Jonas 1
1
1Ïïki oidakatadai ïmo kïïrhi Jonas tïgidukami. Ïgai ïr maradïkatadai ïmo kïïrhi Amitai tïgidukami. Dai ïmo imidagai Gïr Nukadakami aataga ïmadï Jonas daidi potïtïdai,
2—Mïïka aagida go oidakami go gïï kiikiïrï xako Ninibeïrï tïgidu, aagidañi sai kïï maaxi kaatï aanï in buidïrï go soimaaxkamigadï ix makïdï ibuayi ïgai. Kaxkïdï koda iñagai aanï dai xia duada iñagai bhaabhakidï— itïtïdai Gïr Nukadakami go Jonas.
3Dïï gia go Jonas maiti ipïrhi xi imiagi. Daibuna mïï ïgai bhaiyoma mai ïïgida ïrhiditai Gïr Nukadakami. Ayi ïgai go gïï sudaïrï ugidana xako Jope tïgidu ïmo gïï kiiki dai xako mui aïjïiña barko. Ami tïï ïgai ïmo barko Tarsiamaako imïdami dai sabïrhi ïmo boleto. Maiti ipïrhiditadai ïgai xi Gïr Nukadakami tïïgiagi dai tïsai barkoana.
4Bhodïrï jii go barko go gïï sudagi dama. Dai ka ïrana ïxi imïi tai Gïr Nukadakami otoi ïbïrhi kabami. Ïmo gïï xiborhiki dukai kïkiba gobai. Karhioga dupitadai go barko tudu. 5Dai go kïkïïrhi iimidadami go barko ka ïbhïimi xi bhaikoagi dai gïn aaga daañigi ïgai ix makïdï didiuxi aagai ïgai. Dai gïn aaga sudaïrï surhi kukuspidï sai mai bïïtïkana go barko. Dai go Jonas mos koso barko ïraana xako bïïtï kukuspi.
6Dai kapitañigadï go barko mïï kïkiba xako kaatïkatadai Jonas dai potïtïdai,
—Nïñiñi aapi parïgami— itïtïdai. —Daañiñi go Diuxi ix makïdï buaboitudai aapi. Maatï xi ipïlda ïgai xi gïr soiñagi sai mai koiyagi aatïmï— itïtïdai.
7Dai go iimidadami go barko biakana aarhi uxi ixtukïdï maatiagi xorai ïr duñidï xi gïn buidïrï ayi go soi ïrhiaragai ïbïrhikïdï. Daidi ikaitimi ïgai,
—Tï nïida idikïdï xorai ïr duñidï xi gïr ayi idi soi ïrhiaragai— ikaitimi ïgai. Dai podui ïgai dai Jonas ayi gobai.
8Go kïkïïrhi naana maaxi tïkakai go Jonas aidï,
—Gïr aagidañi, ¿Ix tumaxi dui aapi xi gïr dibiji podukai ïbïrhi?— ikaiti. —¿Pïx tumaxiïrï aatabuayi aapi tudu? ¿Dai padïrï imïdami aapi?— itïtïdai. —¿Dai padïrï oidakami aapi? ¿Dai ix tïgidu gï ñoki ix makïdï ñokai aapi?— ikaiti go kïkïïrhi.
9Dai Jonas itïtïdai aidï,
—Israelita aanï. Dai buaboitudai aanï Diuxi Gin Nukadakami ix makïdï ïr tïbagiana oidakami. Ix makïdï idui oidigi ïmadï sudagi tudu— itïtïdai. 10-11—Daibuna mïï aanï mai ïïgida in ïrhiditai gin Nukadakami— itïtïdai.
Dai kabami duduadimu go kïkïïrhi kaïkai aatagidï. Dai go sudagi ïmadï go ïbïrhi apia bamioma xigarhi bujimi. Tai go kïkïïrhi potïtïdai go Jonas,
—¿Tuipïxi mai ïïgidi gï Nukadakami?— itïtïdai. —¿Xibi dukatai gï duna aatïmï xi dodorhi biïna go sudagi?— ikaiti go kïkïïrhi.
12—Sudaïrï abïr gin daituda bai podukai dodorhi bimu gobai— itïtïdai go Jonas. —Kïï maatï aanï saidi aanï ïr gin duñi xi gïn buidïrï gïn ayi go ïbïrhi— itïtïdai.
13Dïï go kïkïïrhi mai ïïgidi Jonas dai kabami gïn aaga papaiñximi go sudagi kaakaparakami uxikïdï kabami imibuda ïrhiditai go barko. Ayi ïrhiditadai ïgai sudagi ugidïrï dïï mai ñako ïbïrhi bui. Mos apia bamioma xigarhi bujimi go ïbïrhi bhaiyoma.
14Dai go iimidadami barkoañdïrï daañimi Gïr Nukadakami daidi potïtïdai,
—Idi kïïrhi ïr duñidï— itïtïdai. —Maiti gïr dagito xi koiyagi aatïmï bïïxkatai ïgai ïmadï. Aapi adaama ïr Tïanïdami di. Dai aapi ibuayi ïïgi pïx dukatai ipïrhiadagi. Kaxkïdï aatïmï gï daanïi xibi xi maiti gïr aituldagi aapi gïïgïbidaragai xi muagi aatïmï idi kïïrhi sudaïrï daitudakai. Xi duñada maiti ïr duñidïkagi ïgai xi podukai gïr ayi go ïbïrhi— ikaiti barkoana iimidadami gadaanïitai ïgai Diuxi.
15Mos potïi ïgai dai bhodïrï sudaïrï daitu ïgai go Jonas tai otoma gï dodorhitu go gïï sudagi. 16Dai go kïkïïrhi kïï gïdukami dukai tïï Gïr Nukadakami nïiditai xi gï dodorhitu go gïï sudagi. Dai daaxi ïgai ïmo daxdaragai dai aagai sai buaboituda agai.
17Dai Gïr Nukadakami ka ïkiaxdïrï otoitadai ïmo gïï batopa dai ïgai bhaa go Jonas. Baika tasai dai baika tukagi bii go Jonas bookadï ïraana go batopa.
Currently Selected:
Jonas 1: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
