Isa 53

3Odami soi dukai nïidi dai kïïdaiña Diuxi daasadï bhaitï kïakami.

Kïïga ïïmadai ïgai soi ïrhiaragai.

Dai odami maiti ipïrhi tomarhi xi nïijadagi.

Odami sïïrhikïdï soi dukai nïidi dai mai xaduturhi.

4Ïïgi gïr abhan daitu aatïmï gïïpi soi ïrhiaragai soi maaxi ibuadatai dïï ïgai taata gïr gïgïbidaraga ix makïdï gïr ajïga.

Dai aatïmï porïrhididitadai xi ïïgi ïr duñidï xi Diuxi gïbaimitadai.

5Dïï aatïmï ïgai dai mai ïïgidi Diuxi bhaiyoma, kaxkïdï ïr aatïmï gïr duñi xi gï sïïxitu ïgai.

Aatïmï gïr aïkatadai gïgïbidaragai. Dïï ïgai taata gïïgïbidaragai gïr bïïtarï soi maaxi ibuadatai aatïmï.

Gïï taata ïgai gïgïbidaragai dai podukai gïr abhan dáí ïgai bhai ïrhiaragai.

Ïgai gï muragi dai podukai gïr duduaditu.

6Dagito aatïmï Diuxi bogïdï dai aadaji aatïmï ïïgi gïr tïgibudaga. Kuga iji aatïmï bïïxkatai ïpïan dukai kañiñiru ix makïdï mai oida ïrhidi Nukadakamigadï. Aatïmï gïr ajïga gïgïbidaragai dïï Gïr Nukadakami ïïgi otosadï abhana dáí gïr soi maaxkamiga ix makïdï idui aatïmï.

7Odami soi buididi otosadï Gïr Nukadakami dai gïikarai bïïxi. Dïï ïgai mai taadaga.

Gï muatu ïgai ïpïan dukai kañiru dai ïgai mai ñokai. Mos dodorhi bii.

Ix maaxi kaatïkana kañiru xudu odami ikidagi popodï podukai dodorhi bii otosadï Gïr Nukadakami.

8Maiti ïr soi maaxi ibuadami ïgai dïï odami bïïxkïrï busaitu maixakaruañdïrï dai mua. Mai tipukatadai xorai soiñagi.

Muu ïgai taatakai gïïgïbidaradï odami soimaaxi ibuadatai odami.

Mai maamara ïgai dai muu.

9Maiti ïr soimaaxi ibuadami ïgai dai tomarhi ïmo imidagai mai yaata ïgai.

Dïï bïïxkïrï mukukai ïgai gï yaasatu soimaaxi iibïdakami saagida ïmo gï bidakami yaasakarudïrï.

10Gïr Nukadakami ïgai dai ipïrhi xi soi maaxi taatamituldagi otosadï dai xi taatagi ïgai gïïgïbidaragai. Gï tïïgitu ïgai ïmo daxdaragai bïïtarï ixtukïdï buanadagi odami soimaaxkamigadï mai ïïgidakai odami Diuxi. Kaxkïdï ïpamu duakatumu dai ka mai mukimu ïpamu xi podukai tomaxi mutadai bïïxkïrï mamarta agai dai oidatu agai piipixaradï. Go piipixaradï ïr odami ix makïdï buaboituda agai.

Bïïxi naato iduñimu ïgai dai kïï ïldatudamu aaduindagai ix makïdï Diuxi iduña ïrhidi.

11Gïr Nukadakami otosadï kïï tuigakïdï nïidamu gïïgïbidaragai ix makïdï taata ïgai ix xïï gïïpi ïr soiñi ka agai dai kïï bai gï ïldamu nïiditai. Ïgai bhïï aimïrada agai soi maaxkamigadï mui odami dai podukai kïïgakïrï bubaida agai.

12Kaxkïdï Gïr Nukadakami maakimu gubukadagai. Dasamu ïgai xi ïr gïï bhaitï kïakamigadï ka agai mui aaduñdï. Maatïmu ïgai buidïrï ix makïdï bui bïïtï. Dai bhodïrï gïïpi bhai ïrhiarakïdï takobida agai maitïkidï aaduñdï ïmadï.

Ïïgi gï tïïgitu ïgai mïtai mua. Odami ïmo soimaaxi ibhïdagami dukai nïidi. Dïï ïgai muu kusu imïitai mui odami soi maaxkamigadï ix makïdï mai ïïgidi Diuxi. Podukai gï báí ïgai bïïtarï ix makïdï mai ïïgiditadai Diuxi.

Currently Selected:

Isa 53: NTP

Highlight

Copy