Lukas 4
4
Go Lukas aagai sai go Diabora buirumada ïrhiditadai go Suxi dai Suxi maiti gï dagito
1Dai gokiïrï xi gï bakoanatu go Suxi ami go aki Jordanïrï sai bhodïrï jii ïgai abhiadïrï kïïga ïïgiditai ïgai Diuxi Ibhïadï. Dai Diuxi Ibhïadï imitu go Suxi oidigamu 2sai ami dakana gokobhai tasai. Daidi ami go Diabora abïnakiditadai go Suxi sai soimaaxi ibuadana soimaaxi iduiñtulda ïrhiditai. Dai maita gautadai Suxi toma lïïchi ami oidigana dakatai dai kabami bhiugimuka.
3Daidi go Diabora potïtïdai aidï,
—Aapi Suxi, ñokidañi go ojodai sai kuadagai naatona gobai pai biaka aapi ixtumaxi ugiagi. ¿Mai ix ïr Diuxi Maradï aapia?— itïtïdai.
4—Cho— itïtïdai Suxi. —Xadïrï gï ïïgidana aanï— itïtïdai. —Daiñi, Diuxi ñokidïrï ikaiti sai,
Mai xu xi mosïkaxi kuadagaiñdïrï óídaga odami, itïtïdai.
5Dai bhodïrï baidaja go Diabora go Suxi ïmapïkïrï xako tïkabaga dai ami otoma gatïtïïgidi bïïxi go oidigi aipakoga xako gatïanïi dudunukami.
6-7Dai potïtïdai ïgai go Suxi,
—Kïï gï tïgito nïida xïï gupuka go óídakami dai dudunukami dai xïï kïïga naana maaxi bia namïakami ïpï. Daiñi, aanï ïgai dai gatïanïi bïïxi gobai dai bhaiga aanï xi maakiagi xorai maakia ïrhiada aanï sai bhodïrï tïanïna ïgai bïïxi oidigi daama óídakami. Dai xi kuikiagi aapi Suxi tami gin buitapi gin xadutudaitai aidï gia gï maakimu aanï bïïxi gobai sai gatïanïna aapi— itïtïdai.
8Daidi Suxi potïtïdai,
—Xadïrï gï xadutudaiña aanï podukai. Diuxi ojadï ikaiti sai,
Diuxi ïgai daidi ïr Tïanïdamigadï odami dai mosïkaxi ïgai buidïrï gï agai xi kuikïskïdagi odami dai xadutuadagi, itïtïdai Suxi.
9-11Dai bhodïrï go Diabora baidakai go Suxi Jerusalenamu dai ami go gïï kiupai daama tïsagi xako bamioma tïkabaga daidi potïtïdai,
—Daiñi, Diuxi ojadïrï ikaiti sai,
Diuxi otosamu tïtïañikarudï sai gï nukatikana ïgai. Dai go tïtïañikarudï Diuxi gï daagïtikamu ïïkadïkïdï sai mai saranana aapi gï ïïkaso no odiana, ikaiti go oja— itïtïdai go Diabora.
—Kaxkïdï mïi taana igïïxi xibi nïidana sa bhai ïr buaboi sai gï nukadakamu ïgai. ¿Mai ix ïr Diuxi Maradï aapia?— itïtïdai.
12Dai Suxi potïtïdai aidï,
—Diuxi ojadïrï ikaiti ïpï sai,
Maiti gï agai xi aagidagi Diuxi saidi iduna ixtumaxi mos nïida ïrhiditai sa bhai iduna,— itïtïdai Suxi.
13Dai amaxi go Diabora dagito go Suxi chïki tasai dai ka mos nïnïrakatadai ix dukatai gïpiïrï daitudagi mai tïïgakai ixdukatai soimaaxi iduiñtuldagi aidï.
Suxi maa ñoki Nasaretïrï óídakami dai go óídakami ami mai ojoida kaï aatagidï dai bhaiyoma bhakoi Suxi bui dai mua agaitadai
14-15Dai Suxi gaatabuadatadai Diuxi Ibhïadï gubukarhigadïkïdï dai jii ïpamu Galileamu. Dai go óídakami ami aipakoga aagaiña go Suxi aidï. Dai aipakoga aïjïiña Suxi kikiupaigadïrï go judidiu ami Galileïrï dai gamamaakaiña aatagi óídakami. Dai bïïxi go óídakami aagaiña xïï kïï tuiga Suxi.
16Aipakoga aimïraitadai ïgai tudu Galileana dai ayi go arhi kii Nasaret tïgidukami xako ïr gïrakami ïgai. Daidi saapatoko baa ïgai kiupiana ami ix dukai ibuadana ïgai bïïxi saapatoko. Dai ami kiupiïrï kïkiba ïgai dai aagai ïmo ñoki ix makïdï ojixi Diuxi ñokidïrï sai kaïkana ix makïdï ami daraka. 17Daidi go tïanïdami ami kiupiana maa go ojai go Suxi ix makïdï oja go Isaiaskaru ïïki. Go Isaias ïr ïmo ñokituldiadamigadїkatadai Diuxi. Dai Suxi kupioka go ojai dai ami tïï xako podukai ojixi sai,
18 Diuxi Ibhïadï gin ïmadï daja. Ïgai tudu gin maa sïïrhikami ansai aituldana go bhai ïrhiaragai aatagi go odami ix makïdï bamioma ïr soititigami. Gin otoi ïgai tudu ansai aagidana aanï ix makïdï maamaixapikan duu sai oidaga kïïgakïrï bubaidaragai ïgai bïïtarï. Dai gin otoi ïpï ansai nïadatudana odami ix makïdï mai nïadagan duu. Dai sai kïïgakïrï bubaidana aanï ix makïdï soi dukai óídaga soi buididitai jaa. 19Gin otoi Diuxi Ibhïadï ansai aagidana aanï óídakami sai ka ayi ixtuigako Diuxi kïïgakïrï nïijada odami tudu, itïtïdai Suxi go odami aagaitai ix kaiti go Isaiaskaru ojadï.
20Dai amaxi kuu Suxi go libro dai ïpamu maa go tïanïdami kiupai dai ïpamu daiba. Dai bïïxkatai ix makïdï ami daraka apia nïnïidi go Suxi. 21Bai ïgai maa ñoki daidi potïtïdai,
—Xibi ka tami gïn buitapi ka po gï buimi ixtumaxi agaitadai go Isaiaskaru ïïki. Aanï tudu ïr ïgai ix makïdï agaitadai ïgai— itïtïdai.
22Dai bïïxkatai ix makïdï kaïkana ñokidï kïïga ñokaiña ïgai bïïtarï. Mai tïtïgaiña odami ixtumaxi gïn tïtïgitoagi mos ïï kïïga xigian dukai ñokaitai go Suxi daidi ikaitiña,
—¿Xako máí ïgai mos ïï bhai maaxkami ñoki? Tanaidïrï gïr saagida oidakami gobai di. ¿Mai ix ïr go Jose maradï gobai?— ikaitiña.
23Dai Suxi potïtïdai,
—Kïï maatï aanï sai mai kïïgakïrï gin buaboitudai aapimï gin ñoki. Daiñi, oidaga ïmo ñoki ix makïdï odami aagaiña xïïxkadï mai buaboitudagi ïgai ïmai. Potïtïdaiña ïgai sai, —Xi duduadadamikagi aapi gï duadañi ïïgi aapi tuduidï. Aidï gia gï buaboituda antaada aatïmï— ikaitiña odami xïxkadï mai buaboitudagi ïgai ïmai. Dai kïï maatï aanï sai bhaitoma podukai gin aagidamu aapimï. Kajioma aapimï tudu sai naana maaxi idui aanï maaxidaragai amïka Kapernaumana. Dai gin tañimu aapimï saidi ibuada aanï maaxidaragai podukai tami gïn saagida ïpï. Tami xakoga gïrakami aanï tudu. Ïma dukai maiti gin buaboituda antaada aapimï. Ka pomaaxi di. 24Kïïga ïr buaboi tudu sai xako ïr gïrakami ïmo ñokituldiadamigadï Diuxi ami go óídakami mai buaboida kaïkana ñokidï— itïtïdai.
25—Daiñi— itïtïdai. —Kïïga ïr buaboi sai ïki aidïxi oidakatadai go ñokituldiadami Diuxi Eliaskaru tïgidukïdï sai mai duudu baika umigi dan tajukami dai kabami jii bhiugigai tami Israelana. Dai muidukatadai bipiudu tami Israelïrï ix makïdï kabami tïgitokatadai soiñi aidï 26dïï gia bïïxkïrï aidïxi otoi Diuxi go Eliaskaru mai otoi sai soiñana tomarhi ïmadutai go bipiudu tami Israelïrï. Dai bhaiyoma otoi ïgai sai soiñana ïmo biudu xibhïadïrï oidakami. Otoi ïgai go Eliaskaru sai soiñana ïgai ïmo Zerapatïrï oidakami tudu ix makïdï Sidoniana bipiïyi— itïtïdai.
27—Dai aidïxi kia oidakatadai go Diuxi ñokituldiadamigadï Eliseokaru tïgidukïdï bhaitoma pogïdui ïpï— itïtïdai. —Aidï mui oidakatadai kokokoñiadï tami Israelïrï ix makïdï biakatadai go lepra tïgidukïdï kokodagai. Dai go Eliseokaru mai duadi tomarhi ïmadutai ïgai dai bhaiyoma duadi ïgai go Naamán ix makïdï ïr Siriañdïrï oidakamikatadai— itïtïdai Suxi go odami.
28Daidi bïïxi go odami ami kiupiana kabami bhakoi kaïkatai go Suxi aatagidï. 29Dai otoma gukiba ïgai dai aadaji ïgai go Suxi ami kiikiañdïrï. Dai go bhaabhaki xako óídakatadai ïgai ïmo gidi daama guka dai ïmo padïrï buarhiga. Dai gubuakïdï baidaja ïgai go Suxi no buarhigana dai gamo taana daituda aagai. 30Dïï gia Suxi mos daibusai odami saagida sïïrhi dai daibuna jii abhiadïrï.
Go Suxi busaitu ïmo diabora tïañikarudï ix makïdï ïmo kïïrhi ïrana dakatadai
31Dai bhodïrï jii Suxi gamo ïmo kiikiamu Kapernaum tïgidukami ix makïdï Galileana bipiïyi. Dai ïmo imidagai saapatoko gatïtïïgiditadai ïgai ñoki ami judidiu kiupaigadïana. 32Dai go Suxi kïïga mamaaxidi saidi ïr ïmo sïïrhikami biakami mos ïï kïïga ñokaitai ïgai dai go odami mai tïtïgaitadai ixtumaxi gïn tïtïgitoagi kaïkatai.
33Dai ami kiupiïrï dakatadai ïmo kïïrhi ix makïdï biakatadai ïmo tïañikarudï go diabora. Dai go diabora tïañikarudï gïgïrï ñokitu go kïïrhi daidi ikaiti,
34—Aapi Suxi, gïr dagitoñi— itïtïdai. —¿Aapi Nasaretañdïrï oidakami ix tuixi gïr sobhikïi aapi aatïmï ix makïdï ïr diabora tïtïañikarudï? ¿Gïr koda pïx agai dai dibia ïpï?— itïtïdai. —Kïïga gï maatï aanï tudu. Aapi ïr Diuxi otosadï dai aapi ïr ïko busaidadï Diuxi— itïtïdai.
35Daidi Suxi bhagakarai go diabora tïañikarudï daidi potïtïdai,
—Maiti ñokada aapi dai busai go kïïrhiañdïrï— itïtïdai.
Dai go diabora tïañikarudï dïbïrapi daitu go kïïrhi ami go odami buitapi dai dagito ka mai soimaaxi buididi bamioma.
36Dai go odami mai tïï ixtumaxi gïn tïgitoagi nïiditai daidi ikaitimi,
—Xïï gubuakami ñokai go Suxi. Asta go diabora tïtïañikarudï ïïgidi dai otoma bubuakïi dai daadagitoi odami di— ikaitimi.
37Podukai aatagaiña go odami aagaitai go Suxi aidï. Dai go aatagi ayi bïïxi aipakoga ami oidigïrï.
Suxi duduadi mui kokokoñiadï
38Dai bhodïrï busai go Suxi abhai kiupiañdïrï dai jii kiidïrï go Ximuñi. Dai tumudï go Ximuñi kabami kokokatadai oiditai toiñdagai kabami. Daidi aaduñdï go kokoadï aagidi go Suxi sai duadana. 39Daidi kïkiba Suxi ami sonoana xako kaatïkatadai go kokoadï dai mos aagidi go kokodagai sai maigobai imïna dai otoma dagito go toiñdagai. Dai otoma bañi go oki dai bhibhidi ïgai go Suxi ïmadï go jaa dadidakami ix makïdï ami darakatadai.
40Dai aidï urunoko karhioga dupikai tasai mui óídakami bua aaduñdï ix makïdï biakatadai naana maaxi kokodagai. Buapi ïgai go Suxi dai ïgai mos taata ïkadïkïdï dai ka duduadi bïïxkatai. 41Dai mui bubaitu ïgai diabora tïtïañikarudï odamiañdïrï ïpï. Dai go diabora tïtïañikaru gïgïrï ñokaiña aidï daidi ikaitiña,
—Aapi Suxi ïr Diuxi Maradï— ikaitiña.
Dïï gia Suxi bhagaidiña ïgai dai aagidiña sai mai aagaiña xorai ïgai. Kïïga maatïkatadai go diabora tïtïañikarudï saidi ïr Diuxi Otosadï go Suxi tudu.
Aipakoga jii go Suxi kiikidïrï óídakami dai gatïtïïgidi ñoki
42Dai xadiko ïïki jii go Suxi maigobai xako ïgiga oidigi. Daidi go odami gaagamu dai ayi xako dakatadai ïgai. Aagidimi ïgai go Suxi sai mai imïna abhiadïrï xako óídaga ïgai. 43Dïï gia Suxi potïtïdai,
—Bia aanï xi aituldagi go bhai ïrhiaragai aatagi maigobai go gaa gïgïrï kiikiïrï óídakami kia. Bia aanï xi aagidagi sai Diuxi tïanïi odami tudu. Pomaaxi bïïtarï gin otoi Diuxi— itïtïdai.
44Daidi jii go Suxi abhiadïrï dai gï aaga aiturhi go ñoki kikiupaigadïrï go judidiu bïïxi go gïgïr kiikiïrï ami Judea munisipiïrï.
Currently Selected:
Lukas 4: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
