Lukâs 16

Zə̀zə̌ fə wù kə̀fàʼ wə̀ ù kwu nəniy utwab ù tsee wiy

1Yesù ə dzày yə̀ awò tsə̀təndii tə we tiy aghu nə, “Wù ù kwumə̀ ù lìy wìy kə də̀ tsə̀ kə ŋwô, u kwu wè kəfàʼ ə̀ we ù yèmə̀ nəniy anə ufyiə wə ù kwu nəniy, wù ù kwumə̀ ù ghè wə̀ ə zuw tsə nə̀ wù kə̀fàʼ wə̀ sə̀àŋə̀ miʼà ùkhiy u we. 2Wù ù kwumə̀ wə̀ ə twoŋə tsìy nyi yə̀ wè kə̀fàʼ wə̀ a ndaw, bəb yə̀ awe nə, ‘À yù də̌ ndzoʼ àyiə àghaa yiy mə zuw azoŋə̀ wò ə? Tyi dzày bə̀ yəə wò fàʼ nəniy ate anə ukhiy wam. Wò kì kàm fàʼ dzə̀ wày â mìə̀ ani kaʼ tsə zii zù isə’ ” 3Wè kə̀fàʼ wə ə dzày tsə anə fôŋ ə̀ we nə̀, “Mwe ə̀ kə̀fàʼ wam kî fyilə myàʼà ŋwò miə anə kəfàʼ. Mə kî sì zəŋə tsə mə̀yə? Mə taʼà kwu way daʼa kə̀ vulə kiy, tuw kiy dədlə sòʼò miə̀ ani bwìy ŋwa tsə̀ ùfyiə. 4Mə mə kəli ayiə yə mə kî zəŋə nəniy, tə̀ abu ghu fyili tsə miə an-a-fàʼ, aghê ki namə ŋgwamə nia kə miə ŋwô anə ndaw tə ghu.”

5U kaʼ tsə ani twoŋə bə̀ àghù yə̀ ùmòʼ umòʼ ghu kə kwu nəniy mwe ə̀ kə̀fàʼ ə̀ we nə̀ ùndàŋ wìy. U dzày yə̀ awò wù ù səsə wə nə̀, “Wò kwu mwe ə̀ kə̀fàʼ wam nə̀ kìə̀?” 6Wù wə dzìy a we nə, “À də ukaŋ u mə̀mbvu fəbwaam.” Wù kə̀fàʼ wə̀ ə dzày yə̀ a we nə, “Niy ŋwàʼà k-a-ndàŋ kə̀, dòʼo tsə wò zəaŋì twâ tsə nə̀ à də ukaŋ mə̀vəm intà.” 7Wè kə̀fàʼ wə bəb yə̀ sòʼo â wù lìy wə̀ a we nə, “Wò kwu mwe ə̀ kə̀fàʼ wam nə̀ kìə̀ kìy,” u bə̀lì kə a we nə, “À də ùmbè u saŋ mə̀bwàm inti.” Wè kə̀fàʼ wə dzày yə̀ a we nə, “Niy ŋwàʼa k-a-ndàŋ kə̀, dòʼo tsə wò zəaŋì twâ tsə nə̀ u də mə̀mbwàm ìmbè.”

8Mwe ə̀ kə̀fàʼ wə̀ ə kali dzwàb tsə wè kə̀fàʼ ə̀ we ùbɛbə̀ wə̀ anə yiə yə ù twòʼò bày kə uwee u we wiy. À yù də yiə yə i də ighe yiy! Aghě mbyi yə̀ bày kə̀ iwee i ghu, tsìy fyi aghû yə̀ ghu də anə asə̂ zwe yiy.

9Yesù ə dzày yə̀ a ghu nə, “I kaŋə yə afwu yiy anə ufyiə wə wò kyilə fə n-a-mbvə̀dintsə tə̀ abu u mây fyi ŋwô yə̂ nəniy, Zə̀kìy ni kpe nî wò anə inaʼ i tsà. 10Wù wə̀ ù fàʼà dzwabə̀ nəniy tsitsi anə ŋyoŋə fə ufyiə fə ù kwu nəniy, ù də̀ ŋwô ani fàʼ dzwàb sòʼò anə ndəŋ kə ufyiə kə ghu nyiə̀ yə awò we. Wù wə̀ ù də fàʼà wày tsitsi anə nyoŋə fə ufyiə fə ghu kwe na anə wokə we, ù wày dzə ani fàʼ tsitsi anə ndə̀m. 11Abu wò tsè nəniy aghê fə anə ŋyòŋə mə̀ ùfyiə, à də ndiə ani nyiə̀ na ukhiy ù soŋə̀ wìy â wò ə? 12Abu wò də yèmə̀ wày anə fyiə kə wû ù lìy, à də ndiə ani nyiə̀ bə̀ wò nə̀ kə kiə̀ kìy ə?”

13Wù lìy wày dzə ani dòʼò wè kə̀fàʼ awò nə̀ mwe ufàʼ àbè, ù də̀ ani liə yəə ù lìy, bà ù lìy wə̀ moo ù ki bvamə faʼa yə awò ù lìy kwunə kòʼò kè ù lìy wə̀. Wò wày dzə ani fwùlì Kə̀zə̀, wò ki fwulə soʼo ùkhiy wiy nyi mòʼ.

Ayiə à liy Yesù kə dziy nəniy.

(Matìyò 11.12-13; 5.31-32; Mâk 10.11-12)

14Aghee Falàsî yìy kə̀ ŋge liə ukhiy, abu ghu zuw tsə ayiə yə Yesù dzìy ghii, ghu kaʼ ani twe màʼà we. 15Yesù ə dzày yə̀ a ghu nə, “À də gha ghǎ kwoʼo iwee yiy anə səkə aghù dzìy nə̀ gha də aghě tsitsi yiy, Zə̀kìy kwuni kòʼò ŋwò ayiə yə a də anə fòŋ tii, aŋwòə ayiə yə aghee mbyi yiy kwu nəniy nə̀ à də kwab tə yiə à màŋ də ayiə àzwunə anə sə k-a-zə̀.”

16I də nə̀ aghê kə kwu ani mùə̀ anə ulàŋ u Musîs nə̀ ayiə àghě ntwùm ə̀ Kə̀zə̀, ghu bû kwûm anə soŋə fə Dzwan wə̀ ù nyiə mwi m-à-zə̀ mìy. Anə yiə yə ghu kaʼ dzə̂ ani nàʼà ntwùm ə̀ ìdzòŋì kwùmə̀ yə̀ nə̀ loʼo kə Zə̀kìy Saʼa nəniy aghee we yiy ate, aghê dzə̀m ə̀ nyiə̀ də̀mə̀ kə ani nyi mùə̀ anə Lòʼo kə Zə̀kìy saʼa nəniy aghû yiy ate. 17Kəbyiwuŋ nə̀ mbvə̀dintsə kiy, nî mìì ŋwò, iyiə imòʼ anə ulàŋ, nî kwuni zù kòʼ dzə̀ wày loʼo kiy.

18“Wù wə̀ ù dzwùm fyi nəniy wìy we nìy yə̀ wìyəŋi ù ŋwò wìy, ù mə zəŋə ayiə təmwàŋ yìy, Wù wə̀ soʼo ù nìy yə̂ nəniy wìyəŋi wə̀ ù fyi ŋwô nəniy ŋəm, ù mə zəŋə ayiə təmwàŋ ə̀.”

Wù ù kwumə̀ wìy nə̀ Lazalùs

19Wù u kwumə̀ ù lìy kə də tsə̀ ŋwô, u dzə̀ŋə̀ təŋə tsə̀ kə ndzwu tə ivən ì taw yiy, nyiə təŋə tsə̀ kə ùfànyiə ù dzoŋə̀ wìy ntsuk i ndzə̀m. 20Wù u lâ ù lìy wiy də sòʼo ghu kə tyoŋə we nə̀ à də Lazalùs, nsə̀ə̀ ə màŋ də anə uwè u we udzə̀m, u bà ani dòʼò anə ufə̀b u mbà u wù ù kwumə̀ wə̀. 21U màŋə̀ dìy kə nə̀ ghe si kwumə nyiə mbòʼò mə̀ ufànyiə̀ mə ìn tswaʼà dyoʼò nəniy a mbvə̀d a təŋə ndàŋ ə̀ wù ù kwumə̀ wə̀ nyiə nəniy ate. Bvu tiy ə màŋə̀ bè nyiŋə niə nsə̀ə̀ mə̀ we mə.

22Abù kə ntsuk ù liy wiy wù ù lâ wə pfə tsə tsə̀təndii tə a-zə̀ tiy bù bòʼò kə we, zù nə̀ we a kə̀lə̀ Ablàhâm a lòʼo kə isəaŋi. Wù ù kwumə̀ wə pfə tsə sòʼò ghu kələ tsə we. 23U zù anə lòʼo kə aghê pfə yiy zê dyoʼò nəniy ate kaʼ tsə ani fi ifi ìsoŋə yìy awote, abù ù lia kwoʼ kə idoŋ, u kòʼ này yə̀ Ablàhâm, Lazalùs də nəniy akə̀lə̀ we. 24U twoŋə fyi bə̀ anə dzə̀ ìtaw yìy nə̀, “A təli wam Ablàhâm, kwoʼ nə̀ mwuli kiy azoŋə̀ mìə̀! Twum tsə Lazalùs tə̀ ù tsùw tsə wà kə̀wo anə mwi ù tsɛm màʼà bə̀ anə nɛm kam. Mə ŋge fyaʼa ŋwò anə uvə̀lə̀.”

25Ablàhâm ə kwunə dzìy yə̀ a we nə, “A wa nam, kòʼò tsə, soŋə fə wò kə nam muə tsə nəniy anə mbyi, wò kə kwu ufyiə ùdzoŋə̀ wìy udzə̀m. Lazalùs ə kyilə ufyiə ù bɛbə wiy. A kwuni bû nyiə ù nyìə̀ zuw dzwàbə̀ ŋwò i we yiy fəə, wò zuw byɛbə nəniy. 26Ani bòʼò dzày tsə sòʼò, ani ŋwò tsə fə a lòʼo kə ghee də ate bù a lòʼo kə wò də nəniy ate, iwad i mə dzàw na ŋgaŋ, nə̀ wù lìy way ani dàŋ a bə̀d kə àzə̀” 27Wù ù kwumə̀ wə̀ dzày yə̀ nə̀, “Kə̀lə â wò a təli wam Ablàhâm, twum yə we anə be kə təli wam, 28aŋwòə awizə̂ yamə nam dòʼò səə ŋwô àtà. Ù zù kwà na yə̀ ghu, à wày a ghii, ghu ki bû kway bə̂ mìə̀ fə anə uvə̀lə̀.”

29Ablàhâm ə bəlì yə̀ we nə, “Awizə̂ yiə̀ kwu ŋwô ani twoŋə ulâŋ wə̀ Musîs kə twâ nəniy, nə̀ ulàŋ wə̀ aghee ntwùm ə̀ Kə̀zə̀ kə twâ na nəniy, ghu kwu ani nia tsə ulàŋ u ghè wə̀.” 30Wù ù kwumə̀ wə̀ ə dzay yə we nə, “Hàay yiy, a təli wam Ablàhâm! Abu wù lìy zɛ̀mə̀ kə anə ipfə zù a kə̀lə̀ ghu, ghu kî zwulə ŋwò â we, ghu kyemì yə̂ awò Zə̀kìy.” 31Ablàhâm ə dzày yə̀ a we nə, “Abu ghu twe ani na ulâŋ u Musîs nə̀ àyiə yə aghee ntwùm ə̀ Kə̀zə̀ kə twâ na, ghu way ani zuw sòʼò àyiə wù wə̀ ù zɛ̀mə̀ kəə ani ipfə.”

Currently Selected:

Lukâs 16: isu

Highlight

Copy