Lukas 13
13
Suxi aagidi go odami sai ïma dukai gïn tïtïgitokana ïgai
1Dai amaxi ami dada chïki kïkïïrhi dai aagidi go Suxi sai go dunukami Pilato tïgidukïdï koi chïki kïkïïrhi go gïï kiupiïrï Jerusalenana. Galilea munisipiañdïrï óídakami ïgai ix makïdï gïn koditu. Gadadaxditadai ïgai buxtaki Diuxi xi amaxi koi go Pilato dai ïradï gï bïïnagi go buxtaki ïradï ix makïdï gadadaxditadai ïgai.
2Daidi kaïkai ix kaiti go kïkïïrhi sai Suxi potïtïdai go odami,
—Kïïga po gïn ïrhiada antaada aapimï sai go Galileañdïrï óídakami ix makïdï gïn koditu bamioma ïr soimaaxi ibuadami xi bhai go gaa óídakami ami Galileana dai sai kaxkïdï gïn koditu ïgai podukai 3dïï maiti ïr buaboi gobai. Daiñi aapimï mai bamioma kïï tutuiga xi bhai ïgai. Gï agai xi kïïga gïn tïgito nïijadagi ïïgi aapimï tudu. Ix mai ïma dukai gïn tïtïgitoagi aapimï ïïgi gïn soimaaxkamigakïdï aidï gia aapimï ïpï mos koi agai— itïtïdai.
4—Dai oi Suxi aatagidï daidi potïtïdai ïgai go odami,
—Kïï maatï aapimï ix dukatai pogïdui miadïrï Jerusalen, sai ami gïi go gïï kii tïkabakami ami xako Siloé tïgidu oidigi. Kïïga maatï aapimï sai ami gïn boixatu bhaibuxtama dan mamaakoba odami gïsïkai gobai. ¿Dai ïgai ix bhai xi bamioma ïr soimaaxi ibuadamikatadai xi bhai go gaa Jerusalenïrï óídakami xi kaxkïdï pomaaxi daibusai? 5Cho tudu. Daiñi aapimï po gïn ïrhiada antaada sai bamioma maiti ïr soimaaxi ibuadami aapimï xi bhai ïgai ix makïdï koi dïï maiti ïr buaboi gobai. Dai aanï aagai sai xi mai ïma dukai gïn tïtïgitoagi aapimï ïïgi gïn soimaaxkamigakïdï aidï gia aapimï bïïxkatai mos koimu ïpï— itïtïdai.
6Dai bhodïrï aagai Suxi ïmo maaxidaragai aatagi sai maatïkana go odami ixdukatai aatabuayi Diuxi. Dai potïtïdai ïgai go odami,
—Ïmo imidagai kïakatadai ïmo igoxi dïïdï dïbïragadïrï ïmo kïïrhi. Dai nukaturhi ïgai ïmai kïïrhi go dïbïrai. Dai dudatai didibaiña go tuidakami go dïbïrai gaagaitai igoxi dai mai tïtïgaiña. Mai ibhaidakana go uxi tudu. 7Daidi go tuidakami potïtïdai go nukadakami dïbïradï,
—Ka baika umigi didibaiña aanï dai gaagaiña ibhiadï idi uxi dai mai tïtïgaiña. Daitudañi bhaiyoma. Ka mos sobhikïi gobai— itïtïdai.
8Daidi go nukadakami go dïbïrai potïtïdai,
—Aapi gin amu, maiti daituda kia. Gin maakañi oigaragai ïpï ïmo umigi kia xi kïïga moikadagi aanï go dïbïrai go uxi uta dai xi daaxidagi ïpï jaa dïbïrai kïï duadixikami. Dai aidï gia xi ibhiatïdagi gobai dagitomu aapi 9dïï gia xi mai ibhiatïdagi gobai aidï gia daituda aapi— itïtïdai.
Suxi duadi ïmo kokoadï ïmo imidagai ibhïxtaragai tasïrï
10Dai ïmo imidagai Suxi gatïtïïgiditadai ñoki ibhïxtaragai tasïrï. 11Dai ami dakatadai ïmo oki ix makïdï bhaibuxtama dan mamaakoba umigi abhiadïrï kokokatadai. Ïmo diabora tïañikarudï dakatadai ïgai ïrana dai tupixtudakatadai. Maiti ixtutuidikïi ïgai xi sïïrhiñdagi tukugadï toma lïïchi. 12Dai tïïgakai Suxi go oki báí ïgai sai miadïrï kïkibana daidi potïtïdai,
—Aapi oki, ka mai kokoadïkamu aapi xibi abhiadïrï bhaitiakoga— itïtïdai.
13Dai taata ïïkadïkïdï bai otoma sïïrhi kïkiba go oki dai aagai xïïxi ïr gïdukami Diuxi.
14Dïï gia go tïanïdami kiupaigadïrï judidiu ami dakatadai dai bhamu nïiditai sai go Suxi duaditadai go oki ibhïxtaragai tasïrï. Saapatokotadai aidïxi duadi ïgai tudu. Daidi go tïanïdami kiupiana potïtïdai go odami,
—Aapimï odami, kïïga bia aatïmï oigaragai xi naadami tasai aatabuadagi dai ibhïxtaragai tasïrï gia cho. Gï agai tudu xi dadiagi aapimï dai gïn duduadadagi ïmai tasïrï mai xu xi ibhïxtaragai tasïrï— itïtïdai.
15Dai Suxi potïtïdai,
—Agia pupuiruga aapimï. Pokaiti aapimï sai maiti gï aagai xi soiñagi ibhïxtaragai tasïrï— itïtïdai. —Kïïga ibuadami gïn dadasai ïïgi aapimï dai maiti ïr buaboi. Pokaiti aapimï sai maiti gï agai xi duadiagi ïmo kokoadï ibhïxtaragai tasïrï. Dïï gia, ¿Aapimï ix bhai xi mai upasaiña ïmo gïn soiga bopoixi xiïpï gïn soiga axñitu ix makïdï no xibhï bupurakagi sai yïïdana sudagi? ¿Bhai ix mai pobuadana aapimï tomaxi ïr ibhïxtaragai tasïrïkagi? Xadïrï mai upasaiña aapimï di. 16¿Kaxkïdï mai ix ïr sïïrhi xi soiñagi aanï idi oki ïpï? Daiñi, go diabora ka burakami duu biakatadai idi oki bhaibuxtama dan mamaakoba umigi kokoadïkatai gobai. ¿Mai ix gï agai ix duadiagi gobai tomaxi ibhïxtaragai tasïrïkagi gobai? Ïmo pipiixaradï gobai go Abraamkaru ïpïan dukai aapimï di— itïtïdai.
17Dai aidïxi potïi Suxi, bïïxkatai ix makïdï bui bïïtïkatadai xia ïjïï. Dïï gia bïïxi go gaa odami bhai gïn ïrhiditadai nïiditai xïï xigiamaaxi aatabuayi Suxi.
Suxi aagai ïmo maaxidaragai ñoki dai aagai ix dukatai gatïanïi Diuxi
18Daidi Suxi potïtïdai go odami,
—Gïn aagidamu aanï ix dukatai aatabuayi Diuxi xïïxkadï gatïanïdagi ïgai. 19Daiñi, xïïxkadï gatïanïdagi Diuxi, gobai ïr ïpïan dukami ïmo uxi kaidï kïïga arhidukami ix makïdï ïmo kïïrhi ïi dïbïradïana. Dai busai gobai dai kïïga gïï dai ïmo gïdukami uxi gï naato. Dai gokiïrï asta kosatai ujurugi ami go uxi maamaradïana ka gïrakai gobai. Pomaaxi gïrai aaduindadï Diuxi tudu xïïxkadï gatïanïdagi ïgai. Arhiduka maaxi tukamïrï dai gokiïrï kïï gïdukami gïrai gobai— itïtïdai.
20Dai potïtïdai ïgai ïpï,
—Ïpïpï gïn aagidamu aanï ix dukatai maaxi Diuxi aaduindadï xïïxkadï gatïanïdagi ïgai. 21Xïïxkadï gatïanïdagi Diuxi, gobai ïpïan buayi xïxkadï ïmo oki bïnaidagi lïïchi kopodakarui parï ïmokobhai litro tuiyi tïrhigi. Dai tomaxi mosïkaxi lïïchi bïnaidi ïgai dai go kopodakarui ka mai maaxkagi saagida bïïnakai go tuiyi bïïxkïrï gokiïrï gïrai gobai dai bïïxi susudadai gobai go tuiyi dai kopodatudai gobai. Dai pomaaxi Diuxi aaduindadï ïpï gatïanïitai ïgai odami saagida. Tukamïrï mai xii ixtumaxi gïdukami maaxi dïï gia gokiïrï kïïga gïdukami biïyi gobai— itïtïdai.
Suxi aagai sai mui odami Diuxi aaduñdï gïn ïrhidi dai maiti ïr buaboi dai ïgai mai biaka agai oigaragai xi Diuxi tïanïdagi
22Daidi go Suxi apia imïitadai Jerusalenamu dai aijimi mui arhi kiikiïrï dai gatïtïïgidiña ñoki go óídakami. 23Dai ïmadutai go odami potïtïdai go Suxi,
—Aapi Tïanïdami, ¿Buaboi xi sai mai xii mui óídakami kïïgakïrï bubuaki agai dai mai xii mui kïïgakïrï óídaka agai bïïxkïrï bïïtarï?— itïtïdai.
Dai Suxi potïtïdai go odami,
24-25—Go kïïgakïrï bubaidaragai ïr ïmo kuuparagai arhidukami gajiakoga duu xako gï agai xi bapakiagi odami ïmo kiiyïrï dai go tuidakami go kii ïr Diuxi. Kabami abïr gïn aaga dai bapaki ami xako mai gïdu gajiakoga tudu. Kaxkïdï tudu ayimu ixtuigako tuidakami go kii kuupa agai go kuuparagai dai aidï ka mai bhaigakamu óídakami ix bapakiagi. Muidutai aapimï kidigamadïrï bimu aidï dai gaagamu ixdukatai bapakiagi dai ka mai ixtutuidimu. Aidï gataañimu aapimï baakigai dai potïdamu aapimï Diuxi,
—Aapi Tïanïdami, kupiokañi go kuuparagai xi bapakia aatïmï— itïimu aapimï aidï.
Dïï gia Diuxi pobai gïn tïdamu,
—Maita an maatï xajadïrï óídakami aapimï— itïimu ïgai.
26Dai aapimï potïdamu,
—¿Dukatai maiti gïr maatï aapi? Gï ïmadï gakuadana aatïmï dai gayïdana di. Dai aapi gamaakaiña ñoki xako óídakami aatïmï— as tïdamu aapimï.
27Dïï gia Diuxi pobai gïn tïdamu aidï,
—Kaxi aant gïn aagidi ansai mai maatï xajadïrï óídakami aapimï. Iimibïrai aapimï tabhiadïrï. Soimaaxi ibuadami aapimï di— gïn tïdamu Diuxi.
28—Kabami soi gïn ïjïldamu aapimï aidï— itïtïdai. —Tïïgimu aapimï go Abraamkaru ïmadï go Isaakaru dai go Jakobokaru xi ami daraka xako gatïanïi Diuxi dïï gia aapimï gïn adaimu Diuxi abhiadïrï dai ka mai biakamu aapimï oigaragai xi gïn tïanïdagi Diuxi. Kaxkïdï kabami suanïdamu aapimï dai kïrïndamu gïn taatamu soimaaxi taatakatai— itïtïdai. 29—Daidi dadimu jaa odami bïïxi aipadïrï oidigi daamaiñdïrï dai ami daraibakai gaugimu ami xako gatïanïi Diuxi. 30Dai mui odami ix makïdï tïkabioma dukai daraka xibi ïgai dai bamioma dumarhi darakïdï dukai bimu aidï. Dai ïïmoko ix makïdï dumarhi dukai daraka xibi ïgai dai kïïga tïkabi dukai darakamu aidï kaxi gatïanïitai Diuxi— itïtïdai.
31Dai aidï tasïrï ami ayi chïki fariseo ami xako dakatadai Suxi daidi potïtïdai,
—Imimudai aapi tabhiadïrï— itïtïdai. —Gï mua ïrhidi go dunukami Herodes— itïtïdai.
32Dai Suxi potïtïdai,
—Agia kaxokai ïrhiadan tuiga go Herodes. Aagidabïrai tudu sai xibi dai xoroko kia bubaidamu aanï tïtïañikarudï diabora go odamiañdïrï dai duduadadamu aanï odami kia ïpï dai baasïmakïdï ka naatomu aanï gin aaduindaga— itïtïdai. 33—Bia aanï ix oijadagi gin imidaga kia tudu dai aiyagi Jerusalenana. Ami Jerusalenana tudu ïr xako gïn koditudai ñiñokituldiadamigadï Diuxi di. Dai kaxkïdï gï agai xi ami aiyagi aanï sai ami gin muatudagi aanï ïpï— itïtïdai.
Suxi potïtïdai go Jerusalenïrï óídakami sai soi gï ïrhiditadai ïgai bïïtarï
34Dai bhodïrï aagai Suxi ïmo ñoki aagaitai go Jerusalen daidi ikaiti,
—Aapimï Jerusalenïrï óídakïdï, soi gin ïrhidi aanï aapimïkïdï. Aapimï tudu ix makïdï maiñana ñiñokituldiadamigadï Diuxi dai kodaiña. Ka muiyoko ipïrhidiña aanï xi gïn ïmpaidagi dai gïn nukadakagi ïpïan dukai xi ïmo takuku nukadakana maamaradï aanadï uta. Podukai gïn nukada ïrhidiña aanï dïï aapimï maiti ipïrhi. 35Dai xibi otoma ka dagitomu aanï gïn kii dai ka maiti gin nïijadamu aapimï asta xïïxkadï aagadagi aapimï ïmo bhai ïrhiaragai ñoki in aagaitai aanï. Aidï po kaitidamu aapimï sai,
Diuxi maakana bhai ïrhiaragai ïgai ix makïdï ïr Diuxi otosadï, ikaitidamu aapimï gin aagaitai aanï.
Dai aidï gia gin nïijadamu aapimï ïpamu— itïtïdai.
Currently Selected:
Lukas 13: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
