Matiye 26

Mbâyri láhá̧narí̧ ɓay a ŋgbá Zezú

(Mrk 14:1-2; Luk 22:1, 2)

1Falké ka Zezú ɔrɔ saɓayké, ké sa hí̧ Gunbɛʼɛri: 2«I tu ɓá mára̧ záymûn ɓay a Pâk, zi nâm sére yáŋ: Kú e ŋgbá Gun a njuku ɓay ɓara nɛ́ ka̧n tûl dii vbatay.» 3Dáy Gáŋnjuku nzáʼaká̧nari̧ rá̧ gáŋnjuku pûri mára̧ há̧narí̧ sé ɓil vûn a Kayíf, ka ɓá gáŋnjuku nzáʼaká̧na. 4Kú kaw ɛ́ ŋgboro ɓay a ŋgbá Zezú ɓá múnáké rá̧lǒo kú í nɛ́. 5Nǎŋnɔ́ dáy kú sa: «Ná ŋgbá nɛ́ ka sêe dawá yá, tí yá lé njukuri e uru bére kuu manárí̧.»

Wûny a há̧na ɓá yámbó kɔ̧ tûl a Zezú

(Mrk 14:3-9; Zâŋ 12:1-8)

6Gelka Zezú ka̧ Betaní, a ɓil vûn a Simɔŋ, mɛ̌ ka tí erú ka ndɛ́ɓɛ. 7Wûny a há̧na gí gbɛ́ŋɛ́ a ŋgbá kû yámbó mbárú, ka lariké ŋgɛ̧́ mambá. Ké fere yámbó kɔ̧ tûl a Zezú, ka kaw nzáʼa lâʼay. 8Gelka gunbɛʼɛri kó nǎŋnɔ́, kú ɗí hɛ́rɛ, dáy a sa: «Ɓayhí̧ ké ɓew yámbó nɔ́ ɓǎŋ lé? 9Tá kú ma mbí a zé lariké ɓá ŋgɛ̧́náké, ka hí̧ lariké hí̧ njuku fóyári yá lé!» 10Zezú tu ɓayké dáy a sa: «Ɓayhí̧rá̧ i zi ɓay ɓá wûny nɛ́ tɔ́ʼɔsêe lé? Hɛ̧ a ké niŋ hí̧ mí, ɓá béla hɛ̧; 11Ɓayhí̧lé, i e ka njuku fóyári a bazeŋ a wǎyri dát, dáy a mǐ, mi tí kaw dát kuu wǎyri yá. 12Yámbó nɔ́ a ké fere kɔ̧ mûn ní, ké niŋ ɓay a mɔny mí ɓay a lɔ̂ʼɔ pâl. 13Mí sa hí̧ wǎyri gbátɓay, gel too ka tísiri nɛ́ a kú e tɔ́ʼɔ Bélaɓay a Gáŋvbôn, kú e saɓay hɛ̧ ka wûny nɛ́ niŋ, a kɛrɛ nɛ́.»

Judas zé Zezú hí̧ gáŋnjuku nzáʼaká̧nari̧

(Mrk 14:3-9; Zâŋ 12:1-8)

14Dáy njuku mbêw a bazeŋ a gunbɛʼɛri bôo a sére, ka rɛŋɛ́ ɓá Judas Ɛskariyót, sé gel a Gáŋnjuku nzáʼaká̧nari̧, 15a sa: A̧hí̧ i e hí̧ mí ɓay a mí zé Zezú hí̧ wǎyri lé? Dáy kú hí̧ nɛ́ lari mínya bonsáy. 16Tí ka sêeké nɔ́, ké kaw ɛ́ ŋgboro ɓay a ɓá Zezú ka̧n ɓil ndɔ̂ʼɔ a kuriri.

Zezú sɔ̧́lâʼa Pâk kuu gunbɛʼɛri

(Mrk 14:12-21; Luk 22:7-18, 21-23; Zâŋ 13:1-30)

17Titíla nâm záymûn sɔ̧́ biré a kú niŋ táŋ haw, gunbɔʼɔ a Zezúri gí vbí nɛ́ ɓá: «Gel a sí̧, mɔ zi ɓá rú sé kara lâʼa záymûn Pâk karú hí̧ mɔ́ lé?» 18Zezú zi a sa: «Í sé ɓil pû a gel a njuku ǎŋ, a i sa hí̧ nɛ́ ɓá: Gáŋnjuku sa, sɛl a sêe a mǐ gí ɗɛ́ŋ dá, mi e niŋ mára̧ záymûn Pâk kuu gunbɔʼɔ níri̧ a goló.» 19Gunbɛʼɛri sé niŋ ɓá báŋké a ké sáy, dáy a kú kara lâʼa Pâk.

20Gelka bɔʼɔlêw ká̧y, Zezú gí kaw nzáʼa lâʼa kuu Gunbɛʼɛri bôo a sére. 21A kú kaw sɔ̧́lâʼay, Zezú sa: «Mi sa hí̧ wǎyri gbátɓay, njuku mbêw a bazeŋ a wǎyri e zé mí.» 22Law a kuriri yírí sé tûl ɓaykénɔ́ dáy njuku mbêw mbêw vbí nɛ́ ɓay a sa: «Ɓá mǐ lé Gáŋmbây?» 23Ké sa: «Njuku ka ɓá ndɔ̂ʼɛ kuu mǐ sé ɓil yoŋ lâʼay, ɓá mɛ̌ pé e zé mí. 24Gun a njuku e ziŋ hûl ɓá báŋké ka ɗé ka̧n ɓil Mbété sé tûléy. Dáy lelêe hí̧ e ná hí̧ njuku ka e zé Gun a njuku lé, belɓá kú mbuŋ nɛ́ nyá.» 25Judas ka zé Zezú, mbí ɓay a sa: Ɓá mǐ lé Gáŋnjuku? Zezú sa hí̧ nɛ́: «Ɓá mɔ̌, pé say.»

Húru a Gáŋmbây

(Mrk 14:22-25; Luk 22:15-20; 1Kɔ 11:23-25; 1Kɔ 10:16-17)

26Gelka kú kaw sɔ̧́lâʼa, Zezú mbí biré, a zi awá hí̧ Gáŋvbôn, a haw ɓilké, a hí̧ Gunbɛʼɛri, a sa: «Í nyá, a í sɔ̧́, a nɛ́ ɓá hay mûn ní. 27Falké, ké mbí yoŋ ví̧nyɛ, a zi awá hí̧ Gáŋvbôn, a hí̧ kuriri, a sa: Í nzó wǎyri too; 28Ɓayhí̧lé, a nɛ́ ɓá sêm mûn ní, sêm ŋgá̧nzáʼa kuu Gáŋvbôn, ka fere ɓay turu ɓéké hɛ̧ri̧. 29Mí sa hí̧ wǎyri, mí tí nzó mbii léna dii ví̧nyɛ nɛ́ mbaa, ka̧ sêe ka mi e nzó ɓá féké kuu wǎyri a ɓil Pû a Bâa a mǐ.» 30Falké a kú mbí mbété si̧ŋ ɗéla ka ɗíy, kú kála, a sé tûl kon Oliviyé.

Zezú sa ɓá Píyɛ́r e sáŋ nɛ́

(Mrk 14:26-31; Luk 22:31-39; Zâŋ 13:36-38)

31Dáy Zezú sa hí̧ gunbɛʼɛri ɓá: «Sû̧ŋ nɛ́, i e sáŋ mí too, ɓayhí̧lé, kú ɗé ka̧n ɓil Mbété a Gáŋvbôn ɓá: “Mi e í njuku koro hɛ̧hɔ́la dalé mbóléri e ɓɛrɛ too.#26:31 Ják13:7 ” 32Dáy Zezú sa ɓáy ɓá, gelka mi e toma a hûl, mi e sé zoko wǎyri a Galilê.» 33Píyɛ́r mbí ɓay a sa hí̧ nɛ́: «Mí ɓá njuku a ǎ̧wrí̧ too pé sáŋ mɔ́, mǐ, mi tí sáŋ mɔ́ nyá.» 34Zezú sa hí̧ nɛ́: «Mi sa gbátɓay hí̧ mɔ́, ka sû̧ŋ nɛ́, sû̧ŋ nɛ́, ɗambɛl rá tôo ké gbô lé, mɔ e sa bɔʼɔké sáy ɓá mɔ zi tu mí nyá.» 35Píyɛ́r resa: «Mí ɓá ɓay a ziŋ hûl kuu mɔ̌ pí, mi tí sáŋ mɔ́ nyá.» Gárá gunbɛʼɛri too sa ɓá mbêwké.

Zezú gɔ́ŋ Gáŋvbôn a Gesemanɛ́

(Mrk 14:32-42; Luk 22:39-46; Zâŋ 18:1; Heb 5:7)

36Dáy Zezú sé kuu gunbɛʼɛri sé gel a kú ɗí ɓá Gesemanɛ́, a ké sa hí̧ kuriri ɓá: Í kaw gelé, a mí sé sá̧ ɓay a gɔ́ŋ Gáŋvbôn. 37Nǎŋnɔ́ ké ɗa Píyɛ́r rá̧ gun a Zebedéri sére, dáy a tí lá mûn tɔ́na rá̧ law lúna. 38Dáy ké sa hí̧ kuriri: «Law ní lú mí mambá ka̧ hûl, í kaw gelé, a í gɛ́ŋ nâm kuu mǐ.» 39Dáy, a mbí bɛʼɛ tɛ̧́w sé mbɛl, a gé huku siri a gɔ́ŋ Gáŋvbôn a sa: Bâa a mǐ, ŋgboro mí erú lé, mɔ́ ɓá yoŋ tɔ́ʼɔsêe nɛ́, ké ɗí kuu mǐ! Dáy ké zi ná ɓá hɛ̧ ka mi ziy, ké ɓá hɛ̧ ka mɔ́ ziy. 40Ké regí gel a gunbɛʼɛri, a gí ziŋ kuriri ka nâm, dáy a sa hí̧ Píyɛ́r: Lé í tí gɛ́ŋ nâm kuu mǐ sɛl a sêe mbêw yá lé? 41Í gɛ́ŋ nâm, a í gɔ́ŋ Gáŋvbôn ɓay a Sata̧n ké zi ná lélaw a wǎyri. Njuku e ka law béla niŋ hɛ̧ dáy, mûn tí ka ŋgɛ́rɛ yá.

42Ké resé ɓáy, a bɔʼɔ séreké, dáy a gɔ́ŋ Gáŋvbôn a sa: «Bâa, ŋgboro mí erú ɓá yoŋké, ké sé ɓá ɗínáké táŋ mí nzó lé, ké niŋ ɓá báŋké ka mɔ ziy.» 43Ké regí ɓáy, a gí ziŋ gunbɛʼɛri kɔ̧ nâm too, ɓayhí̧lé nûn a kuriri ná ɓá nâm. 44Ké répɔŋ kuriri a rekála sé gɔ́ŋ Gáŋvbôn a bɔʼɔ sáyké, a gé sa ɓá ɓay a mbêwké nɔ́. 45Ké regí gel a gunbɛʼɛri, a gí sa hí̧ kuriri: Í ná nâm ɓáy, a kaw ɔʼɔ mûn a wǎyri lé? Í kó, sɛl a sêe gí ɗɛ́ŋ dá, a kú e zé Gun a njuku hí̧ ɓéké njukuri.

46I uru, a ná kála, í kó, njuku ka zé mí, mí gíw.

Kú ŋgbá Zezú

(Mrk 14:43-50; Luk 22:47-53; Zâŋ 18:3-11)

47Ké pa̧n saɓay ɓáy lé, Judas ka̧, mɛ̌ njuku mbêw a bazeŋ a gunbɔʼɔ a Zezúri bôo a sére. Ké gí kuu njukuri ɓá ŋgɛ̧́náké ka gá̧mári̧ rá̧ kâ̧wdiiri. Ɓá gáŋnjuku nzáʼaká̧nari̧ rá̧ gáŋnjuku pû a Juyífri pé, pé kuriri gíy. 48Judas ka e zé nɛ́y, tɔ́ʼɔ hí̧ kuriri ŋgána a há̧na ɓá: Njuku ka mí e fɔ̧ nzɛ́ʼɛ, ɓá mɛ̌ pɔ̧́nɔ́, í ŋgbá nɛ́. 49Judas gí ka̧, núnmbɛ̧́nɛ́ nɔ́ a gbaŋa Zezú a sa: Mi nam mɔ́ Gáŋmbây, dáy a fɔ̧ nzɛ́ʼɛ. 50Zezú sa hí̧ nɛ́: «Mbáŋa a mǐ, hɛ̧ ka mɔ́ gí niŋáké, mɔ́ niŋ ɓá gánáké. Dáy njukukéri gí, a gí ŋgbá Zezú. 51Nǎŋnɔ́, njuku mbêw a bazeŋ a njukuri ka e kuu Zezú, lú gá̧má a mɛ̌ a vbá̧ goy súkú a njukupéna a gáŋnjuku nzáʼaká̧na mbêw kúŋ to vbú siri. 52Dáy Zezú sa hí̧ nɛ́ ɓá: Mɔ́ rerú a gá̧má a mɔ̌ ka̧n ɓil ŋgoroké, ɓayhí̧lé njukuri too ka lú gá̧máy, e ziŋ hûl ka gá̧má. 53Mɔ́ kɛrɛ ɓá, mí zi ma ɗí Bâa a mǐ, ɓay a ké pé a ŋgɛŋnɛ́ aŋnze kúmráké bôo a sére, kú gí hí̧ndɔ̂ʼɔ hí̧ mí nyá lé? 54Dáy mí tí nǎŋ nyáy, ɓay ka ɗé ka̧n ɓil Mbété a Gáŋvbôn, e niŋ a̧ní ɓá báŋké nɔ́ lé?» 55A goló Zezú sa hí̧ njukuri ɓá: «Í gí ka gá̧má rá̧ kâ̧wdiiri gí ŋgbá mí, ɓá báŋa mí kaw ɓá njuku í hûl? Sêe too, mi kaw tɔ́ʼɔhɛ̧ a ɓil vûn a Gáŋvbôn, i zi ŋgbá mí nyá. 56Dáy hɛ̧ nɔ́rí̧ too niŋ, ɓá báŋké ka ɓay a porofɛ́tri sa, ka a ɗé ka̧n ɓil Mbété a Gáŋvbôn.» A goló, gunbɛʼɛri pɔŋ nɛ́ a kú ŋgú.

Mbâyri walɓay kɔ̧ tûl a Zezú

(Mrk 14:53-65; Luk 22:54, 63-65; Zâŋ 18:12; 13:19-24)

57Njukuri ka ŋgbá Zezú, ɓá nɛ́ sé gel a Kayíf gáŋnjuku nzáʼaká̧na ka njuku tɔ́ʼɔ sáŋnari̧ rá̧ gáŋnjuku pûri, mára̧ e ka gelké. 58Píyɛ́r tɔ́ŋ Zezú ɓá ɗínáké, sé ka̧ nzáʼa hɛlɛ a gáŋnjuku nzáʼaká̧na. Ké sé ri ɓil pûké a sé kaw kuu njuku koro ɓil hɛlɛ a mbây, ɓay a ké kó a̧ní rá̧ hɛ̧ké e niŋa lé?

59Gáŋnjuku nzáʼaká̧nari̧ rá̧ njuku walɓayri ɛ́ ŋgboro ɓá ɓay ŋgbá Zezú ka ŋgboro a ɓay a manyákéri rá̧ kú ma í nɛ́. 60Dáy a ɓil ɓay a njukuri ɓá ŋgɛ̧́náké, ka gí ka ɓay a manyákéri gí tûl a Zezú too, kú zi ziŋ ŋgboro ɓayké yá. A falké njukuri sére gí 61a sa: «Njuku nɛ́ sa ɓá: “Mi ma gbɛʼɛrɛ vûn a Gáŋvbôn, ka rembó vûnké ka̧n gelké a ɓil nâm sáy.”» 62Dáy gáŋnjuku nzáʼaká̧na uru a sa hí̧ Zezú: «Mɔ́ zi tí ka ɓay rerú sé tûl ɓay ka njuku nɛ́rí̧ sa sé tûló yá lé?» 63Dáy Zezú kaw ták. Gáŋnjuku nzáʼaká̧na mbí ɓay a sa hí̧ nɛ́: «Mɔ́ sa hí̧ rú, ka rɛŋ a Gáŋvbôn a ndísɛ̌ʼɛ, mɔ́ ɓá Mɛsí, Gun a Gáŋvbôn lé?» 64Zezú resa hí̧ nɛ́: «Ɓá báŋké nɔ́ ka mɔ sáy. Katína mi sa hí̧ wǎyri, tí a ŋgɛŋnɛ́, i e kó Gun a njuku kaw ka ndɔ̂ʼɔ lâʼa a kpɔ́ŋa a Gáŋvbôn, a rekó nɛ́ kɔ́ gí a ɓil ɗaʼam a mbɔ̂m a nûnalê.» 65Dáy gáŋnjuku nzáʼaká̧na ɗí hɛ́rɛ a gɔ́rɔ́ gári a mɛ̌ a sa: «Ké fára Gáŋvbôn! Ɓay a sí̧ ná e zoko lánáké ɓay lé! I lá a ké fára Gáŋvbôn. 66I sa ɓá hí̧ lé?» Kú sa hí̧ nɛ́ ɓá: «Ké ma hûl.» 67Nǎŋnɔ́, kú sa̧sâ̧m kɔ̧ nûn a Zezú, a si nɛ́, njuku a fékéri vbá̧ ɓil nûn nɛ́ 68a sa: «Mɔ́ sa hí̧ rú, mɔ̌ Kiris, a gé vbá̧ mɔ́ lé!»

Píyɛ́r sa ké zi tu Zezú yá

(Mrk 14:66-72; Luk 22:55-62; Zâŋ 18:15-18, 25-27)

69Píyɛ́r kaw a kála a ɓil hɛlɛ, lé wûnypéna a há̧na gí gbɛ́ŋɛ́, a sa hí̧ nɛ́ ɓá: «Mɔ̌ pí, tá mɔ e kuu Zezú njuku Galilê nɔ́ nyá lé?» 70Dáy Píyɛ́r many a mbɛl a njukuri too a sa: «Háy, mi zi tu ɓay ka mɔ zi ɓay a sanáké yá.»

71Falké, ké ta̧m sé nzáʼa hɛlɛ, dáy wûnypéna a féké, gé kó nɛ́ a sa hí̧ njukuri ka e ka goló ɓá: «Njuku nɛ́ e kuu Zezú a Nazarɛ́t kɔ́!» 72Píyɛ́r many ɓáy a sa: «Mi há mûn ní, mi zi tu njuku nɔ́ nyá.»

73Falké kpay lé, njukuri ka e a gelké gí gbaŋ a Píyɛ́r, a gí sa hí̧ nɛ́: «Gbátké lé, mɔ kaw ɓá mbêw a bazeŋ a gunbɔʼɔ a Zezúri: Báŋ saɓay a mɔ̌, tɔ́ʼɔ hí̧ njukuri gel gína a mɔ̌.» 74Dáy Píyɛ́r há mûn nɛ́ a sa: «Gáŋvbôn ké í mí, mi zi tu njuku nɔ́ nyá!» Núnmbɛ̧́nɛ́ nɔ́, tôo gbô, 75dáy Píyɛ́r rekɛ́rɛ ɓáy ka Zezú sa hí̧ nɛ́: «Rá̧ tôo ké gbô lé, mɔ́ e sa bɔʼɔké sáy, ɓá mɔ zi tu mí nyá.» Píyɛ́r tɛ̧́, a vú a vú ɓáy.

Currently Selected:

Matiye 26: pnz

Highlight

Copy