Matìyò 8

Yesù kə zəŋi taw kə wù

(Mâk 1.40-45; Lukâs 5.12-16)

1Abù Yesù tswi dzwoŋi bə̂ anə udoŋ, ŋwàâ kə ghù kǐy dzwùmì bə̀ we. 2Wù ù lìy wiy bù nyaʼa tswi tsə anə sə kə we nə̀ ù kə kwu uŋkə̀m. Wù ù ghà wə̀ ə dzìy awò Yesù a we nə, “A Mwe ə̀ mbyi abu wò liə nəniy zəŋi tsə miə tə̀ mə taw kə.”

3Yesù ə̀ nìày fyi yə̀ ùkwe mwàm tsə we, dzày tsə a we nə, “Mə liə ŋwô nə̀ wò taw kə, wò zwu doʼò tsə.#8.3 Anə sòŋə fə ghà fə̀ ghu kə kòʼò tsə wè ùŋkə̀m nə̀ à də̌ wù ù dzə̂ wìy à də̀ ighe Yesù kə dzi nə̀ ù zwu dòʼò tsə” Ùŋkə̀m wə̀ ə dyaŋi mày fyi ŋwò tsə. 4Yesù ə dzày yə̀ a we nə, “Kəə wò nì dzìy iyiə yə mə zəŋi nəniy awò wù lìy, kwuni zu dě yə̀ uwe niə̀ wìy awò wù ùlwaʼà wìy, tə̀ ù fwə̀d kòʼ tsə̀ nə̀ wə̀ mə taw ə̀. Wò kî zù sà yə̀ fyiə kə Musîs kə twâ na nəniy an-a-làŋ ani dè tsə nə̀ wò mə taw.”

Yesù kə zəŋi taw wù kə̀fàʼ ə̀ sǔgôʼ ù nè wìy

(Lukâs 7.1-10; Dzwan 4.43-54)

5Abù Yesù zù kwùm tsə nəniy a Kàpanùm, Wù ùnè tə̀sǔgôʼ tə Lôm ù lìy wiy bù a kə̀lə̀ we, bwoʼ we nə̀ wokiy ghii a we nə, 6“A mwe ə̀ mbyi, wè kə̀fàʼ wam də a ndaw ù dzàŋə̀ nəniy ù də anə ayiə̀ pfə yiy.”

7Yesù ə dzày yə̀ â we nə̀, “Mə bê zəŋə taw ŋwò we.”

8Wù ùnè tə̀sǔgôʼ wə̀ mee a we nə, “Hǎy, a Mwe mə də ndiə yəə wò nə bû a ndaw yam, swǎy tsə kə dzə̀, tə̀ wè kə̀fàʼ wam ki taw kə. 9Mə kwu aghê nê mə faʼà a təŋə̀ ghu, mə kwu soʼo nəniy sǔgôʼ tìy ghu faʼà nəniy a təŋə̀ mìə̀, mə kwu nəniy daʼa kiy ani dzày yə̀ â ùmòʼ a we nə, ‘Ŋwòə!’ Ù kî ŋwò yə̀, mə də ani dzày yə̀ sòʼò â ù lìy a we nə, ‘Bǔ!’ U bù sòʼò. Mə də ani dzày tsə â wù kə̀fàʼ wam a we nə, ‘Zəŋi yə ghii!’ U zəŋi yə̀ sòʼò.”

10Abù Yesù zuw tsə ayiə yə ghii, idzwə yiy ŋge zwum yə̀ we ate, U dzày yə̀ awò aghù yə̀ ghu kə dzwumə̀ nəniy we a ghu nə, “Mə ndzəmə̀ dzìy bə̀ ŋwò mə kamə kə̀ kôʼkôʼ dzəə wù lìy wìy fə anə inaʼ Islàel ù kwu dzòʼò ìbɛmə yə wù wə̀ kwu nəniy. 11Mə ndzəmə̀ dzìy bə̀ ŋwò awò ghà nə̀, aghê nî ŋwò bə̀ anə nàʼà tə mbyi tə tə̀dzə̀m ghu bû a lòʼo kə Zə̀kìy saʼa nəniy ate nə̀ Ablàhâm, nə̀ Ayzìk, nə̀ Dzàkôb anə inyi yə i də nəniy an-a-vələ. 12A kwuni bû aghû yə̀ ghu kə kwu ani ba dòʼò awo a lòʼo kə Zə̀kìy saʼa nəniy ate, ghu ni nîy maʼà fyi yə̂ ghu anə kələm, ghu ni diiy fələ àsooŋ.” 13Yesù ə dzày yə̀ â wù tə̀sǔgôʼ ùnè wə̀ a we nə, “Zù i yiə̀ yìy a ndaw, ibɛmə yiə̀ yìy mə zəŋi nə̀ i doʼò kə anə yiə yə wò dzày nəniy.”

Wè kə̀fàʼ ə̀ we wə dyaŋi taw kə anə sòŋə fə ghà fə̀.

Yesù ə zəŋi taw kə ndə̀mə̀ àghù

(Mâk 1.29-34; Lukâs 4.38-41)

14Yesù ə bwìy zù a ndàw Pità, zù kòʼ yə̀ nèwìy Pità anə ukày ù dzàŋə̀ nəniy uwee wiy. 15U mwàm tsə wokə we, uwee wə dyaŋi mày. Nèwiy Pità wə̀ ə dyaŋi ŋwò dɛ̀m tsə ghu.

16Nə̀ inyikwubì tìy, aghee bòʼò bə̀ àghù yə̀ nsìy mə̀bɛbə̀ mìy kə də azòŋə̀ ghu akə̀lə̀ Yesù. Yesù ə dzày tsə kə iyiə imòʼ dzwùm fyi ŋwò tsə nsìy mə̀bɛbə̀ mə̀, u zəŋi taw kə sòʼò àghè àdzaŋə yə àdzə̀m. 17Ù kə fàʼ àyiə yə ani zəŋi tsə nə̀, ayiə yə wè ntwùm ə̀ Kə̀zə̀ Ìzayà kə twâ na nəniy nə̀ a bû fyi àsoŋə̀ yìy. Ù kə dzày na nə̀, “U kə nìy ŋwò dzàŋ tə ŋgàŋ, nìy ŋwò sòʼò fəm kə ŋgàŋ.”

Aghê liy ghu kə dziy dzwumì soʼò Yesù

(Lukâs 9.57-62)

18Abù Yesù kòʼ tsə ŋwàâ kìy lwe dòʼò a tə̀ŋə̀ we, u dzày yə̀ awò tsə̀təndii tə we tiy nə̀ ghu dâŋ a bə̀d kə iŋwù kə̀ liy kə. 19Wù ù tyi dê ùlâŋ ù lìy wǐy zù bù dzày tsə a we nə, “A àtyidè, mə dzwumə̀ bə̀ ŋwò wô abu wò zè kə yə!”

20Yesù ə bə̀lì kə a we nə, “Ŋkəŋə miy kwu ubwôʼ u ghu ìm muə nəniy ate, ŋwùni kwu soʼo ndaw tiy ani mùə̀ ate, Wà Wù kwuni kwu way loʼo kə̀ gaʼa k-a-tuw kiy.”

21Wù lìy wìy nə̀ ù kə də tsə̀ndii, ù mee a we nə, “A mwe, təmi tsə mə zû kələ bə̂ dzə̂ təli wam.”

22Yesù ə dzày yə̀ a we nə, “Dzwùmi bə̀ miə, wò na tə̀ aghû yə̀ ghu pfə doʼò ghu kələ yə̂ àghè pfə yiy.”

Yesù kə bwiy na zoŋ

(Mâk 4.35-41; Lukâs 8.22-25)

23Abù ì yîy tsìy tsə nəniy, Yesù ə nyi kə anə kəmfə̀n nə̀ tsə̀təndii tə we tiy ŋwò yə̀. 24Zòŋə̀ ì lìy yiy màŋ kaʼ tsə kə ani tsìy anə iŋwù yəə mfə̀n kìy ni fwuli. Yesù ə kwunə bvunə. 25Tsə̀təndii tə we tiy ə zù zɛ̀m kə we, a we nə, “A Mwe ə̀ mbyi, ŋwòə kə idoŋ wò fây ghə̀d, Ghè kî pfə kə ŋwò!”

26Yesù ə bə̀lì kə nə̀, “Ghà tsəŋə kìə̀? Ghà kamə kəli ibɛmə yiy.” U dyaŋi kwà tsə zoŋ yə, i mày yə̀, lòʼo tiy dòʼò tsə moŋ.

27Adzwə ŋge zwum yə̀ àghù yə̀ ghu kə də anə kəmfə̀n, ghu bəbə anə iwè i ghu nə̀, “À yù də̌ ndiə? Zoŋ zuw dyaŋə lâŋ kə we kiy!”

Aghê à liy abè nə̀ nsìy mə̀bɛbə̀ mìy anə iwè

(Mâk 5.1-20; Lukâs 8.26-39)

28Abù Yesù zù kùm tsə nəniy a ŋgwùŋ ì lìy yə̀ anə inaʼ i Gàdalà, u kpe yə̀ nə̀ àghè àbè ghu kə kwu nsìy mə̀bɛbə̀ mìy anə iwè. Ghu kə ŋwò bə̀ anə dzwə təsày. Ghu kə ŋge kwu kədaʼa, aghê kə kàmə̀ tsìy tsə̀ wǎy dzəd a bə̀d kə ghà kə̀. 29Ghu ə bwoʼ fyi kəbôŋ nə̀, “A Yesù, Wà Kə̀zə̀, wò kwu iyiə kìə̀ nə̀ ghə̀d ə? Wò mə bù ani bù byɛbi màʼà ghə̀d nə̀ soŋə fiy kamə kpe â Zə̀kìy ani wiy màʼà ghə̀d ə̀?”

30Saʼ kə umfə̀libyiə kiy kə kwùlì də̀ awote kə nyiə nəniy. 31Yəə i də nəniy ghii, nsìy mə̀bɛbə̀ mə bwoʼ Yesù nə̀ wokiy a we nə, “Abu wò dziy dzwûm fyi ghəd, twum nyi yə̀ ghəd anə saʼ kə umfə̀libyiə kə.”

32Yesù ə dzày yə̀ a ghu nə, “Fyi nənìy!” Ghu ŋwò fyi tsə azoŋə̀ àghù yə̀, zù nyi yə̀ azoŋə̀ saʼ kə umfə̀libyiə kə. Saʼ kə umfə̀libyiə kə ŋwò nyəŋ zù bvə̀ nyi tswi tsə anə mbə̀lì kə iŋwù, mwu pfə yə̀ mwi a wote.

33Aghû yə̀ ghu kə yemə̀ nəniy anə umfə̀libyiə wə, ghu nyəŋ zù anə inaʼ zù dzày yə̀ ayiə yə àdzə̀m a kə fyi nəniy azoŋə̀ àghù yə̀ àbè nsìy mə̀bɛbə̀ mə̀ kə də nəniy azoŋə̀ ghu. 34Aghê dzə̀m ə ŋwò fyi bə̀ anə inaʼ ani zù kòʼ Yesù. Abù ghu bû kòʼ tsə nəniy we, ghu bwoʼ we nə̀ wokiy nə̀ ù ŋwò fyi anə tsə kə ghu.

Currently Selected:

Matìyò 8: isu

Highlight

Copy