1Sa 8

1-2Go Samuel darai ïïgi maamaradï xi ïgai ïr kakaigikagi bai tïanïna ïgai go Israelitas ka kïrhimukai Samuel. Ix makïdï ïr gaxïgi Joel tïgidukatadai dai go gïmai Abhiaxi. Kakaigitadai ïgai Bersebana. 3Dïï ïgaipïrï mai ïpïamaaxi gaatadui ix maaxi aatadui ogadï. Arhiïxi gïn gagara ïgai gïïgïpi gamaitï ïrhiditai dai mai sïïrhi gaatadui. 4Kaxkïdï gïn ïmpagi aidï bïïxi go bhaitï gukakamigadï go Israelitas dai iji dai Ramamu ataga agai ïmadï Samuel.

5Daidi potïtïdai ïgai,

—Aapi kaxi ïr kïrhiodami Samuel. Dai gï maamara ka mai aatabuayi ix maaxi aatabuadana aapi. Ka mai biaka rïrhidi aatïmï kakaigi podukai. Daiñi, go gaa odami no xibhïkai bia Rey xorai tïanïdagi. Gïr daasamudai aapi ïmo Rey podukai ïpï xi ïgai gïr tïanïdamudai— itïtïdai go bhaitï gukakami Samuel.

6Dai soi gï ïrhi Samuel kaïkai xi go Israelitas biaka ïrhidi ïmo Rey dai ataga ïgai ïmadï Gïr Nukadakami.

7Dai Gïr Nukadakami itïtïdai,

—Mai xu aapi gï dagitoimi go odami. Aanï ïgai dai gin dagitoimi ïgai bhaiyoma. Aanï ïgai daidi kïïgakïrï ïr Reygadï ïgai di. Dai xibi ka maiti ipïrhidi ïgai xi aanï tïanïdagi. Daiñi— itïtïdai. —Ipïrhidi aanï pïxi buadagi ïïgi xi dukai gï aagidagi ïgai— itïtïdai Gïr Nukadakami Samuel.

Currently Selected:

1Sa 8: NTP

Highlight

Copy