Kə̀fàʼ 5

Ayiə yə Ànàniyàs nə̀ Sàfiliyà kə zəŋi

1Wè lìy kə də̀ tsə̀ ŋwô izəd i kə də nə̀ à də̌ Ànàniyàs nə̀ wìy we Sàfiliyà ghu zù fè tsə loʼo kə ghu, 2u səay tsə nə̀ wìy we, nə̀ ghu nasə tsə boʼ kə ukhiy, ghu nìy kə boʼ kə̀liy kə, ghu zû nyiə̀ yə̂ awò àghě ntwùm ə̀ Yesù yìy. 3Pità ə dzày yə̀ a we nə, “A Ànàniyàs, à də̌ kìə̀ wò bɛmə na yə̂ nə̀ Satàn kəli kə daʼa anə fôŋ yiə̀, zəŋi tsə nə̀ wò dzày ayiə guw yiy â Zwàykə̀zwekiy yə? Wò mə nasə boʼ kə ukhiy kiy anə ukhiy wə wò kə̀ fê nəniy loʼo kiə̀ kiy ate. 4Â wò ani zù fè loʼo kə ghè kə̀, à kə kwu tsə wô loʼo kə te kiy. Ukhiy wə wò kə fê nəniy loʼo kə ate à kə nam də̀ sòʼò ùkhiy yiə̀. À zəŋi kìə̀ wô nə̀ wò fâʼ ndzòʼò ìyiə yə? Wò nɛb Kəzə̀, wò kə̀ nɛb dzə̂ aghû yìy!” 5Anə ayiə yə Ànàniyàs zuw tsə nəniy ghii, u bvə̀ bə̀ ambvə̀dintsə, pfə dyaŋi yə̀. Aghû yə̀ àdzə̀m, ghu kə zuw nəniy ndzòʼò àyiə ghè yə̀ àdzə̀m a kə fyi nəniy, ghu tsəŋ. 6Awa fəghàŋ iŋə̀mə̀ àliy yiy tsìy nyi bə̀, nìy kə ivən i we, baŋ kə anə təndzwu, fyi zù kələ yə̀.

7Fwatəiwùŋ tìy tsìy tsə ìti, wiy tsìy nyi bə̀ a ndaw nə̀ ù kwu dyaŋi way iyiə yə i fyi awote nə̀ ŋəm, 8Pità ə dzày yə̀ awe nə, “Dzày bə awò mìə̀, à yù mày dzə̀ ùkhiy wə̀ ghà kə fê nəniy loʼo kiy ate?”

Sàfiliyà ə bə̀lì kə a we nə, “Ìny a mây ukhiy ùghè wə̀.”

9Pità ə dyaŋi bəb yə̀ a we nə, “À də̌ kyə̀ ghà bɛmə fwumi kə ani mwàmkòʼ Zwày kə Mwe ə̀ mbyi ə? Aghû yə̀ ghu mə̀ kələ nəniy ŋəm yiə̀, ghu təmi dòʼò anə ufə̀b u ndaw nyiə. Ghu kî byòʼò fyiə sòʼò ŋwò wô. 10U dyaŋi bvə̀ bə̀ a təŋə̀ Pità pfə tsə. Awa iŋə̀mə̀ yə̀ ə tsìy nyi bə̀, yəə ghu kôʼ tsə nə̀ ù mə pfə, ghu bòʼò fyi zù kələ yə̀ we akə̀lə̀ ìsày i ŋə̀mə̀ we. 11Aghê Kəzə̀, nə̀ aghè liy yə àdzə̀m ghu kə zuw ayiə yə ghii, ghu kəli itsəŋ anə təfòŋ.”

Aghee ntwumə Yesù yìy kə zəŋi mali tə yiə nə̀ kwab tə yiə tiy

12Aghee ntwum ə̀ Yesù yìy kə fàʼ ndə̀mə̀ mali tə yiə nə̀ kwab tə yiə tiy anə sə kə ghù. Aghû yə̀ ghu kə bɛmə nəniy Zə̀kìy kə taw bè dzəŋə tsə̀ anə bə̀d kə ndàw Kə̀zə̀ kə̀ Solomùn kə biə nəniy ghu kə twoŋə nə̀ à də̌ Pòtikò.#5.12 Pòtikò kə də̀ loʼo kə̀ liy kiy a ndàw Kə̀zə̀ Solomùn kə biə nəniy a bə̀d kə̀ inyi yiy fyiə kwoʼo bə̂ ate. Kə kə də̀ anə yiə yə wù də nəniy ani təmi dòʼò ate moo bwìy tsìy yə̀ ate. Wù də̀ sòʼò ani nùw dòʼò tsə̀ awote. 13Aghê àliy yə àdzə̀m ghu kə də kamə bɛmə nəway awò Yesù ghu tsəŋə ani bù təm fwumi bə̀ anə uzə u ghu yə̀ ghu bɛmə nəniy Yesù, yəə ghu kə tsəmə ŋge dzîy kə ayiə àdzoŋə̀ yìy ghii kùmə̀ yə̀ nə̀ ghu. 14Ndə̀mə̀ iyəŋi nə̀ iŋə̀mə̀ ə kwuni tsə̀ŋ kwu kə ani bɛmə nyiə̀ awò Mwe ə̀ mbyi. Ntàŋə̀ ghu tsə̀ŋə̀ dùw kwoʼo yə̀ kə ŋwò. 15Bòʼ ayiə yə aghee ntwumə Yesù yìy kə zəŋi nəniy, aghee byòʼò bə̀ aghù yə̀ ghu kə dzaŋə̀, bè nə̀ ghu anə dzəd, nìŋə̀ nia yə̀ ghu anə məŋkày nə̀ anə ùkpaləkpàlə̀, dzìy abu Pità bwìy yə̂ nəniy anə dzəd, zəəŋi kə Pità kǐy nə̀ də ani mwàm yə̀ ghu. 16Ùŋwàâ u ghù wìy ŋwò bə̀ anə nàʼà tə̀ tə də nəniy akə̀lə̀ Yèlusalèm ə nìy bə̀ aghee dzaŋə yiy nə̀ aghù yə̀ nsìy mə̀bɛbə̀ mìy kə də nəniy azoŋə ghu, aghee ntwumə Yesù yìy zəŋə taw kə ghu.

Aghe ntwumə Yesù kə fii anə wo kə aghě Dzû

17Wù ùlwaʼà ùnè wìy nə̀ aghě Sadùsî yə̀ àdzə̀m ghu kə də fwumi nəniy nə̀ we, ghu ghòʼ này yə̀ àghě ntwumə Yesù. Ghu səay tsə ayiə yə ghu dziy zəŋi nə̀ ghu. 18Ghu kwi kwe yə̀ àghě ntwùm ə̀ Yesù a ndàw ntsaʼ yə ghu fyiê nia nəniy aghê bɛbə yiy ate. 19Tsə̀ndii ə Kə̀zə̀ kwuni bù nə̀ ntsukə tə ghè tə̀, fwiy tsə ufə̀b u ndàw ntsaʼ yə, nìy ŋwò fyi bə̀ aghee ntwumə Yesù awote, dzày tsə aghu nə̀, 20“Ghà zû təmi tsə a ndàw Kə̀zə̀, ghà naʼà tsə ayiə adzə̀m â ghu kwumə̀ yə̀ nə̀ ndzòʼò ìmùə̀ ìfyiə yə ghu kwu nəniy ani mùə̀.” 21Aghee ntwùm ə̀ Yesù yə̌ bvami zuw yə̀ ayiə yə ù dzày nəniy â ghu. Utsuk wiy zwu tsə, aghee ntwùm ə̀ Yesù yìy zù tsìy nyi yə̀ a ndàw Kə̀zə̀, kaʼ yə̀ kə ani tyi dè ayiə â àghě Kəzə̀ yìy. Wù ùlwaʼà ùnè wìy, nə̀ aghee we yiy twoŋə bə̀ ŋgəd tə aghee Dzû, ghu kwi tsə dzəŋə kə̀soŋə̀ kìy, twum twoŋə bə̀ àghèe ntwumə Yesù akə̀lə̀ ghu.

22Aghee ulàŋ yə̀ ghu kə twum yə̂ nəniy ghu a ndàw ntsaʼ ə dzwoŋi bù dzày bə̀ a ghu nə, 23“Yəə ghè zù nəniy a ndàw ntsaʼ, ghè zû kòʼ tsə nə̀ ì nam fè dòʼò taw kə ŋwò. Aghee kyiŋə təmi doʼò sòʼò nəniy awote anə ufə̀b. Ghè fwiy nyi yə̂ nəniy ndàw ntsaʼ, kə̀ kôʼ dzə̂ nəway wè ntwùmə Yesù ùlìy wìy awote anə fôŋ.” 24Abù ŋgəd tə aghè àlwaʼa tə̀ nə̀ wù kə̀tuw anə aghù yə̀ ghu kə kyiŋə̀ nəniy ndàw Kə̀zə̀ zuw tsə nəniy ayiə yə adzwə ŋge zwum ghu ate ghu kaʼ ani mòʼ nə̀ à si fyi kìə̀ nə̀ àghě ntwùm ə̀ Yesù ə? 25Wè lìy dyaŋi tsìy nyi bə̀ dzày tsə nə̀ “Ghà zwuli tsə! Aghû yə̀ ghà kə fê na nəniy a ndàw ntsaʼ ghu də nyiə a ndàw Kə̀zə̀ tyi dè ayiə awò àghee Kəzə̀ yìy.” 26Wù ù kə̀tuw wə̀ ghàʼ ŋwò kə nìy kə aghee ulàŋ àliy yiy, ghu zù nìy dzwoŋi bə̀ àghě ntwùm ə̀ Yesù. Ghu kə kə̀ kwuni kwi dzə̂ nəway ghu anə kədaʼa, aŋwòə ghu kə tsəŋə nə̀ aghee ndàw Kə̀zə̀ yìy də ani təm ghu nə àtay yiy.

27Anə yiə yə ghu nîy tsîy nyi bə̂ nəniy nə̀ àghě ntwum ə̀ Yesù yə̀ anə ndàw ì saʼà yìy, wù ùlwaʼà ùnè wə̀ ə dzày yə̀ awò aghě ntwum ə̀ Yesù yə̀ aghu nə, 28“Ghè maa dzày te bə̀ â ghà nə̀ ghà kə kâm tyi dè dzə̀ ìyiə ìliy yiy fə anə izəd i wû wə̀. Kwuni kòʼò kə nənìy àyiə yə ghà zəŋi nəniy. Ghà tsəŋ kwu kə ani tyi dè ayiə anə inaʼ i Yèlusalèm ìdzə̀m, də̀mə̀ sòʼò ani bàŋ àdzwə ghələ anə ipfə i Yesù.”

29Pità nə̀ àghě ntwùm ə̀ Yesù àliy yə bə̀lì kə a we nə, “Ghè kwu ani zuw ayiə yə Zə̀kìy dzîy nəniy à wày dzə ayiə yə aghê dzîy. 30Ghà kə wiy Yesù nə̀ ghà ba we anə kàʼ fə təzəd. Zə̀ kə nə̀ tě ə ŋgàŋ asəsə yiy ə kwuni zɛ̀m ŋwò dzwoŋi bə̀ Yesù anə ipfə. 31Zə̀kìy mə zəŋi nə̀ Yesù dòʼò tsə wù ùsòŋə̀ wìy, na yə̀ we anə ukwe ù nyiə wiy. Zə̀kìy mə zəŋi nə̀ ù dòʼò tsə kətuw, ù dòʼò tsə sòʼò wù wə̀ ù bii fyiə nəniy aghû yìy, ani nyiə̀ aghè Islàel nə̀ bwòʼ kìy ghu kyemì ŋwô kə anə ayiə ghu àbɛbə yiy, ghe nîyzə̂ soʼò ayiə ghu àbɛbə yiy. 32Ghəd nə̀ Zwàykə̀zwe kə̀ Zə̀kìy nyiə̀ nəniy awò àghu yə̀ ghu zuw nəniy â we, ghè fə də̌ ani dzày bə̀ àyiə yə àdzə̀m a fyiə â ghà.”

33Abù aghê ndàw ìsaʼà yə̀ zuw tsə nəniy ayiə yə, fôŋ tìy ŋge ŋə̀m ghu ate. Ghu liə ani wiy màʼà aghě ntwum ə̀ Yesù yə̀. 34Wè Falàsî ùlìy ghu kə tyoŋə nəniy nə̀ à də̌ Gàmalìyèl, ù kə də nəniy wù wə̀ ù tyi dê nəniy ulâŋ wìy, aghê dzə̀m kə ŋge nyə̀ tsə̂ nəniy we nə̀ ŋkwiʼi miy, u kwuni ŋwò təmi kə idoŋ, tsày tsə kəlâŋ nə̀ ghu nîy ŋwô fyi yə̀ nə̀ aghee ntwum Yesù yə̀ abee anə kə̀mə̀ fə fə sòŋə. 35U dzày tsə awò aghě ndàw ìsaʼ yìy nə̀ “Aghee Islàel, ghà nîy tsə iyemì anə ayiə yə ghà zəŋə nə̀ àghù yə̀. 36Mòʼo bə̀ nənìy Tìyodàs wə̀ ù kə bû fyi kə nəniy fə khu khu, dzìy nə̀ ghe də wù ùsoŋə̀ wìy. Aghee kaʼ yə̀ ani dzwùmì we kwùmə̀ yə̀ mə̀bwàm ìnkyàʼì, aghê liy kwuni wiy màʼà we. Aghû yə̀ ghu kə dzwùmə̀ nəniy we, ghu sàlì ŋwò yə̀, dzəŋə kə we kiy pfə ŋwò tsìy yə̀. 37Ì yuu tsìy ŋwò tsə, soŋə fə naʼà tìy kə taŋə aghee ghu yiy kpe tsə, Dzudàs wə̀ ù kə fyi anə inaʼ i Galìlî bù fə̀, aghee kwò yə̀ sòʼò a dzəmə̀ we, ani kàm soŋə yə̀, aghee liy kwuni màʼà tsə we. Aghû yə̀ ghu kə dzwùmə̀ we, ghu sàlì ŋwò tsə sòʼò. 38Anə ì yuu nyiə, mə gha tswû bə̀ nə̀ ghà kə zəŋi dzə̀ iyiə ìliy yiy nə̀ àghù yə̀. Bəə à də nə̀ ghu ayiə yə̀ zəŋə anə daʼa kə ghu, ghu kî bvə̀ ŋwò. 39Abu à kwuni də nə̀ ayiə yə̀ ghu zəŋə a ŋwô bə̀ â Zə̀kìy, ghà way dzə ani bwi na ayiə ghè yə̀. À mày kə nə̀ ghà liə ani ŋwày nə̀ Zə̀kìy.”

Aghee ndàw ìsaʼà yə̀ ə dzwùmì yə̀ ìtswù yə̀ Gàmalìyèl tswù nəniy ghu ate 40Ghu twoŋə tsìy nyi bə̀ àghě ntwùm ə̀ Yesù yə̀, tyili bwad ghu nə̀ mbàŋ fìy, tsày tsə kəlâŋ nə̀ kəə ghu nə̀ kamə̀ dzîy ìyiə ìliy yiy anə izəd i Yesù. Ghu dyaŋi nyəli màʼà tsə ghu. 41Anə yiə yə aghee ntwùm ə̀ Yesù yìy ŋwô tsə nəniy anə ndàw aghee saʼa yə, ghu kwu kədwiʼi anə tə fòŋ aŋwòə Zə̀kìy nìy yə̀ nə̀ ghu kpe ŋwò ani fii ghu kəli utuw ùdələ wiy bòʼ Yesù 42Ghu tsìy yə̀ kə nə̀ sə kiy ani nàʼà ntwùmə ìdzoŋə̀ yìy kwùmə̀ yə̀ nə̀ Yesù wù wə̀ Zə̀kìy sûw kyili na nəniy.

Currently Selected:

Kə̀fàʼ 5: isu

Highlight

Copy