Numeros 14

1Bhodïrï go Israelitas mos gïgïr suañimi kaïkai aatagidï go bhaitï gukakami. Ïmo tukagi mos suanïi ïgai. (Biaka ïrhiditadai ïgai xako oidakagi dïï ïbhïidi ïgai xi bui surhigiagi go Kanaanïrï óídakami.) 2Dai bïïxkatai go Israelitas ñokidimi go Moises dai go Aaron bui,

—Xioma ïr kïïgaikamudai xi Ejipituana koimudai aatïmï xiïpï tanaxi oidigana xako daraja aatïmï dai mai xu xi gïr kodagi go Kanaanïrï óídakami— ikaitimi. 3—Ixtumaxi bïïtarï gïr bua Gïr Nukadakami Kanaanïrï. Ipïrhidi ïgai xi gïr kodagi go Kanaanïrï óídakami dai gïr boopoidagi gïr ooñiga ïmadï gïr maamara. Aa surhigimudai aatïmï Ejiptuamu ïpamu bhaiyoma— ikaitimi go Israelitas. 4Daidi ikaitimi ïpï, —Tï daasa ïmoko xorai gïr bhaitï kïkibagi bai ïgai gïr baidakana Ejiptuamu ïpamu— ikaitimi go Israelitas.

5Dai go Moises ïmadï Aaron mos kuiki dai dïbïrapi kuikitu kokobadï dai xadutugi ïgai Diuxi ami odami buitapi.

6Go Josue ïmadï Kaleb oiditadai go gaa bhaitï gukakami aidïxi Kanaanïrï ajiopatadai ïgai dai nïnïidi oidigi ami ix xïï kïïgadu ix makïdï gïn maakia ïrhidi Diuxi. Dai go Josue ïmadï Kaleb soi gïn ïrhidi dai ïïgi saasarai yukuxidï kaïkai aatagidï go Israelitas xi mai bapakia ïrhidi gamoko.

7Daidi itïtïdai ïgai go Israelitas aidï

—Kaïkabïrai aapimï gïr aaduñi. Arhiïxi kïïgadu go oidigi xako nonora aatïmï dai bïïxi aipako gïr tïgito nïnïidi. 8Kïïga naana maaxi oidaga kïïkïgadukami dai dïdïbïrai kïïkïgadu ïxidagai bïïtarï. Daiñi, xi oigïda gïr nïijadagi Gïr Nukadakami aidï gia gïr soiñamu ïgai dai gïr tïïgidamu go dïdïbïrai gobai oidataragai bïïtarï— itïtïdai go Kaleb ïmadï Josue. 9—Maiti agai xi bui bïïtïkagi aapimï Gïr Nukadakami mai ïïgiditai aatïmï ïgai. Tomarhi maiti agai xi ïbhiada aatïmï go Kanaanïrï óídakami. Tuma xijiakamu gobai. Otoma maitïmu aatïmï bui surhigïkai. Ïgai mai bia xorai soikïdagi di. Dai aatïmï gia Gïr Nukadakami gïr abhana kïïka dai ïgai gïr soiñamu. Maiti abïr duduadikuda tuduidï— itïtïdai go Josue ïmadï Kaleb.

10Podukai abïnakidimitadai ïgai aaduñdï. Dïï go aaduñdï bhaiyoma bui bhaakoi dai ojodaikïdï maiña agaitadai. Koda ïrhiditadai ïgai go Josue ïmadï Kaleb tudu. Tai todian dukai gï maaxitu Gïr Nukadakami kudagidï ikuxi baakiañdïrï xako didibidi ïgai aaduñdï dai go Israelitas bïïxkatai tïï.

26Dai Diuxi aataga ïmadï go Moises dai Aaron daidi itïtïdai,

27—Ka arhiïxi galtutuiga go Israelitas dai mos apia kia gin buidïrï ñokai ïgai— itïtïdai. —Xïï tïbïpi gï aagadamu kia xi kaïkagi aanï go atagidï soimaaxkami— itïtïdai. 28—Mïïka abïr gin ñokitulda aapimï daidi abïr aagida go odami sai,

—Ka ïïgi podukai aagaitadai aapimï sai koi agai. Dai xibi gia aanï agai sai buaboikïdï pobai gïn duñimu aapimï ix dukatai aagaitadai aapimï. Bïïxi gin gubukadagakïdï aanï agai gïn buitapi sai buaboi aagai aanï— itïtïdai. —Gïn abhana daitudamu aanï gïgïbidaragai tudu— itïtïdai.

29Bhodïrï Diuxi aagidi ix tuma gïgïbidaragai biaka agai go Israelitas daidi itïtïdai,

—Bïïxi go ix makïdï ojixi sensoïrï dai biakami ïmokobhai umigi aïkami taiyakoga dai ix makïdï gin bui ñiño, bïïxi gobai koimu. Nobai oidigana xako dïgabusai aapimï ka mos aipakoga bïïtïkamu tukugadï koidadï. 30Tomarhi ïmadutai aapimï mai bapakimu ami xako agaitadai aanï xi gïn maaki in agaitadai. Mosïkaxi go Kaleb ïmadï Josue gia bapaki agai ami. 31Pokaititadai aapimï sai go Kanaanïrï oidakami gïn boopoida agaitadai gïn maamara. Dïï Aanï bhaiyoma baidakamu gïn maamara dai tïïgidamu dïbïradï go Kananeos xi ami xioma óídakamu gïn maamara— itïtïdai.

32—Dïï gia aapimï tanai oidigana bïïtïkamu gïn tukuga koikai aapimï. 33Gïn maamara tanai oidigana nukada agai kañiñiru dai óídaka agai ïpï gokobhai umigi kia. Podukai po kaki umigi taata agai aapimï gïïgïbidaraga mai ïïgidakai. Dai gïn maamara ïpï soi taadakamu go kobhai umigi aïkami gïn ïmadï. Daidi bhodïrï bïïxi ugitimu aapimï ix makïdï ïr gïïgïr odami xibi. Dai aidï gia bapakimu gïn maamara Kanaanïrï. 34Gokobhai tasai iji go kïkïïrhi otoxikami dai mïï nïnïidi oidigi xi maaxi tiodi Kanaanïrï. Dai xibi aanï aagai sai xïïki tasai iji go ojotoxikami po kaki umigi taata agai aapimï gïn gïïgïbidaraga. Podukai maatïkamu aapimï xi gïn buayi ix makïdï gin buidïrï bïïtïkagi— itïtïdai Gïr Nukadakami.

35—Arhiïxi galtutuiga aapimï tudu. Bïïxkatai bhai aa aapimï dai gin bui surhi. Kaxkïdï podukai gïn taatatulda iñagai aanï. Tanai oidigana tïïgimu aapimï xako ukami ayimu dai koimu. Aanï ïr Diuxi dai Nukadakami tïgidu aanï dai aanï aagai sai pobai gïn duiñdamu aanï— itïtïdai Gïr Nukadakami Moises. —Potïdamu aapi go Israelitas— itïtïdai.

Currently Selected:

Numeros 14: NTP

Highlight

Copy