. 10Ti Buch'u yal talel ta banomile, ja' ono'ox ti Buch'u muy batel ta vinajel ti bu slajeb toyol oye, yu'un laj yich' ta venta scotol. 11Jel tos laj yac'anbe sbijil ta jujun tal. Yu'un oy jlom laj yac'be sbijil yo' jech ta x'och ta jcholc'op. Oy jlom laj yac'be sbijil ta yalel ti c'usi ta x'ac'bat sna'ic yu'un ti Diose. Oy jlom laj yac'be sbijil ta yalel ti lequil ach' c'ope. Oy jlom laj yac'be sbijil yo' ta x'och ta sbainel jch'unolajeletic xchi'uc jchanubtasvanejetic. 12Ja' jech laj yac'be sbijil ti yu'untaque yo' jech ta xtunic ta sventa ti yabtele, xchi'uc yo' ta x'ayan yipic ti jch'unolajeletic ti c'otemic ta sbec'tal stacopal ti Cristoe. 13Ti ja' jech taj une, yo' jech jcotoltic ta jtatic ti jmoj ta xc'ot ta co'ntontic ta xch'unele, xchi'uc ta yojtiquinel Xnich'on ti Diose, yo' ta xc'ot ta pasel ta xlic jamuc ti jba jsatique, ja' to mi laj jtatic jech c'u cha'al ti Cristoe. 14Ja' yu'un un, mu xa co'oluc j'elantic jech c'u cha'al ololetic ti xtal xbat ti snopobil yu'une, ti jochbil no'ox ta xch'unel ti oy c'usi ach' ta xchanubtasat yu'un ti jlo'lavanejetic ti ja' no'ox ta sc'an ta x'ic'van batel ta sbelal ch'ayele. 15Ja' ta sc'an ti oyuc syail xc'uxul o'ntonal ta yalel ti c'usi ja' melele, ti tsotsuc sc'oplal jmojuc ch'icutic batel ta stojol ti Cristoe, yu'un ja' c'otem ta jolil cu'untic. 16Ta sventa ti Cristoe, ti jujunotique jmoj ta jvol jbatic jcotoltic ta sventa jun ti jol o'ntonale, mu sjip sten sbaic c'alal lec ti c'usi ta spasic ta jujun tale, scotolic ta stsac yipic, ta stsatsubic ta sventa ti oy syail xc'uxul o'ntonale.#Col 2.19.
Ti ach' cuxlejal ta stojol ti Cristoe
17Jech un cha'e, xi s'elan ta xcalboxuc ava'iic ta sc'ubanbeloxuc ta stojol ti Diose: Lajuc sc'oplal avu'unic ta spasel jech c'u cha'al ta spasic ti buch'utic yan yajvalique, ti ja' no'ox cuxulic ta spasel ti c'usi mu'yuc smelol ta snopique. 18Yu'un ti stuquique, soquem ti snopbenal yu'unique, mu'yuc xcuxlejal Dios ta stojolic, pochan xa'i sba ta scoj ti yijuneb ti yo'ntonique. 19Laj to sc'oplal ma' ti xa'iic q'uexlale, yu'un yac'ojbeic yipal ta spasel ti c'usi lec ta xa'iique, ti xtal no'ox ta sjolic ta spasic ti c'usi mu'yuc smelole.#Ro 1.21-25. 20Ti c'alal laj ava'ibeic sc'oplal ti Cristoe, ma'uc jech lachanubtasatic ti vo'oxuque. 21Ti vo'oxuque laj ava'ibeic ti sc'opojele, laj achanic ta stojol c'usi smelol ti bu ja' melele. 22Jech o xal un, tsots sc'oplal jipic tenic comel ti c'u s'elan ti lacuxiic talel ta vo'nee,#Col 3.9. ti soquem ta j'ech'ele, ti naca lo'labiloxuc yu'un ti sc'upijel o'ntonale. 23Ja' lec, ach'ubuc ti acuxlejalique, ti snopbenal avu'unique. 24C'u'inic ti ach' cuxlejale#Col 3.10. jech c'u cha'al oy ta yo'nton ti Diose,#Gn 1.26. ti oy stuq'uile, ti co'ol xchi'uc ti bu ja' melele.
25Ja' yu'un un cha'e, lajuc sc'oplal avu'unic ta sjutilanel ti c'ope. Ta jujun tal, alanbo abaic ti bu ja' melele,#Zac 8.16. yu'un jcotoltic junotic ta stojol ti Cristoe.#Ro 12.5.
26Ma'ucuc me xata o amul yu'un mi oy bu la'ilinique.#Sal 4.4; Stg 1.19-20. Ma'ucuc me ti sjunul c'ac'al xa'ilete. 27Mu me xavac'beic yavil jutebuc ti pucuj ta atojolique.
28Ti buch'u ch-elc'aje, ac'o yicta ti eleq'ue, ac'o abtejuc yo' jech ta yabtel stuc xu' ta scolta ti buch'utic abol sbaique.
29Ictaic ta yalel ti chopol c'opetique. Ti c'usi ta xloc' ta aveique, lecuc ta a'yiel yo' jech ta stsatsubic, ta staic lequilal ti buch'utic ta xa'iic ti ac'opique. 30Mu xavaq'uic ta at o'nton Xch'ul Espíritu ti Diose, yu'un ja' aselloalic svinajeb ti c'otemoxuc xa ta yu'un ti Diose, ti ta ono'ox xacolic c'alal mi sta ti sc'ac'alile.
31Lajuc sc'oplal ta atojolic ti soquet ta xava'iique, ti sbic'tal avo'ntonique, ti xajajetic no'ox ta ile, ti xti'et no'ox ajolique, xchi'uc scotol ti c'usi chopole. 32Oyuc slequilal avo'ntonic ti c'uxuc xava'i abaique. Ch'aybo aba amulic ta jujun tal jech c'u cha'al laj xch'ayboxuc amulic ti Dios ta sventa ti Jesucristoe.#Col 3.13.
Currently Selected:
Efesios 4: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000