Luk 23

Kú ɓá Zezú sé mbɛl a mbây Pilát

(Mat 27:1-2, 11-14; Mrk 15:1-5; Zâŋ 18:28-38)

1Falké, njukuri too uru a ɗá Zezú sé mbɛl a mbây Pilát. 2Kú gé ka̧ gel a Pilát a gé títáʼa deɓay ka̧n nzáʼa Zezú a sa: «Rú ziŋ njuku nɛ́ há̧ra̧ lá gélri, a kaw ɓew njuku a manárí̧ a sa ɓá: njukuri kú zi ná pú lari lambô hí̧ Sezar, a saɓay ɓá, mɛ̌ ké kaw ɓá Kiris, ké kaw ɓá mbây.» 3Mbây Pilát vbí Zezú ɓá: «Mɔ ɓá mbây a Juyífri lé?» Zezú zi a sa: «Ɓá báŋké nɔ́ ka mɔ́ sáy.» 4Pilát gí sa hí̧ gáŋnjuku nzáʼaká̧nari̧ rá̧ njukuri ɓá: «Mi zi ziŋ ɓay a há̧na mbêw, ka ma ɓá ɓay ŋgbá njuku nɛ́ nyá.» 5Dáy njukuri resa a ŋgɛ́rɛ ɓá: «Ké kaw tɔ́ʼɔ ŋgboro kpútûl hí̧ njukuri, ké tí ka tísiri a Galilê, a sé ka̧ tísiri a Judé too, a ŋgɛŋnɛ́, ké gí a e ka gelé.»

Zezú a mbɛl a mbây Herod

6Pilát lá kú saɓay a Galilê, dáy a vbí ɓá njuku nɛ́, ɓá njuku a tísiri a Galilê lé? 7Gelka ké lá ɓá Zezú ɓá njuku a tísiri a Galilê, ké pé Zezú sé gel a Herod, ka ɓá mbây a tísiri a Galilêy. Ɓayhí̧lé a ɓil nâmkéri nɔ́, Herod gí a e ka Zerúzalɛ̂m. 8Gelka Herod gé kó Zezú, ké kaw ka mûnrína. Ɓayhí̧lé ké láɓay a Zezú, dáy a kaw ɛ́ ŋgboro kó nɛ́, ɗiɓaŋ dá; ké kɛrɛ ɓá há̧na Zezú e niŋ hɛ̧sáʼama a há̧na lé, ké ma kónáké. 9Ké vbí Zezú ɓayri ɓá ŋgɛ̧́náké, dáy Zezú zi rerú ka ɓay hí̧ nɛ́ nyá. 10Gáŋnjuku nzáʼaká̧nari̧ rá̧ njuku tɔ́ʼɔ sáŋnari̧ e a goló a kaw kúŋɓayri a ka̧n nzáʼa Zezú a ŋgɛ́rɛ. 11Herod rá̧ ŋgawbére a mɛ̌ri̧ kaw ɓá sáʼa nɛ́, a yáw nɛ́. Falké, kú ɓá laa mbây ri nɛ́ dáy, a repé nɛ́ resé gel a Pilát. 12Tílké Herod kuu Pilát kaw ɓá njuku ŋgá̧nari̧, dáy tí a sêeké nɔ́, kú retɛ̧ njuku mbáŋari̧.

Kú ɓá ɓay ŋgbá Zezú ɓay a í nɛ́

(Mat 27:15-26; Mrk 15:6-15; Zâŋ 18:39–19:16)

13Pilát mára̧ gáŋnjuku nzáʼaká̧nari̧, gáŋnjuku pûri rá̧ njukuri. 14Dáy a sa hí̧ kuriri ɓá: «I ɓá njuku nɛ́ gí mbɛl ní, a sa ɓá ké kaw tɔ́ʼɔ ŋgboro kpútûl hí̧ njukuri. Mi vbí nɛ́ ɓayri a mbɛl a wǎyri too, dáy a zi kó hɛ̧ a há̧na mbêw sé tûl ɓay, ka i sa ka ɓá ɓékéhɛ̧ ka njuku nɛ́ niŋ nyá. 15Herod kɔ́, zi kó ɓéké a há̧na a ké niŋ nyá, pé a repé nɛ́ regí. Tɔ́ʼɔ ɓá njuku nɛ́ zi niŋ ɓékéhɛ̧ a há̧na ka ma ɓay a hûl yá. 16Ɓaykénɔ́, pé mi sa ɓá, kú vbá̧ nɛ́ a ndêe, a kú pɔŋ nɛ́.» 17Dáy ɓil nâm Pâk dát lé, Pilát ten njuku mbêw, ka vûn sɛl hí̧ njukuri. 18Kú vbá̧nzáʼa kuriri too a sa: «Mɔ́ í nɛ́, a mɔ́ pɔŋ Barabás hí̧ rú.» 19Barabás nɔ́, kú ŋgbá nɛ́ ka̧n vûn sɛl ɓay tûl bére, a ké niŋ a ɓil pû rá̧ ɓay a í hûl. 20Pilát kaw ɛ́ ŋgboro ɓay a pɔŋ Zezú, dáy a revbí kuriri ɓáy. 21Dáy, njukuri too vbá̧nzáʼa a ŋgɛ́rɛ a sa ɓá: «Mɔ́ ɓara nɛ́ ka̧n tûl dii vbatay! Mɔ́ ɓara nɛ́ ka̧n tûl dii vbatay!» 22Pilát revbí kuriri a bɔʼɔ sáyké ɓá: «Ɓéké hí̧ rá̧ njuku nɛ́ niŋ lé? Mi zi ziŋ ɓékéhɛ̧ a há̧na a ké niŋ, ka ma ɓay a ziŋ hûl yá. Mi hí̧nzáʼa ɓá kú vbá̧ nɛ́ a ndêe, a kú pɔŋ nɛ́.» 23Dáy, njukuri vbá̧nzáʼa a ŋgɛ́rɛ gé ɓá mbɛl, a sa ɓá: Kú ɓara ɓá Zezú ka̧n tûl dii vbatay. Dáy vbá̧nzáʼaké retá tûl a Pilát. 24A goló, Pilát ŋgá̧nzáʼa ɓá ké e niŋ hí̧ kuriri ɓá báŋké a kú ziy. 25Nǎŋnɔ́, Pilát gí pɔŋ njuku a kú ŋgbá nɛ́ ka̧n vûn sɛl ɓay tûl bére rá̧ ɓay a í hûl, ɓá báŋké nɔ́ a kú vbíy, dáy a ɓá Zezú hí̧ kuriri, ɓá kú niŋ hɛ̧ a kú zi ziŋ nɛ́.#23:25 Gel a nɛ́ zi tí a ɓil mbété a fékéri yá.

Kú ɓara Zezú ka̧n tûl dii vbatay

(Mat 27:32-44; Mrk 15:21-32; Zâŋ 19:17-27)

26Gelka kú ɗá Zezú kaw séna, kú gé ziŋ njuku a há̧na, ɓá njuku a tísiri a Sirɛn, rɛŋɛ́ ɓá Simɔŋ, ké kaw réna a wâʼa. Ŋgawbéreri gé ŋgbá nɛ́ a ŋgɛ́rɛ, a ɓá nɛ́ hol dii vbatay a Zezú, tɔ́ŋ nɛ́. 27Njukuri ɓá ŋgɛ̧́náké tɔ́ŋ kuriri rá̧ wûnynjukuri ka vú a órómûn a kuriri ɓay tûl a Zezúy. 28Dáy, Zezú kí a ɛ̧rɛ̧ kuriri a sa: «Wûny Zerúzalɛ̂mri̧, í vú ɓay a mǐ nyá, í vú ɓá ɓay a wǎyri rá̧ ɓay a gun a wǎyri. 29Ɓayhí̧lé sêeké e gína, ka njukuri e sa ɓá: “Béla hí̧ mâaturi ka zi mbuŋ bɔʼɔ mbêw yáy, ka zi ɓá gun â̧m pâm bɔʼɔ mbêw yáy!” 30A goló, njukuri sa hí̧ konri̧ ɓá: Í lé kɔ̧ tûl a ɓurú, rá̧ a sa hí̧ kolri ɓá: Í puru rú. 31Ɓayhí̧lé mí ɓá nǎŋnɔ́, pé njuku niŋ ziŋ dii a ndísɛ̌ʼɛy, e ná a̧ní hí̧ dii a hɔ́ʼɔké lé?» 32Kú ɗa njukuri sére, ɓá ɓéké njukuri kɔ́, ɓay sé í kuriri kuu Zezú. 33Kú gé ka̧ gel a kú ɗí ɓá: «Gel ŋgótûl» ŋgawbéreri gé ɓara Zezú ka̧n tûl dii vbatay kuu ɓéké njukuri sére ka̧n tûl dii vbatay a kuriri kɔ́, mbêw a ŋgboro a lâʼa rá̧ mbêw a ŋgboro a kporo a Zezú. 34Dáy Zezú sa: «Bâa, mɔ́ vbá̧buma hí̧ kuriri, ɓayhí̧lé kú zi tu hɛ̧ a kú kaw niŋáké yá.» Dáy kú wal gári a mɛ̌, a ɓú ɓele rú. 35Njukuri ew a ɛ̧rɛ̧ nɛ́. Gáŋnjuku pû a Juyífri kaw a sáʼa nɛ́, a sa ɓá: «Ké pɛ̧́ njuku a fékéri, a ŋgɛŋnɛ́, ké pɛ̧́ mûn nɛ́ ka mûn nɛ́ mbaa lé a ké mí ɓá Kiris, njuku ka Gáŋvbôn pé?» 36Ŋgawbéreri kɔ́ sáʼa nɛ́ a ta̧m gí gbɛ́ŋɛ́, a gí hí̧ nɛ́ vôn a sɔ̧́naké, 37a kú sa: «Mɔ̌ mí ɓá gbát mbây a Juyífri lé, mɔ́ pɛ̧́ mûn nɔ́ ka mûn nɔ́!» 38Kú ɗé hɛ̧, a ɓara ka̧n tûl dii vbatay ka tûlé ɓá: «Njuku nɛ́ ɓá mbây a Juyífri.»

39Njuku ɓékéhɛ̧ a mbêw, a kú ɓara nɛ́ ka̧n tûl dii vbatay, fára Zezú a sa hí̧ nɛ́ ɓá: «Mɔ zi tí ɓá Kiris yá lé? Mɔ́ pɛ̧́ mûn nɔ́, a mɔ́ gí pɛ̧́ rú kɔ́!» 40Dáy njuku a mbêw sa hí̧ nɛ́: «Mɔ zi ŋgú wɔ́w a Gáŋvbôn nyá lé, mɔ̌ a kaw tɔ́ʼɔsêe ɓá báŋa a mɛ̌ kɔ́y? 41Dáy tɔ́ʼɔsêe a maná ná ɓá ndáráké, ɓayhí̧lé ná niŋ ɓékéhɛ̧. A mɛ̌, ké zi niŋ ɓékéhɛ̧ a há̧na mbêw yá.» 42Fal saɓay nɔ́, ké fere a sa hí̧ Zezú ɓá: «Zezú, mɔ́ kɛrɛ mí a sêe ka mɔ́ e gí kaw Mbây a mɔ̌.» 43Dáy Zezú zi a sa hí̧ nɛ́: «Mi sa hí̧ mɔ́ gbátɓay, sénɛ́ mɔ e sé kuu mǐ sé nûnalê.»

Hûl a Zezú

(Mat 27:45-56; Mrk 15:33-41; Zâŋ 19:28-30)

44Gelka sêe gí ka̧ lawgel a tûl, tirí̧ma ɗere ka nyá tísiri too, sé ka̧ sɛl a sêe sáy a bɔʼɔlêw. 45Gáŋ laa, a kú ɓá kúŋ ɓil vûn a Gáŋvbôn, ka wal gel ewá a gáŋnjuku nzáʼaká̧na lé, a sáʼa ka lawgel, tí ka sâa sé ka̧ taa. 46Zezú vbá̧nzáʼa ɓá gbénáké a sa: «Bâa, mi pɔŋ Têm a mǐ ka̧n ɓil ndɔ̂ʼɔ.» A fal ɓay nɔ́, ké hú. 47Gáŋnjuku a ŋgawbére a Rɔmɛri̧, ka e a golóy, kó hɛ̧ ka táy, ka ɗél Gáŋvbôn a sa: «Gbátɓay njuku nɛ́, zi tí ka ɓéké yá!» 48Njukuri too ka mára̧ gí gelké, ka a kó hɛ̧ ka táy, kú rekála ka lawyíra a sí̧ŋ tûl a kuriri. 49Mbáŋa a Zezúri too rá̧ wûnynjukuri ka tɔ́ŋ nɛ́ tí ka Galilê, ew ɓá ɗínáké ɓay kó hɛ̧ri̧ ka kaw tánay.

Goro hûl a Zezú

(Mat 27:57-61; Mrk 15:42-47; Zâŋ 19:38-42)

50-51Njuku a há̧na erú, rɛŋɛ́ ɓá Jozɛf, ké ɓá béla njuku, a kaw ɓá gun pû a Juyíf a há̧na, a kú ɗí ɓá Arimaté. Ké ŋgbá ɓay a sáŋna a Gáŋvbôn mambá, ké zoko káwa Mbây a Pû a Gáŋvbôn. Ké e ɓil mára̧ a gáŋnjuku a pûri kɔ́, dáy a zibɔʼɔ ɓay ka gáŋnjuku a pûri wal kɔ̧ tûl a Zezú yá. 52Jozɛfké uru a sé ziŋ Pilát, a gé vbí nɛ́ ɓay a mbí hûl a Zezú, dáy Pilát gé zibɔʼɔké. 53Ké sé ɗere hûl a Zezú ka tûl dii vbatay, a mbí laa a kurú, dáy a mbí sé ɓá ka̧n ɓil lɔ̂ʼɔpâl a kú gu a ɓil saw ka ŋgɛŋ, ka a pa̧ná ɓá hûl ka̧nrú̧ bɔʼɔ mbêw yá ɓáy. 54Sêeké ɓá ɗambɛl nâm ɔʼɔ, sêe mɔny mûn, ɓay a nâm ɔʼɔ a Juyífri, ké tí rá. 55Wûnynjukuri, ka tɔ́ŋ Zezú gí ka Galilê, sé tɔ́ŋ Jozɛf sé ka̧ tûlpâl, a gé kó gelka ké ɓá a hûl a Zezú ka̧nrú̧y. 56Falké kú rekála gí ɓil pû, a gí mɔny mára̧ri̧ rá̧ yámbóri ka̧n, ɓay a sé ɓá kɔ̧ hûl. Dáy sêe ɔʼɔ tí dá, kú gí ɔʼɔ ɓá báŋké ka sáŋna vbíy.

Currently Selected:

Luk 23: pnz

Highlight

Copy