Mâk 4
4
Zə̀zə̌ fə wù ù swùm wə ù kə təmə ndzòʼ tìy
(Matìyò 13.1-9; Lukâs 8.4-8)
1Yesù ə kaʼ fəli tsə ani tyi dè ayiə â ghu a kə̀lə̀ ìŋwù i Galilî. Ŋwàâ kə ghù kə̀ kə kə dzɛ̀mì na we, kə kə ŋge dùw. À yù də̀ ighe ù kə nyi dòʼò kə anə kəmfə̀n anə foŋə̀ ìŋwù, aghê àliy yə təmi dòʼò tsə kə anə iŋgùŋə. 2U tyi dè ghu nə̀ ndə̀mə̀ tə ayiə tiy anə mənzə̀zə̌, dzìy a ghu nə̀.
3“Ghà zuw! Wù ùswum ùlìy wìy kə zù ani zu təndzòʼ anə uswum. 4Abù ù təm yə̂ nəniy, ndzòʼ tə̀liy tiy tswaʼi dòʼò yə̀ anə dzəd, ŋwùni bù tsuw fwu ŋwò kə. 5Ndzòʼ tə̀liy tiy tswaʼi yə̀ anə lòʼo tə una tə də bày kwu way zuub tiy. Tə zəaŋì nɛmə fyi kə aŋwòə zuub tiy kə banə wày awò àghaŋə ani nyi tswi tsə. 6Abù inyi kwuni fyi kwoʼ bə̂ nəniy, tsə̀ ə zuk màʼà kə ndzòʼ tə ghà tə, tə pfə ŋwò yə̀ aŋwòə ghaŋə tə ghu tiy kə kə̀ banə nyi tswi tsə dzə̂. 7Ndzòʼ tə̀liy tiy tswaʼi yə̀ anə lòʼo kə təfàb, abù tə fyi kə, fàb tə̌ nɛmə fyàŋì na tsə ndzòʼ tə ghè tə̀, tə də kə̀ boŋ. 8Ndzòʼ tə̀liy tiy tswaʼi yə̀ anə zùb tə̀ dzoŋə̀ tìy. Tə fyi kə, nɛmə kə, boŋ tsə. Tə̀liy tiy boŋ kə mə̀vəm inti, tə̀ liy tiy mə̀vəm intìfoŋ, tə̀liy tiy mə̀bwàm tsìy fyi tsə tə̀ tuu ghu kə zuu nəniy.”
9Yesù ə dzày kəd tsə a ghu nə̀ “Wù wə̀ ù kwu nəniy utswuŋi wiy, u zuw ayiə yə mə dzây.”
Sələ kə iyiə kə Yesù kə dzîy zə̀zə̌ miy
(Matìyò 13.10-17; Lukâs 8.9,10)
10Abù Yesù də nəniy nə̀ noŋə̀ we, tsə̀təndii tə we tə ivəm nə̀ ghe tiy ibè nə̀ aghè liy yiy ghu kə də akə̀lə̀ we, ghu ə zù bù bəbə a we nə̀ zə̀zə̌ fə̀ mìŋə̀ nə̀ìndiə. 11Yesù ə bə̀li yə̀ ghu nə̀ “Zə̀kìy mə zəŋi nə̀ ghà kəli nù tə ayiə tə kwùmə̀ yə̀ nə̀ yiə yə ù saʼa nəniy ate, Akwuni bû àghè liy yə̀, ghu maŋə̀ zuw təŋə kə àyiə adzə̀m anə mənzə̀zə̌” 12Ani zəŋi tsə tə̀
ghu ki fwələ, kòʼò kyilə way,
ghu ki zwələ,
zuw kyilə way ayiə
yə mə dzîy nəniy.
Aŋwòə abu ghu kə zuw kyilə nəniy,
ghu kə tu kyemì yə̂ awò Zə̀kìy
tə̀ Zəkìy nîyzə̂
ìbɛb i ghu.
Yesù ə tyi dzày yə̀ zə̀zə̌ fə wù ùswum wə ù təmə ndzòʼ tìy
(Matìyò 13.18-23; Lukâs 8.11-15)
13Yesù ə dyaŋi bəb tsə â ghu nə̀, “Ghàa mə̀ kə̀ zuw kəli zə̀zə̌ fə ə̀? Ghà kî kwuni də̌ mə̀yiə ani zuw kəli zə̀zə̌ mə̀ lìy mə̀ ə? 14Wù ùswum wə̀ də yəə à də̌ wù wə̀ ù nìàʼà fyiə yə ntwùm ə̀ Kə̀zə̀. 15Ndzòʼ tə̀ tə kə tswaʼi dòʼò yə̂ anə dzəd; tə də̀ yəə aghû yə̀ ghu zuw nəniy ntwùm ə̀ Kə̀zə̀, Satàn ə zàŋì bù nìy ŋwò fyi kə ntwùm ìghà yə̀ anə fòŋ tə ghu. 16Ndzòʼ tə̀liy tə tə kə tswaʼi yə̂ anə lòʼo tə una, tə də̀ yəə aghû yə ghu zuw nəniy ntwùm ə̀ Kə̀zə̀ ghu dyaŋi bɛmə kə nə̀ dwiʼi kiy. 17Ghu də yəə à də̌ ndzòʼ tə̀ ghaŋə tiy də kamə nyi tswi tsə anə təzùb, ghu də dyòʼò tsòŋə̀ wày. Abu ghu fyi kpee kə nə̀ ùtswə̀d wìy, moo aghê ə zəŋi tsə ghu nə̀ ìbɛb yiy kwùmə̀ yə̀ nə̀ ntwùm ə̀ Kə̀zə̀, ghu dyaŋi tu dòʼò yə̀ i nyi ghà yə̀. 18Ndzòʼ tə̀liy tə tə kə tswaʼi yə̂ anə lòʼo kə təfàb. Tə də yəə à də̀ aghû yə̀ ghu zuw nəniy ntwùm ə̀ Kə̀zə̀, 19Ayiə ə mbyi, nə̀, niyoŋi kə ukhiy kiy, nə̀ ighaa yiy ani kəli tsə ndə̀mə̀ ndə̀mə̀ tə ufyiə, à də̀ ufyiə wə u kwuni fyaŋə̀ nia nəniy fôŋ tə ghu tiy. Ghu də yəə à də̌ ndzòʼ tə̀ tə də wày ani boŋ utam. 20Ndzòʼ tə̀liy tə tə kə tswaʼi yə̂ anə zùb tə̀ dzoŋə̀ tìy; tə də yəə aghû yə̀ ghu zuw tsə nəniy ntwùm ə̀ Kə̀zə̀, ghu bɛmə kə, zəŋə yə̀ àyiə yə ì dzìy nəniy. Ghu də yəə à də̌ ndzòʼ tə dzoŋə̀ tə̀ tə boŋə nəniy utam wiy; tə̀liy tiy mə̀vəm inti, tə̀liy tiy mə̀vəm intìfoŋ, nə̀ tə̀liy tiy fəbwaam tsìy fyi tsə tə tuu ghu kə zuu nəniy.”
Zə̀zə̌ fə təkàʼì
(Lukâs 8.16-18)
21Yesù ə bəb tsə a ghu nə̀, “Wù lìy dà tsə ŋwò kaʼì tìy u na nyi yə̀ a təŋə kəkaŋ moo a təŋə ukày ə̀? Ghu wa tyilə nia kə anə kəfyiə nə̀ aghê si koʼo asə ate ə? 22Fyiə kə kə nû doʼò nəniy ghu kî nìy fyiə bə̀ ŋwò nə̀ndaa, fyiə kə kə kəəd doʼò, ghu kî fwukə myìʼà kə ŋwò. 23Wù wə̀ ù kwu nəniy utswuŋi wiy, u zuw ayiə yə mə dzây!”
24Yesù ə dzày fəli yə̀ â ghu nə̀, “Na tsə nənìy isə yiy anə ayiə yə ghà zuw nəniy! Dzəd yə wò zəŋə yə̂ ayiə yiy ate awò àghè àliy, à də̌ dzəd yə Zə̀kìy kî zəŋə bə̂ soʼò nə̀ wò, Kə bôʼ zəŋi tsîy fyi. 25Aghû yə̀ ghu zwulə nəniy ayiə yə mə tyi dê nəniy, Zə̀kìy ki zəŋi tsə nə̀ ghu zuw kəli dzwâb tsə tə̀ ghu kəli tsə utwab. A kwuni bû àghù yə̀ ghu də zwulə way, ghu kî nìyzə̀ ə̀ ŋwò ayiə yə ghu bôʼ kwu nəniy.”
Fə̀zə̀zə̌ anə yiə ndzòʼ tìy niyemə
26Yesù ə kàm dzày tsə nə̀, ayiə yə Zə̀kìy saʼa aghè ə we ate a də yəə. Wù ùswum ùlìy kə təm yə̀ tə̀ndzòʼ anə uswum u we. 27Abù ntsukə miy tsîy tsə nəniy, ndzòʼ tə̀ ə fyi kə, kaʼ yə̀ ani nɛmə, u də bòʼò kwu dyaŋi way yiə yə ndzòʼ tə̀ niɛmə nəniy ate. 28À zəŋə kə̀mbvə̀dintsə nə̀ ndzòʼ tìy nɛmə mwu bə̂ ù tam, à səsə ki kaʼa tsə nsə mə̀ tə̀fə̀bə̀, in nɛmə bù nyə̀ kə ubwolə, utam wiy fyi bə̀ bàŋ tsə. 29Abù utam wə̀ dyaŋə bàŋə bə̂, wù ùswum wə dyaŋi zè kə ani zù kwà aŋwòə à də̀ soŋə fə̀ kwaa fiy.
Zə̀zə̌ fə nyàŋə fə sàm ə̀ kə̀ fyiə
(Matìyò 13.31,32; Lukâs 13.18,19)
30Yesù ə bəb fwuli tsə nə̀, “A ba də̀ ani tyi tsə mə̀yə yəə Zə̀kìy saʼa aghee we yəə?” Mə də ani tyi dzày tsə anə zə̀zə̌ fə̀ ghaa fiy ə? 31Də yəə wù nì nìy kə nyàŋə fə sam fə fə tɛb tsîy fyi sam tə ufyiə tə̀liy tiy, fə anə mbyi tə̀dzə̀m, zu yə̀ ambvə̀d. 32Abù ghu zuu tsə nəniy, i nɛmə ghaʼ tsìy tsə ufyiə ùlìy wə u də nəniy anə mbà, kəli yə̀ tə̀ŋkwè anə yiə yə ŋwùni də ani bù ma dòʼò kə ate, zəŋə sòʼò ndaw tə ghu a ate.
33Yesù kə nìʼà tsə̀ ntwùm ə̀ Kə̀zə̀ awò aghě ghà yə̀ anə ndə̀mə̀ mənzə̀zə̌ yəə à də̌ ì mù, dzìy â ghu anə yiə yə ghu də ani zuw kəli. 34Ù kə taw dzìy təŋə tsə̀ ayiə â ghu anə mənzə̀zə̌. Abù ù kwuni doʼò tsə kə nə̀ tsə̀təndii tə we tiy, u tyi dzày yə̀ ayiə yə zə̀zə̌ fə̀ miŋə̀ nəniy.
Yesù ə bwi na zoŋ
(Matìyò 8.23-27; Lukâs 8.22-25)
35Abù nə̀ nyinkwubì tìy, a ntsuk fə ghà fə̀, Yesù ə dzìy awò tsə̀təndii tə we tiy nə̀, “Ŋgà dâŋ a bə̀d kə iŋwù kə̀liy kə.” 36Ghu na sə tsə ŋwàâ kə ghù kə̀, nyi kə anə kəmfə̀n nə̀ Yesù ŋwò yə̀ nə̀ ìdàŋ yìy. Ùmfə̀n ùliy wiy kə də sòʼo ŋwô awote. 37Zòŋ ìlìy ə màŋ kaʼ tsə kə ani tsìy anə iŋwù yə̀. Mwi kaʼ yə̀ ani nyi anə kəmfə̀n, kə də̀ yəə kə ni mələ. 38Yesù ə də̀ ibàm anə kəmfə̀n ù bvunə nəniy gaʼ na kətuw an-a-ntìì. Tsə̀təndii tə we tiy bù zɛ̀m kə we nə, “A Àtyi dè, wò kòʼò wày nə̀ ghè də ani bəm pfə ə̀?”
39Yesù ə ŋwò kə idoŋ, kwà tsə zoŋ yə nə̀ mwi mə nə̀ “Bwi doʼò.” Zoŋ ə dyaŋi mày tsə, loʼo tiy ŋwò dòʼò tsə moŋ. 40Yesù ə dyaŋi bəb tsə awò tsə̀təndii tə we tiy a ghu nə, “Ghà tsəŋə kìə̀? Ghà kam nam kwu way ibɛmə yiy ə̀?”
41Ghu kə ŋge tsəŋ ŋwô, ghu kaʼ yə̀ ani bəb anə iwè ighu nə̀, “À yù də ndiə? Zoŋ zuw dyaŋə lâŋ kə we kiy nə̀ mbuw kə dzwî kìy!”
Currently Selected:
Mâk 4: isu
Highlight
Share
Copy

Want to have your highlights saved across all your devices? Sign up or sign in
© CABTAL 2023