Matiye 28

Toma a Zezú a hûl

(Mrk 16:1-10; Luk 24:1-12; Zâŋ 20:1-10)

1Ka fal nâm ɔʼɔ a típélé rím, ka ɓá ɗambɛl nâm pénay, Marí Makdala rá̧ Marí a ǎ̧w, uru a sé kó tûlpâl. 2Dalé tísiri laŋ a ŋgɛ́rɛ, ɓayhí̧lé, aŋnze a Gáŋmbây a há̧na ɗere a nûnalê gí gíkra gáŋ saw ka nzáʼa lɔ̂ʼɔ gefal, a kaw tûlké. 3Mûn nɛ́ fé ŋgbalák ɓá báŋa mbɔ̂m ka vbú hâ, rá̧ gári a mɛ̌ puku ɓá báŋa mbúsâny. 4Ŋgawbéreri ka koro tûlpâl, wɔ́w ŋgbá kuriri, kú ná kɔ̧ ɓá báŋa hûlri 5Dáy aŋnze mbí ɓay a sa hí̧ wûnynjukuri nɔ́ ɓá: «Í niŋ wɔ́w yá, mí tu ɓá i kaw ɛ́ Zezú a kú ɓara nɛ́ ka̧n tûl dii vbatay; 6Ké tí a gelé mbaa, ké toma ka hûl dá, ɓá báŋké a ké sáy. Í gí kó gel a ké nárú̧. 7Í reɓá gánáké sé sa hí̧ Gunbɛʼɛri, ɓá ké toma a ɓil a hûlri dá, dáy ŋgɛŋnɛ́ ké e sé zoko wǎyri ka Galilê, a goló pé, i e gé kó nɛ́y. Ɓá ɓayké nɔ́, pé mi zi ɓay a sa hí̧ wǎyri.» 8Wûny rá̧yrí̧ uru a ŋgúna ka tûlpâl, mbá ka wɔ́w, ka mûnrína, ka ŋgú sé saɓayké hí̧ gunbɔʼɔ a Zezúri. 9A núnmbɛ̧́nɛ́, lé kú kó Zezú gí tɛ̧́ ziŋ kuriri a sa: «Mi nam wǎyri!» Kú ta̧m gí gbɛ́ŋɛ́, a gí ŋgbá bɛʼɛ, a huku mbɛlɛ́ a hí̧ hɔ́ná hí̧ nɛ́. 10Dáy Zezú sa hí̧ kuriri: «Í niŋ wɔ́w yá, í sé sa hí̧ nyîn nírí̧ kú sé Galilê: Ɓá a goló, pé kú e gé ziŋ mí.»

Ŋgawbéreri gí saɓay hɛ̧ ka táy

11Gelka wûny nɔ́rí̧ e ka ŋgboro ɓáy, ŋgawbére a fékéri regí ɓil pû, a gí sa hí̧ gáŋnjuku nzáʼaká̧nari̧ hɛ̧ too ka táy. 12Dáy gáŋnjuku nzáʼaká̧nari̧ kuu gáŋnjuku pûri mára̧ há̧narí̧, a láhá̧narí̧, a hí̧ ŋgɛ́rɛ lari hí̧ ŋgawbére nɔ́rí̧, 13a sa hí̧ kuriri ɓá: «Í sa ɓá Gunbɛʼɛri pé gí a haŋa sû̧ŋ, ka i e a nâm, pé a gí ríw hûl a mɛ̌ kála rúy. 14Rá̧ mbây tûlkaw mí láɓaykéy, rú tu ɓay ka rú e sa hí̧ nɛ́, ɓay a mú tûl a wǎyri.» 15Ŋgawbéreri nyá lari, a niŋ ɓá báŋké a kú sa hí̧ kuriri. Nǎŋnɔ́ pé ɓayké wal ma bazeŋ a Juyífri too ka̧ sénɛ́.

Zezú hí̧ nzáʼapéna hí̧ gunbɛʼɛri

(Mrk 16:14-18; Luk 24:36-49; Zâŋ 20:19-23; Pap 1:6-8)

16Gunbɛʼɛri bôo ka mbêw sé Galilê, sé tûl kon ka Zezú tɔ́ʼɔ hí̧ kuriri. 17Gelka kú gé kó nɛ́y, kú sé huku mbɛlɛ́ a hí̧ hɔ́ná hí̧ nɛ́, dáy njuku a fékéri e ka manyɓay dát a ɓil law a kuriri. 18Nǎŋnɔ́ Zezú ta̧m gí, a sa hí̧ kuriri: «Gáŋvbôn hí̧ mí kpɔ́ŋa too a nûnalê rá̧ tísiri. 19Í sé gel a njuku a tísiri too, a í niŋ kú tɛ̧́ gunbɔʼɔ níri̧; í ɓá kuriri nyá batêm ka rɛŋ a Bâa rá̧ ka rɛŋ Gun rá̧ ka rɛŋ a Têm Pukí, 20a i tɔ́ʼɔ hí̧ kuriri a kú tɔ́ŋ hɛ̧ too ka mi sa hí̧ wǎyri. Dáy i tu ɓá, mi e kuu wǎyri sêe too, ka̧ sêe kɔ́rɔ́ké.»

Currently Selected:

Matiye 28: pnz

Highlight

Copy