Mataibo 25

Ïmo maaxidaragai aatagikïdï aagidi Suxi go odami sai bhai gïn dukana ïgai xïïxkadï dibiagi ïgai ïpamu

1Dai Suxi oi go aatagi daidi potïtïdai ïgai mamaatïrdamigadï,

—Gïn aagidamu aanï ïmo maaxidaragai aatagi sai maatïkana aapimï ix maaxika agai xïïxkadï gatïanïi Diuxi— itïtïdai. —Ïpïan dukami gobai kunataragai xakoga bhaibuxtama aarhi oki nïnïraka ix dibiagi go ix makïdï onta agai. Nïnïraka ix dibiagi ïgai dai mïï buidïrï ayi agai mai kia aïkai ïgai kunataragiana. Nïnïraka ïgai sai tukarï aiyagi ïgai tudu dai bhïï ajiopai ïgai kukudakarui. 2-3Dai taamatai go aarhi oki mai kïïga gïn tïgito dai mai bhïkai asaiti kukudakarudï bïïtarï. 4Dïï gia go gaa taamatai gia bukai tutukayu biakami asaiti kukudakarui bïïtarï. Kïïga gïn tïgito ïgai tudu—.

5—Dai tïbïpi nïnïra ïgai go ix makïdï onta agai mai maatïkatai xïïxkadï dibiagai. Dai laachkïdï ayi koximudagai go aarhi oki dai bïïxkatai kokoi. 6Daidi bhodïrï ïran tukarï no xibhïkai iiña ixtumaxi daidi ikaiti,

—Ka bhodïrï imïi ix makïdï onta agai— ikaiti. —Iimibïrai aapimï aarhi oki dai amïka abïr buidïrï ayi— ikaiti ixtumaxi.

7—Daidi bïïxi bapaañi go aarhi oki dai bhai dui kukudakarugadï. 8Dïï gia go ix makïdï mai kïïga gïn tïgitotadai ka ugidagatadai asaitigadï. Dai aagidi ïgai go ix makïdï gia kïïga gïn tïgitotadai daidi potïtïdai,

—Kaxi ugidagai asaitigadï gïr kukudakaruga dai karhioga tuu gobai. Gïr oidabïrai lïïchi gïn asaitiga tudu— itïtïdai.

9—Cho— ikaiti go ix makïdï kïïga gïn tïgito. —Ix gin maakiagi aatïmï aidï gia ka mai aji agai asaiti gïr bïïtarï dai tomarhi aapimï gïn bïïtarï ïpï. Bhaiyoma abïr iimi dai sabïda asaiti nobai xako gï gaagarai gobai— itïtïdai.

10—Dai utudama ijitadai ïgai gasabïda agaitai asaiti bai ka ayi go ix makïdï onta agai. Dai go aarhi oki ix makïdï gia kïïga gïn tïgito bapai ïmo kiiyïrï ïgai ïmadï xako po gï duña agai go kunataragai. Daidi ka bapakïkai ïgai sai gï kuu go kuuparagai ami—.

11—Dai laachkïdï ami dada go gaa aarhi oki daidi kidigañdïrï ñokidi ïgai ix makïdï kaxi onta agai daidi potïtïdai,

—Aapi kïïrhi gïr kupiokidañi go kuuparagai dai gïr maaka baakigai— itïtïdai.

12Dai go ix makïdï ka onta agai tukabiadïrï potïtïdai,

—Maiti an gïn maatï dai maiti gïn maakimu aanï oigaragai xi gïr urabagi aapimï— itïtïdai.

13Daidi bhodïrï potïtïdai Suxi go mamaatïrdamigadï sai,

—Po ikaidaga go maaxidaragai aatagi aagaitai xïxkadï dibiamu aanï ïpamu tudu. Dai kaxkïdï gï agai sai kïïga bhai gïn dukagi aapimï ïpïan dukai go aarhi oki ix makïdï gia kïïga gïn tïgito. Aanï ïr Diuxi otosadï ix makïdï ïmo kïïrhi busai dai mai maatï aapimï xuduku dibiamu aanï ïpamu. Kaxkïdï gï agai sai kïïga bhai gïn dukagi aapimï— itïtïdai.

Suxi aagai ïmo maaxidaragai aagaitai baika pipioñi, goka ix makïdï kïïga idui dai ïmoko ix makïdï mai kïï idui

14Dai oi Suxi aatagidï dai potïtïdai ïgai mamaatïrdamigadï,

—Gïn aagidamu aanï ix maaxi xïxkadï gatïanïdagi Diuxi— itïtïdai. —Ïpïan dukami gobai xïxkadï ïmo kïïrhi busai agai kiiyañdïrï dai mïkaxi imi agai. Dai mai kia imïkai báí ïgai pipioñigadï sai aatagana ïgai dai nukaturhi ïgai tuminxigadï. 15Kïïga maatïkatadai ïgai pipioñigadï ix makïdï kïïga gïn tïgitoka dai kaxkïdï bamioma tïïgi ïgai tuminxi ïïmoko. Nukaturhi ïgai taama mirhi tuminxi ïmoko dai ïmai gomirhi dai ïmai maa ïgai ïmo mirhi maatïkatai ïgai xïï kïïga gïn tïgitoka ïgai bïïxkatai. Dai bhodïrï bhïiyi ïgai boi dai mïkaxi jii.

16Dai go pioñi ix makïdï bhïitadai taama mirhi tuminxi otoma jii dai mïï aaduinturhi go tuminxi dai ïgaikïdï maitïturhi ïgai ïpï taama mirhi daamioma. 17Dai ix makïdï goka mirhi bhïitadai podui ïpï dai ïpï goka mirhi daamioma gamaitï. 18Dïï gia ix makïdï ïmo mirhi bhïitadai ïgai gia jii dai no xibhïkai kokoi dïbïrai dai yaasa. Mos ïxto ïgai tuminxigadï amudï tudu.

19Dai tïbïpikïdï dibia go amudï ïpamu dai báí ïgai pipioñigadï sai aagana ix idui ïgai go tuminxi ix makïdï nukaturhitadai ïgai. 20Dai ami ayi go ix makïdï taama mirhi bhïitadai. Dai potïtïdai ïgai amudï,

—Daiñi gin amu, tami daraka go taama mirhi tuminxi ix makïdï gin nukaturhi aapi dai tami daraka ïpï taama mirhi ix makïdï gï maitïturhi aanï gokïdï— itïtïdai.

21Daidi amudï potïtïdai,

—Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï, kaxkïdï xibi gï maakimu aanï sïïrhikami sai gïïpi bamioma gatïanïdana aapi. Gin urabañi tudu gin bhai ïrhiaragïrï— itïtïdai.

22Dai bhodïrï ami ayi go ix makïdï goka mirhi bhïitadai tuminxi. Dai potïtïdai ïgai amudï,

—Daiñi gin amu, tami daraka ï goka mirhi tuminxi ix makïdï gin nukaturhi aapi. Dai tami daraka ïpï goka mirhi ix makïdï gï maatïturhi aanï gokïdï— itïtïdai.

23Daidi amudï potïtïdai,

—Kïï idui aapi gin pioñiga— itïtïdai. —Kïï tuiga aapi dai kïï sïïrhi aatadui aapi— itïtïdai. —Kïï idui aapi go chïkikïdï ix makïdï gï nukaturhi aanï dai kaxkïdï xibi gï maakimu aanï sïïrhikami sai gïïpi bamioma gatïanïdagi aapi. Gin urabañi gin bhai ïrhiaragïrï tudu— itïtïdai.

24Dai bhodïrï dibia ix makïdï ïmo mirhi tuminxi bhïitadai dai aagada agai ix idui ïgai go tuminxi. Daidi ikaiti ïgai,

—Gin amu, kïï maatï aanï saidi aapi mai taata gatïanïi. Dai kïï maatï aanï ïpï sai gaïxidiña aapi ïïxidï jaa. Dai buyiña aapi maitïkidï jaa mai aatabuadatai aapi— itïtïdai. 25—Kaxkïdï duadimukatadai aanï gin nukatuldakai aapi gï tuminxiga dai mïï yaasa aanï dai ïxto. Naa, tami daraka gï tuminxiga— itïtïdai.

26Daidi amudï potïtïdai,

—Agia ïr soimaaxi ibuadami aapi parïgami— itïtïdai. —Pobai in tïtïdai aapi sai kïï maatï aapi sai buyiña aanï yoobaradï jaa tomaxi maiti gaïi aanï. Dai pokaiti aapi ïpï saidi buyiña aanï maitïkidï jaa. 27¿Xi ïr buaboikagi gobai aidï gia ix tuixi mai bankoana bapai aapi gin tuminxiga? Xi poduñimudai aapi aidï gia go banko gin aa noraidamudai gin tuminxiga xibi ïmadï ïpï lïïchi maitïki daamioma. Dïï mai kïï idui aapi mos yaasakai aapi gin tuminxiga— itïtïdai.

28Dai bhodïrï potïtïdai go kïïrhi go gaa pipioñigadï,

—Ka mai kïï idui go pioñi galtuigakami, kaxkïdï abïr popoida go tuminxi ix makïdï bia gobai dai maaka ïgai ix makïdï bia bhaibuxtama mirhi— itïtïdai. 29—Aanï aagai tudu sai bamioma maakimu aanï xorai kïï idui gobaikïdï ix makïdï ka maatadai aanï. Dai podukai gïïpi bamioma biakamu ïgai. Dïï gia popoidamu aanï bïïxi ixtumaxi biakagi ïgai ix makïdï mai kïïga ibuadagi gobaikïdï ix makïdï ka maatadai aanï. 30Dai gobai gin pioñiga galtuigakïdï ix makïdï mai kïïga idui maiti ïr soiñi toma lïïchi. Kaxkïdï abïr maigobai kidigana busaida xakoga tukamuga. Ami suakadamu gobai dai kïrïndamu taatamudï soimaaxi taatamaitai— itïtïdai.

31Dai oi Suxi aatagidï daidi ikaiti,

—Kïïga ïr buaboi sai imimu aanï tami oidigi daamaiñdïrï, aanï ix makïdï ïr go otosadï Diuxi ix makïdï ïmo kïïrhi busai. Dïï gia gokiïrï ïpamu dibiamu aanï bïïxi gin tïtïañikaruga ïmadï gatïanïda iñagaitai ïmo gïï Rey dukai tami oidigi daama. 32-33Amaxi bïïxi oidigi daama óídakami gin buitapi gïn ïmpaidada agai. Dai ïkobai bubaidamu aanï gin buaboitudadamiga dai gin sïïrhixapadïrï darasamu aanï. Dai ix makïdï maiti gin buaboitudai ogixapadïrï darasamu aanï. Ïpïan duñimu aanï xïïxkadï ïmo paxturu ïkobai bubaidiña kañiñiru saagidañdïrï xixibato tudu— itïtïdai.

34Dai bhodïrï aanï ix makïdï ïr go gïï Rey aagidamu ïmo ñoki go buaboitudadami gin sïïrhixapadïrï darakatai ïgai dai potïdamu aanï,

—Gimibïrai aapimï ix makïdï Diuxi gin Oga ka maa ïmo gïdukami bhai ïrhiaragai. Aidï abhiadïrï xi mai kia kïkibatadai oidigi Diuxi ka bhai buayitadai ixdukatai gïn tïanïdagi tudu dai gobai ïr gïn bhai ïrhiaraga. Dai xibi ka ayi ix bhïiyagi aapimï gïn bhai ïrhiaraga urabakatai aapimï Diuxi aaduñdï ix makïdï gatïanïi ïgai. 35Aidïxi bhiugimukatadai aanï, gin bhibhidi aapimï kaxkïdï. Dai aidïxi tonomokatadai aanï gin oidi aapimï sudagi. Aidïxi ïmo xibhïadïrï dukai imïdami ayi aanï gïn kiiyïrï bïïxkïrï kïïga gin miadïgidi aapimï tudu. Tomaxi maiti gin maatïkatadai aapimï. 36Dai aidïxi mai yukusukatadai aanï aapimï gin maa yukuxi. Dai gin dadiji aapimï aidïxi kokokatadai aanï dai aidïxi maixapikatadai aanï ïpï. Bïïxi gobai idui aapimï gin bïïtarï dai kaxkïdï bia aapimï oigaragai xi urabagi aaduñdï Diuxi xako gatïanïi ïgai.

Po tïdamu aanï go buaboitudadami aidï buañixikatai iibhïadï ïgai— ikaiti go Suxi.

37Dai pobai gin tïdamu ïgai ix makïdï buañixi iibhïadï,

—Aapi Gïr Nukadakami, ¿Bïkidï gï nïidi aatïmï ix bhiugimukatadai aapi xi gï bhibhidi aatïmï? Dai ïpï ¿Bïkidï tonomokatadai xi gï oidi aatïmï sudagi? 38¿Dai bïkidï gï miadïgidi aatïmï gïr kiiyïrï mai maatïkatai aatïmï xorai aapi? ¿Dai bïkidï mai yukusukatadai aapi xi gï maa aatïmï yukuxi? 39¿Dai bïkidï gï dadiji aatïmï kokokatai aapi xiïpï gï maixapikatai aapi ïpï?— pobai gin tïdamu go buaboitudadami amaxi.

40Dai potïdamu aanï ïgai,

—Daiñi— tïdamu aanï. —Kïïga soikïiña aapimï jaa buaboitudadami. Soikïiña aapimï asta go buaboitudadami ix makïdï bamioma mai tïanïi tudu. Dai bïïxi aïkatai ixtumaxi ix makïdï idui aapimï soikïitai ïgai, bïïxi gobai aanï podukai nïidi sai aanï in bïïtarï iduitadai aapimï. Gobai kïïga ïr buaboi tudu. Po tïdamu aanï go buaboitudadami Reygadïkatai aanï— itïtïdai Suxi go odami.

41Dai bhodïrï ñokidamu aanï ïgai ix makïdï gin ogixapadïrï gukaka agai, ix makïdï mai buaboitudai tudu. Dai potïdamu aanï,

—Iimibïrai aapimï tabhiadïrï. Diuxi mai kïïgakïrï gïn nïidi tudu. Iimibïrai xako bïïxkïrï bïïtarï mïïkana táí, xako bhai dui Diuxi gïgïbidaragai bïïtarï go diabora ïmadï tïtïañikarudï. Gamo abïr iimi tudu. 42Aidïxi bhiugimukatadai aanï aapimï maiti gin bhii, dai aidïxi tonomokatadai aanï maiti gin oidi aapimï sudagi ïpï. 43Dai mïï ayi aanï xako óídagatadai aapimï dai aapimï maiti gin miadïgidi maiti gin maatïkatai aapimï. Mai yukusukatadai aanï dai aapimï maiti gin maa yukuxi ïpï. Kokokatadai aanï dai maixakaruana dakatadai aanï dai maiti gin dadiji aapimï ïpï. Po tïdamu aanï tudu— itïtïdai Suxi.

44Bai ïgai ix makïdï maiti gin buaboitudai pobai gin tïdamu,

—¿Bïkidï gï nïidi aatïmï ix bhiugimukatadai aapi xi ïpï xi tonomokatadai xi ïpï xi mïkaxikïdï imïdamikatadai aapi dai xi ïpï xi mai yukusukatadai xi ïpï xi kokokatai aapi xiïpï gï maixakatai aapi? ¿Bïkidï gï nïidi aatïmï podukai dai maiti ipïrhi xi gï soiñagi?— gïn tïdamu ïgai ix makïdï mai buaboitudai.

45Dai potïdamu aanï,

—Idi ñoki ix makïdï gïn aagidamu aanï kïïga ïr buaboi. Daiñi, aidïxi maiti ipïrhi aapimï xi soikïdagi ïmadutai gin aaduñi, dai mai xudu tomaxi go bamioma mai tïanïdamikagi ïgai, ix maiti ipïrhi aapimï xi soikïdagi ïgai aanï podukai nïidi xi maiti ipïrhi aapimï xi gin soikïdagi tudu— tïdamu aanï.

46Dai ix makïdï potïdagi aanï ka maigobai iimïda agai xako bïïxkïrï bïïtarï taata agai gïgïbidaragai. Dïï gia ix makïdï kïïga buañixi iibhïadï gia iimimu xako kïïgakïrï óídaka agai bïïxkïrï bïïtarï— itïtïdai Suxi go mamaatïrdamigadï.

Currently Selected:

Mataibo 25: NTP

Highlight

Copy