Lukas 24

Chïki oki iji yaasakaruamu dai tïï sai kaxi gï duakatu Suxi ïpamu

1Gïn ibhïxi go oki go ibhïxtaragai tasai tudu. Dïï gia tumiñoko ïïki mos baakïkai ïkarhi iji amïka ïgai xako tïïtadai tukugadï Suxi. Dai bhïkai go xigian ubadami ix makïdï ka bhai duitadai ïgai tïkida agai tukugadï Suxi. Dai jaa oki oidi ïpï. 2Dai aïkai ïgai go tïjobiana sai tïï ïgai ix ka maigobai daka go odai ixtukïdï taagiña kuupikatadai gobai. 3Dai baapa ïgai dïï ka mai tïï ïgai tukugadï Suxi Gïr Nukadakami.

4Dai kia mo gukatadai go oki dai mai tïtïïgai ixtumaxi gïn tïtïgitoagi mai tïïgakai tukugadï Suxi bai todian dukai gïn maaxitu goka kïkïïrhi. Ami sonoana gukatadai ïgai xako kaatïkatadai Suxi tukugadï dai yukuxidï go kïkïïrhi kïïga totoarïi. 5Dai go oki kuiki ami kabami duduadimukai.

Dai go kïkïïrhi potïtïdai,

—¿Tuimïxi koidadï saagida gaagai aapimï ïgai ix makïdï ïr Duakakami?— itïtïdai. 6—Mai daka ïgai tami tudu. Ka duakatu ïgai di— itïtïdai. —Gïn tïgitobïrai tudu ix gïn tïtïdai ïgai mai kia iimïkai aapimï Galileañdïrï baasïki. 7Pobai gïn tïtïdai ïgai sai gï tïïgidatuda agai soimaaxi ibuadami buidïrï. Dai saidi kuruxiana gï xixatuda agai. Dai sai bhodïrï baika tasaikïdï duakatuda agai ïpamu— itïtïdai go kïkïïrhi ix makïdï totoarïi yukuxidï.

8Dai go oki kïïga gïn tïgito aidï ix tïtïdaitadai go Suxi. 9Dai aa surhi ïgai abhiadïrï tïjobiañdïrï dai ayi xako darajatadai go gaa. Dai aagidi bïïxi gobai go bhaibuxtama dan ïmoko ïko bubaidadï Suxi. Dai aagidi ïgai bïïxi go gaa mamaatïrdamigadï Suxi ïpï. 10Ix makïdï aagidi ix dukatai pogïduitadai ïr go Maria Magdalena dai go Juana dai go gïmai Maria ix makïdï ïr dïïdï Santiago. Dai jaa oki ïpï ix makïdï oiditadai aagiditadai go ïko bubaidadï Suxi ïpï. Aagidi ïgai go Suxi ojotosadï tudu.

11Dai go ojotosadï Suxi ïmo buirudagai dukai kaï aatagidï go oki dai mai buaboitu. 12Dïï gia go Piduru otoma mïï gamo tïjobiamu. Dai ka aïkai sai kuiki dai nïnïnai tukabiako dai tïï mosïkaxi go manta ixtukïdï bhixapikatadai tukugadï Suxi. Dai aa gïi ïgai dai jii kiidamu dai tïtïitoi ixtumaxi pogïduitadai.

Gï maaxitu go Suxi buidïrï goka kïkïïrhi boiyïrï iimïdami

13Dai aidï tasïrï goka kïkïïrhi ix makïdï ïr mamaatïrdamigadï Suxi iimïitadai ïmo arhi kiikiamu xako Emaus tïgidu. Parï goka hora imidagai gobai Jerusalenañdïrï. 14Dai boiyïrï iimïi ïgai dai gaatagai aagaitai ixtumaxi pogïduitadai Suxikïdï amïï Jerusalenïrï. 15Aatagaitadai ïgai ami boiyïrï iimïitai dai Suxi ayi ami xako iimïi ïgai dai oi. 16Dai ï goka kïkïïrhi nïidi dïï Diuxi mai maa oigaragai ix maatï nïijada ïgai xorai ïgai.

17Dai Suxi potïtïdai,

—¿Ix tumaxi aatagaiña aapimï boiyïrï iimïitai?— itïtïdai.

Dai ami gukiba ï goka kïkïïrhi kabami soigamukatai. 18Dai ïmoko Kleopas tïgidu dai ïgai potïtïdai go Suxi,

—¿Jerusalenïrï pïx aimïraitadai aapi dai mai máí ix tumaxi pogïdui amïka? Mosïkaxi aapi mai maatï ïrhi aanï. Bïïxi odami maatï di— itïtïdai.

19—¿Tuma aagai aapimï?— itïtïdai Suxi.

Dai go kïkïïrhi potïtïdai,

—Aagai aatïmï ix dukatai pogïdui Suxi go Nasaretañdïrï oidakïdï. Diuxi dai odami kïïgakïrï nïidiña ïgai ïmo ñokituldiadamigadïkatai ïgai Diuxi. Kïï gubuakami dukai aatabuadana ïgai dai kïïga ñokaiña tudu. 20Dïï gia go bhaitï gukakamigadï go dadaxdadami ïmadï gïr tïtïanïdami tïïgi ïgai go Romanos dai gatïjai ïgai muaragai. Podukai kuruxiana gï xixatu ïgai. 21Aatïmï po gïr ïrhiditadai sai go Suxi kïïgakïrï gïr busaida agaitadai aatïmï Israelitas sai ka maiti gïr tïanïna go Romanos. Dïï xibi kaxi pogïdui baika tasai abhiadïrï xi gï muatu ïgai— itïtïdai.

22—Dïï gia xibi naana maaxi gïr tïtïitoi aatïmï ixtumaxikïdï gïr aagidi chïki oki. Xibi kiamoko ïïki iji ïgai tïjobiamu xako tïïtadai ixtumaxi tukugadï go Suxi. 23Dai kaxi as mai tipukatadai tukugadï. Dai bhodïrï dada go oki xako darajatadai aatïmï dai gïr aagidi sai tïïtadai ïgai goka tïtïañikarudï Diuxi ix makïdï aagidi sai kaxi gï duakatu go Suxi ïpamï. 24Dai ïïmadutai gïr aaduñi iji gamo tïjobiamu ïpï dai bïïxi tïï ïpï ixdukatai gïr aagidi go oki. Dïï gia modukai mai tïï ïgai go Suxi— itïtïdai.

25Dai Suxi potïtïdai,

—Agia kapaka gïn momo aapimï odami— itïtïdai. —Mai oton buaboitudai aapimï bïïxi ixtumaxi oja ñiñokituldiadamigadï Diuxi ïïki tudu. 26Utudama gin aagidi ixdukatai daibusai ïgaikïdï ix makïdï ïr Diuxi daasadï Rey. Dai ka ojixi sai gï agaitadai xi taatagi ïgai bïïxi gobai ix makïdï aagai aapimï sai bhodïrï gobai ix makïdï ïr Rey kïïga bhïna gïdukami xadutudaragai. Bïïxi ojixi gobai di. Kaxkïdï gï agaitadai ix maatïkagi aapimï bïïxi gobai— itïtïdai.

27Dai bhodïrï Suxi gï aaga tïtïgidi ñoki ï goka kïkïïrhi. Aagidi ix tïiya ïrhidi ojadï go ñokituldiadamigadï Diuxi xako aagai ïgai go Suxi. Go Moises ojadïkïdï gï aaga ïgai dai bhodïrï aagidi ix tïiya ïrhidi ojadï bïïxi go gaa ñokituldiadamigadï Diuxi ïpï xako aagai ïgai go Suxi.

28Dai aidïxi ka ayi ï goka kïkïïrhi ami Emausïrï saidi go Suxi kia bhaitïkioma daibuñadan dui. 29Dïï gia go iimïdami kabami aagidi sai amaxi biïna ïgai ïmadï. Potïtïdai ïgai,

—Tanaxi gïr ïmadï bii. Ka didiaymi oidi di— itïtïdai.

Dai go Suxi baa ami kiiyana dai ïmadï bii agai.

30Dai aidïxi ka ugia agaitadai Suxi ïgai ïmadï dai mesa buidïrï darakatadai sai Suxi bhïiyi ïmo pan dai táí Diuxi ïmo Diuxiatanamїidaragai dai sasarai dai maa go kïkïïrhi. 31Dai ka mos podunakai ïgai bai Diuxi maa oigaragai go kïkïïrhi sai maatï nïidana ïgai go Suxi dai máí ïgai. Dai bhodïrï todian dukai mai tiputa go Suxi ami. 32Baidi go kïkïïrhi pobai gïn tïtïdai ïïgi aipakoga,

—Agia mïmïïda antaadakana gïr ibhïdaga bhai ïrhiarakïdï gïr aagiditai ïgai ix tïiya ïrhidi Diuxi ñokidï boiyïrï iimïitai aatïmï ¿aba?— ikaitimi.

33Dai bhodïrï obaimi ïgai dai bhïiyi boi ïpamu Jerusalenamakoga.

Dai ka aïkai ï goka kïkïïrhi Jerusalenïrï tïï ïgai go bhaibuxtama dan ïmoko ojotosadï Suxi ïmo ïmpaiñdaragïrï ïmadï jaa ix makïdï urabakatadai ïpï. 34Dai ami ïmpaiñdaragïrï ikaititadai go ojotosadï Suxi,

—Kïïga ïr buaboi sai duaka Gïr Nukadakami. Gï maaxitu ïgai go Ximuñi buitapi tudu— ikaititadai.

Gï maaxitu go Suxi muidutai go mamaatïrdamigadï buitapi

35Dai bhodïrï ï goka kïkïïrhi ix makïdï utudama ayitadai aagidi ïgai go gaa ix dukatai daibusai boiyïrï iimïitai ïgai. Dai aagidi ïgai sai máítadai ïgai go Suxi aidïxi saasarai ïgai go pan. 36Dai kia ñokaitadai ïgai ami bai todian dukai gï maaxitu go Suxi dai ami kïkiba saagida dai biaturhi mamaatïrdamigadï. 37Dai duduadimu go mamaatïrdamigadï pobïn ïrhiditai sai ïr ïmo sïiñarhi. 38Dai Suxi potïtïdai,

—¿Tui mïxi duduadimuka dai naana gïn tïtïitoi?— itïtïdai. 39—Gïn tïgito abïr nïida gin ïïka ïmadï gin ïïkaso. Aanï aba. Daiñi, gin taatabïrai dai nïida. Daiñi, ïmo sïiñarhi mai oo dai mai tukuga di. Dai ka nïidi aapimï sai aanï gia— itïtïdai.

40Pobai itïtïdai ïgai tudu dai tïtïgidi ïkadï ïmadï ïïkasodï.

41Dai bhai gïn ïjïrhi go mamaatïrdamigadï nïiditai dai mai tïtïgaitadai ixtumaxi gïn tïtïgitoagi. Dïï modukai mai kïïga buaboitudai ïgai xi kaxkïdï Suxi potïtïdai,

—¿Bia mïxi ixtuma ugia aanï?— itïtïdai.

42Dai mamaatïrdamigadï maa lachi batopa gaikami 43dai Suxi bhïiyi go batopa dai uu ami buitapi mamaatïrdamigadï.

44-45Dai bhodïrï soi Suxi tïgibudadï go mamaatïrdamigadï sai maatï kaïkana ïgai Diuxi ñokidï. Daidi potïtïdai ïgai,

—Gïn tïgitobïrai aidïxi gïn aagidiña aanï sai bïïxi gï agaitadai xi po gï duñagi ix dukatai ojixi go Moises ojadïrï dai go Salmo librogadïrï dai go ojadïrï bïïxi go ñiñokituldiadamigadï Diuxi. 46Ïgai podukai oja tudu sai Diuxi otosadï Rey biakatadai xi soimaaxi taatagi dai mukiagi dai sai bhodïrï baika tasaikïdï biakatadai ïgai xi ïpamu duakatudagi. 47Dai oja ïgai ïpï sai Diuxi otosadï Rey maaki agai gubukarhigai mamaatïrdamigadï sai aituldana ïgai idi ñoki bïïxi óídakami. Gï agai xi bïïxi óídakami maatïkagi sai bia xi ïma dukai gïn tïtïgitoagi sai oigïrhi biïna soimaaxkamigadï. Gï aagai xi gï aituldagi ñoki go óídakami Jerusalenïrï ïpïgioma dai gokiïrï bïïxi go gaa óídakami oidigi daama. 48Aapimï ïr nïijadami tudu sai bïïxi daibusai aanïkïdï ixdukatai ojixi. Dai gï agai xi aagagi aapimï bïïxi ix tuma nïidi— itïtïdai.

49—Daiñi— itïtïdai. —Ka podukai aagai gin Oga sai gïn maaki agai Ibhïadï gïn abhana dai aanï gïn otosdamu ïgai. Dïï gia gï agai xi tanaxi Jerusalenïrï biiyagi aapimï dai nïnïrakagi asta xïxkadï Diuxi Ibhïadï gïn maakiagi gubukarhigai tïbagiañdïrï— itïtïdai.

Tïsai Suxi tïbagiamu

50Dai bhodïrï Suxi baidakai mamaatïrdamigadï asta Betania ukami. Dai ami go Suxi tïkabi bañigi ïïgi ïkadï dai gadaanïi Diuxi sai kïï tuigakana ïgai mamaatïrdamigadï bïïtarï. 51Dai kia gadaanïi ïgai dai ka taiyako imimi dai gï baidakatu tïbagiamu. 52Dai go mamaatïrdamigadï ami iduñi ïmo xadutudaragai Suxi bïïtarï dai bhodïrï aa surhi ïgai Jerusalenamu dai kïïga bhai gïn ïrhiatugai ïgai. 53Dai ami Jerusalenïrï dudatai ajiopïiña ïgai go gïï kiupiamu dai oigïda ñokaiña ïgai Diuxi bïïtarï.

Mosïkaxi.

Currently Selected:

Lukas 24: NTP

Highlight

Copy