Mataibo 15

Suxi pokaiti sai tomaxi naana dukai kïï ibuadagi ïmoko dïï gia ix mai buañixikagi iibhïadï gobai ix makïdï ibuadana ïgai maiti ïr soiñika agai sai Diuxi kïïgakïrï nïijadagi

1Daidi bhodïrï dada chïki fariseo ïmadï tïtïïgiadami sïïrhikami Jerusalenañdïrï dai mïï ayi xako dakatadai go Suxi. Daidi potïtïdai ïgai Suxi,

2—¿Ix tuixidï gï mamaatïrdamiga mai ïïgidi go bituldaradï gïr aaduñi ïïkidadï? Apia dukai mai kia gïn ikomakai gakuayi ïgai tudu. Dai gïr ïïki aaduñi ikaitiña sai xi gakuadagi ïmoko mai kia gï ikomakai sai gobai tukurhimadai ibhïadï— itïtïdai.

3Daidi go Suxi potïtïdai,

—¿Dai aapimï, ix tuixi mai ïïgidi ixtumaxi gïr tïjai Diuxi dai bhaiyoma ïïgidi aapimï gïn bituldaraga?— itïtïdai. 4—Daiñi— itïtïdai. —¿Maiti ix podukai ojixi Diuxi ojadïrï sai gï agai xi xadutuadagi aatïmï gïr oga ïmadï gïr dïï? Dai pokaiti Diuxi ïpï sai xorai soimaaxi ñokadagi buidïrï ogadï xiïpï dïïdï sai gï agai muatudagi ïgai Po tudu ikaiti Diuxi ojadï— itïtïdai Suxi.

5—Dïï aapimï gïïpi ïma dukai aagai. Aapimï pokaiti sai xïïxkadï gïn dïïdï tïgitokagi soiñi sai bhaiga aapimï ix potïdagi sai ka mai bia aapimï ixtukïdï soiñagi, sai ka tïïgi aapimï gïn buxtuidaga Diuxi ïmo xadutudaragai dukai. Pokaitiña aapimï sai ka Diuxi tuidadï gïn buxtuidaga tudu dai sai kaxkïdï ka mai bhaiga aapimï ix soiñagi gïn dïïdï. Po tudu ikaitiña aapimï oiditai ïïgi gïn bituldaraga dai mai maakia ïrhiditai aapimï soiñi gïn dïïdï. Podukai gajiadïrï bipiayi aapimï Diuxi ñokidï ix makïdï ikaiti sai gï agai xi xadutuadagi gïn dïïdï. 6Diuxi kïïga gïr aagidi saidi gï agai sai xadutuada aatïmï gïr dïïdï. Dïï gia pokaitiña aapimï sai gïn bituldaraga gïn mamaakai oigaragai sai mai xadutuadana aapimï. Dai podukai mai namïakami dukai nïidi aapimï Diuxi ñokidï bamioma ïïgiditai aapimï gïn bituldaraga— itïtïdai.

7—Agia yaataboga aapimï fariseos. Xadutuadan kaiti aapimï Diuxi dai mai buaboikïdï xadutudai aapimï tudu. Kaxkïdï go ñokituldiadamigadï Diuxi Isaias tïgidukami ojai ïïki gïn aagaitai aapimï. Oja ïgai xako ikaiti Diuxi sai,

8 Gin xadutuadan kaiti go odami dïï mos mai buaboikïdï gin xadutudai ïgai ibhïadïkïdï.

9 Xïxkadï ibuadagi ïgai ïmo xadutudaragai gin bïïtarï mai kïïgakïrï gin xadutudai tudu.

Naana maaxi ñoki gatïtïïgidiña ïgai daidi pokaitiña saidi gobai ïr Diuxi ñokidï dïï bhaiyoma mosïkaxi ïr odami tïgibudadï gobai ix makïdï gatïtïïgidi ïgai— ikaiti Diuxi.

10Kïïga mui odami ami darakatadai aidï. Dai Suxi aagidi sai miadïrï gukibana daidi potïtïdai ïgai,

—Kïïga abïr gïn tïgito kaïka gin aatagi saidi maatï kaïkana aapimï. 11Daiñi— itïtïdai. —Tomarhi ïmo kuadagai ix makïdï odami tïñidïrï bapakïi tukurhimadai ibhïadï. Dïï gia go soimaaxi ñoki ix makïdï tïñidïañdïrï busakïi, gobai gia bhaiga xi tukurhimadagi ibhïadï— itïtïdai.

12Daidi mamaatïrdamigadï potïtïdai go Suxi,

—¿Gï tïgito pïx nïidi sai go fariseos bhakoi gï bui kaïkatai gï aatagi?— itïtïdai.

13Daidi Suxi potïtïdai,

—Maiti abïr buamï gïn ïrhiada go fariseoskïdï. Ïgai maiti ïr aaduñdï Diuxi tudu. Ïpïan dukami ïgai ïxikami ix makïdï maiti ïr ïïxidï Diuxi gin Oga. Dai ayi agai ixtuigako bainkuma agai Diuxi. 14Daiñi, maiti abïr buamï gïn ïrhiada go fariseoskïdï. Mai maatïtai gamamaakai ïgai ñoki tudu mai maatïkatai ïgai ixtumaxi ïr buaboi. Ïpïan dukami ïgai ïmo mai nïayi ix makïdï bapaidi jaa ix mai nïadami ïpï sai oijadana. Baidatikan kaiti xako kïïgadu dïï ïgai ïmadï go ix makïdï oijadagi bïïxkatai ïmo gïï dïgakana surhigian dukai iduñimu bhaiyoma— itïtïdai.

15Daidi Piduru potïtïdai go Suxi,

—Gïr aagidañi ix tïiya ïrhidi go maaxidaragai ñoki aagaitai go kuadagai— itïtïdai.

16Dai Suxi potïtïdai,

—¿Modukai mïx mai maatï kaï go aatagi?— itïtïdai. 17—Daiñi, ixtumaxi tïñidïrï bapakïi ïmoko, ixtumaxi kuadagi ïmoko tudu, gobai mosïkaxi bokadïrï ukami ajïi dai bhodïrï maigobai busakïi ïpamu tukugadïañdïrï. Mai ajïi gobai ibhïgadïrï tudu. Kaxkïdï ¿Dukatai tukurhimadana gobai ibhïadï?— itïtïdai. 18—Dïï gia ixtumaxi odami ïrabiadïrï busakïi, go soimaaxkami ix makïdï ibuadagi ïgai tudu, gobai gia tukurhimadai gaibïdaga. Gobai odami ibhïadïañdïrï busakïi— itïtïdai. 19—Abhiadïrï busakïi naana maaxkami soimaaxi tudu. Dukami, abhiadïrï busakïi soimaaxi tïgibudagai dai gakodaragai dai ïmadï bodagi oki ix makïdï maiti ïr oñigadïkagi ïmoko dai gaïxidagi, dai ïmadï bodagi oñigadï ïmai, yaatagidagai, dai naana kai nïidaragai. 20Bïïxi gobai odami ibhïadïañdïrï busakïi dai gobai ïr ix makïdï tukurhimadai odami iibhïadï. Dïï gia ix maiti gïn ikomakai gaugiagi ïmoko gobai xadïrï tukurhimadana ibhïadï— itïtïdai Suxi go mamaatïrdamigadï.

Ïmo oki griego ñokadami kïïga buaboitudai go Suxi

21Dai bhodïrï jii go Suxi ami Galilea munisipiañdïrï dai ayi miadïrï xako Tiroana dai Sidonïrï tïtïgidu goka gïgïr kiiki. 22Dai ami dakatadai ïmo oki ix makïdï ïr pipiixaradïkatadai go Kananeos agaikïdï. Maiti ïr judiukatadai ïgai tudu. Dai mïï ayi ïgai xako dakatadai go Suxi daidi gïgïr ño daidi ikaiti,

—Aapi gin Tïanïdamiga, aapi ix makïdï ïr pipiixaradï go Rey Dabidkaru tudu— itïtïdai. —Soi gïlda gin nïida dai gin soiña. Ka arhiï soi taatamai ïmo gin maara oki biakatai ïmo tïañikarudï go diabora ïrana— itïtïdai. Dai muiyoko potïtïdai ïgai go Suxi gïgïr ñokaitai.

23Dïï gia go Suxi dodorhi bii dai mai aa noraidi ñoki. Daidi mamaatïrdamigadï Suxi mïï aagidi Suxi daidi potïtïdai,

—Aagidañi go oki sai imïna— itïtïdai. —Ka ojorhi aatïmï gïgïr ñokaitai gobai— itïtïdai.

24Dïï gia Suxi potïtïdai,

—Diuxi gin otoi an saidi soiñana gïr aaduñi judidiu ix makïdï óídaga tami Israelïrï. Kuga iimïdami kañiñiru gïn dukami ïgai tudu. Dai maiti ïr sïïrhi xi soikïda aanï go oki. Maiti ïr Israelita gobai kaxkïdï. Ïmo xibhïadïrï oidakami gobai tudu— itïtïdai.

25Dïï gia go oki mïï dibia buidïrï Suxi dai ami totonakïdï kïkiba daidi potïtïdai,

—Gin soiñañi aapi gin Tïanïdamiga— itïtïdai.

26Daidi Suxi potïtïdai,

—Maiti ïr judiu aapi oki dai kaxkïdï maiti ïr sïïrhi xi gï soiñagi aanï. Xi gï soiñagi aanï gobai ïr ïpïan dukami xi ïïxiadagi aanï bhiadї go aarhi dai maakadagi aanï googoxi— itïtïdai.

27Daidi go oki potïtïdai aidï,

—Buaboi aba ix dukai aagai aapi gin Tïanïdamiga. Dïï gia bïïxkïrï googoxi kïïga bia oigaragai ix ugiagi sasakigadï ix makïdï susurhigïi mesagadïañdïrï amudï tomaxi mai bia ïgai oigaragai ix ugiagi go bhiadї go aarhi. Dai podukai ïpï gin oigïdakai gin maaka oigaragai ix gin soiñagi aapi tomaxi maiti ïr judiu aanï— itïtïdai.

28Daidi Suxi potïtïdai,

—Agia kïïga aagai aapi oki. Kïïga buaboitudai aapi tudu— itïtïdai. —Ka busaimu go Diabora tïañikarudï ix makïdï gï maara ïrana dajatadai— itïtïdai.

Dai aidïpïrï ka kïïga duayi maradï go oki.

Duduadi Suxi mui naana maaxi kokokoñiadï

29Daidi jii go Suxi abhiadïrï xako atagaitadai ïgai go oki ïmadï dai go gïï sudagi ugidïana sïïrhi daibusai xako Galilea tïgidu gïï sudagi. Dai ayi ïgai ïmo gidana dai ami tïsai ïgai dai ami daiba. 30Dai ami dada mui odami dai baidati mui kokokoñiadï. Baidati ïgai chuchuekogami dai jaa ix makïdï mai bhaigakatadai ajiopadagi dai jaa ix makïdï mai nïadatadai dai jaa ix makïdï mai bhaigakatadai ix ñokiagi ïmadï jaa mui naana maaxi bipiakami kokodagai. Mui baidati ïgai tudu dai mïï tua ïgai buidïrï Suxi bai ïgai duduadi.

31Daidi go odami nïidi xïï kïïga ajiopai ix makïdï chuchuekogatadai dai ix makïdï mai bhaigakatadai aimïradagi ïpï. Dai nïidi ïgai ïpï ix ka ñokai ïgai ix makïdï mai bhaigakatadai ñokiagi dai ix makïdï mai nïadatadai ka kïïga nïayi ïpï. Dai mai tïtïgaitadai go odami ixtumaxi gïn tïtïgitoagi nïiditai gobai. Daidi ikaitiña ïgai,

—Xïïxi ïr gïdukami Diuxigadï go judidiu dai pomaaxi ibuayi— ikaitiña ïgai.

Bhibhidi Suxi maako mirhi odami

32Dai bhodïrï báí Suxi go mamaatïrdamigadï sai miadïrï gukibana daidi potïtïdai ïgai,

—Soi gin ïrhidi go odami bïïtarï— itïtïdai. —Ka ayi baika tasai ix tami gin ïmadï daraka ïgai dai mai bia ixtuma ugiagi. Mai otosa in ïrhidi sai nonoigïna ïgai apia dukai mai kia ugakai. Susuikitu antaada boiyamu tudu— itïtïdai.

33Daidi go mamaatïrdamigadï potïtïdai aidï,

—¿Dukatai tïïgana aatïmï kuadagai mosïïki odami bïïtarï? Mai tipu óídakami tanai tudu— itïtïdai.

34Daidi Suxi potïtïdai,

—¿Bïïki pan bia aapimï?— itïtïdai.

—Kubarakami pan ïmadï chïki batopa— itïtïdai go mamaatïrdamigadï.

35Daidi aagidi Suxi go odami sai daraibana ami dïbïrapi. 36Dai bhodïrï bhïiyi ïgai go batopa ïmadï pan dai sasaarai. Mos arhi kubarakamikatadai go pan. Dai aagidi ïgai Diuxi ïmo Diuxiatanamïidana dai bhodïrï maa ïgai go mamaatïrdamigadï sai maakana ïgai go odami. 37Daidi kabami muida go kuadagai asta xako bïïxi go odami kïïga gautadai daidi kïïga tataxkobai bïïxkatai. Dai ka ugakai ïmpagi ïgai kubarakami gïgïr asarai susudakami kuadagai sasakigadï ix makïdï bhaibitu. 38Dai ix makïdï gauu ïr maakoba mirhi go ïïgi kïkïïrhi dai ïkobïrakoga mui oki dai aarhi gauu ïpï. 39Dai gokiïrï Suxi aagidi go odami sai nonoigïna dai bhodïrï ïmo barkoïrï tïsai ïgai dai jii Magadanamu.

Currently Selected:

Mataibo 15: NTP

Highlight

Copy