Exodo 7

1Bhodïrï Gïr Nukadakami potïtïdai go Moises,

—Daiñi— itïtïdai, —Gï maakimu aanï gubukadagai paidi gin bïïtarï ñokada aapi. Dai aapi gï sukurhi gï ñokituldiadami buidïrï go Ejiptuïrï Rey. 2Ïïgi ix dukatai gï aagidagi aanï podukai aagidamu aapi go Aaron xi ïgai utioma atagidamu go Ejiptuïrï Rey dai aagidamu sai dagitona ïgai go Israelitas xi iimiagi Ejiptuañdïrï. 3Dai aanï mai dagitomu go Rey xi ïma dukai bhïiyagi tïgibudagai. Dai bhodïrï iduñimu aanï naana maaxi maaxidaragai buidïrï go Ejipituana óídakami. 4Dïï tomaxi dukai go Ejiptuïrï Rey maiti gï ïïgida kaïkamu. Daidi bhodïrï gia daituldamu aanï ïmo gïdukami gïïgïbidaragai abhana go Ejiptuïrï óídakami mai ïïgidakai ïgai. Dai aidï gia bubaidamu aanï gin aaduñi. Bhïimu ïgai boi dai ka mos sakarhi gukibamu ïgai ïmo gïï desfile dukai mos ïï muidukatai— itïtïdai . 5—Gin gubukadakïdï bubaidamu aanï go Israelitas. Aidï gia maatïkamu go Ejipituana óídakami xorai aanï dai xïïxi ïr gubuakami aanï dai maatïkamu aidï ïpï xi aanï ïr Nukadakami— itïtïdai Diuxi go Moises.

Bhodïrï Diuxi aagidi Moises ïmadï Aaron ix dukatai iduñagi Rey buidïrï amïï aïkai ïgai. 20Dai Moises ïmadï Aaron ïïgida kaï Gïr Nukadakami. Go Aaron bhïiyi uxiaradï dai mïï xako kïakatadai go Ejiptuïrï Rey ïmadï sonoïrï gukakami ami gïïgï ïgai go gïï akiana sudagi. Daidi go sudagi bïïxi sudakami ïrai gï naato. 21Bïïxi koi go batopa daidi ka mai bhaiga Ejipituana óídakami xi yïïdagi sudagi. Go aki xigarhi ubai mos ïr ïraikatai. Bïïxi aipako xïïxi ukami ajïga go Ejipituana dai xako kaatïkana sudagi go ïï ïrai kaatïkana xibi. 24Xi kaxkïdï bïïxi go Ejipituana oidakami nobai go gïï aki ugidana kobiakarai dai busaitu sudagi buañixikami ix tuma yïïdagi.

Currently Selected:

Exodo 7: NTP

Highlight

Copy