Juan 5

Suxi Duadi ïmo kïïrhi ix makïdï mai bhaigakatadai aimïrdagi

1Dai ïmo imidagai sai ayi ixtuigako ibuadana go judidiu ïmo bagimi sai Suxi jii go bagimiana Jerusalenamu. 2Dai ami Jerusalenïrï miadïrï go kuuparagai Kañiru Kuuparadï tïgidukïdï ami miadïrï kaatï ïmo poso bhai gïdukami dai biakami taama portarhi abhana. Go poso Betesda tïgidu Hebreo ñokidïkïdï. 3Dai ami portatarhiana bïïtïkatadai mui kokokoñiadï ïmadï mui mai nïadami dai ix makïdï kuga gukatadai ïïkasodï ïpï ïmadï jaa ix makïdï maiti ixtutuidikïi ix oiñïdagi tukugadï. Bïïxkatai ïgai mos nïnïrakatadai ix oiñïdagi go sudagi ami posoana. 4Ïïmo imidagai daibuiña ïmo Diuxi tïañikarudï dai oiñidiña go sudagi ami posoana bai tomax makïdï kokoadï ix makïdï ïpïgioma bakiagi sudaïrï oiñitai gobai sai ïgai duduadïiña. 5Dai kaatïkatadai ïmo kïïrhi ix makïdï ïmokobhai dan bhaibuxtama dan mamaakoba umigi kokokatadai.

6Dai Suxi tïï go kïïrhi dai máí ix ka tïbïpi kokokatadai daidi itïtïdai,

—¿Duada pïx ïrhidi?— itïtïdai.

7Daidi go kokoadï itïtïdai,

—Gin Mamaatïtuldiadamiga, gin duadia in ïrhidi dïï mai tipu xorai gin soiñagi ix baakia aanï sudaïrï xudu oiñïda gobai. Bakia in ïrhidi dïï go gaa gin maitïkïi dai ïpïgioma bapakïi— itïtïdai.

8Dai Suxi itïtïdai aidï,

—Bañigiñi dai bhïiyi gï baakoxi dai imïda— itïtïdai.

9Mos potïi Suxi tai duayi go kïïrhi dai kusuka baakoxigadï dai ka aimïrai. Ïmo ibhïxtaragai tasïrï pogïdui gobai.

10Dai gokiïrï go judidiu itïtïdai go kïïrhi,

—¿Tuipïxi kusuba imïi aapi gï baakoxi xibi ibhïxtaragai tasïrï? Go Moiseskaru sïïrhikamiana gïr daidi ix gaatabuadagi ibhïxtaragai di— itïtïdai.

11Daidi go kïïrhi itïtïdai aidï,

—Ïmo kïïrhi ix makïdï gin duadi dai ïgai gin tïjai ansai bhïna gin baakoxi dai imïda— itïtïdai.

12—¿Borai gï tïjai pïsai kusubana gï baakoxi?— itïtïdai go judidiu aidï.

13Dïï mos go kïïrhi mai máí xorai duadi. Sïïrhikïdï muidu odami ami dai Suxi kaxi odami saagida baatadai kaxkïdï. 14Dïï gia gokiïrï Suxi tïï go kïïrhi nobai go gïï kiupiana Jerusalenïrï kïakïdï daidi itïtïdai tïïgakai,

—Aapi kïïrhi, ka duayi aapi. Ka maiti soimaaxi ibuada tudu xibi bhaitiakoga, tadu gï ayi ïmo gïdukamioma soimaaxi— itïtïdai.

15Dai jii go kïïrhi abhiadïrï dai mïï aagidi go judidiu sai Suxi ïgai ix makïdï duaditadai. 16Baidi gokïdï go judidiu gaagaitadai ixdukatai soi buadagi go Suxi. Mai bhai ïrhidi ïgai ix Suxi duduaditadai odami ibhïxtaragai tasïrï.

17Daidi Suxi aagidi go judidiu ix tuixi aatabuayi ïgai ibhïxtaragai tasïrï daidi potïtïdai,

—Daiñi, Diuxi gin Oga mai dagitokai gaatabuayi tomaxtuigako, tomaxi ïr ibhïxtaragai tasïrïkagi dai aanï mos ibuayi ix dukai ïgai ibuayi— itïtïdai.

18Dïï go judidiu bamioma gaagaitadai ixdukatai muagi go Suxi kaïkai ñokidï. Bhakoi ïgai Suxi bui gaatabuadatai ïgai ibhïxtaragai tasïrï dai potïkai ïpï saidi ïr Diuxi maradï. Ïpïan ïxi gï namïaturhi Diuxi potïkai saidi ïr Diuxi maradï dai go judidiu bïïtarï gobai ïr ïmo gïdukami parunaragai Diuxi bui. Kaxkïdï mua ïrhiditadai ïgai.

19Dai Suxi potïtïdai go judidiu aidï,

—Kïïga abïr gïn tïgito kaïka idi ñoki. Daiñi, kïïga ïr buaboi saidi ïr Diuxi Maradï aanï dai ïïgi gin tïgibudagakïdï maiti ibuayi aanï toma lachi. Mosïkaxi ix tumaxi nïijadagi aanï ix buayi Diuxi gin Oga, pomaaxi ibuayi aanï ïpï. 20Diuxi gin oigïdai Maradïkatai aanï dai ïgai gin tïtïgidiña bïïxi ix tumaxi ibuayi ïgai. Gïdu aba go maaxidaragai ix makïdï idui aanï duadakai go kïïrhi ix makïdï mai bhaigakatadai imidagai dïï gia Diuxi gin maakimu jaa maaxidaragai saidi ibuada aanï ix makïdï ïr gïgïrdukamioma kia ix gobai. Gin maakimu Diuxi gïgïrdukami maaxidaragai bai podukai ka mai tïïgimu aapimï ix tumaxi gïn tïtïgitoagi ibuadatai aanï gobai— itïtïdai. 21—Daiñi, Diuxi gin Oga kïïga duakatudai koidadï dai aanï ïr Diuxi Maradï dai aanï ïpï duakatudai xorai ipïrhiada aanï. 22Dai mai xu Diuxi gin Oga aagada agai xorai ïr kïïga ibuadami dai xorai ïr mai kïïga ibuadami. Bhaiyoma gin maa ïgai sïïrhikami Diuxi Maradïkatai aanï ansai aagaiña xorai ïr kïïga ibuadami dai xorai ïr mai kïïga ibuadami. 23Kaxkïdï ix xïïxi odami xadutudai Diuxi gin Oga, go kaxi gï agai ix gin xadutuadagi ïpï. Aanï ïr Diuxi Maradï tudu dai ïr Diuxi otosadï, kaxkïdï ix ïmo odami maiti gin xadutuadagi aidï gia ka mai xadutudai ïgai Diuxi gin Oga ïpï— itïtïdai.

24—Kïïga abïr gïn tïgito kaïka idi ñoki. Daiñi, odami ix makïdï ïïgida kaïkagi gin ñoki dai buaboitudagi ïgai ix makïdï gin otoi ka bïïxkïrï bïïtarï oidaka agai. Diuxi ka mai maakimu ïgai gïgïbidaragai dai ka bubuaka abhiadïrï xako darakatadai ïgai, xako mos ïr ïï mukigami gï dukami tudu, dai ka baapa ïgai xako gia ïr kïïgakïrï oidakaragai— itïtïdai.

25Dai Suxi oi aatagidï dai itïtïdai ïpï,

—Kïïga abïr gïn tïgito kaïka idi ñoki. Daiñi, aanï ïr Diuxi Maradï dai aanï aagai sai ayimu ix tuigako kaïka agai go koidadï ix ñokada aanï dai duduaka agai. Dai xibi aanï aagai sai ka ayi gobai. 26Daiñi, Diuxi gin Oga bia gubukarhigai ix duakaltudagi odami dai gin maa ïgai gubukarhigai ix aanï duakatuldana odami ïpï Maradïkatai aanï. 27Dai gin maa ïgai ïmo sïïrhikami ïpï. Aanï kïïgakïrï odami busai ix kaxkïdï Diuxi gin maa sïïrhikami ix aagada aanï xorai ïr kïïga ibuadami dai xorai ïr mai kïïga ibuadami ïpï— itïtïdai. 28-29—Kïïga abïr gïn tïgito kaïka gin ñoki— itïtïdai. —Daiñi, ayimu ixtuigako bïïxi koidadï bubuakimu abhiadïrï xako yaasapi mos in kaïkai ix ñokada aanï. Dai ix makïdï kïïga idui kïïgakïrï óídaka agai duduakakai. Dïï gia ix makïdï mai kïïga idui taata agai go gïgïbidaragai— itïtïdai.

Aagidi Suxi go odami sai Diuxi ïgai dai maatadai sïïrhikami

30Dai Suxi oi aatagidï dai potïtïdai ïgai go judidiu,

—Aanï mai ïïgi gin tïgibudagakïdï aagai ix tumaxi dai tomarhi ïmo imidagai maiti ibuayi ïïgi ix tumaxi ipïrhiadagi aanï. Bïïxkïrï, bïïxkïrï ibuayi aanï dai aagai ix tumaxi ipïrhidi gin Oga. Kaxkïdï xuduku aagagi aanï xorai kïïga ibuayi dai xorai mai kïïga ibuayi kïï sïïrhi aagai aanï. Aagai aanï mosïkaxi ix tumaxi ipïrhidi gin Oga kaxkïdï— itïtïdai.

31—Ix mosïkaxi ïïgi aanï gïn aagidamudai xorai aanï aidï gia bhaigakamudai aapimï ix potïiyagi ix maiti ïr buaboi gin ñoki. 32-33Dïï mos oidaga ïmai dai aagai xorai aanï. Ïgai Juan tïgidu dai ïgai kïï sïïrhi aagai. Aapimï otoi kïkïïrhi sai tïkakana go Juan sa xorai aanï dai ïgai kïïga gïn aagidi. 34Daiñi, aanï in bïïtarï maiti ïr ixtumaxikamudai ix mai tipukamudai xorai ñokadagi gin bïïtarï dai aagagi xorai aanï, dïï aapimï gïn bïïtarï gï agai ix oidakagi ïmai ix gïn aagidagi xorai aanï dai mai xu ix ïïgi gïn aagidagi aanï. Kaxkïdï gïn aagidi aanï ix kaiti Juan aanïkïdï. Ipïrhidi aanï ix kïïgakïrï bubuakiagi aapimï gin buaboidakai kaxkïdï gïn aagidi ix kaiti go Juan. 35Ïgai ïr ïmo kudakarui gï dukamikana aapimï gïn bïïtarï gïn aagiditai ix tumaxi ïr buaboi aanïkïdï dai aapimï bhai gïn ïrhidiña chïki tasai kaïkatai ñokidï— itïtïdai.

36—Gia ïr buaboi tudu sai Juan gïn aagidiña xorai aanï. Dïï kia oidaga ïma maaxi ïpï ix makïdï aagai kïïgioma xorai aanï. Go aaduindagai ix makïdï ibuadana aanï ami aagai kïïgioma xorai aanï. Ibuayi aanï go aaduindagai ix makïdï Diuxi gin tïjai dai kaxkïdï nïiditai gin aaduindagai kïïga gï maatï sai Diuxi gin otoi. 37Diuxi gin Oga gin otoi tudu dai ïgai gïn aagidi xorai aanï ïpï— itïtïdai. —Aapimï tomarhi ïmo imidagai mai kaïkana ix ñokadagi Diuxi dai tomarhi mai nïidi aapimï ix maaxi. 38Ïgai aagai xorai aanï dïï gajiadïrï bipiayi aapimï ïgai ñokidï maiti gin buaboitudakai. Diuxi otosadï aanï dai bïïxkïrï maiti gin buaboitudai aapimï. 39Daiñi, kïïga nïnïidiña aapimï Diuxi ñokidï pobïn ïrhiditai sai ami tïigimu aapimï ix dukatai kïïgakïrï oidakagi bïïxkïrï bïïtarï. Diuxi ñokidïrï kïïga aagai sai aanï ïr Diuxi Maradï. Kaxkïdï gï agaitadai ix kïïga gin buaboitudagi aapimï. 40Dïï tomax dukai maiti ipïrhidi aapimï ix gin buaboitudagi. Ix gin buaboitudamudai aapimï aidï gia kïïgakïrï oidakamudai aapimï bïïxkïrï bïïtarï— itïtïdai.

41Daidi Suxi oi aatagidï daidi itïtïdai go judidiu,

—Daiñi aanï mai buamï in ïrhidi tomaxi soi dukai gin nïijadagi aapimï. 42¡Kïïga maatï aanï sai mai oigïdai aapimï tomarhi Diuxi di! Kaxkïdï mai buamï ïrhidi aanï ix maiti gin oigïadagi aapimï dai soi dukai gin nïijadagi. 43Daiñi, aanï dibia biakatai ïmo sïïrhikami gin Ogañdïrï dïï mos aapimï bïïxkïrï maiti gin buaboituda ïrhidi. Dïï gia ix dibiagi ïmai kïïrhi ïïgi gubukadadïkïdï mai biakatai tomarhi ïmo sïïrhikami Diuxiañdïrï, ïgai gia buaboitudamu aapimï. 44Daiñi, gïdioma Diuxi ix toma xorai dïï aapimï bamioma buamï gïn ïrhidi ix odami kïïgakïrï gïn nïijadagi dai mai pokaxi buamï gïn ïrhidi ix Diuxi kïïgakïrï gïn nïijadagi. Kaxkïdï xadïrï gin buaboitudana aapimï. 45Dïï tomax dukai mai xu aanï ïgai ix makïdï gïpiïrï gïn bupadamu Diuxi buitapi. Go Moiseskaru sïïrhikamigadï ïgai ix makïdï gïpiïrï gïn bupadamu bhaiyoma. Mai kïïga ïïgidi aapimï go Moiseskaru sïïrhikamigadï di. Dai aapimï pobïnïrhidi sai Moiseskaru ojadï ïgai dai gïn soiñamu ix kïï biiyagi aapimï Diuxi ïmadï. 46Dïï mai buaboikïdï buaboitudai aapimï go Moiseskaru ojadï. Ix buaboitudamudai aapimï Moiseskaru ojadï aidï gia aanï gin buaboitudamudai aapimï aanï ïpï. ¡Tudu ami go Moiseskaru ojadïana aagai xorai aanï di! 47Dïï gia mai buaboitudai aapimï ixtumaxi oja go Moises ïïki gin aagaitai gobai, kaxkïdï dukatai gin buaboitudana aapimï aanï xibi— itïtïdai Suxi.

Currently Selected:

Juan 5: NTP

Highlight

Copy