John 7
7
Tombu Laga Purbb Te Jisu Juwa
1Eitu khan huwa pichete, Jisu Galilee te berai thakise, kelemane Yehudi khan Taike morai dibole thaka karone Tai Judea phale berabo mon kora nai. 2Yehudi khan laga Tombu laga Purbb din bhi usor ahi ponchise#7.2 Lev. 23.33-36,39-43; Deu. 16.13-15.. 3Karone Tai bhai khan Taike koise, “Etu jaga chari kene Judea te jai jabi, Apuni ki kaam kori ase etu Apuni laga chela khan bhi dikhi bole dibi. 4Kelemane Jun bhi tai nijor naam ke untcha koribo mon kore, tai lukai kene nakore. Jodi Apuni etu kaam korise koile, Apuni nijorke dikhai dibi duniya ke.” 5Kelemane Jisu laga nijor bhai khan bhi Taike biswas kora nai. 6Titia Jisu taikhan ke koise, “Moi jabole laga thik somoi huwa nai, kintu tumikhan karone hodai somoi taiyar ase. 7Prithibi tumikhan ke ghin no koribo, kintu Moike ghin kore kelemane Moi taikhan laga biya kaam ke gawahi diye. 8Tumikhan purbb te jabi; Moi to etiya etu purbb te najabo, kelemane Moi laga somoi pura huwa nai.” 9Tai taikhan ke etu sob koi dise, aru Tai Galilee te thaki jaise.
10Kintu Tai bhai khan juwa pichete Tai bhi khula-khula nohoi, kintu lukai kene purbb te jaise. 11Titia, Yehudi cholawta khan Taike purbb te bisarise aru koise, “Tai kot te ase?” 12Aru manu khan majote Tai nimite kotha namila bisi ulaise. Kunba koi, “Tai bhal manu ase.” Kintu dusra khan koise, “Nohoi, kintu Tai manu khan ke ulta loijai.” 13Hoilebi Yehudi cholawta khan ke bhoi pora kun bhi Tai laga kotha khuli kene kowa nai.
14Aru jitia purbb laga adha somoi jaise to Jisu mondoli te ahikena sikhabole shuru hoise. 15Aru Yehudi cholawta khan asurit hoise, koise, “Kineka etu manu Shastro jane, pora likha nathaki kene bhi?” 16Jisu taikhan ke jowab di koise, “Moi sikhai di thaka kotha khan to Moi pora nohoi, kintu Moike pathai diya pora ase. 17Jodi kunba Isor laga itcha te jabo mon korile, etu kotha to Isor pora ahise na Moi nijor khushi pora ase, tai nijor janibo. 18Kun nijor khushi pora kobo etu tai nijorke prosansa kori ase, kintu jun taike pathai diya ke prosansa kore, etu hosa ase aru tai monte adharmikta nathake. 19Moses tumikhan ke niyom dise nohoi? Kintu tumikhan kun bhi niyom ke mana nai. Kile tumikhan Moike morai dibole bisari thake?” 20Bhir khan jowab di koise, “Tumi logote bhoot ase. Kun apnike morai dibole bisari ase?” 21Jisu taikhan ke koise, “Moi ekta kaam kori dise, aru tumikhan sob asurit korise. 22Moses tumikhan ke sunnot laga hukum dise, etu to, Moses pora nohoi kintu baba laga khandan khan pora ahise aru tumikhan Bisram dinte sunnot kori thake. 23Jodi ekjon manu Bisram dinte sunnot kori kene Moses laga niyom nabhangai, to kele tumikhan Moike ghusa kore kelemane Moi Bisram dinte manu ke bhal kora nimite? 24Chehera saikene bisar na koribi, kintu dharmikta pora bisar koribi.”
Etu He Khrista Ase Naki?
25Titia Jerusalem pora aha kunba koise, “Taikhan pora morai dibole bisari thaka to etu manu nohoi? 26Kintu sabi, Tai to khula-khula kotha koi ase aru kunbi Taike eku nokoi, Tai he Khrista ase koi kene Yehudi cholawta khan bhi jani loise? 27Etu manu kot pora ase, amikhan etu jani ase. Kintu jitia Khrista ahibo, Tai kot pora ase etu kun bhi najanibo.” 28Titia Jisu mondoli bhitor te jor pora hikai se aru koise, “Tumikhan Moike jane, Moi kot pora ahise. Hoilebi Moi nijor khushi pora aha nohoi kintu Jun he Moike pathaise Tai hosa ase, Junke tumikhan najane. 29Moi Taike jane, kelemane Moi Tai pora ahise, aru Tai he Moike pathaise.” 30Karone, taikhan Taike dhori bole kosis korise, kintu kun bhi Tai uporte hath diya nai, kelemane Tai somoi napuncha karone. 31Aru bisi manu Taike biswas kori loise, aru taikhan koise, “Jitia Khrista ahibo, Tai etu manu pora kori diya pora bhi bisi asurit kaam nakoribo naki?”
Cholawta Khan Pora Jisu Ke Dhori bole Pathaise
32Manu khan Jisu laga kotha koi thaka etu Pharisee khan jani kene, mukhyo purohit khan aru Pharisee khan Taike dhori bole daruga khan ke pathai dise. 33Titia Jisu taikhan ke koise, “Moi olop somoi karone tumikhan logote ase, pichete jun Moike pathaise Tai logote jai jabo. 34Tumikhan Moike bisaribo, aru napabo, aru kot te Moi jabo ta te tumikhan ahibo na paribo.” 35Titia Yehudi cholawta khan kotha korise aru taikhan majote hudise, “Tai kot te jabole ase, aru ki karone amikhan Taike napabo? Tai Yunani khan ephale-uphale hoi thaka khan ke sikhabole jai jabole ase? 36Tai kowa etu ki kotha ase, ‘Tumikhan Moike bisaribo, kintu Moike napabo, aru kot te Moi jabo ta te tumikhan ahibo na paribo’?”
Jibon Pani Laga Nodi
37Aru purbb laga ses dinte, juntu dangor din ase, Jisu uthi kene jor pora koise, “Jodi kunba pyasa ase, tai Moi logote ahi kene khabi. 38Jun Moike biswas koribo, tinehoile Shastro te kowa nisena, nodi jinda laga pani tai laga pet pora bohi ahibo.” 39Kintu Tai Atma laga kotha koi thakise, juntu biswas kora khan pabole thakise, aru Tai nijor mohima te juwa nai kelemane Pobitro Atma etiya tak Taike diya nai.
Manu Khan Majot Te Bhag Hoi Juwa
40Titia bhir pora kunba etu huni kene, “Asol bhabobadi etu he ase” koise. 41Aru dusra koise, “Etu he Khrista ase.” Kintu kunba koise, “Khrista to Galilee pora ahibo naki?” 42Khrista to David laga khandan pora aru Bethlehem bosti kot te David thakisele, ta te pora ahibo eneka Shastro te kowa nohoi?#7.42 Mic.5:2.” 43Titia Tai karone manu khan dui bhag hoi jaise. 44Aru kunba Taike dhori bole hoise, kintu kunbi Tai uporte hath diya nai. 45Titia daruga khan wapas mukhyo purohit khan aru Pharisee khan logote ahise, aru taikhan pora koise, “Kile tumikhan Taike loi aha nai?” 46Daruga khan jowab dise, “Kunbi Tai nisena kotha nakoi.” 47Titia Pharisee khan taikhan ke jowab dise, “Kile, tumikhan bhi thogai te giri ase? 48Kunba cholawta khan aru Pharisee khan Taike biswas kori luwa nohoi na? 49Kintu niyom najana etu bhir manu khan to shrapit hoise.” 50Nicodemus jun he rati te Jisu logote ahise, tai pora taikhan ke koise, 51“Amikhan laga niyom hisab te manu laga kotha nahuna age te golti lagabo pare naki?” 52Taikhan taike jowab dise, “Tumi bhi Galilee manu ase? Sabi aru bisaribi, kelemane Galilee pora kun bhabobadi bhi naulabo lage.”
53Aru sob manu nijor-nijor ghor te jai jaise.
Currently Selected:
John 7: ISVNag
Highlight
Share
Copy
Want to have your highlights saved across all your devices? Sign up or sign in
NAG-ISV
Creative Commons License
Indian Standard Version (ISV) - Nagamese (Indian Standard Version (ISV) - Nagamese), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
