Hechos 15

Ojotoxikami Jerusalenïrï bhai dui ïmo ñoki

1Aidï tuigako ayi jaa kïkïïrhi ami Antiokiïrï xako darajatadai Pabora ïmadï Bernabe. Judeañdïrï iimïdami go kïkïïrhi ïgai. Dai aïkai gïn aaga maakaimitadai aatagi go buaboitudadami. Daidi ikaitimi aidï,

—Gï agai mïxi gïn circuncidandoagi aapimï ix dukai gïr biturhi go Moises ïïki. Ïma dukai mai kïïgakïrï bubuakimu aapimï— ikaitimi.

2Go kïkïïrhi aatagidï mai ïpïan duu agaitadai go Pabora ïmadï Bernabe aatagidï xi gokïdï kabami gïn bupui ñokaitadai ïgai. Ka maiti ixtui ïgai xi ïmo tïgibudagai biakagi xi go buaboitudadami aagidi Pabora dai Bernabe ïmadï jaa chïki buaboitudadami sai mïï nïnïabana go ojotoxikami Jerusalenïrï dai sai ami bhai buadana go aatagi.

—Mïïka abïr aagida go ojotoxikami ïmadï kïkïrhiodami bhaitï gukakami bai ïgai aagana ix bhai ïr buaboi xi gï agai ix gïr circuncidandoagi, aatïmï ix makïdï maiti ïr judidiu— itïtïdai ïgai go buaboitudadami.

3Daidi go Pabora ïmadï Bernabe bhïiyi boi ïmadï jaa chïki buaboitudadami, gïn otosakai go buaboitudadami. Sïïrhi dïgabusai ïgai xako Fenisiana dai Samariana tïtïgidu oidigi. Aatagidi ïgai go buaboitudadami judidiu ami oidakami dai aagidi sai jaa odami ïpï ix makïdï maiti ïr judidiu ka buaboitudaitadai Suxi Kristo. Daidi bïïxkatai go buaboitudadami ami oidakami bhai gïn ïjïrhi kaïkai aatagidï.

4Gokiïrï ka aïkai ïgai Jerusalenïrï go ojotoxikami dai go bhaitï gukakami kïï bhai gïn ïjïrhidi nïiditai. Dai go gaa buaboitudadami ami bhai gïn ïjïrhidi ïpï. Daidi Pabora ïmadï Bernabe dai ix makïdï oiditadai bïïxi aagidi ixdukatai Diuxi gïn gupukaturhi xi aagadagi ïgai Diuxi ñokidï. Aagidi ïpï sai Diuxi gubukadadïkïdï jaa odami buaboitu ïpï ix makïdï maiti ïr judidiu. Dai go Jerusalenïrï oidakïdï buaboitudadami bhai gïn ïjïrhidi kaïkatai. 5Dïï mos ami darajatadai jaa buaboitudadami ïpï ix makïdï ïr fariseos dai ïïmoko ïgai ikaiti,

—Gï aagai ix gïn circuncidandoagi bïïxi go buaboitudadami ix makïdï maiti ïr judidiu dai gï aagai ix tañiagi aapimï bai ïïgidiña bïïxi ixtumaxi gïr biturhi Moiseskaru— ikaiti go fariseos.

6Dai gïn ïmpagi go ojotoxikami ïmadï bhaitï gukakami dai aaga agai sa bhai ïr buaboi ix duu agaitadai go fariseos. 7Bhai tïbïpi gaataga ïgai gaagaitai ixdukatai aa noraidagi aatagidï go fariseos dai bhodïrï kïkiba Piduru daidi itïi,

—Gin aaduñi kïïga maatï aapimï sai Diuxi ïkobai gin busaitu ïki ansai aituldana go bhai ïrhiaraga aatagi go ix makïdï maiti ïr judidiu bai ïgai buaboitudana ïpï. 8Daiñi, Diuxi nïidi bïïxi odami iibhïadï. Dai Diuxi mamaaxidi xi kïïgakïrï nïidi ïgai go ix makïdï maiti ïr judidiu ïpï otosakai Gï Ibhïdaga ïgai abhana. Xibi gïr ïpïan dukai bipiatu ïgai Diuxi Ibhïadï. 9Diuxi mos ïmadugan dukai gïr nïidi aatïmï ïmadï ïgai ix makïdï maiti ïr judidiu. Kaxkïdï Diuxi buañidi iibhïadï ïgai buaboitudakai ïgai ïpï— ikaiti.

10Dai Piduru oi gï aatagi dai kabami ñokidi go gaa daidi ikaiti,

—¿Nïida mïxi ïrhidi ïpï sa bhai bhamutudana aapimï Diuxi?— ikaiti. —Maitï agai xi soi buadagi aapimï go buaboitudadami ix makïdï maiti ïr judidiu. Maitï agai tudu tïanïdagi ïgai xi ïgiada gïr bituldaraga. Mos sobhidamu aapimï Diuxi aaduindadï xi pobuadagi aapimï di. Tomarhi aatïmï dai tomarhi gïr aaduñi ïkidadï mai ñako xi ïgiada gobai di. 11Cho daiñi, bhaiyoma buaboitudai aatïmï sai Suxi Gïr Nukadakami gubukadadïkïdï kïïgakïrï bubuakïi aatïmï mos buaboitudakai aaduindadï ix makïdï idui ïgai kuruxiïrï. Xibi podukai buaboitudai ïgai ix makïdï maiti ïr judidiu ïpï— itïtïdai Piduru.

12Dai go gaa ix makïdï ami darajatadai mos dodorhi bii daidi kaïkatai aatagidi go Pabora ïmadï Bernabe. Aatagiditadai sai Diuxi gïn maatadai gubukadagai xi ïgai buadana naana maaxi maaxidaragai mïï xako óídaga go ix makïdï maiti ïr judidiu. Ibuadana ïgai maaxidaragai ami ix makïdï ïïgi Diuxi ixtutuidi xi buadagi.

13Dai kugaidakai ïgai gïn aatagi bai Jakobo itïtïdai aidï go gaa,

—Gin aaduñi, gin kaïkabïrai. 14Kïïga gïr aagidi go Ximuñi Piduru ix dukatai ïpï dui aidïxi Diuxi tukamidïrï gï tïgito nïidi go ix makïdï maiti ïr judidiu. Aidïpïrï Diuxi ïko bubaitu ïïmoko ïgai saidi ïr maamaradïkana. 15Podukai tudu agaitadai go aagadami Diuxi ñokidï ïïki. Ïgai oja ix kaiti Gïr Nukadakami dai Gïr Nukadakami ikaiti aidï,

16 Gokiïrioma ïpamu dibiamu aanï.

Dai ïpamu kïïsamu aanï bakidï go Dabid. Xatuidiñikami gobai dai aanï ïpamu bañidamu.

17 Poduñimu aanï bai go gaa odami ïpï oidigi daama óídakami ix makïdï maiti ïr judidiu biakagi ixdukatai gaagagi urabaragai gin ïmadï ïpï, ikaiti.

18Gïr Nukadakami ïgai dai pokaiti ïïki tudu dai ïgai podukai iduñimu.

19Pobai tudu kaiti go ïkidadï ojai— ikaiti go Jakobo oiditai aatagidï. —Kaxkïdï xibi aanï pokaiti sai maiti agai aatïmï xi tañiagi go buaboitudadami ix makïdï maiti ïr judidiu xi ïïgiadagi ïgai naana maaxi gïr bituldaraga. 20Mosïkaxi gï aagai ix ojixdagi aatïmï sai ka mai kuadana bhabhaidi ix makïdï gï dadaxdi go momono ix makïdï xadutudai odami Diuxi dukai. Dai sai mai ïmadï boona ix makïdï maiti ïr aduñdï. Dai sai ka mai kuadana bhaabhiadï buxtaki bhaikoadï, ix makïdï mai busakïi ïradï dai koiyïrïi tudu. Dai sai mai kuadana ïradï. 21Pobai tudu kaitiña aagadami ïki abhiadïrï Moises bituldaradï. Bïïxkïrï bïïxi go gïgïr kiikiïrï podukai mamaakaiña ïgai ñoki ibhïxtaragai tasïrï bapakïitai judidiu kiupaigadïrï— itïtïdai Jakobo.

Suxi ojotosadï idui ïmo ojixikami buaboitudadami bïïtarï ix makïdï maiti ïr judidiu

22Daidi bhodïrï go ojotoxikami ïmadï go gaa bhaitï gukakami dai bïïxkatai go buaboitudadami ami Jerusalenïrï, bhai dui ñoki xi otosa agai goka gïn aaduñi Antiokiamu ïmadï go Pabora dai Bernabe. Dai otoi ïgai go Silas ïmadï ïmo kïïrhi Udaxi tïgidukami. Odami Barabas aagaiña ïgai. Ïgai bïï goka ïr bhaitï gukakami dai go buaboitudadami kïi xadutudaiña ïgai.

23Go Jerusalenïrï buaboitudadami otoi ïmo ojai ïgaikïdï go Antiokiïrï buaboitudadami bïïtarï. Dai go ojai ikaiti,

—Aatïmï ojotoxikami ïmadï bhaitï gukakami gïn biaturhi aapimï gïr aaduñi ix makïdï maiti ïr judidiu dai Antiokiana óídaga. Otosai aatïmï ïmo biatuldaragai bïïtarï Siriana oidigïrï dai Ciliciana oidigïrï óídakami ïpï.

24Gïr aaduñi, kajioma aatïmï sai gamoko iji kïkïïrhi tabhiadïrï ix makïdï aatïmï mai otoi. Ïgai naana maaxi gïn tïgitoturhi gïn aatagikïdï xi aapimï ka mai xioma daraja bii. Aatïmï mai aagidi xi podukai gïn aatagiadagi ïgai. 25Kaxkïdï bhai dui aatïmï ñoki dai bïïxkatai bhai aa xi gïn otosdagi go Pabora dai Bernabe ïmadï jaa goka kïkïirhi. Gia kïïga ïïmadai aatïmï go Pabora ïmadï Bernabe dai kïï oigïdai aatïmï. 26Ïgai mos apia ñokaiña Suxi bïïtarï tomaxi mui odami koda ïrhiditadai.

27Gïn otosda ragai go Udaxi ïmadï Silas ïpï. Ïgai gïn aatagiadamu idi baaxi ñoki makïdï idi ojiïrï gïn daraxi aatïmï. 28Diuxi Ibhïadï ïgai dai gïr tïanïi xibi dai aatïmï pokaiti sai mosïkaxi gï aagai aapimï xi ïgiada idi chïki ñoki,

29Mïsai mai kuadana bhabhaidi ix makïdï gï dadaxdi go mono ix makïdï xadutudai odami Diuxi dukai, dai tomarhi mai kuadagi ïradï, dai tomarhi bhaabhiadï buxtaki bhaikuadï, ix makïdï mai busakïi ïradï dai koiyïrïi, dai tomarhi mai boopïdagi ïmadï ix makïdï maiti ïr aduñdï.

Ix ïïgiadagi aapimï bïïxi idi ñoki aidï gia ka kïïga ibuayi aapimï. Gobai ïr bïïxi gïr aatagi xibi bïïtarï— ikaiti ojadï go ojotoxikami.

30Daidi go maakoba kïkïïrhi diosagi go buaboitudadami Jerusalenïrï dai iji Antiokiamu. Ami ïmpagi ïgai bïïxi go buaboitudadami dai gatïïgi go ojai.

31Daidi go buaboitudadami ïmo abïnakidaragai dukai kaï go ojai dai kïï bhai gïn ïjïrhi kaïkai. 32Go Udaxi ïmadï Silas ïr aagadami Diuxi ñokidï ïpï dai bhai tïbïpi aatagidi ïgai go buaboitudadami dai abïnaki dai gupukaturhi gïn aatagikïdï. 33Bhodïrï abhiadïrï mui tasaikïdï kaxi imia agaitadai go kïkïïrhi ïpamu Jerusalenamu baidi go buaboitudadami diosagi dai potïtïdai,

—Diuxi kïïgakïrï gïn baidakagi gamoko ukami xako óídaga go ix makïdï bhaigobai gïn otoi— itïtïdai.

34Dïï mos go Silas bhaiyoma ipïrhi ix anaaxi biiyagi. 35Daidi go Pabora ïmadï Bernabe anaaxi bii ïpï Antiokiïrï. Dai jaa kïkïïrhi ïmadï gamamaakaiña ïgai aatagi aagaitai Diuxi ñokidï.

Ïjïkobai iji go Pabora ïmadï Bernabe

36Daidi gokiïrï ïmo imidagai Pabora potïtïdai go Bernabé sai,

—Timïda dadida ïpamu go buaboitudadami aipako kiikiïrï óídakami xako kaxi aagidi aatïmï Diuxi ñokidï daidi nïida as dukatai daraja— itïtïdai.

37Dai go Bernabe baidaja ïrhiditadai ïmoko ix makïdï Juan Markos tïgidu. 38Dïï go Pabora mai baidaja ïrhiditadai. Ïgai ïkioma mai kïïga duitadai. Gïn dagitotadai ïgai gïn aaduindagïrï dai mos aa gïitadai ïgai Panfiliañdïrï xi kaxkïdï go Pabora xibi mai bhai agaitadai xi baidakagi. 39Daidi kabami ñiño ïgai dai modukai mai bhai dui dai ïjïkobai iji. Go Bernabe baidakai Markos dai tïtïsai ïmo barkoïrï dai iji Chipreamu. 40Daidi Pabora bai Silas sai oidana ïgai. Dai mai kia iimïkai ïgai bai go buaboitudadami gadáí Diuxi sai kïïga oigïdaitai nukatikana dai sai maakana gubukadadï, daidi bhodïrï iji ïgai. 41Siriana dai Ciliciana dïgabusai dai gupukaturhi ïgai go buaboitudadami ami óídakami.

Currently Selected:

Hechos 15: NTP

Highlight

Copy