Numeros 20
20
1Dai bhodïrï mos baakïkai go utu umigi go Israelitas ayi xako gïï kaatï go oidigi Sin tïgidukami. Dai ami gïn urhi ïgai Kadesïrï. Ami Kadesïrï muu go Maria, xïgidï Moises ïmadï Aaron. Abhaxi gï yaasatu ïgai.
2Dai mai tipukatadai sudagi ami . Tai gïn ïmpagi go odami daidi bui ñoki go Moises ïmadï Aaron daidi itïtïdai,
3—Xioma ïr kïïgatadai xi gïr kodaitadai Diuxi Gïr Nukadakami ïmadï go gaa Israelitas ix makïdï gïn koditu Diuxi buitapi dai mai xu ix koiyagi aatïmï tonomodagaikïdï— itïtïdai go Israelitas. 4—¿Tuixidï gïr bua aapimï tanai oidigana? Gïr Nukadakami aaduñdï aatïmï di— itïtïdai. —¿Ipïrhidi mïxi tïxi koiyagi aatïmï tonomodagaikïdï dai gïr bua ïmadï gïr sosoiga buxtaki?— itïtïdai. 5—Arhiïxi soi maaxi oidigi tanai. Bhaiyoma gïr biamudai aapimï Ejipituana. Mai kïï gï buayi ïjïxikami tami toma lachi. Tomarhi igoxi mai tipu tomarhi uba tomarhi granada. Mai tipu tomarhi sudagi ixtuma yïïdagi aatïmï— itïtïdai go Israelitas.
6Dai go Moises ïmadï Aaron ïkobai bubuaka dai mïï ayi kitaagiña go ikuxi baaki xako Gïr Nukadakami didibidi aaduñdï. Ami kuiki ïgai dai dïbïrapi kuikïstu kokobakïdï xadutudaitai. Daidi gïn buidïrï gï maaxitu kudaigadï Gïr Nukadakami.
7Dai Gïr Nukadakami potïtïdai go Moises,
8—Bhïkañi gï uxiakarui dai Aagidañi gï sukurhi Aaron xi gï soiñana ïmpaida go odami. Bhodïrï go odami buitapi aagidañi go gïï odai gobai sai gïn oidana sudagi. Busaimu sudagi go odaiñdïrï mos potïkai aapi daidi yïïdamu go odami ïmadï sosoigadï— itïtïdai Gïr Nukadakami.
9Daidi go Moises mïï ikuxi kiiyañdïrï bhïi go uxiaradï ix dukai aagai Gïr Nukadakami. 10Dai bhodïrï Moises ïmadï Aaron ïmpagi go odami mïï buidïrï go odai ix makïdï agaitadai Gïr Nukadakami. Dai bhamu Moises dai itïtïdai go odami,
—Arhiïxi ñiñokidaraga aapimï bïïxkatai— itïtïdai. —Dai xibi biakamu aatïmï xi busaidagi sudagi idi odaiñdïrï baida gayïdagi aapimï— itïtïdai Moises.
11Dai gokoaja gïïgï Moises go odai uxiaradïkïdï dai gïïpi busai sudagi. Daidi ka jii go odami ïmadï sosoigadï.
12Bhodïrï Gïr Nukadakami itïtïdai Moises ïmadï Aaron,
—Gïn aagidi aanï mïxi aagidagi go odai sai gïn oidana ïgai sudagi dai aapimï gïïgï bhaiyoma. Ka maiti gin buaboitu aapimï dai maiti gin xadutugi pobuadatai aapimï buitapi go Israelitas. Xibi kaxkïdï mai bapakimu aapimï amïï Kanaanïrï xako gïn maatadai aanï ïmadï go gaa xi ami oidaka agaitadai aapimï— itïtïdai Gïr Nukadakami Moises ïmadï Aaron.
13Ami xako podui gobai ïr gïï busanïrï sudagi xako Mariba tïïgidi. Ami go Israelitas bui ñiño Gïr Nukadakami bai Gïr Nukadakami tïïgi xïï kïï buañixi tïgibudadï.
22Dai bïïxi bubuaka go Israelitas Kadesañdïrï dai iji Hor tubidaki amakoga. 23Dai go Hor tubidaki ugidïrï kïïka xako Edom tïgidu oidigi. Dai ami Gïr Nukadakami atagidi go Moises ïmadï Aaron.
24Dai Gïr Nukadakami aagidi sai go Aaron muki agai dai itïtïdai ïgai,
—Go Aaron ka muki agai— itïtïdai. —Ka mai baakia agai ïgai gamo Kanaanïrï xako aagai aanï xi maaki iñagai go Israelitas xi ami óídakagi. Ka maiti gin ïïgidi aapimï amïka xako busanïi sudagi Maribïrï. Kaxkïdï ka mai baakia agai go Aaron— itïtïdai Gïr Nukadakami. 25—Dai aapi Moises baidakañi go Aaron mïï daana kugïrï Hor tubidaki dai baidakañi maradï ïpï ix makïdï Eleazar tïgidu. 26Ami tubidaki dama upasdamu aapi Aaron yukuxidï xadutudikïdï dai aadidamu aapi go Eleazar. Go Aaron abhaxi mukia agai— itïtïdai Gïr Nukadakami.
27Go Moises ïïgida kaï Gïr Nukadakami aidï. Tïsai ïgai Hor tubidaki dama dai go Aaron ïmadï Eleazar oi. Dai bïïxkatai go Israelitas nïidi xi mïï dudui ïgai. 28Dai ka tïïtïigïkai ïgai go Moises upai Aaron yukuxidï xadutudikami dai aadi go Eleazar. Daidi abhaxi muu go Aaron tubidaki kugïrï. Bhodïrï mïïkadïrï tïapai go Moises ïmadï Eleazar. 29Ïmokobhai dan bhaibuxtama tasai suanïtadai go Israelitas soigamukatai ka mai tipukatai go Aaron.
Currently Selected:
Numeros 20: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
