2Sa 7

Go Israelitas dudatai kokodiïrï bapakïiña

1Dai aidïpïrï Gïr Nukadakami dumaltu go buidïrï bïïtïkamigadï go Israelitas xi gamaitï go Israelitas dai ugidagai kokodi buidïrï go gaa óídakami maigobai. Kaxkïdï go Dabid mos ibhïxta oidakana kiidïrï.

2Dai oidakatadai ïmo kïïrhi Natan tïgidukami ix makïdï ïr ñokituldiadamigadїkatadai Diuxi. Dai Dabid itïtïdai ïgai,

—Maiti ïr sïïrhi xi aanï gin kii kïï tiodikagi finuakami uxikïdï duñixikatai dai go Kajoñi Xadutudikïdï mos ïr ikuxi kiiyïrï dakamikagi. Iduiñda in ïrhidi ïmo baaki kïï tiodikami Diuxi bïïtarï ïpï— ikaiti Dabid. 3Dai Natan itïtïdai, —Buaboi aba ix dukai aagai aapi. Duñiñi tudu ix dukatai tïtïitoi aapi xi Gïr Nukadakami gï soikidamu— itïtïdai.

4Dïï aidï tukarï Gïr Nukadakami aataga ïmadï Natan daidi itïtïdai,

5—Mïïka aataga ïmadï gin soikïdami Dabid daidi aagida sai aanï pokaiti sai gobai maiti gin duiñda ïgai baaki xako oidakagi aanï— itïtïdai Gïr Nukadakami. 12—Aagidañi go Dabid sai xïïxkadï mukia ïgai aanï daasa iñagai ïmoko go piipixaradï ïgai ix makïdï bhïiya agai gubukadadï— itïtïdai Gïr Nukadakami Natan. 13—Go ix makïdï daasa iñagai kïïsa agai gin kii dai aanï maakia iñagai gubukadagai xi ïgai piipixaradï mos apia bhïjidamu go baaxi gubukadadï tomaxi tuigako— ikaiti Gïr Nukadakami. 14—Aanï ïr ogadï dukami ka agai gobai ix makïdï daasamu aanï dai ïgai ïr gin maara dukami ka agai. Dai xi mai kïï duñagi ïgai aanï gïïgïbidamu. Maiti xi pobuayi odami xudu mai kïï buadagi maradï— ikaiti Gïr Nukadakami. 15—Kaxi aant dagito go Saul dai xibi Dabid maa aanï Saul gubukadadï. Dai Dabid ïmadï piipixaradï ïgai gia mai podukai dagitomu aanï— ikaiti. 16—Nukada iñagai piipixaradï ïgai xi ïgai tomaxi tuigako Rey ka agai dai bia ka agai gï gubukadaga— ikaiti Gïr Nukadakami.

17Potïtïdai Diuxi go Natan dai bhodïrï go Natan utioma aagidi Dabid ï galbaaxi aatagidï Diuxi.

Currently Selected:

2Sa 7: NTP

Highlight

Copy