1 Timoteo 6

1Ti mosoviletique, ac'o me yich'ic ta muc' ti yajvalique yo' jech mu xich' chopol c'optael ti Diose xchi'uc ti c'usi ta xichanubtasvancutique. 2Mi oy buch'u ja' jch'unolajel ti yajvalique, ma'ucuc xalic ta yo'ntonic ti ja' yamal xa sc'oplal ta xich'ic ta muc' ti jech co'ol jch'unolajeletique. Ja'uc le'e, x'ech'uc to ac'o yac' sbaic ta tunel ta stojol, yu'un ti bu yac'oj sbaic ta tunele, ja' jun jch'unolajel ti c'uxubinbile. Ti va'i s'elan taje, ja' jech xaval, ja' jech xachanubtasvan.

Ti bats'i c'ulejal ta j'ech'ele

3Mi oy buch'u yan o ti c'u s'elan ta xchanubtasvane, ti mu xco'olaj xchi'uc ti c'u s'elan jun yutsil chanubtasvan ti Cajvaltic Jesucristoe, ti mu xco'olaj xchi'uc ti c'u s'elan jch'unojtique, 4ja' jun toyobba, mu'yuc c'usi sna' ta j'ech'el. Yu'un naca xchamel jolal ta xac' mi xavulvun xchi'uque, ti ja' ta scoj ta xlic ti it'ixal o'ntonale, ti mu jmojuc ti snopbenale, ti naca tsalvanej ta c'ope, ti mu junuc o'ntonale. 5Yu'un co'ol s'elanic jech c'u cha'al ti buch'utic mu xojtiquinic ti bu ja' melele, ti soquem no'ox sjolique, ti naca letovajel sna'ic ti mu'yuc spajebe, xchi'uc ti c'otem lec ta yo'ntonic ti naca c'ulejal ta xac' comel sc'oplal ti c'usi jch'unojtique. 6Melel un, ti c'usi jch'unojtique, ja' taob muc'ul c'ulejal ta j'ech'el, ja'uc le'e, ja' no'ox ti buch'u jun yo'nton xchi'uc ti c'usi x'ayan yu'une. 7Yu'un mu'yuc ono'ox c'usi quich'ojtic talel c'alal lijvoc'otique, laj to c'op ma' ti oy c'usi ta xquich'tic batel mi lijchame.#Job 1.21; Sal 49.17; Ec 5.15. 8Mi oy ti jve'el cuch'omtique, mi oy ti jc'u'tique, lec xa oy unbi, muyubajcutic yu'un. 9Ja'uc ti buch'u ta spas sba ya'i ta jc'uleje, ta xyaque ta pets' ti mu cha'bel stsal yu'un ti ic'bil chechbil yu'un ti sc'upijel yo'nton ta soquesel sba xchi'uque, ja' scoj ti ta xch'ayic ta be ti viniquetic ti ch'ayel sq'uelojic batele. 10Ti sc'upijel o'ntonal yu'un ti taq'uine, ja' me'mulil ta scotol.#Heb 13.5. Yu'un oy jlom laj xa xrioxinic ti taq'uine. Jech o xal laj xa yicta sbaic ta xch'unel ti Cajvaltique, ti yepal no'ox ti svocolic ti li' cuxulic ta banomile.

Ac'bo yipal ta xch'unel lec ti Cajvaltique

11Ti vo'ot yajtunelot ti Diose, q'uejo me aba ta stojol scotol taje. Oyuc yutsil stuq'uil ti c'usi ta xapase. Ja' paso ti c'usi ta sc'an ti Diose, ti c'otemuc o ta avo'nton ta xch'unel ti Cajvaltique, ti oyuc syail xc'uxul avo'ntone. ti oyuc yipal avu'unic c'alal oy ti vocole, ti biq'uit avac'oj abae. 12Ac'bo yipal ta xch'unel ti Cajvaltique. Mu nacauc no'ox laj ava'ibe sc'oplal ti cuxlejal sbatel osil ti c'otem ta aventae. Yu'un ja' ta sventa laj staot ta iq'uel ti Diose, ti jamal laj aval ta sba ta sat rexticoetic ti c'otem ta avo'nton ta xch'unel ti Cajvaltique. 13Avi tana une, ta sba ta sat ti Dios ti ja' yac'ojbe xcuxlejal scotol ti c'usitic oye, ta sba ta sat ti Cajvaltic Jesucristo ti jamal laj yal sba ta stojol ti Poncio Pilatoe,#Jn 18.37. 14ta jpasot ta mantal ti c'otuc me ta pasel avu'un ti va'i s'elan laj calbote, ti mu xayanijes abae yo' lec ti ac'oplale, ti jechuc yacalucot ta spasel ti c'u sjalil mu'yuc ta xvul ta loq'uel ti Cajvaltic Jesucristoe. 15Ti ja' no'ox stuc Dios ti tsots xu' yu'une, ti jelavem yutsile, ti ja' Ajvalil yu'un ti ajvaliletique, ti ja' Jpas-mantal yu'un ti jpas-mantaletique, snopoj xa ti oy bu ta sta sc'ac'alil ta stac talel ti Jesucristoe. 16Yu'un stalel o ti jech stalel o cuxule, ti xojobin no'ox ti bu oye, ti mu'yuc buch'u xu' ta xnopaj ech'el ti bu oye.#Sal 104.2. Mi ja'uc jun vinic yiloj ti Diose, mi ja'uc xu' sq'uel xtoc. Yu'un sbatel osil c'otem ta sventa ti ich'biluc ta muc' xchi'uc ti smuc'ul stsatsale. Jechuc.

17Ti buch'utic oy sc'ulejalic li' ta sba banomile, albo ya'iic ti mu stoy sbaic xchi'uque, ti ma'ucuc spat yo'ntonic xchi'uc ti sc'ulejalique, yu'un ti c'ulejale, ta jech yepal xu' ta xlaj sc'oplal. Ac'o spat yo'ntonic ta stojol ti Dios ti stalel cuxule, ti oy ta yoc ta sc'ob ta yac'belotic scotol ti c'usi ta xtun cu'untique yo' lec oyotic. 18Albo ya'iic mantal ti ac'o spasic ti c'usi leque yo' jech ta xc'otic ta jc'ulej ta sventa ti lequil abtel ta spasique, ti ta slequilaluc yo'ntonic ac'o coltavanicuc xchi'uc ti c'usi oy x'ayan yu'unique. 19Mi jech ta spasic taje, ta xlic ya'i ta yo'ntonic ti oy xa sc'ulejalic scaj-tsobojic ta xtun yu'unic liquel lec batele, xchi'uc ta staic ti cuxlejal ja' sventa sbatel osile.

Slajeb mantal c'ubanbat ti Timoteoe

20Timoteo, tuc'ulano, chabio lec ti avabtel la'ac'bat abaine. Mu xats'etan ani' achiquin ta ya'yiel jeche' c'opetic ti mu'yuc yipe. Mi ja'uc xats'etan ani' achiquin ta ya'yibel sc'opic ti buch'utic oy sbijil ta xalic c'alal mu'yuque, ti ja' no'ox ta xcontrainvanique. 21Yu'un oy jlom laj xch'unic ti c'op taje. Lic yicta sbaic ta xch'unel ti Cajvaltique.

Ac'o sva'an sba ta yac'beloxuc slequilal yutsilal ti Diose. Jechuc.

Currently Selected:

1 Timoteo 6: TZC00

Highlight

Copy