Matiye 15

Hɛ̧tɔ́ʼɔ a zîiri

(Mrk 7:1-13)

1Nǎŋnɔ́ Fariziyɛ̧́ri̧ rá̧ njuku tɔ́ʼɔ sáŋnari̧ gí gel a Zezú a Zerúzalɛ̂m a sa: 2«Ɓayhí̧ gunbɔʼɔri zi hɛʼɛ sáŋna a zîi a manárí̧ nyáy lé? Ɓayhí̧lé kú zi turu ndɔ̂ʼɔ a kuriri rá̧ a sɔ̧́lâʼa yá.» 3Dáy Zezú sa hí̧ kuriri: «A wǎyri ɓayhí̧ i zi hɛʼɛ sáŋna a Gáŋvbôn nyá, ka ɛ́ ɓá tɔ́ŋ sáŋna a wǎyri lé?» 4Katína, Gáŋvbôn sa ɓá: « “Mɔ hɛʼɛ bâa a mɔ̌ rá̧ mâa a mɔ̌,” rá̧ “njuku mí háhɛ̧ ka̧n tûl a bâa a mɛ̌ malé mâa a mɛ̌ lé, kú í nɛ́.” 5Dáy a wǎyri, i sa ɓá: “Njuku mí sa hí̧ bâa a mɛ̌ malé mâa a mɛ̌, ɓá hɛ̧ ka mi zi ɓay hí̧ wǎyri, ɓá hɛ̧ ka mi mɔny ɓay a hí̧ Gáŋvbôn.#15:5 Tí ɓá kú mɔny, ɓay a hí̧ Gáŋvbôn nyá, ɓá kúŋɓay. Kú zi ɓay a hí̧ Gáŋvbôn nyá, a zi ɓay a hí̧ bâa malé mâa kuriri yá kɔ́.” 6Tɔ́ʼɔ ɓá ké zi ma hí̧ndɔ̂ʼɔ hí̧ bâa a mɛ̌ malé mâa a mɛ̌ nyá, nǎŋnɔ́ i lú ɓay a Gáŋvbôn sé fal, ka niŋ ɓá hɛ̧ sáŋna a wǎyri. 7Njuku foori, Porofɛ́t Ezayí sa kɔ́, a ké kaw saɓay ka kó wǎyri ɓá: 8Gáŋvbôn sa ɓá: “Njuku nɛ́rí̧ ɗél mí a nzáʼa a kuriri ɓǎŋ, dáy law a kuriri ɗí kuu mǐ mambá. 9Hɔ̧́na a kú hí̧ mí, zi tí ka nɛ́rɛ̧ nyá, ɓayhí̧lé hɛ̧tɔ́ʼɔ a kú tɔ́ʼɔ too, gí ka ŋgboro a kɛrɛ a njukuri.”»

Hɛ̧ ka ɓá njuku niŋ ɓéké

(Mrk 7:14-23)

10Zezú ɗí njukuri a sa: «Í láɓay nɛ́ ɓá táŋáké: 11Tí ɓá hɛ̧ ka njuku lâʼa sé mûn nɛ́, pé ɓew káwa a mɛ̌ nyá, ɓá ɓay ka tɛ̧́ a nzáʼa a njuku, pé ɓew káwa a mɛ̌.» 12Dáy gunbɛʼɛri mára̧ gí gbɛ́ŋɛ́ a sa: «Mɔ zi tu ɓá Fariziyɛ̧́ri̧ law a kuriri sé ɓay tûl ɓay nɔ́rí̧ a kú lá yá lé?» 13Zezú sa: «Tɛ̧́rɛ̧́ dii too, ka zi tí ɓá Bâa a mǐ a nûnalê ka rú yáy, kú e lúrú kɔ̧ kpâa. 14Í pɔŋ kuriri: Ɓá râ̧wri̧ pé kɔʼɔ mbáŋa a kuriri râ̧wri̧! Gelka râ̧w, kɔʼɔ mbɛ́ŋnɛ́ râ̧w, kú e lé lɔ̂ʼɔ kuriri sére too.» 15Píyɛ́r mbí ɓay a sa: «Mɔ́ sa táŋa a galaɓay nɔ́, hí̧ rú.» 16Dáy Zezú sa: «Wǎyri kɔ́, i rekaw táŋ hɛ̧túna lé? 17Í zi tu ɓá hɛ̧ too ka ri nzáʼa a njukuy, tá sé ɓil, a ré tɛ̧́ ka mûn nɛ́ nyá lé? 18Dáy, hɛ̧ ka tɛ̧́ a nzáʼay, gí a ɓil law, a nɔ́ pé ɓew káwa a njuku. 19Ɓayhí̧lé, a ɓil law pé ɓéké kɛrɛ tɛ̧́ a ɓá njuku í hûl, a ɓá njuku mbí dala, a ɓá njuku niŋ dala, a ɓá njuku ríríwa, a ɓá njuku saɓay manyákéri rá̧ ɓew ɓay a njukuri. 20Hɛ̧ nɔ́rí̧ pé ɓew káwa a njukuri. Dáy sɔ̧́lâʼa táŋ turu ndɔ̂ʼɔ, ɓá báŋké ka sáŋna sáy, zi ɓew káwa a njuku yá.»

Wûny gɔ́rɔ́ a há̧na láɓulaw hí̧ Zezú

(Mrk 7:24-30)

21Falké Zezú kála a goló a sé tísiri a Tîr rá̧ tísiri a Sidɔ̂ŋ. 22Wûny a há̧na ka tísiri a Kanaa, ná ɓil kaw a goló gí gé lé, a sa hí̧ nɛ́ ɓá gbénáké ɓá: Gáŋnjuku, Gun a Davít, mɔ́ kósêe a mǐ! Gun a lɔŋɔ́ a mǐ, têm ɓéké rí nɛ́, a ɓá nɛ́ tɔ́ʼɔsêe mambá. 23Dáy, Zezú zi rerú a ɓay hí̧ nɛ́ nyá. Gunbɛʼɛri ta̧m gí gbɛ́ŋɛ́, a gí vbú hí̧ nɛ́ ɓá: «Mɔ́ ní nɛ́, ɓayhí̧lé ké zi pɔŋ vbá̧nzáʼa tɔ́ŋ nárí̧ nyá.» 24Zezú zi nzáʼa a kuriri a sa: «Kú pé mí gí ɓá ɓay a gun mbóléri a gun Izirayɛ́lri ka ɓɔ́l.»

25Dáy wûny rá̧y, gí huku mbɛlɛ́ a sa: Gáŋmbây, mɔ́ kósêe a mǐ! 26Zezú sa: «Zi belɓá mɔ́ mbí lâʼa a gun a léléri a ɓá vbú hí̧ vâari yá.» 27Wûny rá̧y sa: «Katína Gáŋmbây, dáy vâari lâʼa ɓá ɓuʼura lâʼari, ka to a tûl tay lâʼa a bákáwa a kuriri.» 28Nǎŋnɔ́, Zezú resa hí̧ nɛ́: Wûny! Láɓulaw a mɔ̌ hɔ̧́ mambá, ké ná hí̧ mɔ́ ɓá báŋké nɔ́ a mɔ ziy. Núnmbɛ̧́nɛ́ nɔ́, gun lɔŋɔ́ a mɛ̌ ziŋ ŋgɛ́rɛ.

Zezú ŋgɛ́rɛ záŋmári̧ ɓá ŋgɛ̧́náké

29Zezú kála a goló, a sé gbaŋ fâ̧w a Galilê. A sé he tûl kɔ̂l a kawrú. 30Dáy njukuri ɓá ŋgɛ̧́náké mára̧ gí gé lé, a gí kuu njuku kpɛrɛri, râ̧wri̧, njukuri ka ndɔ̂ʼɔ malé bɔʼɔ belyáy, ŋgbôŋri̧ rá̧ njuku záŋmá a fékéri ɓá ŋgɛ̧́náké. Kú ɓá kuriri gí kaw mbɛlɛ́, dáy ké ŋgɛ́rɛ kuriri. 31Njukuri ɓá ŋgɛ̧́náké kaw yér, gelka kú kó ŋgbôŋri̧ saɓay, njuku bɔʼɔ malé ndɔ̂ʼɔ belyári ziŋ ŋgɛ́rɛ, njuku kpɛrɛri séséna, a râ̧wri̧ kó gel, dáy a tí ɗél Gáŋvbôn a Izirayɛ́l.

Zezú ɓá lâʼa sɔ̧́ njukuri kumrá̧ké nɛŋ

(Mrk 8:1-10)

32Zezú ɗí gunbɛʼɛri a sa: Mi kó njuku nɛ́rí̧ sehaŋ mambá, ɓayhí̧lé nâm sáy dá, a kú kaw kuu mǐ a gelé, lâʼa zi tí hí̧ kuriri mbaa, mi tí ɓá kuriri rekála ɓǎŋ nyá, ɓay a kú zi ná gé ta̧ a ŋgboro. 33Gunbɛʼɛri sa hí̧ nɛ́: A gel a sí̧ ná e ziŋ lâʼa ka e ma njuku nɛ́rí̧ a ɓil lawkɔ́r nɛ́ lé? 34Zezú vbí kuriri ɓá: «Biré daw a̧ní, í erú lé?» Dáy kú sa: «Zíndɔ̂ʼɔsáy rá̧ gun nzwîyri kpay.» 35Nǎŋnɔ́, ké sa hí̧ njukuri ɓá kú kaw tísiri. 36Dáy a mbí biré zíndɔ̂ʼɔsáy rá̧ nzwîy, a zi awá hí̧ Gáŋvbôn, ka haw ɓilké a hí̧ gunbɛʼɛri, ɓá kú wal hí̧ njukuri. 37Njukuri too lâʼa ma kuriri, dáy gunbɛʼɛri mára̧ zínké mbá tol zíndɔ̂ʼɔsáy. 38Njukuri too ka sɔ̧́lâʼaké bon a kuriri ɓá kumrá̧ké nɛŋ, kú zi kɛ̧́ wûnynjukuri rá̧ gun a léléri yá. 39Falké, a ké vbara njukuri dáy, ké rehe kumbôn, a kála sé ɓil kaw a Magada̧n.

Currently Selected:

Matiye 15: pnz

Highlight

Copy