Juan 8

Gï bhïitu ïmo oki abhana kaatïkatai ïmai ix makïdï maiti ïr kunadï

1 Dai bhodïrï tïsai Suxi ïpamu go gidiïrï Olibo tïgidukami dai ami bii ïmo tukagi. 2Dai xadiko mos maaxiko oidigi ïpamu jii ïgai go gïï kiupiamu Jerusalenïrï dai mui óídakami gïn ïmpagi bai Suxi daiba ami dai gamaa ñoki. 3Kia ñokaitadai go Suxi bai ami dada chïki bhaitï gukakami judidiu ix makïdï ïr ojadami sïïrhikami ïmadï fariseos. Baidati ïgai ïmo oki ix makïdï gï bhïitu abhana kaatïkatai ïmai ix makïdï maiti ïr kunadï. Dai ami kïi ïgai go odami buitapi.

4Daidi go kïkïïrhi ix makïdï buatadai go oki gaagaitadai ixtukïdï gïpiïrï buajagi go Suxi daidi itïtïdai,

—Mamaatïtuldiadami— itïtïdai. —Idi oki gï bhïitu ïmadï kaatïkatai ïmai ix makïdï maiti ïr kunadï. 5Dai go Moiseskaru sïïrhikamigadïrï ikaiti sai gï agai aatïmï ix maikarsagi dai kodadagi oki ix makïdï pomaaxi buadagi. ¿Dai aapia pïx kaiti?— itïtïdai.

6Potïtïdai ïgai nïidana sa tïna go Suxi. Nïida ïrhiditadai ix bhai ïïgiadamu Suxi go Moises sïïrhikamigadï. Dai ix mai ïïgiada ïgai aidï gia biaka agaitadai ïgai ixtukïdï gïpiïrï buajagi, kaxkïdï potïtïdai. Dïï go Suxi mos kuiki dai gaojai masabigadïkïdï dïbïrapi. 7Dïï go kïkïïrhi apia galkaitimi taidi go Suxi kïkiba daidi potïtïdai,

—Gï agai sai ïmadutai aapimï ix makïdï mai soimaaxi idui tomarhi ïmo imidagai ïpïga maiñagi go oki— itïtïdai.

8Dai bhodïrï ïpamu kuiki go Suxi dai ïpamu gaojai dïbïrapi.

9Daidi bhodïrï kïïdukai ïïmo maaxi nonoigimi ïgai ix makïdï buatadai go oki mos kaïkai ïgai ix kaiti go Suxi. Ï ix makïdï bamioma ïr kïkïrhiodami ïpïgioma iji. Dai podukai iimimi go gaa ïpï asta xudu go bamioma utu imïdami ka jiitadai ïpï maatïkatai saidi ïr soimaaxi buadami ïgai bïïxkatai. Dai gokiïrï ïïgi Suxi ïmadï go oki bii ami go odami buitapi.

10Dai bhodïrï sïïrhi kïïkiba Suxi ïpamu dai potïtïdai ïgai go oki,

—¿Taa dudui go kïkïïrhi ix makïdï gïpiïrï gï bupai?— itïtïdai. —¿Maiti ix tipu tomarhi ïmoko ix makïdï gataanïitadai gïgïbidaragai gï bïïtarï?— itïtïdai.

11—Cho— itïtïdai go oki. —Mai tipu tomarhi ïmadutai— itïtïdai.

Daidi Suxi potïtïdai,

—Aanï ïpï maiti tañimu gïgïbidaragai bïïtarï dïï gia imïdañi dai ka maiti soimaaxi ibuada— itïtïdai.

Suxi potïtïdai odami saidi ïgai ïr kudagi gï dukami bïïxi óídakami bïïtarï

12Dai bhodïrï Suxi aatagidi go gaa odami ami darakïdï dai potïtïdai,

—Daiñi, ix dukai kudagikïdï maaxkana oidigi podukai ïpï aanï maaxitudai odami bïïtarï tumaxi ïr buaboi. Kaxkïdï ïr kudagi gï dukami aanï. Dai xorai gin oijadagi kïïgakïrï óídaka agai bïïxkïrï bïïtarï dai ka mai tukapi ajiopada agai maatïkatai ix tumaxi ïr buaboi— itïtïdai.

13Daidi go fariseos itïtïdai aidï,

—Ïïgi aapi aagai saidi ïr buaboi gï ñoki dïï mai tipu tomarhi ïmadutai ïmai xorai potïiyagi saidi ïr buaboi. Kaxkïdï aatïmï pokaiti sai mai namïga gï ñoki— itïtïdai.

14Dai Suxi potïtïdai aidï,

—Namïga aba gin ñoki. Daiñi, kïïga maatï aanï sai tïbagiañdïrï dibia aanï dai sai ïpamu tïbagiamu imimu aanï kaxkïdï kïïga gï maatï saidi ïr buaboi gin ñoki tomaxi mosïkaxi ïïgi aanï aagai saidi ïr buaboi. Aapimï mai maatï xajadïrï busaikami aanï dai tomarhi xajako imïdami aanï dïï aanï gia maatï— itïtïdai. 15—Aapimï ïïgi gïn tïgibudagakïdï aagai sai mai kïï buayi aanï dai aanï mai aagai xorai kïïga ibuayi dai xorai mai kïïga ibuayi. 16Aanï mosïkaxi ix tumaxi ïr buaboi aagai dai ix potïiyagi aanï sai ïmadutai mai kïï buayi aanï gia buaboi aagai. Mai ïïgi gin tïgibudagakïdï ñokai aanï tudu dai bhaiyoma tïgibudadïkïdï Diuxi ix makïdï gin otoi ñokai aanï kaxkïdï gï maatï saidi ïr buaboi gin ñoki— itïtïdai. 17—Daiñi, ïïgi gïn ojiïrï xakoga ojixi go sïïrhikami ikaiti sai ix goka kïkïïrhi ïmadugan dukai ñokadagi saidi gï maatïkana sai buaboi ñokai ïgai. 18Dai aanï ïmadï gin Oga bïï gokatai ïmadugan dukai ñokai. Bïï gokatai aatïmï pokaiti saidi ïr buaboi gin ñoki dai kaxkïdï gï maatï saidi ïr buaboi ix tumaxi aagai aanï— itïtïdai Suxi.

19Daidi go gaa itïtïdai,

—¿Bako daja gï oga?— itïtïdai.

Daidi Suxi itïtïdai,

—Aapimï mai maatï xorai aanï dai mai maatï aapimï ïpï xorai ïr gin Oga— itïtïdai. —Ix gin maatïkamudai aapimï xorai aanï aidï gia maatïkamudai aapimï gin Oga ïpï— itïtïdai.

20Go Suxi podukai maa ñoki go gïï kiupiana kïakatai ami go tuminxi bhai tuakaruïrï dai bïïxkïrï maiti gï bhïitu. Mai kia ayitadai ixtuigako gï bhïitudagi ïgai kaxkïdï.

Suxi maa ñoki go odami ix makïdï mai buaboitudai

21Daidi Suxi ïpamu maa aatagi go odami daidi itïtïdai,

—Imïda iñagai aanï tabhiadïrï dai aapimï gin gaagadamu dïï modukai koimu aapimï kia gïpiïrï bïïtïkamikatai gïn soimaaxkamikïdï. Mos koimu aapimï dai modukai maiti ixtuidimu ix dukatai aiyagi amïka xako dakamu aanï— itïtïdai.

22Dai go judidiu ikaiti,

—¿Ïïgi ix gï muatuda agai go Suxi daidi ikaiti sai mai ixtuidimu aatïmï ix dukatai aiyagi amïka xako imi agai gobai?— ikaiti.

23Daidi Suxi potïtïdai,

—Aapimï mos ïr tami idi oidigi daama óídakami dai aanï gia ïr mïï daana tïkabiïrï oidakami. 24Kaxkïdï gïn aagidi aanï sai mos koimu aapimï kia gïpiïrï bïïtïkamikatai gïn soimaaxkamikïdï. Daiñi, kïïga gïn aagidi aanï xorai aanï dai ix mai buaboitudagi aapimï ix tumaxi gïn aagidi aanï aidï gia mos koimu aapimï kia gïpiïrï bïïtïkamikatai gïn soimaaxkamikïdï— itïtïdai Suxi.

25Dai go odami itïtïdai,

—¿Borai gï ïrhidi aapi?— itïtïdai.

Dai Suxi po tïtïdai,

—Ka baasïki abhiadïrï gïn aagidiña aanï xorai aanï— itïtïdai. 26—Dai kïïga maatï aanï xïïxi ïr soimaaxi buadami aapimï dai kïï bhaigakatadai aanï ix potïiyagi ix ïr soimaaxi buadami aapimï. Dïï aanï bhaiyoma aagai mosïkaxi ix tumaxi gin aagidi go makïdï bhaigobai gin otoi. Ïgai mai yaatagïi dai ïgai ñokidï aiturhi aanï óídakami— itïtïdai Suxi.

27Dïï go odami modukai mai maatï kaï ix tumaxi aagidi go Suxi. Mai máí ix aagiditadai ïgai sai ïr otosadï Diuxi gïr Oga.

28Kaxkïdï Suxi potïtïdai,

—Daiñi, aanï ïr ix makïdï kïïgakïrï odami busai dai xïxkadï ïmo kuruxiana gin xixagi aapimï dai táí gin bañidagi aidï gia maatïmu aapimï sai aanï ïr Ga Tïanïdami. Maatïmu aapimï aidï sai aanï mai ïïgi ibuayi ixtumaxi gin tïtïitoi dai bhaiyoma ibuayi mosïkaxi ix tumaxi gin Oga gin aagidi— itïtïdai. 29—Aanï bïïxkïrï ibuayi ix tumaxi bhai ïrhidi ïgai ix makïdï gin otoi kaxkïdï gin ïmadï daja ïgai dai maiti gin daadagitoi ïgai tomarhi ïmo imidagai— itïtïdai Suxi.

30Dai kïïga mui odami kaï Suxi aatagidï aidï dai muidutai buaboitu.

Suxi aagai xorai ïr buaboikïdï maamaradï Diuxi

31Bhodïrï Suxi aatagidi go judidiu ix makïdï buaboitudai daidi potïtïdai,

—Ix mos apia ïïgiadagi aapimï gobai ix makïdï gïn aagidi aanï, aidï gia buaboikïdï ïr gin mamaatïrdamigaka agai aapimï 32dai kïïga maatïkamu aapimï ixtumaxi ïr buaboi. Dai buaboitudaitai aapimï ixtumaxi ïr buaboi aidï gia kïïgakïrï bubuakimu aapimï ix ka mai pipioñi dukai gïn aaduintuldamu gïn amu— itïtïdai.

33Daidi go judidiu itïtïdai,

—¿Tuipïxi pokaiti sai bia aatïmï ïmo gïr amu ix makïdï pipioñi dukai gïr aaduintulda agai? Aatïmï ïr Abraamkaru piipixaradï di. Xadïrï pipioñi dukai gïr nïijadana jaa— itïtïdai.

34Daidi go Suxi itïtïdai,

—Ix aapimï ïïgiadagi go soimaaxkami kaxi ïr pipioñigadï go soimaaxi aapimï— itïtïdai. 35—Daiñi, kïïga gï maatï sai ïmo kiiyïrï ïmo pioñi mai bia sïïrhikami ix gatïanïdagi, ïbogiami ïmo gamara gia. 36Kaxkïdï ix go gamara kïïgakïrï gïn bubaidagi sai ka maiti gïn aaduintulhdana go soimaaxkami aidï gia ïr buaboi sai kïïgakïrï bubuakimu aapimï— itïtïdai. 37—Ka aagai aapimï saidi ïr Abraamkaru piipixaradï aapimï dai gobai ïr buaboi dïï tomaxi ïr piipixaradï aapimï ïgai bïïxkïrï gin mua ïrhidi aapimï mai ïïgida kaïkatai aapimï gin ñoki— itïtïdai. 38—Daiñi, aanï ïmadï dakana gin Oga dai gïn aagidi ixtumaxi gin aagidi ïgai. Dïï aapimï mai ïïgidi ïgai dai bhaiyoma bia aapimï ïmai gïn oga ix makïdï ïïgidi aapimï— itïtïdai.

39Daidi go judidiu itïtïdai,

—Go Abraamkaru ïr gia aatïmï gïr oga— itïtïdai.

Daidi Suxi itïtïdai,

—Ix buaboikïdï ïr Abraamkaru maamaradïkamudai aapimï aidï gia ïpïan ibuadamudai aapimï ïgai tudu— itïtïdai. 40—Dai aanï mos gïn aagidi ixtumaxi ïr buaboi dai ix makïdï gin aagidi Diuxi gin Oga dai bïïxkïrï gin mua ïrhidi aapimï. Go Abraamkaru xadïrï gin mua agaiña di— itïtïdai. 41—Dïï aapimï ibuayi ïpïandukai ïmai ix makïdï ïr gïn oga— itïtïdai.

Dai go judidiu itïtïdai,

—Maiti ïr totonadï aatïmï Diuxi— itïtïdai. —Diuxi ïr gïr oga di. Mai tipu ïmai— itïtïdai.

42Daidi Suxi itïtïdai,

—Cho daiñi— itïtïdai. —Ix buaboikïdï ïr Diuxi maamaradïkamudai aidï gia gin oigïadamudai aapimï. ¡Diuxiañdïrï dibia aanï di! Dai mai xu ix ïïgi gin bhai ïrhiarakïdï— itïtïdai. —Diuxi ïgai ix makïdï bhaigobai gin otoi tudu. 43¿Dai ix tuixi mai maatï kaï aapimï gin aatagi? Gïn aagidamu aanï ix tui. Mai bapakïi gin ñoki gïn momoïrï ix makïdï gïn aagidi aanï kaxkïdï mai maatï kaï aapimï. 44Aapimï ïr maamaradï go diabora di— itïtïdai. —Dai ojoidi aapimï ix buadagi ixtumaxi ïgai ipïrhidi. Ïgai tukamïrï abhiadïrï mos ïr gamuakamikana dai buidïrï kaatïkamikana ïgai ixtumaxi ïr buaboi. Ïïgi pomaaxi tuigakami ïgai ix kaxkïdï yaatagïi ïgai. Ïgaiñdïrï tudu daibïi bïïxi go yaatagi— itïtïdai. 45—Kaxkïdï aidïxi gïn aagidi aanï ixtumaxi ïr buaboi aapimï maiti gin buaboitudai. 46Daiñi, tomarhi ïmadutai aapimï mai bia ixtukïdï gïpiïrï gin bupadagi. Bïïxkïrï aagaiña aanï ix tumaxi ïr buaboi kaxkïdï. ¿Dai tuixi maiti ipïrhidi aapimï ix gin buaboitudagi tomaxi kïï sïïrhi aagai? 47Ix Diuxi maamaradïkamudai aapimï aidï gia kïïga bhai ïrhiarakïdï kaïkamudai gin ñoki. Dïï aapimï mai kaïka ïrhidi, kaxkïdï kïïga maatiga maaxi sai maiti ïr Diuxi maamaradï aapimï— itïtïdai.

48Daidi go judidiu itïtïdai,

—Aa gia Samarhiïrï oidakami maaxi tuiga aapi biakatai ïmo diabora tïañikarudï gï abhana— itïtïdai.

49Dai Suxi itïtïdai,

—Maiti aanï bia tomarhi ïmo diabora tïañikarudï— itïtïdai. —Bhaiyoma xadutudai aanï Diuxi gin Oga dïï aapimï gia maiti gin xadutudai toma lachi— itïtïdai. 50—Daiñi, mai xu dibia aanï ipïrhiditai ix ïmo gïï namïakami dukai gin nïijadagi odami. Kaxi ïmo namïakami dukai gin nïidi Diuxi di. Dai ïgai maakimu gïgïbituldaragai ix makïdï maiti gin xadutuadagi— itïtïdai. 51—Daiñi, aanï aagai sai xorai ïïgiadagi gin ñoki mai muki agai tomarhi ïmo imidagai dai gobai gia ïr buaboi— itïtïdai.

52Daidi go judidiu itïtïdai aidï,

—Aa gia ïr buaboi sai bia aapi ïmo diabora tïañikarudï— itïtïdai. —¿Tuixi pokaiti aapi sai xorai ïïgiadagi gï ñoki ka mai muki agai? Daiñi, go Abraamkaru ïmadï bïïxi go gaa aagadami Diuxi ñokidï ka bïïxkatai koi ïïki di. 53¿Dukatai bamioma gïdukana aapi ix bhai gïr pipiixarakaru Abraamkaru ix makïdï ïïki muu? Dai bïïxkatai go aagadami Diuxi ñokidï ïïki koi ïpï di. ¿Aapi pïx tudu bamioma ïr gïdukïdï ix bhai ïgai? ¿Ïmo gïdukami pïx gï ïrhidi ïïgi aapi dai pokaiti sai odami ix makïdï ïïgiadagi gï ñoki mai koi agai?— itïtïdai go judidiu.

54Dai Suxi potïtïdai aidï,

—Daiñi, ix ïïgi aanï potïiyagi saidi ïr ïmo gïï namïakami aanï, ¿Tumaxi ïr soiñikana gobai? Dïï gia Diuxi gin Oga ïgai ix makïdï ïmo namïakami gin aagai. Daiñi, pokaiti aapimï sai buaboitudai aapimï Diuxi 55dai tomarhi mai maatï aapimï xorai ïgai. Dïï aanï gia kïïga maatï. Ix po tïimudai aanï sai mai maatï aanï Diuxi gïn ïpïan ïxi yaatabogami busaimudai aanï. ¡Dïï aanï mai yaatagïi toma lïïchi! Kïïga maatï aanï Diuxi tudu dai kïïga ïïgidi aanï ïpï— itïtïdai. 56—Daiñi, gïn pipiixarakaru Abraamkaru kïïga bhai ïrhiarakïdï nïnïratadai ix dibiagi aanï dai aidïxi dibia aanï kïï bhai gï ïrhidi— itïtïdai Suxi.

57Daidi go judidiu potïtïdai,

—Aapi mai kia aitu gokobhai dan bhaibuxtama umigi. ¿Dukatai pokaiti aapi sai nïidi go Abraamkaru?— itïtïdai.

58Dai Suxi itïtïdai,

—Aanï aagai sai aidïxi mai kia busaitadai go Abraamkaru aanï kaxi oidakatadai— itïtïdai.

59Daidi go gaa otoma bui ojodai mos kaïkai ïgai ix kaiti go Suxi dai maikarsa agaitadai dai mua agaitadai. Dïï mos go Suxi otoma gï ïxto dai otoma busai amïï go gïï kiupiañdïrï.

Currently Selected:

Juan 8: NTP

Highlight

Copy