Luk 24

Toma a Zezú a hûl

(Mat 28:1-10; Mrk 16:1-8; Zâŋ 20:1-10)

1A fal nâm ɔʼɔ, a gel a pélé rím, wûny rá̧yrí̧ tɛ̧́ sé tûlpâl ka mára̧ yámbóri a kú mɔny. 2Kú gé ka̧, a gé kó ɓá gáŋ saw a kú ɓá ndi nzáʼa lɔ̂ʼɔpâl gíkra ka̧n gbaŋké. 3Kú tá a gé ri ɓil lɔ̂ʼɔ dáy, a zi gé ziŋ hûl a Gáŋmbây Zezú yá. 4Kú zi tu ɓay a kú e sanáké yá, falké, kú kó njukuri sére rí gári ɓá pukí fe ndéeré ndéeré tɛ̧́ gí ziŋ kuriri. 5Dáy wɔ́w ŋgbá kuriri, kú ɗíŋ nûn a kuriri, lé njuku rá̧yrí vbí kuriri ɓá: «Ɓayhí̧ i kaw ɛ́ njuku ka e ka ndísɛ̌ʼɛ a bazeŋ a hûlri lé? 6Ké zi tí gelé mbaa, ké toma a hûl dá. Í kɛrɛ ɓay ka ké tí sa hí̧ wǎyri ka Galilê ɓá: 7Belɓá Gun a njuku, kú zé nɛ́ hí̧ ɓéké njukuri, a kú ɓara nɛ́ ka̧n tûl dii vbatay, a nâm a sáyké a falké lé, ké toma a hûl.»

8Gelka kú láɓay ráy nǎŋnɔ́, kú rekɛ́rɛ ɓay ka Zezú tí sa hí̧ kuriri. 9Kú uru ka tûlpâl, a rekála sé sa hí̧ gunbɔʼɔ a Zezúri ka bôo a mbêw rá̧ gárá njuku a fékéri. 10Wûny nɔ́rí̧ ka sé saɓay hí̧ apotere a Zezúri ɓá: Marí a pû Makdala, Zâ̧n rá̧ Marí mâa a Ják rá̧ wûny a fékéri ɓáy, ka e kuu kuriri. 11Dáy apotereri kɛrɛ ɓá ɓayké zi tí ɓá gbátɓay yá, a zi, zibɔʼɔké yá. 12Dáy Píyɛ́r kó nǎŋnɔ́ a uru, a ŋgú sé ka̧ tûlpâl, a gé pɔ a ɛ̧rɛ̧ ɓil lɔ̂ʼɔ lé, ké kó ɓá laa a kú ku hûl a Zezú rúy. Dáy a uru a rekála, a kaw yér sé tûl hɛ̧ ka táy.

A tûl ŋgboro sé Emayûs

(Mrk 16:12-13)

13Sêeké nɔ́, gunbɔʼɔ a Zezú sére, uru a Zerúzalɛ̂m, a mbí ŋgboro ɓay a sé pû a há̧na, ka rɛŋké ɓá Emayûs. Ɗína ŋgboroké, ɓá séna a bɔʼɔ lé, e mbí sɛl a sêe sére. 14Kú kaw fɔ́ŋ sa̧a a bazeŋ a kuriri sé tûl hɛ̧ri̧ too ka táy. 15Gelka kú kaw séséna, a many há̧narí̧, Zezú kɔ́ gí ziŋ kuriri, a sé mbêw kuu kuriri. 16Dáy hɛ̧ há̧na de nûn a kuriri, kó nɛ́ a ŋgá̧ nɛ́. 17Lé Zezú vbí kuriri: «A̧hí̧ tá rá̧ i séséna a many há̧narí̧ nǎŋnɔ́ lé?» Dáy kú láɓay ráy nǎŋ, a gí ew ka teʼere tûl a kuriri. 18Njuku mbêw a bazeŋ a kuriri ka rɛŋɛ́ ɓá Keleyopás sa hí̧ nɛ́ ɓá: «Njukuri too ka tísiri Zerúzalɛ̂m, tu hɛ̧ ka tá ka Zerúzalɛ̂m ka sénɛ́, a mɔ̌, mɔ e a gel a sí̧ rá̧ a zi tu ɓayké yá lé?» 19Dáy ké vbí kuriri ɓá: A̧hí̧ tá lé? Kú fere a sa: «Hɛ̧ ka tá ka tûl a Zezú a Nazarɛ́t, ka kaw ɓá kpɔ́ŋa porofɛ́t, ké tɔ́ʼɔ ka ŋgboro a péna niŋa a mɛ̌ rá̧ a ŋgboro a ɓay sána a mɛ̌ a mbɛl a Gáŋvbôn rá̧ a mbɛl a njukuri. 20Dáy gáŋnjuku a njuku nzáʼaká̧nari̧ rá̧ gáŋnjuku pû ɓurú ŋgbá nɛ́ hí̧ Pilát, ɓá kú walɓay ŋgbá nɛ́, a kú í nɛ́, nǎŋnɔ́, kú sé ɓara nɛ́ ka̧n tûl dii vbatay. 21Dáy rú kɛrɛ ɓá mɛ̌ pé ɓá njuku ka e ten gun Izirayɛ́lri. A ɓilké nɔ́ too, sénɛ́ niŋ nâm sáy ka hɛ̧ nɔ́rí̧ táy. 22Wûny a há̧narí̧ a bazeŋ a ɓurú, niŋ rú kaw yér, ɓayhí̧lé tí pélí nɛ́ rím, kú uru a sé tûlpâl 23dáy a gé ziŋ hûl a Zezú yá, a regí sa hí̧ rú ɓá kú gé ka̧, a gé ziŋ aŋnze a Gáŋvbônri̧, dáy kú sa hí̧ kuriri ɓá Zezú kaw ka ndísɛ̌ʼɛ. 24Njuku a há̧narí̧ a bazeŋ a ɓurú, uru ka ŋgú sé tûlpâl, a regí sa hí̧ rú ɓá báŋké ka wûnynjukuri gí sáy, ɓá kú ziŋ Zezú yá.» 25Dáy Zezú sa hí̧ kuriri ɓá: «Njuku táŋ hɛ̧túnari̧, law a wǎyri kpú mambá a ɓil láɓulaw sé tûl hɛ̧ri̧ too ka porofɛ́tri tí tɔ́ʼɔy! 26I zi tu ɓá Kiris e tɔ́ʼɔsêe nǎŋnɔ́ rá̧ Gáŋvbôn ké ɓá nɛ́ ri ɓil hɔ̧́na a mɛ̌ nyá lé?» 27Dáy Zezú tí sa táŋa hɛ̧ri̧ ka Mbété a Gáŋvbôn sa sé tûlé, a tí a ɓil a mbété a Mɔyíze, rá̧ ɓil mbété a porofɛ́tri too.

28Gelka kú zi ɗɛ́ŋ ka pû ka gunbɔʼɔ a Zezúri zi ɓay a serúy, Zezú niŋ ɓá báŋa, ké e sé ɓá ɗínáké. 29Dáy kú sa hí̧ nɛ́ ɓá: «Mɔ́ gí ná kuu ɓurú ɓá sêe riŋ dá, zaa lé gel e yíra.» Nǎŋnɔ́, ké zibɔʼɔké a sé vûn kuu kuriri. 30Gelka hɛ̧lâʼa gí ká̧y, kú gé kaw nzáʼaké lé, ké mbí biré a zi awá hí̧ Gáŋvbôn, a haw, a hí̧ kuriri. 31A goló, nûn a kuriri gí ŋgburu dáy kú gí tu ɓá Zezú pɛ̧́nɛ́, núnmbɛ̧́nɛ́ a goló, ké ɓɔ́l a mbɛl a kuriri. 32Dáy kú sa a bazeŋ a kuriri ɓá: «Katína, ná zi lá law a manárí̧ zaŋ ɓá báŋa hɔrɛ, a ké kaw sa táŋa ɓay a Mbété a Gáŋvbôn hí̧ nárí̧ ka ŋgboro nyá lé?»

33Dáy, a kú uru núnmbɛ̧́nɛ́ a goló, a mbí ŋgboro, a rekála sé Zerúzalɛ̂m. Kú gé ziŋ gunbɔʼɔ a Zezúri bôo a mbêw rá̧ mbáŋa a kuriri ka mára̧ kaw, 34a sa ɓá: «Ɓá gbátɓay! Gáŋmbây toma a hûl dá! Simɔŋ kó nɛ́.» 35Nǎŋnɔ́, kuriri kɔ́, kú gé sa hɛ̧ ka ziŋ kuriri ka ŋgboro, rá̧ hɛ̧ ka niŋ rá̧ a kú tu ɓá Zezú, ɓá a gel ka, ké kaw haw biré.

Zezú tɔ́ʼɔ mûn nɛ́ hí̧ apotereri bôo a mbêw

(Mat 28:16-20; Mrk 16:14-18; Zâŋ 20:19-23; Pap 1:6-8)

36Gunbɛʼɛri kaw saɓayké ɓáy, ka Zezú tɛ̧́ gí ew lawgel a kuriri a sa: A vónáké ké kaw kuu wǎyri! 37Kuriri too, wɔ́w ŋgbá kuriri, ɓayhí̧lé kú kɛrɛ ɓá kú kó vbôn a há̧na. 38Dáy Zezú sa hí̧ kuriri: «Ɓayhí̧ i erú ka wɔ́w lé? A ɓayhí̧ mára̧ kɛrɛ nǎŋnɔ́ gí law a wǎyri lé? 39I kó ndɔ̂ʼɔ ní, a i kó bɔʼɔ ní, ɓá mǐ, í ɗá mûn ní, a i kó, vbôn zi tí ka hay mûn, malé húrú yá, ɓá báŋké nɔ́ ka i kó nɛ́y.» 40Ké kaw sa nǎŋnɔ́, a tɔ́ʼɔ kuriri ndɔ̂ʼɛ rá̧ bɛʼɛ. 41A ɓil mûnrína a kuriri, kú zi nyá ɓayké ɓá gbátɓay yá ɓáy, ná yér hí̧ kuriri, dáy Zezú vbí kuriri ɓá: I erú ka hɛ̧lâʼa a gelé lé? 42Dáy kú mbí kúŋá nzwîy a ɛʼɛké hí̧ nɛ́. 43Ké nyá a sɔ̧́ a mbɛl a kuriri a goló. 44A falké, ké sa hí̧ kuriri: Ka mi e kuu wǎyri ɓáy, mi saɓay hí̧ wǎyri sé tûl hɛ̧ri̧ too ka ɗé ka̧n ɓil mbété sáŋna a Mɔyíze, ɓil mbété a porofɛ́tri rá̧ ɓil mbété si̧ŋ, hɛ̧ri̧ too ka e niŋa sé tûl ní. 45A goló, ké ŋgburu hɛ̧túna a kuriri, ɓay a kú lá ɓil ɓay ka ɗé ka̧n ɓil Mbété a Gáŋvbôn. 46A sa hí̧ kuriri: Í kó hɛ̧ a kú ɗéy: Kiris e tɔ́ʼɔsêe, a ziŋ hûl, nâm sáy a falké lé, ké e uru a hûl. 47Nǎŋnɔ́, belɓá kú tɔ́ʼɔɓay ka rɛŋɛ́ magél too a tísiri, tí ka Zerúzalɛ̂m, kú sa hí̧ njukuri ɓá kú fere káwa a kuriri, a Gáŋvbôn ké vbá̧buma hí̧ kuriri. 48Wǎyri, i kaw ɓá njukuri ka kó, ka a lá hɛ̧ri̧ too ka táy. 49Dáy mǐ, mi e pé hɛ̧ ka Bâa a mǐ ŋgá̧nzáʼa ɓay a pé gí hí̧ wǎyri. Í zi ná tɛ̧́ a ɓil pû nɛ́, ka̧ sêe ka kpɔ́ŋa a nûnalê e ɗere gí kɔ̧ tûl a wǎyri.

Héna a Zezú sé nûnalê

50Dáy Zezú ɗá kuriri tɛ̧́ sé falgel ka ŋgboro sé pû Betaní, a gé gbaŋ ndɔ̂ʼɛ sé sâa, a ɗí béla kɔ̧ tûl a kuriri. 51Gelka, ké kaw ɗí béla kɔ̧ tûl a kuriri, ké ɗém há̧na kuu kuriri, a he kála sé nûnalê. 52Dáy kú ew ka hɔ̧́ nɛ́, a falké, kú rekála sé Zerúzalɛ̂m mbá ka mûnrína. 53Nâm too, kú e a ɓil vûn a Gáŋvbôn, a kaw ɗél Gáŋvbôn dát.

Currently Selected:

Luk 24: pnz

Highlight

Copy