Kə̀fàʼ 6

Ghu kə sày kə aghê sèmbe nə̀ ghu fày àghě ntwùm ə̀ Yesù

1Anə ntsukə mə aghee ntwùm ə̀ Yesù kə nìʼà nəniy ntwùm ə̀ ìdzoŋə̀ yìy ate, ntàŋə̀ tsə̀təndii tə Yesù tìy dùw kwoʼ yə̀. Aghee Glîk yə̀ ghu kə dzəŋə̀ nəniy idzəŋi ghè Dzû yìy, ə kaʼ yə̀ ani zwìy nə̀ àghee Dzû yìy. Aghee Glîk dzìy nə̀ aghee Dzû yìy dzû ufànyiə nyə̀ wày iyəŋi mpfənsə aghee Glîk yìy. 2Aghee ntwùm ə̀ Yesù àvəm nə̀ àghè bè, ghu kwi tsə kədzəŋə nə̀ àghù yə̀ ghu bɛmə nəniy â Zə̀kìy, dzày yə̀ aghu nə, “Ghè way dzə ani bwi na yə̀ ntwùm ə̀ Kə̀zə̀ dzìy ghè dzû ùfànyiə. 3Awizə̂ yamə, ghà sày kə aghê àsèmbe anə uzə ghii, aghû yə̀ ghà kwu nə̀ Zwàykə̀zwekiy də azoŋə̀ ghu, ghu kwu soʼo utwab wiy, ŋgà ki nyiə̀ fàʼ kə̀ dzuu kə ufànyiə kə awò ghu. 4A kwuni bû ghə̀d, ghè ki kwu kə ani gwùŋì, nìʼà sòʼò ntwùm ə̀ Kə̀zə̀.”

5Səay kə aghee ntwùm ə̀ Yesù yìy kə nyiə̀ nəniy kə ŋge dzwàb aghě Kəzə̀ yə̀ anə təfòŋ, ghu dyaŋi kaʼ tsə ani sày àghù yə̀ ghu kî dzû ufànyiə wiy. Ghu sày fyi bə̀ Stifə̀n isə ù kə kwu nəniy ibɛmə ìsoŋə̀ yìy, Zwàykə̀zwekiy ŋge də̀ sòʼo azoŋə̀ we. Ghu kàm sày kə Filîp, nə̀ Plokolùs, nə̀ Nìkanòl, nə̀ Timòn nə̀ Pàmenàs nə̀ Nikolàs wə̀ ù kə də nəniy wè Antìyòk. Ù kə way dzə wè Dzû, u kwuni bɛmə awò Zə̀ kə aghě Dzû kiy. 6Ghu nìy kə aghû yə̀ ghu sây kə, zù dè yə̀ ghu awò aghee ntwùm ə̀ Yesù yìy. Aghě ntwùm ə̀ Yesù yə̀ ə gaʼ tsə awo azoŋə̀ ghu gwùŋì tsə nə̀ Zə̀kìy fây ghu ani fàʼ fàʼ kə̀.

7Ntwùmə̀ Kə̀zə̀ ə zè kə sə kə̀ sə. Ndə̀mə̀ tsə̀təndii tə Yesù tìy tsə̀ŋə dùw kwoʼò yə̀ kə ŋwò a Yèlusalèm. Ndə̀mə̀ àghě lwaʼa yiy bɛmə kə sòʼò â Zə̀kìy.

Ŋgəd tə aghě Dzû yiy kwi ŋwò yə̀ Stifə̀n

8Stifə̀n kə də̌ wù wə̀ Zə̀kìy kə dê nəniy we nə̀ fòŋə̀ ìdzòŋə̀ yìy, nyə̀ tsə sòʼò we nə̀ daʼa kiy ani fàʼ mali tə yiə tə̀ soŋə̀ tìy nə̀ kwab tə yiə tiy anə fwumi kə ghù. 9Aghê liy ghu kə ŋwô bə̂ nəniy anə ndàw dzəŋə kə aghě Dzû a Sìlîn nə̀ anə inaʼ i Àlèzandà. Ghu kə də̀ fwumi nə̀ àghě Dzû àliy yiy ghu kə ŋwô bə̂ anə mbwòʼ ə̀ Sìlisìyà nə a mbòʼò Esìyà, ghu kə tyoŋə ghu nə̀ à də̀ “Aghû yə̀ ghu fyi ŋwô tsə anə fàʼ kə ukwə̂d.” Ghu bù kaʼ ani səay Stifə̀n anə fàʼ kə̀ ù kə̀ fàʼà nəniy. 10Ghu kə kwuni wày dzə ani bə̀lì Stifə̀n bòʼ ùtwab wə Zwàykə̀zwekiy kə nyiə̀ nəniy â we nə̀ ù dzày àyiə ate. 11Aghû yə̀ ə zwuni tsə iŋə̀mə̀ aliy liy yiy nə̀ ghu dzây tsə nə̀, “Ghè kə zuw Stifə̀n dzìy nəniy ayiə àbɛbə yiy anə tuw kə Musîs, dzìy sòʼò anə tuw k-a-zə̀.” 12Aghû yə̀ ghu kə fyi ŋwô tsə nəniy anə fàʼ kə ukwə̂d, ghu ŋwùmì fyi kə fôŋ tə ŋgəd tə inaʼ, nə̀ fòŋ tə aghè tyiə dê ulàŋ wìy, nə̀ fòŋ tə aghè liy yə àdzə̀m, anə ayiə yə ghu dzây. Aghû yə̀ ə kwi tsə Stifə̀n, nìy zù nə̀ we a ndàw ìsaʼà yìy. 13Ghu byay tsə nə̀ àghè liy nə̀ ghu dzây àyiə àbɛbə yiy anə tuw kə Stifə̀n. Ghu nìy tsìy nyi bə̀ nə̀ àghě ghà yə̀. Aghû yə̀ mee “Stifə̀n dzìy kyabə tsə̀ àyiə bɛbə yiy kwùmə̀ yə̀ nə̀ ndàw Kə̀zə̀ ə̀ ŋgàŋ ìzwê yìy, dzìy sòʼò àyiə bɛbə yiy kwùmə̀ yə̀ nə̀ làŋ kə Musîs kìy. 14Ghè mə̀ zuw ù dzìy nə̀ Yesù wə̀ ù kə fyi nəniy a Nazalèt nî sàʼà tsə ndàw Kə̀zə̀ ìdzə̀m, ù kwuni kə soʼò biə kə inaʼ kə ŋgàŋ kə̀ Musîs kə byiə̀ na nəniy.” 15Abù ghu zwuli mâ tsə nəniy ayiə à guw yə aghù yə̀ dzìy nəniy, aghû yə̀ àdzə̀m ghu kə də nəniy a ndàw ìsaʼà yìy, ghu dwùŋ na yə̀ àsə azoŋə̀ Stifə̀n. Ghu kòʼ tsə nə̀ utwûmusə u we wiy mwâ yəə à də̀ utwûmusə tsə̀ndii ə Kə̀zə̀.

Currently Selected:

Kə̀fàʼ 6: isu

Highlight

Copy