Márke Túlɓay
Túlɓay
Bélaɓay a Márke, ɓá Bélaɓay ka zi pé ma gárákéri yáy. Ké saɓay hí̧ njuku láɓulawri ka zi tí ɓá Juyífri too yáy. Ké zi saɓay sé tûl káwa a lélé a Zezú yá. Kú zi ziŋ saɓay a Zezú ɓá ŋgɛ̧́náké a ɓilké yá. Dáy ké saɓay a hɛ̧ri̧ ɓá ŋgɛ̧́náké sé tûl mára̧ri̧, sé tûl ŋgɛ́rɛ záŋmári̧, sé tûl manyɓayri. A ɓil ɓay a fékéri, ké saɓay ɓá ŋgɛ̧́náké sé tûl hɛ̧ri̧ ka mbété a Bélaɓay a fékéri zi saɓaykéri yáy.
Bélaɓay a Márke, tɔ́ŋ ŋgboro a mbêwké kuu gázín mbété a Bélaɓay a sáykéri. Dáy tí a títáʼaké, ké tɔ́ʼɔ Zezú ɓá báŋa Gun a Gáŋvbôn. (1:1) A gé kɔ́rɔ́ké, Gun a Gáŋvbôn gí ziŋ hûl, kú ɓara nɛ́ ka̧n tûl dii vbatay (15:39).
Tí ka títáʼaké gí ka̧ lawgel a mbété a Márke(1:1–8:26), Zezú zi zibɔʼɔké ɓá njukuri kú tu ɓá ké kaw ɓá Gun a Gáŋvbôn nyá. Ké ŋgɛ́rɛ njuku záŋmári̧, a ní têm ɓékéri, a saɓay ri ka kpɔ́ŋa. Njukuri kaw vbí há̧narí̧: «A gé ɓá njuku nɔ́ lé? » Dáy Zezú sa hí̧ njukuri ka kɛrɛ ɓá kú tu nɛ́y ɓá: «I zi ná sa hí̧ njuku a há̧na káwa a mǐ.»
Tí ka lawgel sé ka̧ kɔ́rɔ́ké(8:27–16:20), tɔ́ʼɔ njukuri a̧ní Zezú kaw ɓá Gun a Gáŋvbôn.
Njukuri ka e ka bɔʼɔ kpɔ́ŋa a Rɔmɛri̧, kaw hɛʼɛ gáŋnjukuri a kú kó kuriri ɓá báŋa a vbônri̧. Njuku nɔ́rí̧ kaw niŋ hɛ̧ yérkéri, a kaw ziŋ hɔ̧́na, kú kaw ndé hɛ̧ ŋgɛ́rɛ́kéri too.
A tu ɓá, Zezú, Gun a Gáŋvbôn, ka ŋgboro a zi mbí mûn a njuku rá̧ lá nzáʼa a Gáŋvbôn, ɓá nɛ́ sé tɔ́ʼɔsêe ka̧ hûl. Gunbɔʼɔ a Zezúri, zi lá ɓilké ka sêeké nɔ́ nyá. Kú sáŋ Zezú a kú kaw walɓay kɔ̧ tûlé ɓay a í nɛ́. Ɓá gáŋnjuku a ŋgawbére a Rɔmɛri̧ a kó Zezú kaw húnay pé sa ɓá: «Katína, njuku nɛ́ ɓá Gun a Gáŋvbôn!»
Gelka Zezú kaw saɓay a mɛ̌ ka mûn nɛ́, ké tɔ́ʼɔ mûn nɛ́ ɓá Gun a njuku. Ɓayké nɔ́ zi ɓay a sa ɓá njuku ka Gáŋvbôn hí̧ nɛ́ kpɔ́ŋa too, kpɔ́ŋa walɓay rá̧ vbá̧buma a ɓéké a njukuri. Ɓayké nɔ́ tɔ́ʼɔ pí ɓá Zezú kaw ɓá gbát njuku, a tɔ́ʼɔ hɛ̧ri̧ ka mú a ɓil káwa a mɛ̌ ɓá njuku rá̧ nzáʼapéna a mɛ̌ a tísiri.
Bélaɓay a Márke, vbí ɓay ɓá: «A gé ɓá Zezú lé?» Njuku ka ma ɓay a rerú ka ɓayké a núnmbɛ̧́nɛ́ nɔ́ zi tí yá. Mbété a Márke ɓá njuku sé ŋgboro ka Zezú serúy. Ké ŋgburu ŋgboro tu Zezú kpay kpay hí̧ njukuri.
Currently Selected:
Márke Túlɓay: pnz
Highlight
Share
Copy
Want to have your highlights saved across all your devices? Sign up or sign in
© 2023 CABTAL