Markos 6

Suxi maakai ñoki Nasaretïrï

1Dai go Suxi ïpamu nora kiidamu xako gïrakami ïgai, dai mamaatïrdamigadï bïïxi oi. 2Dai aïkai ibhïxtaragai tasai tai baa Suxi kiupaigadïrï judidiu dai ami gamaakai ñoki go odami. Dai mui odami ix makïdï kaï aatagidï ka mai tïï ixdukatai gïn tïtïgitoagi dai naana kaitimi.

—¿Baajadïrï máí Suxi pomaaxi aatagi? dai ¿Baajadïrï bhïiyi mos ïï kïïgadukami tïgibudagai? dai ¿Dukatai ibuayi gobai mos ïï gïïgïrdukami aaduindagai ix makïdï odami mai nïidi tomarhi ïmo imidagai?— ikaitimi. 3—Gobai mos ïr ibiixumadami uxi dai dïïdï Maria tïgidu— ikaitimi. ¿Maiti ix gïr saagida óídaga susukurhidï? Daja go Jakobo dai go Jose dai go Udaxi ïmadï go Ximuñi, dai susukurhi oki bïïxi gïr saagida óídaga ïpï— ikaitimi odami dai bhaakoi bui.

4Dai go Suxi potïtïdai aidï,

—Daiñi, odami toma xako óídakami xadutudai go aagadami Diuxiañdïrï ñoki. Mosïkaxi ïïgi kiidïrï óídakami gia mai xadutudai ïmadï ix makïdï óídaga miadïrï xako gïrakami ïgai— itïtïdai Suxi.

5-6Daidi go Suxi mai tïtïïgaitadai ixdukatai gï tïtïïgitoagi nïiditai xïïxi mai buaboitudai go odami. Dai ka mai bhaiga ïgai xi ibuadagi gïïgïrï aaduindagai ami xako gïrakami ïgai. Mos daama dáí noonobidï dai duadi chïki kokokoñiadï dai mosïkaxi. Bhodïrï jii ïgai abhiadïrï dai maigobai dadiji arhi kiiki xako chïchïkidu bhaabhaki dai ami gamamaakaiña ñoki.

Suxi otosa agai ojotosadï

7Bhodïrï báí ïgai go bhaibuxtama dan goka mamaatïrdamigadï, dai aipako otoi gogokatai. Dai maa gubukadagai xi bubaidana Diabora tïtïañikarudï odamiañdïrï. 8-9Dáí ïgai xi bukiagi ixtumaxi boiyamu, tomarhi morarhi, tomarhi bhitugai, tomarhi tuminxi. Mosïkaxi biakatadai ïgai oigaragai xi bukiagi gïn gigiika dai ix gïn aadakagi gïn sususaka ïmadï mos arhi ïmo aadikami yukuxi. 10Daidi Suxi potïtïdai ïgai,

—Mïx xudu ajiagi no xibhïkai ïmo kiiyïrï abïr anaaxi gïn urhiñaka asta mïx xïïxkadï iimia agadagi abhai kiikiañdïrï— itïtïdai. 11—Dai mïx ajiagi ïmapïkïrï mïx xako maiti gïn miadïgidagi dai tomarhi maiti gïn kaïkan buadagi, bïrai bubuaki abhiadïrï dai gigigida gïn sususaka bai gïsïna tukuragadï. Dai ami óídakami nïijadamu mïx xuduku gigidagi gïn sususaka dai ka mos ïr ïmo bhagaidaragai dukami ka agai ïgai bïïtarï. Podukai maatïkamu ïgai xi mai kïï dui maiti gïn miadïgidakai— itïtïdai.

12Taidi iji go mamaatïrdami dai aagidimi odami sai gï aagai ix ïmadukai gïn tïtïïgitoagi Diuxi buitapi. 13Dai bubaitu ïgai mui Diabora tïtïañikarudï odamiañdïrï ïpï. Dai mui duduadi kokokoñiadï mos tïkiditai asaiti.

Odami mai maatïkana go Suxi xorai ïgai

14Bïï aipako aagaiña odami go Suxi dai asta go gïï Rey Erodïxi tïgidukami kajioma ïpï dïï mai maatïkana xorai ïgai. Dai mui odami ikaitiña aagaitai go Suxi,

—Ïgai ïr go Juan ix makïdï bapakonadami aagaiña odami. Go Rey tïjai muaragai dai xibi kaxi gï duakatu ïgai ïpamu kaxkïdï gïïdukami bia gubukadagai abhana dai gïïgïrï ibuayi aaduindagai ix makïdï odami maiti ixtutuidikïi ix ibuadagi— ikaitiña.

15Dai jaa ikaitiña,

—Elias ïrhi aanï ïgai ix makïdï maaxi aagaiña Diuxi ñokidï— ikaitiña.

Dai jaa ikaiti,

—Ïmo aagadami Diuxiañdïrï ñoki ïgai ïpïan dukami ix makïdï oidakana ïïki— ikaiti ïïmoko.

16Dai aidïxi go Rey Erodïxi kaï aatagidï odami taidi ikaiti ïgai aagaitai go Suxi ïpï,

—Ïgai ïr go Juan, ix makïdï tïjai aanï guikutaragai modï ïrhi aanï, dai xibi ka duaka ïgai ïpamu ïrhi aanï— ikaiti go Rey.

17Go Rey ïïkioma gatïjaitadai mïsai bhïna go Juan dai sai maixakarui ïrana burana kadenakïdï. Ïmo oki Erodiaxi tïgidukami ïr duñidï gobai. Go oki ïgai ïr oñigadïkatadai go Pirhi ix makïdï ïr sukurhidï go Rey Erodïxi. Dai go Rey ïxi ïïgi sukurhi oñigadï dai ïma bii. 18Tai aidïxi ïxi ïgai bai go Juan kia oidakatadai dai potïtïdai ïgai go Rey aidï,

—Maiti ïr sïïrhi pïxi ïmadï dakagi gï sukurhi oñigadï— itïtïdai.

19-20Bai gokïdï go oki kïïdaitadai go Juan dai mua ïrhidi dïï mos go Rey ïbhïiditadai go Juan. Kïï maatïkana ïgai xi go Juan ïr Diuxi tuidadï dai ix kïï odami tuiga ïgai. Dai tomaxi go Rey mai kïïga maatï kaïkana Juan aatagidï bïïxkïrï bhai ïrhiarakïdï kaïkana ïgai dai mai dagito ïgai go oki ix soi duiñdagi. Kaxkïdï mai tïtïïgaitadai go oki ixdukatai muagi.

21Dïï tomax dukai go oki Erodiaxi ïmo imidagai gia tïï ixdukatai muagi go Juan. Ïmo imidagai tasagadïkatadai go Rey tai idui ïgai ïmo bagimi daidi gatïjai duñaragai kïïgadukami kuadagai dai baapa sonoïrï gukakamigadï dai bhaitï gukakami sandarugadï ïmadï jaa gïn bipidakami Galileïrï óídakami. 22Taidi go Erodiaxi maradï oki baa ami xako gakuadatadai go bapaidarxikami dai gatudai. Taidi go Rey Erodïxi ïmadï go gaa ix makïdï ïmadï gakuadatadai arhiïxi ojoida tïï go arhi oki. Taidi go Rey potïtïdai go arhi oki,

—Gin tañiñi pïx tumaxi ipïrhiadagi nai aanï gï maakimu— itïtïdai go Rey. 23—Daiñi, gin bapasai aanï naidi gï maakiagi pïx tumaxi gin taañiagi toma pïx gin táí tajukami go dïbïrai ix makïdï tïanïi aanï— itïtïdai.

24Taidi go arhi oki busai abhiadïrï daidi itïtïdai dïïdï,

—¿Ixtuma tanïna aanï?— itïtïdai.

Daidi go oki potïtïdai,

—Tañiñi modï go Juan ix makïdï bapakonaiña odami— itïtïdai.

25Taidi go arhi oki otoma baa ïpamu xako dajatadai go Rey Erodïxi daidi potïtïdai,

—Ipïrhidi aanï pïxi xibi otoma gin maakiagi Juan modï ïmo aasokorhiïrï— itïtïdai.

26Baidi go Rey sïïrhikïdï soi gï ïrhi. Dïï mos kaxi gï baasa ïgai gï bapaida buitapi, kaxkïdï biakatadai ix maakiagi. 27Tai otoma otoi ïgai ïmo sandaru dai aagidi sai buapana go Juan modï. 28Taidi maixakaruamu jii go sandaru dai mïï guikuta modï Juan dai ïmo aasokorhiïrï bua. Taidi go Rey maa go arhi oki bai ïgai tïïgi dïïdï. 29Dai odami ix makïdï ïr mamaatïrdamigadï go Juan máí ix kaxi gï muatu ïgai dai mïï bhïiyi tukugadï dai yaasa.

Taama mirhi odami bhidaradï

30Tai gokiïrï Suxi ojotosadï ïpamu dada xako dakatadai Suxi dai aagidi bïïxi ixtuma idui ïgai xako gïn otoi Suxi dai ix dukatai mamaatïturhi ïgai odami. 31Tai arhiïxi mui daibuiña dadidakami bai mai ajïi tasai tomarhi ugida bïïtarï. Tai go Suxi potïtïdai mamaatïrdamigadï,

—Tinda tïtai gïr iibïxta lachi maigobai xako ïgiga oidigi— itïtïdai.

32Taidi go Suxi ïmadï mamaatïrdamigadï tïtïsai ïmo barkoana dai no maigobai iji xako mai tipu oidakami. 33Dïï mos muidutai nïidi aidïxi iji ïgai dai máí sai ïr go Suxi dai dïbïrapi boopoi bïïxi aipadïrï aarhi kiikiañdïrï óídakami, dai ïpïgioma ayi xi go Suxi. 34Dai aidïxi ka tïbai go Suxi barkoañdïrï sai tïï ïgai go mui odami ix makïdï ami dadatadai dai soi gï ïrhiadan tïï. Kañiñiru ix makïdï mai bia xorai nukadakagi duu tïï ïgai tudu dai naana dukai maa aatagi. 35Dai bhodïrï urunoko go mamaatïrdami Suxi miadïrï gukiba daidi potïtïdai,

—Kaxi ti urui dai mai tipu bhaabhaki tanai mianai, 36otosañi go odami bai iimïna aarhi kiikiamu xako mai xii mïïmïkaxiga tabhiadïrï bai sabïdana ixtuma ugiagi. Maiti bukati ïgai bhitugadï di— itïtïdai ïgai go Suxi.

37Dïï mos go Suxi potïtïdai,

—Bhibhidabïrai aapimï— itïtïdai.

Tai go mamaatïrdami potïtïdai,

—Ïbogiami ayimudai gociento dinarhi#6:37 Go dinarhi ïr ïmo tuminxi ix makïdï ïmo tasai aaduindagai aïkami namïakana. tuminxi aïkami pan go kaaki odami bïïtarï. ¿Baadïrï aituldana aatïmï?— itïtïdai ïgai.

38Taidi go Suxi potïtïdai,

—Mïïka abïr nïida mïx xïïki pan bia— itïtïdai.

Dai mïï nïidi ïgai dai bhodïrï potïtïdai,

—Taama aatïmï bia pan dai goka batopa— itïtïdai aidï go mamaatïrdami.

39Dai bhodïrï Suxi tïjai go odami sai basoi saagida daraibana chïchïkiatai. 40Taidi go odami daraiba ïïmo ciento dai tatajukan ciento. 41Tai bhodïrï go Suxi bui go taama pan ïmadï ï goka batopa dai tai nïnïaba ïgai dai aataga ïmadï Diuxi. Bhodïrï saasarai go pan dai maa go mamaatïrdami bai ïgai takogidana go odami. Dai ï goka batopañdïrï ïpï takogi ïgai bïïxkatai. 42Dai uu go odami dai gïn tataxkobai ïgai bïïxkatai. 43-44Sïïrhikïdï mui odami bhibhi ïgai go panakïdï, mosïkaxi kïkïïrhi aitudai taama mirhi. Dai gokiïrï ka ugakai ïmpagi ïgai bhaibuxtama dan goka asarai susudakai bidadï go pan dai batopa sasakigadï.

Sudagi daama kïixapa jii go Suxi

45Taidi go Suxi aagidi mamaatïrdamigadï sai tïtïidïna barkoana dai bhaitï iimïna. Aagidi sai iimïna baasmokoradïrï go gïï sudagi dai sai aïna xako Betsaidana tïgidu. Dai go Suxi diosaida agai odami kia. 46Aidïxi ka diosagi ïgai tïsai ïmo gidamu dai ami aataga agai ïmadï Diuxi. 47Dai gokiïrï aidïxi ka didiaymi oidigi tai go mamaatïrdami kaxi go gïï sudagi ïrana ïxi iimïi barkoana baidi go Suxi ïïgi kïakatadai sudagi ugidana. 48Dai tïï ïgai xi go mamaatïrdami ka maiti ixtui ixdukatai imitudagi go barko bui kaatïkatai ïbïrhi. Xarhimodï go Suxi ka aijimitadai go mamaatïrdami mos sudagi daama imïitai dai bhaitï daibuña agaitadai. 49Dai mamaatïrdami tïï ix sudagi daama imïi ïgai dai pobï ïrhi xi ïr ïmo suiñarhi dai ijiña tïïgakai. 50Bïïxkatai tïï dai arhiï duduadimu. Dïï go Suxi potïtïdai aidï,

—Maiti abïr buamï ïnïrhiada. Aanïana. Maiti abïr duduadikuda— itïtïdai.

51Dai tïsai ïgai barkoana xako iimïitadai ïgai tai otoma gï ïpitu ïbïrhi. Baidi go mamaatïrdami mai tïtïïgai ixdukatai gïn tïtïïgitoagi. 52Mai kia ajïi tïgibudadï xi maatiagi xorai go Suxi tomaxi nïidi ïgai ixdukatai iduitadai Suxi takabioma go panakïdï. Arhiï kaapaka iibhïadï kaxkïdï.

Suxi duduadi kokokoñiadï xako Genesaret tïgidu oidigi

53Dai basadïrï dïgabusai ïgai go gïï sudagi dai ayi xako Genesaret tïgidu oidigi dai ami buu ïgai go barko sudagi ugidana. 54Dai mos tïapai ïgai barkoañdïrï tai go óídakami máí go Suxi. 55Dai otoma aipako boopoi kiikiamu ix makïdï ami oidigïrï guka dai uxiïrï buapaimi kokokoñiadï xako kajiomatadai ix dakagi go Suxi. 56Dai toma xako dajagi go Suxi xi gïïgïrï kiikiana xiïpï aarhi kiikiana xiïpï xako mïïmïkaxi guka bhaabhaki tomax dukai go odami bubaidiña kokokoñiadï plasana. Dai daanïiña ïgai Suxi sai dagitona go kokokoñiadï ix tomaxi mosïkaxi taatagi ugidïrï yukuxidï. Dai bïïxkatai ix makïdï mos taata duduayi.

Currently Selected:

Markos 6: NTP

Highlight

Copy