Hechos 10

Piduru dibiji go Kornelio

1Dai Cesareïrï oidakatadai ïmo kïïrhi Kornelio tïgidukami. Ïgai tïanïitadai ïmo ciento sandaru, kapitañigadï tudu ïgai. Italiañdïrï oidakamikatadai go sandadaru ïgai. 2Dai go Kornelio ïmadï aaduñdï kïïga xadutudaiña Diuxi. Ïgai dudatai soikïiña judidiu ix makïdï tïgitokana dai mai dagitokai daanïiña Diuxi tomax tuigako. 3Daidi ïmo imidagai koi gïsïko tasai go Kornelio ïmo tïïtïki dukai tïï ïmo Diuxi tïañikarudï. Kïïga nïidi ïgai sai miadïrï kïkiba go Diuxi tïañikarudï dai kaï ïgai ix tïtïdai,

—Kornelio— itïtïdai go Diuxi tïañikarudï.

4—¿Tumaxi tïgitoimi aapi?— itïtïdai Kornelio dai mos nïidi ïgai go Diuxi tïañikarudï duadimukatai. Daidi go Diuxi tïañikarudï itïtïdai aidï,

—Kïïga bhaigïrhidi Diuxi kaïkatai xi daanïi aapi ïgai dai ïgai kïïga nïidi ix soikïi aapi soititigami— itïtïdai.

5—Xibi otosañi kïkïïrhi Jopamu baidi mïï baidana ïgai ïmo kïïrhi Ximuñi Piduru tïgidukami.

6Ïmai Ximuñi kiidïrï gï urhiñaka ïgai. Baketatadami go Ximuñi ïgai dai gïï sudagi ugidïrï oidaga— itïtïdai Diuxi tïañikarudï.

7Daidi ka imïkai go Diuxi tïañikarudï taidi báí go Kornelio goka pipioñigadï dai ïmoko sandarugadï ix makïdï kïïga ïmagi ïgai dai ix makïdï kïïga xadutudai Diuxi. 8Dai aagidi ïgai bïïxi ixtumaxi tïïtadai ïgai. Daidi bhodïrï otoi Jopamu.

Tïïtïkidï Piduru

9Dai xadiko dan duku ïxi ka aijimitadai ïgai Jopeïrï dai aidïpïrï tïsai go Piduru baaki daama kaparakamiïrï daidi gaatagi agai Diuxi ïmadï. 10Kabami bhiugimukatadai ïgai dïï mai kia bhai gï duitadai kuadagai dai ïgai nïnïrakatadai daidi tïïtïki duu tïï ïmo ixtumaxi. 11Tïï ïgai ix gï kupioko tïbagi dai dïbïrapi ukami tïbañimi ïmo gïï suayi dukai dai bïï maakoba xixixonaiñdïrï daagïkan imïi. 12Dai ami suayi daama daraitugai naana maaxi buxtaki dai kïkïixi dai ujurugi. 13Daidi Piduru kaï ïmo ñoki daidi ikaiti,

—Aapi Piduru kïkibañi dai koda dai uga— itïtïdai.

14—Xadïrï— ikaiti Piduru.

—Tomarhi ïmo imidagai maiti ïr ugakami aanï gobai ix makïdï aatïmï judidiu tukurakami dukai nïidi dai daidarxikami gobai aatïmï gïr bïïtarï— ikaiti.

15Daidi go ñoki ïpamu ño daidi ikaiti,

—Daiñi, Diuxi ka buañixikami aagai gobai dai bia aapimï oigaragai xi ugiagi gobai. Xibi maiti agai xi tukurakami aagada aapi dai tïiyagi sai daidarxikami gobai— itïtïdai.

16Baikakoga tïï Piduru go suayi sai tïbai dai bhodïrï tïsai gobai tïbagiamu ïpamu. 17Kia tïtïitoitadai Piduru ix tuma bïïtarïkatadai tïïtïkidï bai ami kurarai kuuparagïrï ayi Kornelio ojotosadï. Boiyañdïrï gatïkakaimi ïgai sa xako oidaga Ximuñi dai ayi. 18Dai aïkai ïgai gïgïrï gatïkakai sa bhai xi ami gï urhiñakatadai Ximuñi ix makïdï Piduru aagaiña odami.

19Dai aidïpïrï kia tïtïitoitadai go Piduru go tïïtïki bai Diuxi Ibhïadï itïtïdai aidï,

—Aapi Piduru, gï gaagaimi baika kïkïïrhi. 20Otoma bañigiñi dai mïï taana nïida dai oida. Maiti buamï gï ïrhiatugada tudu aanï gin otosa gobai tudu— itïtïdai Diuxi Ibhïadï.

21Daidi go Piduru tïbai dai mïï tïtïdai aidï go kïkïïrhi,

—Aanï ïgai dai gin gaagaimi aapimï— itïtïdai.

—¿Mïx tuma tïgitoimi?— itïtïdai.

22Daidi go kïkïïrhi itïtïdai aidï,

—Ojotosadï aatïmï go kapitañi Kornelio— itïtïdai.

—Go Kornelio kïï xadutudai Diuxi. Dai bïïxi go judidiu kïï tuigakami aagai ïgai— itïtïdai. —Dai ïmo Diuxi tïañikarudï aagidi go Kornelio sai gï baidana pïsai imïna kiidïrï dai maakana aapi ñoki— itïtïdai kïkïïrhi.

23Daidi go Piduru miadïgi aidï bai ïgai anaaxi bii aidï tukarï Piduru ïmadï.

Piduru ayi kiidïrï Kornelio

Dai xadiko iji ïgai dai Piduru oi dai chïki buaboitudadami Jopeïrï óídakami oi ïpï. 24Dai gïmai xadiko ayi Piduru Cesareïrï. Ami nïnïrakatadai go Kornelio ïmadï mui aaduñdï dai jaa ïpï ix makïdï kïïga ïmagi ïgai. 25Dai aïkai go Piduru Kornelio kiidïrï busai go Kornelio dai biaturhi dai buidïrï kuiki dai xaduturhi bhaiton dukami xi ïr Diuxikatadai Piduru.

26Dai Piduru itïtïdai aidï,

—Kïkibañi. Maiti pobuada. Aanï mos ïr odami ïpïan dukai toma xorai— itïtïdai.

27Dai kia atagaimi ïgai Kornelio ïmadï dai baa tukabi dai tïï ïgai jaa mui odami ix makïdï ami gïn ïmpaidakatadai. 28Daidi Piduru tïtïdai odami aidï,

—Kïïga maatï aapimï sai daidarxi aatïmï judidiu gïr bïïtarï ix dibida aatïmï jaa odami ix makïdï maiti ïr judidiu dai tomarhi xi gïn uurapïkïdagi aatïmï. Dïï Diuxi gin tïïgi sai maiti agai ix tukurakami dukai nïijadagi odami ix makïdï Diuxi kïïgakïrï nïidi. 29Kaxkïdï mos gin báí aapimï antai otoma mïïkadïrï jii aanï. Dai xibi gin aagidabïrai ix tuma bïïtarï gin báí aapimï— itïtïdai Piduru.

30Daidi Kornelio itïtïdai aidï,

—Kaxi pogïdui maakoba tasai parï kaduku, ka koi gïsïko tasai, tanaxi gin kiiyïrï dakatadai aanï dai gadaanïitadai aanï Diuxi. Dai todian dukai gï maaxitu ïmo kïïrhi dai totobikïi yukuxidï. 31Daidi gin tïtïdai,

—Kornelio, kïï bhai gï ïrhidi Diuxi kaïkatai ixdukatai daanïi aapi dai ïgai nïidi ïpï ixdukatai kïïga soikïi aapi soititigami. 32Otosañi kïkïïrhi Jopamu tudu bai mïïka baidana ïgai go Ximuñi Piduru. Gï urhiñaka ïgai ïmai Ximuñi kiidïrï ix makïdï ïr baketatadami. Gïï sudagi ugidana oidakami ïgai— Pobai gin tïtïdai go Diuxi tïañikarudï biakami totobikïdami yukuxidï— itïtïdai go Kornelio.

33—Kaxkïdï otoma gaotoi aanï mïsai gï gaagana, dai aapi kïïga idui dibiakai. Dai xibi tami daraja aatïmï gïr nïiditai Diuxi dai kaïka rïrhidi ixtuma ñoki gïr otoxi Diuxi aapikïdï— itïtïdai Kornelio.

34Dai go Piduru maa ñoki aidï daidi itïtïdai,

—Xibi ka maatï nïidi aanï ix Diuxi mo ïxi oigïdai odami tomaxi maiti ïr judidiu ïgai. Ïmadugan dukai nïidi ïgai bïïxkatai. 35Diuxi kïïgakïrï nïidi tomax maaxkami odami ix makïdï ïr xadutuadami Diuxi dai ix makïdï kïïga ibuadagi— itïtïdai Piduru.

36—Daiñi— itïtïdai, —Aapimï kïïga maatï sai Diuxi maa ïmo bhai ïrhiaragai aatagi go judidiu. Aagidi ïgai sai mosïka Suxi Kristo gamaakai urabaragai Diuxi ïmadï. Dai Suxi Kristo ïgai dai bïïxi adama ïr gatïanïdami oidigi daama. 37Aapimï kïï maatï ïpï sai go Juan ïr ïpïgioma gamaakadamikatadai bhai ïrhiaragai aatagi gabapakonaitai odami. Galileïrï gamaakaiña ïgai aatagi dai abhiadïrï aipakoga aayi go aatagi bïïxi aipakoga xako ukami Judea tïgidu oidigi. 38Dai kïïga maatï aapimï ïpï sai Diuxi maa ïïgi Ibhïadï go Suxi ix makïdï ïr Nasaretïrï oidakami sai ïgai biakagi gubukadadï Diuxi Ibhïadï. Aipakoga aimïraiña go Suxi dai Diuxi Ibhïadï gubukadadïkïdï soi ïgai mui odami dai duduadi ïgai mui ix makïdï Diabora soi buididitadai. Diuxi ïmadï dakatadai go Suxi kaxkïdï pomaaxi ibuadana ïgai— itïtïdai Piduru.

39—Dai aatïmï ïr nïijadami bïïxi ixtumaxi ibuadana Suxi Jerusalenïrï ïmadï bïïxi aipako xako ïr judidiu kiidï— itïtïdai. —Daidi gokiïrï ami óídakami mua go Suxi kuruxiabha xixakai. 40Dïï bhobai baika tasaikïdï Diuxi duakaturhi ïgai ïpamu, dai gïr dagito ix nïijada aatïmï. 41Dïï mai xu bïïxi óídakami nïidi go Suxi duakatukai ïgai. Mosïkaxi chïkiatai aatïmï ix makïdï ïr Diuxi ïkobai bubaidadï tïï. Aatïmï tudu mosïkaxi ix makïdï Suxi ïmadï gauu dai gaii ka duakatukai ïgai. 42Dai Suxi gïr tïjai tïsai aagidana odami ix kaiti Diuxi ñokidï. Dai gïr tïjai ïpï sai aagidana aatïmï odami sai Diuxi ka dáí go Suxi sai ïgai ïr nïniadamikana bïïxi odami, modukai koidadï ïmadï duduakakami, dai sai ïgai aagada ix makïdï ïgai dai biakamu gïgïbidaradï dai ix makïdï mai biakamu ïpï. 43Kaxi ïkioñdïrï abhiadïrï bïïxkatai ïgai ix makïdï ïr ñokituldiadamigadїkatadai Diuxi kaxi aagaiña go Suxi. Ïgai aagaiña sai Suxi gubukadadïkïdï oigïrhixikami bipiïyiña bïïxi soimaaxkamigadï odami ix makïdï buaboitudagi go Suxi— itïtïdai Piduru.

44Dai go Piduru kia gamaakaitadai ñoki dai todian dukai dibia Diuxi Ibhïadï dai abhana bii bïïx go odami ix makïdï kaïkatadai Piduru aatagidï. 45Daidi go buaboitudadami judidiu ix makïdï oiditadai go Piduru ka mai tïïtadai ixdukatai gïn tïtïgitoagi ka nïiditai sai Diuxi Ibhïadï kaxi abhana bitadai go odami ix makïdï maiti ïr judidiu ïpï. 46Dai go judidiu kaï go odami ix makïdï Diuxi Ibhïadï abhana bitadai ix ïgai ñokaitadai mui ñoki ix makïdï ïgai mai maatïkana ïkioma. Kïïga ñokaitadai ïgai Diuxi bïïtarï dai aagaiña ïgai sai Diuxi gia ïr gubuakami.

47Dai Piduru kaï gobai daidi itïtïdai,

—Aatïmï ka nïidi xi idi odami kaxi gïr ïpïan dukai biatu Diuxi Ibhïadï tomaxi maiti ïr judidiu gobai— itïtïdai. —¿Bhai ix oidaga xorai mai bhai aagana ix gïn bapakonakagi gobai?— itïtïdai.

48Daidi bhodïrï Piduru gatïjai saidi gïn bapakonana go odami Suxi Kristo sïïrhikamigadïrï. Dai go odami aagidi Piduru sai anaaxi gï urhiñana chïki tasai.

Currently Selected:

Hechos 10: NTP

Highlight

Copy