Mataibo 28

Ïpamu gï duakatu go Suxi

1Dai xadiko ka daibusaitadai go ibhïxtaragai tasai dai kaxi ïr Tumiñoko baidi mos maaxiko oidigi sai iji go Maria Magdalena ïmadï go gïmai Maria dai mïï nïida agai xako yaasapikatadai go Suxi.

2Dai todian dukai gigiburhi oidigi ami. Tïbagiañdïrï tïbai ïmo tïañikarudï Diuxi kaxkïdï. Dai maigobai dáí ïgai go gïï odai ixtukïdï kuupidi xako yaasapikatadai Suxi. Dai ami go gïï odiana daiba ïgai. 3Ïpïan totoarïi ïgai xïxkadï bïpïdokïdagi oidigi dai yukuxidï toja ïpïamaaxi kïbai. 4Dai kabami duduadimu go sandadaru mïï aïkai go tïañikarudï Diuxi. Gigiburhi ïgai dai susuikitu dai koidadï duu bïïtïkatadai dïbïrapi mos ïï duduadikukatai.

5Daidi go tïañikarudï Diuxi ñokidi go oki ix makïdï ami dadatadai daidi potïtïdai,

—Maiti abïr duduadikuda. Kïï maatï aanï sai gaagai aapimï ïgai ix makïdï kuruxiana gï xixatu. Gaagai aapimï go Suxi tudu— itïtïdai. 6—Mai tipu ïgai tanai. Kaxi duaka tudu ix dukai agaitadai ïgai baasïkioñdïrï tudu— itïtïdai. —Bhaigobai abïr nïniada xako yaasapikatadai ïgai tudu. 7Dai ka nïidakai aapimï abïr otoma mïï aagida go mamaatïrdamigadï. Aagidabïrai sai ka duaka ïgai tudu dai sai bhaitï imïi ïgai Galileamu. Ami Galileana tïigimu aapimï. Kaxi gïn aagidi aanï xako tïïgimu aapimï tudu— itïtïdai.

8Daidi go oki otoma iji dai kïïga bhai gïn ïrhiatugai ïgai dai duduadimutugai ïpï dai mïï aagida agai go mamaatïrdamigadï Suxi. 9Dai kia boiyamu imïi ïgai baidi Suxi buidïrï ayi dai biaturhi,

—Bhaiga— itïtïdai.

Dai go oki boopoi dai mïï buidïrï kuiki dai taata ïïkasodï dai idui ïmo xadutudaragai ïgai bïïtarï ami. 10Dai Suxi potïtïdai,

—Maiti abïr duduadikuda aapimï oki. Mïïka abïr aagida gin aaduñi sai iimïna Galileamu. Ami gin tïigimu ïgai— itïtïdai.

11Mai kia ayitadai go oki go kiikiïrï baidi bhaitï boopoi sandadaru ix makïdï ami nukadatadai xako gï yaasatu go Suxi. Boopoi ïgai dai ïpïgioma ayi kiikiïrï dai mïï nïidi go tïtïanïdamigadï go dadaxdadami dai aagidi ix dukatai pogïduitadai.

12Daidi go tïtïanïdamigadï go dadaxdadami gïn ïmpagi ïmadï go bhaitï gukakamigadï go judidiu dai bhai dui aatagi ix dukatai iduña agai. Dai bhodïrï maa ïgai bhai mui tuminxi go sandadaru. 13Daidi potïtïdai ïgai,

—Aagidabïrai go óídakami sai kokosokatadai aapimï tukarï dai dada go mamaatïrdamigadï Suxi dai gaïxi tukugadï. Podukai abïr aagida óídakami— itïtïdai. 14—Dai maiti abïr buamï gïn ïrhiada ix duñada kajiomakagi go kaigi ix kaiti aapimï. Aatïmï gïn ñokituldiadami buitapi ïgai tudu sai mai bhamukagi ïgai dai maiti gïn maakiagi gïgïbidaragai— itïtïdai.

15Daidi bui go sandadaru go tuminxi dai podukai aatagidi ïgai go óídakami ix tïtïdaitadai go dudunukami. Dai kaxkïdï apia kia pokaitiña go judidiu xibi tudu ix dukai yaata go sandadaru dai aagidi.

Suxi maa aaduindagai go mamaatïrdamigadï

16Dai bhodïrï go bhaibuxtama dan ïmoko mamaatïrdami iji Galileamu dai ayi ïmo gidiana xako aagiditadai Suxi sai gamo iimïna ïgai. 17Daidi tïïgakai ïgai go Suxi ami saidi idui ïgai ïmo xadutudaragai ïgai bïïtarï. Dïï gia ïïmoko mai maatïkatadai ix bhai kïïga buaboitudagi kia ix bhai buaboikïdï ïr go Suxi gobai.

18Dai ami buidïrï ayi Suxi go mamaatïrdamigadï daidi potïtïdai,

—Ka bhïiyi aanï ïmo sïïrhikami dai bïïxi adaama ïr Tïanïdami aanï tami oidigi daama dai mïï tïbagiana ïpï. 19Iimibïrai bïïxi oidigi daama tudu daidi abïr tïïgida gin ñoki bïïxi go naana maaxi ñokadami ix makïdï oidaga oidigi daama. Podukai abïr soikïda saidi ïr gin mamaatïrdamigakagi ïgai. Daidi bapakonadabïrai ïpï sai podukai maaxitudana ïgai saidi ïr oijadami ïgai Diuxi gin Oga dai saidi ïr aanï gin oijadamiga ïpï Maradïkatai aanï Diuxi. Dai go bapakonaragai ïr ïmo maaxidaragaika agai saidi ïr oijadami ïgai Diuxi Ibhïadï ïpï. 20Tïïgidabïrai ñoki sai ïïgiada ïgai bïïxi ixtumaxi gïn tïjai aanï. Dai gï agai sai maatïka aapimï sai aanï gïn ïmadï daka iñagai asta xïïxkadï ukami kïakagi oidigi— itïtïdai Suxi.

Mosïkaxi.

Currently Selected:

Mataibo 28: NTP

Highlight

Copy