Mataibo 18

Suxi aagai ix tuma odami bamioma namïaka agai xako gatïanïi Diuxi

1Dai aidïpïrï go mamaatïrdamigadï Suxi mïï nïidi ïgai daidi potïtïdai,

—¿Ix makïdï aatïmï gï mamaatïrdamiga ïgai dai bamioma gatïanïda agai xïïxkadï kaxi gatïanïdagi Diuxi?— itïtïdai.

2Daidi báí Suxi ïmo arhi odami dai ami go mamaatïrdamigadï buidïrï kïi daidi potïtïdai ïgai,

3—Aanï aagai sai gï agai xi ïma dukai gïn tïtïgitokagi aapimï saidi ïpïan tutiakagi aapimï aarhi mai tïtïanïdami dukai gïn ïrhiditai. Ïma dukai mai biakamu aapimï oigaragai xi urabagi Diuxi gatïanïitai ïgai. Gobai kïïga ïr buaboi— itïtïdai. 4—Dai aanï aagai sai odami ix makïdï ïpïan tutiakagi idi arhi odami mai tïtïanïdami gïn ïrhiditai, ïgai ïr ix makïdï bamioma ïr namïakami Diuxi bïïtarï xïïxkadï gatïanïdagi ïgai— itïtïdai.

5—Daiñi— itïtïdai. —Aanï aagai sai xorai kïïga oigïdadagi ïmo arhi odami kaxi gin oigïdadan buayi ïgai aanï ïpï. 6Dïï gia xorai gïpiïrï daitudagi ïmadutai go aarhi odami sai soimaaxi ibuadagi ïgai aanï aagai sai ix makïdï gadaitu kabami biakamu gïgïbidaragai. Xioma ïr kïïgaikamudai ïgai bïïtarï xi kuxiboana gï buramudai ïmo gïï mauturui dai go gïï sudagiïrï gï daitudamudai ïgai dai mai xu xi gïpiïrï daitudagi ïgai ïmo arhi odami. Kabami gïgïbitulda agai Diuxi tudu— itïtïdai.

Suxi aagidi go mamaatïrdamigadï sai gïn nukadakana sai mai gïpiïrï daitudana ïgai ïmadutai go aarhi

7Dai oi Suxi aatagidï daidi potïtïdai ïgai mamaatïrdamigadï,

—Agia soi ïrhiaraga oidigi daama óídakami bïïtarï sai naana maaxi oidakamu ix makïdï abïnakiadamu sai soimaaxi ibuada ïgai. Kïïga gï maatï sai oidakamu gobai tudu. Dïï gia sogigi odami ix makïdï abïnakiadagi jaa soi soimaaxi ibuadana. Kabami biakamu ïgai gïgïbidaragai tudu— itïtïdai.

8-9—Gïn aagidamu aanï ïmo maaxidaragai ñoki sai maatïkana aapimï xïï kabami gï agai sai maigobai dasagi toma tumaxi ix makïdï gïn abïnakiadagi sai soimaaxi ibuada aapimï dai podukai gïpiïrï gï daitudagi. Daiñi, gï agai sai maigobai daasagi aapimï tomax tumaxi ix makïdï soimaaxi gïn duiñturhiadagi dai gïpiïrï gïn surhidagi tomaxi ïr gïn ïkakagi gobai xiïpï ix gïn ïkasokagi ïpï. Xi gïpiïrï gïn daitudagi gobai gï agai sai guikutagi aapi dai maigobai daitudagi tudu. Dai xi ïr gï bujikagi ix makïdï gïpiïrï gï daitudagi gï agai sai busaidagi aapimï. Xioma ïr kïïga xi mai ïkakagi aapimï xiïpï sai mai ïkasokagi xiïpï sai mai bujikagi ïpï dïï gia sai kïïgakïrï oidakagi aapi bïïxkïrï bïïtarï. Maiti gï agai tudu sai kïïga biakagi aapimï gobai dai imiagi go gïï taiyïrï dai ami taatagi aapimï gïgïbidaragai bïïxkïrï bïïtarï— itïtïdai.

10—Maiti abïr soi dukai nïijada tomarhi ïmo aarhi tudu. Daiñi, oidaga tïtïañikarudï Diuxi ix makïdï nukadai dai ñokiturhiña go aarhi amïka tïbagiana buidïrï Diuxi gin Oga. Kaxkïdï kïïga abïr gïn tïgitoka dai mai soi dukai nïijada go aarhi— itïtïdai.

Suxi aagai ïmo maaxidaragai ñoki aagaitai kañiñiru sai maatïkana go odami xïï bhai gï ïrhidi Diuxi xïïxkadï kïïgakïrï busiagi ïmo soimaaxi ibuadami

11Dai kia gamamaakai Suxi ñoki go odami daidi potïtïdai ïgai,

—Aanï ïr go otosadï Diuxi ix makïdï ïmo kïïrhi busai dai dibia aanï kïïgakïrï bubaida iñagaitai odami ix makïdï ïr kuga imiadï Diuxi bïïtarï—.

12—Daiñi— itïtïdai. —Xi ïmo odami sosiakagi ïmo ciento kañiñiru dai ïmoko soigadï kuga imiagi, ¿Bhai ix mai dagitona ïgai go gaa bamioma muidu kañiñiru ix makïdï kïï daraka nobai ïmo gidana dai mïï gaagana ïgai go ïmadugakïdï ix makïdï ïkobai xibhï jii? Ïjï tudu. 13Dai ix tïïgiagi ïgai kabami bhai gï ïrhidiña ïgai bïïtarï go soigadï ix makïdï xibhï jiitadai. Bamioma bhai gï ïrhidiña gobai bïïtarï xi bhai go gaa bïïtarï ix makïdï kaburhi gukakana tudu. 14Dai podukai ïpï Diuxi gin Oga maiti ipïrhidi xi tomarhi ïmo oidakami kuga imiagi Diuxiañdïrï— itïtïdai Suxi.

Suxi aagidi mamaatïrdamigadï ix dukatai ibuadagi ïgai xïïxkadï soi buidadagi ïmai

15—Daiñi— itïtïdai. —Xi ïmo buaboitudadami soi buidadagi ïmadutai aapimï, gï agai sai ïkobai aatagadagi aapi ïmadï dai maakiagi ñoki. Dai ix gï ïïgiadagi ïgai dai ïmadukai gï tïgitoagi aidï gia ïmo aadunumï dukaikamu aapimï ïpamu. 16Dïï gia xi maiti ipïrhiadagi ïgai xi gï ïïgiadagi aidï gia baidañi ïpï ïmoko xiïpï goka buaboitudadami daidi abïr maakada ïpamu ñoki sai podukai oidakana goka xiïpï baika nïijadami ix tumaxi aagidagi aapimï. 17Dai xi modukai maiti ipïrhiadagi ïgai xi gïn ïïgiadagi abïr aagida bïïxkatai go buaboitudadami. Dai xi apia dukai maiti ipïrhiadagi ïgai xi ïma dukai gï tïgitoagi, aidï gia maiti abïr biaka urabaragai ïgai ïmadï. Ïmo mai buaboitudadami kabami soimaaxi ibuadami dukai abïr nïijada aidï. Ïmo taanïdami kuota ix makïdï mai sïïrhi aatabuayi podukai abïr nïijada tudu— itïtïdai Suxi.

Suxi aagai ïmo ñoki aagaitai go daañigaigadï go buaboitudadami

18—Gïn aagidamu aanï ïmo ñoki dai kïïga ïr buaboi gobai. Daiñi, xi aapimï buaboitudadami daidarxikami aagadagi ïmo ixtumaxi tami oidigi daama aidï gia Diuxi daidarxikami aagadamu ïpï amïï tïbagiana dakatai ïgai. Dai podukai ïpï ix maakadagi aapimï oigaragai saidi gï ibuadagi ixtumaxi aidï gia Diuxi ïpï maakimu oigaragai gobai bïïtarï ïpï— itïtïdai.

19—Dai aanï gïn ïmadï dakamu xïïxkadï gïn ïmpiadadagi aapimï ïpï. Dai xi gokatai aapimï bhai duñagi ñoki daanïda agaitai Diuxi, aanï aagai sai ïgai iduñimu ixtumaxi tanïdagi aapimï. 20Aanï gïn ïmadï dakamu toma xako gïn ïmpaidadagi aapimï tudu gin buaboitudaitai aapimï. Tomaxi mosïkaxi gogokatai xiïpï babaikatai gïn ïmpaidadagi aapimï aanï gïn ïmadï dakamu— itïtïdai.

Suxi aagai ïmo maaxidaragai ñoki aagaitai ïmo gïï tïanïdami ïmadï ïmo pioñigadï

21Daidi Piduru potïtïdai go Suxi,

—Gin Tïanïdamiga— itïtïdai. —¿Bïkioko gï agai xi oigïldadagi aanï ïmoko ix makïdï soi gin buidadagi? ¿Gï agai xi ix asta kubarakamioko apia oigïldadagi aanï soi gin buididitai ïgai?— itïtïdai.

22—Cho— itïtïdai Suxi. —Mai xu xi mosïkaxi kubarakamioko. Gï agai bhaiyoma sai apia oigïldada aapi tomaxi mai tïgito aapi xïkioko soimaaxi gï buididi ïgai— itïtïdai.

23—Daiñi— itïtïdai. —Gïn aagidamu aanï ïmo maaxidaragai sai maatïkana aapimï ix dukatai nunukadai Diuxi go odami ix makïdï tïanïi ïgai. Ïpïan dukami gobai ïmo rey ix makïdï bia pipioñigadï saidi go pipioñigadï buaturhi tuminxi go rey. Dai go rey aagida agai sai aa namïidana. 24Utudama gï aaga ataga agai ïgai ïmadï pipioñigadï dai bhai duña agai ïgai ïmadï ïjïkobai ix dukatai aa namïida agai. Dai ami go rey buidïrï gï kïsatu ïmoko go pipioñigadï ix makïdï buaturhi sïïrhikïdï mui tuminxi. Mai bhaigakatadai ïgai xi bïïxi nato aa namïidagi toma xïï tïbïpi oidakagi ïgai mos ïï muidu buaturhiditai ïgai. 25Mai tipukatadai ix dukatai kïïgakïrï busiagi ïgai tudu. Xi kaxkïdï go rey gatïjai gagararagai go pioñi ix makïdï gabuaturhi ïmadï oñigadï dai maamaradï dai modukai buxtuidadï sai podukai aa namïidana ïgai buatuldaradï.

26Dai go pioñi totonakïdï kïkiba buidïrï go rey dai daañimi sai oigïldana daidi potïtïdai,

—Gin oigïdañi dai gin nïnïraka kia nai aanï gï aa namïidamu xïïxi gï buaturhi aanï— itïtïdai.

27Daidi go rey soi gïlda antaadatu ïgai bïïtarï dai oigïrhi dai ka mai táí go tuminxi dai dagito sai imïna bhaiyoma.

28Dïï gia sïïrhikïdï galtuigakatadai go pioñi dai jii ïgai abhiadïrï dai maigobai tïï ïmai pioñi ix makïdï buaturhitadai chïki tuminxi. Dai kuxiboana bhïiyi dai karhioga burhiji daidi potïtïdai,

—Gin aa namïidañi xïïxi gin buaturhi aapi— itïtïdai.

29Daidi go gïmai pioñi totonakïdï kïkiba buidïrï daidi daañimi daidi potïtïdai,

—Gin nïnïrakañi kia nai aanï gï aa namïidamu bïïxi xïïxi gï buaturhi aanï— itïtïdai.

30Dïï go pioñi galtuigakïdï maiti ipïrhi dai bhaiyoma gatïjai maixaragai asta xïïxkadï bïïxi aa namïidagi ïgai.

31Dai go gaa pipioñi kabami soi gïn ïjïrhi nïiditai ixtumaxi idui ïgai dai mïï aagidi go rey ix dukatai pogïduitadai. 32Daidi go rey báí go ix makïdï mai kïï iduitadai daidi potïtïdai,

—Agia galtuiga aapi pioñi— itïtïdai. —Gin daanïitadai aapi dai kaxkïdï soi gïrhi aanï aapikïdï dai gï oigïrhi aanï bïïxi pïx makïdï gin buaturhi aapi— itïtïdai. 33—¿Dukatai mai soi gïrhi aapi gï aduñi bïïtarï ïpï?— itïtïdai.

34Dai kabami bhamu go rey dai gatïjai maixaragai dai aagidi ïgai go nukadakami ami maixakaruana sai kabami soimaaxi taatatuldana ïgai go pioñi galtuigakïdï asta xïïxkadï ukami bïïxi naato aa namïidagi ix makïdï buaturhi— Potïtïdai Suxi go mamaatïrdamigadï aagiditai ïmo maaxidaragai ñoki.

35Dai potïtïdai ïgai ïpï sai,

—Gï agai sai maatïkagi aapimï sai gin Oga ix makïdï tïbagiana daja podukai gïn duñimu aapimï ixdukai iduñi go rey go pioñi galtuigakïdï ix mai buaboikïdï oigïldadagi aapimï gïn aaduñi buaboitudadami xïxkadï soi gïn buidadagi ïgai— itïtïdai.

Currently Selected:

Mataibo 18: NTP

Highlight

Copy