Matìyò 14

Ipfə i Dzwan wə̀ ù kə nyiə̂ nəniy aghê nə̀ mwi m-à-zə̀ mìy

(Mâk 6.14-29; Lukâs 9.7-9)

1Anə soŋə fə ghà fə̀, Helòd kə də̀ kədòŋ a Galìlî, u zuw tsə ayiə kwùmə yə̀ nə̀ Yesù. 2U dzày yə̀ awò àghě kəfàʼ ə we yiy a ghu nə, “Dzwan wə ù nyìə̀ nəniy mwi m-à-zə̀ mìy, ù mə zɛ̀mə̀ dzwoŋi anə ipfə? À yù də̀ iyiə i ghè yə̀ ù kwu nəniy daʼa kiy ani zəŋi mali tə yiə tiy.”

3I kə ghî də̌ nə̀ soŋə fə̀ liy fiy kə də̀ ŋwô Helòd kə dzây nə̀ ghu kwiy kwe na Dzwan a ndàw ntsaʼ anə iyiə i Hèlodìàs wìy àzə̀ ə̀ we tyoŋə Filîp. 4Soŋə fə Helòd kə nîy yə̂ nəniy wìy àzə̀, Dzwan ə dzìy a we nə, “Lâŋ kìy byemə dzə̀ wày nə̀ wò nîy we.” 5Helòd ə mòʼ tsə nə̀ ghe wiy màʼà Dzwan, u kwuni tsəŋə àghù aŋwòə aghê yə̀ kə kwu nə̀ Dzwan kə də wè ntwùm ə̀ Kə̀zə̀.

6Abù anə ndzòʼò ntsuk fə ghu kə byi nəniy Helòd ate, wà Hèlodìàs ùyəŋi bən anə səkə ghu ghii, ibən i ghè yə̀ ə ŋge dzwàb anə sə kə Helòd, 7u nyi kə məŋkà tɛb na dyaŋi yə̀ dzìy nə̀ ghe kî nyìə̀ ŋwòə we nə̀ fyiə kə ù liə nəniy.

8Zə̂ we tswù tsə we, nə̀ ù dzày yə̀ â we nə̀, “Mə liə nə̀ wò nyiə̀ bə̂ tuw kə Dzwan wə ù nyìə̀ nəniy mwi m-à-zə̀ mìy nyiə fəə anə kənəli.”

9Iyiə i ghè yə̀ ə fyimi dòŋ kə̀ ghii, yəə ù kə kâ byɛbi dzə̂ nəniy anə səkə aghù yə̀ ù kə nâm bə̂, u tsày tsə kəlâŋ nə̀ ghu zəŋi yə̂ ìyiə yə ù dzày nəniy. 10Ghu dyaŋi zù gbù ŋwò kə tuw kə Dzwan a ndàw ntsaʼ. 11Ghu bù nə̀ tuw kə ghè kə̀ anə kənəli, nyə̀ yə̀ awò wà ùyəŋi wə. Wà ùyəŋi wə bòʼò nyə̀ yə̀ â zə̂ we. 12Tsə̀təndii tə Dzwan tiy bù bòʼò kələ yə̀ ìvən i Dzwan. Ghu dyaŋi zù dzày yə̀ â Yesù.

Yesù ə fyi tsə aghû təkaam i tà

(Mâk 6.30-44; Lukâs 9.10-17; Dzwan 6.1-14)

13Abù Yesù zuw tsə nəniy ayiə ghè yə̀, u nyi kə anə kəmfə̀n, zù dòʼò yə̀ anə lòʼo k-a-nùw nə̀ noŋə̀ we. Yəə ŋwàâ kə aghù kə̀ zuw tsə nəniy ayiə yə̀ ghi, ghu ŋwò dzwùmì yə̀ we anə lòʼo kə ghè kə̀ anə ifwe. 14Anə yiə yə̀ Yesù kwùm tsə awote, anə iŋgùŋə i dzwî, u kòʼ ŋwà kə ghù, ghu kwô bə̂ nəniy, mwuli kiy kwoʼ we, u zəŋi taw kə aghû yə̀ ghu kə dzaŋə̀ nəniy anə uzə u ghu.

15Nə̀ ìnyikwubì tə ghà tə̀ tsə̀təndii tə Yəsù tìy ə zù bù dzày yə a we nə̀, “Ŋgà fə̂ nam də̀ a mbvən, soŋə fiy mə ŋgee zù sòʼò. Sàli màʼà aghù yə̀ àdzə̀m tə̀ ghu nə̀ zê zwe nyiə fyiə kiy anə nàʼà tə̀ tə kwulì də̀ nəniy fə.”

16Yesù ə bə̀lì kə nə̀, “Ghu kwu dzə̀ way loʼo kə̀ liy kiy ani zù ate, ghà nyiə̀ ghu nə̀ fyiə kə̀ nyiə kiy.”

17Ghu bə̀lì kə â Yesù nə̀, “Ghè fə kwu kə ghɛbə tə uba ìtà nə̀ tsi tiy ibè.”

18Yesù ə dzày yə̀ a ghu nə̀, “Bù nəniy nə̀ ùghe wiy akə̀lə̀ miə̀.” 19Ù dzày tsə nə̀ aghè ghè yə̀ ə doʼò tswi tsə anə uzuu. Ù nìy kə ghɛbə tə uba tə̀ ìtà nə̀ tsi tə ìbè, lia kwoʼ kə anə kəvələ, lwì tsə ufyiə wə̀. Byiʼi tsə ghɛbə tə uba tə̀ nyə̀ yə̀ awò tsə̀təndii tə we tə nə̀ ghu dzâw nyiə̀ yə̂ â ŋwàâ kə aghù kə̀. 20Aghê àdzə̀m ə nyi kwu dzwàb tsə, tsə̀təndii tiy kwumi tsìy yə̀ mbòʼò mə̀mbà in lwe tsə anə uŋkhìy ùvəm nə̀ ghe wiy ubè. 21Ntàŋə̀ iŋə̀mə̀ yə̀ ghu kə nyi nəniy, ghu kə də təkaam ità nə̀ ghu kə̀ taŋ nə way iyəŋi nə̀ ànìsə̂ yìy.

Yesù kə bwìy anə tuw kə mwiiy anə iŋwù

(Mâk 6.45-52; Dzwan 6.15-21)

22Yesù ə dyaŋi dzày yə̀ awò tsə̀təndii tə we tiy nə̀ ghu nyi kə an-a-mfə̀n, tə̀ ghu dâŋ fyi yə̂ isə a ŋgùŋ ìliy yìy. U kwuni dòʼò səə tsə ibàm ani kòʼ tsə ayiə yə ŋwaâ kə̀ dziy salì yə̂ ate. 23Abù ù sàlì maʼà tsə ŋwàâ kə̀, u ŋwò tsə a wote, u kwoʼ yə̀ anə udoŋ ani zù gwùŋì. Utsuk u dzəə bə̀, Yesù ə də̀ kə awo nə̀ noŋə we. 24A sòŋə fə ghè fə̀ nə̀ mfə̀n kìy kâm wày dzə anə iŋgùŋə, nə̀ kə mə zù kwùm tsə anə fôŋə ìŋwù, zoŋ təŋə kyabə tsə̂ nəniy nə̀ mbuw kə dzwî kìy.

25Ani zù kwùm nə̀ ùmwaʼ ù twuŋə wiy, u ŋwò dzwùmì yə̀ ghu nə̀ ù bwìy yə̀ anə tuw kə mwi anə iŋwù. 26Abù tsə̀təndii tə we tiy kôʼ yə̂ nəniy we yəə ù bè nəniy anə mwi, ghu kaʼ kə anə i bvuʼi məmbòŋ nə̀ ìtsəŋ yiy dzìy tsə nə, “À dəə àmbvə̂ntsə!” Fôŋtìy fyi ghu adzə̀m anə yiə yə ghu kə kôʼ yə̂ nəniy we.

27U dzày yə̀ a ghu nə, “Kə̀ nə̀ tsəŋ dzə̀ à də̀ miə Yesù! Ghà kəli tsə kə tə̀fòŋ.”

28Pità ə ŋwò bwoʼ fyi kə kəbôŋ dzìy tsə nə̀, “A Mwe ə̀ mbyi, abu à də wô dzay bə tə̀ mə tâ bə̂ soʼò anə tuw kə mwi in bù a kə̀lə̀ wò.”

29Yesù ə dzày yə̀ a we nə, “Bù!” Pità ə dyaŋi tà fyi kə sòʼò anə kəmfə̀n kaʼ yə̀ ani bwìy koŋə anə tuw kə mwi zè a kə̀lə̀ Yesù. 30Abù ù kwuni kôʼ nəniy zoŋ yə u kaʼ ani tsəŋ, kaʼ yə̀ ani mələ nyi tswi anə dzwî. U bwoʼ fyi bə̀ kə̀bòŋ nə̀, “A Mwe ə̀ mbyi, fày miə.”

31Yesù ə dyaŋi nìày fyi yə̀ kə̀wo, kwiy tsə we, dzày yə̀ a we nə, “Wò kwu liy fə ibɛmə, à də kìə̀ wò kaʼ yə̂ ani sə̀m kè ə?”

32Abù ghu bû nyi kwoʼ kə anə kəmfə̀n, zòŋ yə dyaŋi mày yə̀. 33Aghû yə̀ ghu kə də nəniy an-a-mfə̀n, ghu bù kaʼ ani fwùlì we dzìy tsə nə, “Ìsoŋìsoŋì wò ndzə̀m də Wà Kə̀zə̀.”

Yesù ə Zəŋi taw Aghê à dzaŋə anə inaʼ i Gènesalèt

(Mâk 6.53-56)

34Abù ghu dâŋ fyi yə̂ nəniy a ŋgwùŋə̀ ìŋwù ìlìy yìy, zù kwùm tsə anə inaʼ i Gènesalèt, 35aghě inaʼ i ghè yə̀ ə kòʼ kəli tsə Yesù, ghu nàʼà tsìy yə̀ anə mbwòʼ ì ghè yə̀ ìdzə̀m. Ghu bòʼò bə̀ àghè à dzaŋə yiy àdzə̀m anə inaʼ bù nə̀ ghu a kə̀lə̀ Yesù. 36Ghu bwoʼ we nə̀ wokiy nə̀ aghê à dzaŋə yə̀ si lyebə mwamə tsə we anə təndzwu tə̀ ghu taw kə. Aghê à dzə̀m ghu kə mwâm nəniy ndzwu tə we tiy ghu maa taw mà àdzə̀m.

Currently Selected:

Matìyò 14: isu

Highlight

Copy