Matìyò 7
7
Isaʼ yə wò saʼa nəniy aghe liy yiy ate
(Lukâs 6.37,38,41,42)
1Kə̀ saʼ dzə̀ aghê liy, bəə à də wày ghii, Zə̀kìy ki saʼ sòʼò wò. 2Fòʼò ìsaʼ yə wò saʼa nəniy aghû yìy ate, à də̀ sòʼò ighe Zə̀kìy kî saʼa nəniy wô ate. Dzəd yə wò saʼa aghê liy yiy ate, à də̀ sòʼo dzəd yə Zə̀kìy kî saʼa nəniy wô ate. 3Wò də̌ mə̀yə ani kòʼ səfə itay fə nyi doʼò nəniy anə isə i àzwə̀ nə̀ wò kwuni kwu kə̂m kə fəkàʼ anə isə yiə̀ ə? 4Wò də̌ mə̀yə ani dzày nə̀ Kə̀lə̀ â wò a àzə̀ wam, bù mə fɛb maʼà fyi bə̂ səfə itay anə isə yiə̀ nə̀ wò wày ani kòʼ kə̀m kə fəkàʼ kə̀ kə də nəniy anə isə yiə̀ ə? 5Gha, mə̀ nə̀ nyi mbe imbè, wò kwu ani nìy ŋwò fyi bə̀ dzə̀ kə̀m kə fəkàʼ kə̀ kə də nəniy anə isə yiə̀ isəə, wò ki dyaŋi də ani kòʼ dzwàb tsə səfə itay fə, fə də nəniy anə isə i àzə̀ yiə̀.
6Ghà kə nîy kə dzə̀ fyiə kə̀ zwe kə à də k-a-zə̀ kìy ghà nyiə̀ yə̂ â bvu tiy, tə ki fə̂d kâm dzûm ghà. Ghà kə nîy kə dzə̀ atay ghi àmwaa àdzoŋə̀ yìy ghà maʼà yə̂ awò ùmfə̀libyiə wiy, u ki dyî maʼà anə awù.
Ŋwa yə̀ ufyiə wə wò làʼà nəniy awò Zə̀kìy
(Lukâs 11.9-13)
7I tsəŋə ŋwa yə kə fyiə kə wò làʼà nəniy â Zə̀kiy, ù kì nyìə̀ ŋwò. I tsəŋə khu yə kə fyiə kə wò làʼà nəniy, Zə̀kìy kî zəŋə ŋwò wò kôʼ. I tsəŋə bwoʼo tsə kə ufəb u ndaw wiy Zə̀kìy ki fwiy maʼà tsə â wò. 8Wù wə̀ ù tsəb ŋwa yə̂ dzə̂ â Zə̀kìy, ù kì kyilə ŋwò fyiə kə ù làʼà nəniy, wù wə̀ ù tsə̀ŋə̀ khu yə̂ kə ŋwoə̀, Zə̀kìy kî zəŋə ŋwò nə̀ ù kòʼ fyiə kə ù khu nəniy, wù wə̀ ù tsə̀ŋə̀ bwoʼo yə̂ kəə bâʼ kìy, Zə̀kìy kî fwukə tsə ŋwò bâʼ kìy awò we. 9À də̌ ndiə anə uzə ghii nə̀ tě wa, abu wa niə̀ ŋwa bə̂ nəniy bakiy awò wò, wò də̀ ŋwô ani fə̀d nìy kə itay wò nyiə̀ yə̂ â we ə̀? 10Moo wò də̀ ŋwô ani nìy kə zwə wò nyiə̀ yə̂ awò wa niə̀, abu ù ŋwa bə̂ nəniy itsi yiy â wò ə̀? 11Bəə aghê àbɛbə yəə à də̀ gha, ghà də ani nyə̀ ùfyiə ùdzoŋə̀ wìy awò awa ghi, mòʼo tsə təli ghi wə ù də nəniy an-a-vələ yəə ù kì də ani nyə̀ ùfyiə ùdzoŋə̀ wìy awò àghù yə̀ ghu ŋwa yə̂ nəniy â we!
12Iyiə yə̀ i də nəniy anə ŋwàʼà kə ulàŋ u Musîs nə̀ ayiə yə aghě ntwùm ə̀ Kə̀zə̀ kə khu twâ na nəniy à də̌ nə̀, “I zəŋə yəə ayiə yə wò liə nəniy nə̀ aghê si zəŋə bəə nə̀ wò.”
Dzə̀d ì Ìtsà yìy kwali də̀ ŋwô
(Lukâs 13.24)
13Ghà kwu ani tsìy anə kwali fə ufə̀b u mbà, aŋwòə ufə̂b wə̀ u zê nəniy anə uvə̀lə̀ u dûw ŋwò. Dzəd yə ì zè nəniy awo ì bva ŋwò. Ndə̀mə̀ àghè tsîy ate. 14Akwuni bû kwali fə dzəd fə, à də̌ dzə̀lə̀ ìtsà. Ì taw ŋwò ani bwìy. À bwìy kə̂ sə fə aghù anə dzə̀d ìghè yə̀.
Aghê ntwumə Kəzə̀ àsoŋə̀ yìy nə̀ à guw yiy.
(Lukâs 6.43-45)
15Ghà ki yemə tsə nə̀ àghě ntwùm ə̀ ìguw yìy. Ghu bê a kə̀lə̀ ghà ghu bvamə zəŋə yəə à də̀ təndzù anə gùw tə iwe. Anə təfòŋ mwàmə mə̀ ghu miy də yəə à də̀ ukəŋ. 16Ghà kî kyilə ŋwòə ghu anə yiə ghu à zəŋə yiy. Wò wày dzə ani zù kumi lamə a təŋə təfàb, moo ani kumi àŋgəm a təŋə ufàm. 17Kâʼ fə̀ dzoŋə̀ fìy muə kə ùtam ùdzoŋə̀ wìy. Akwuni bû kàʼ fə̀ bɛbə fiy, fə muə bə̀ kə ùtam ùbɛbə wiy 18Kâʼ fə̀dzoŋə̀ fìy way dzə ani mu utam ùbɛbə wiy, Kâʼ fə̀bɛbə fiy way soʼo ani mu dzə̀ ùtam ùdzoŋə̀ wìy. 19Ghu kî fòŋə̀ myìʼà ŋwò kâʼ fə̀ fə də muə way utam ùdzòŋə̀ wìy, ghu piə̀ màʼà. 20Ghà kî kòʼò kyilə àghě ntwùm ìgûw yìy anə ayiə ghu àzəŋə yiy.
Yesù nì dzìy yə̀ â aghè liy nə̀ Mə kə kwu dzə̀ way gha
(Lukâs 13.25-27)
21À wày dzə aghê dzə̀m ghu tyoŋə nəniy miə nə̀, “Mwe ə̀ Mbyi, Mwe ə̀ Mbyi” ghu nî zè nəniy a lòʼo kə Zə̀kìy saʼa nəniy ate, à mày kə à yuu ghu kwuni zəŋə nəniy ayiə yə Təli wam wə ù də nəniy anə kəvələ ù liə nəniy nə̀ ghu zəŋi. 22Anə ntsuk fə isaʼ, ndə̀mə̀ àghè ni dziy â mìə̀ nə̀, “Mwe ə̀ Mbyi, Mwe ə̀ Mbyi, ghè kə nìʼà tsə̀ ntwùm ə̀ Kə̀zə̀ anə izəd yiə̀, ghě dzwùm fyi ndə̀mə̀ nsìy mə̀bɛbə̀ mìy anə izəd yiə̀, zəŋi sòʼò ndə̀mə̀ ndə̀mə̀ tə mali tə yiə.” 23Mə ni kwuni dziy â ghu nə̀, “Mə kə kwu dzə̀ way gha, ŋwòə tsə nənìy a kə̀lə̀ mìə̀, ghà də aghê àbɛbə yiy!”
Le tə aghè à biə təndaw yiy àbè
(Lukâs 6.47-49)
24Wù wə̀ ù zuw nəniy ayiə yam àdziy yiy, zəŋə yə̀ sòʼò, ù də̀ yəə à də̌ wù ùtwabə̀ wə̀ ù byiə nəniy ndàw we anə kəna ì taw dzwabə̀. 25Abù iwe yiy niə̀ tsə, dzwì lwe kə, zoŋ bû də̀ŋ tsə nəniy ndàw ìghà yə̀ soʼo, i də kə̀ kwuni bəlì aŋwòə ghu kə byiə na tsə kə ndàw ìghà yə̀ anə kəna.
26“Wù wə̀ ù zuw nəniy ayiə yam à dziy yiy, kwuni zəŋə way ayiə yə mə dzîy nəniy, ù də̀ yəə à də̌ wù ù liʼà wə̀ ù byiə nəniy ndàw we anə lòʼo k-a-sisi. 27Abù iwe yiy niə̀ tsə, dzwì lwe kə, zoŋ bû də̀ŋ tsə nəniy ndàw ìghà yə̀, i bəlì bvwə̀.”
Daʼa kə Yesù kwu nəniy ani tyi dè àyiə
28Abù Yesù dzày mâ tsə nəniy ayiə yə, adzwə zwum ŋwàâ kə aghù kə̀ anə ayiə yə ù kə tyi dê nəniy ayiə yiy ate, 29aŋwòə ù kə tyiə dè yəə à də̌ wù wə̀ ù kwu nəniy daʼa kə̀soŋə̀ kìy. Ù kə tyiə dè dzə̀ wày yəə à də̀ aghû yə̀ ghu kə tyiə dê nəniy ulâŋ u Musîs wìy.
Currently Selected:
Matìyò 7: isu
Highlight
Share
Copy
Want to have your highlights saved across all your devices? Sign up or sign in
© CABTAL 2023
