Luk 17

Ɓéké rá̧ vbá̧buma

(Mat 18:6-7, 21-22; Mrk 9:42)

1Zezú sa hí̧ Gunbɛʼɛri: Katína, hɛ̧ri̧ ɓá ŋgɛ̧́náké erú ka e niŋ rá̧ a ɓá njukuri lé ɓil ɓékéhɛ̧. Dáy ná ɓá mbɛl ɓewa hí̧ njuku ka niŋ rá̧ ka a ɓá mbɛ́ŋnɛ́ njuku lé ɓil ɓékéhɛ̧. 2Belɓá njuku nɔ́, kú ŋgá̧ ŋgburu saw ka̧n solé a sɔʼɔrɔ nɛ́ vbú ɓil mbii lúkí. Ɓayhí̧lé bel ndé, kú niŋ nǎŋnɔ́ hí̧ nɛ́, a tûl a pɔŋ nɛ́ a ké niŋ gun a mǐ a há̧na mbêw, ké lé ɓil ɓékéhɛ̧. 3Í koro tûl a wǎyri ɓá béláké! «Nyîn nɔ́ mí niŋ ɓékéhɛ̧ ziŋ mɔ́ lé, mɔ́ sa gbátɓay hí̧ nɛ́, rá̧ ké mí tu ɓékéhɛ̧ a mɛ̌ lé, mɔ́ vbá̧buma hí̧ nɛ́. 4Rá̧ ɓil nâm mbêw, ké mí niŋ ɓékéhɛ̧ ziŋ mɔ́ bɔʼɔké zíndɔ̂ʼɔsáy, rá̧ a mí regí lé siri hí̧ mɔ́ bɔʼɔké zíndɔ̂ʼɔsáy ka sêeké nɔ́ lé, mɔ́ vbá̧buma hí̧ nɛ́.»

Láɓulaw

5Apotere a Zezúri sa hí̧ nɛ́: «Gáŋmbây mɔ́ niŋ a láɓulaw a ɓurú ké hɔ̧́ sé mbɛl!» 6Gáŋmbây sa hí̧ kuriri ɓá: «Wǎyri mí erú ka láɓulaw tɛ̧́w ɓá báŋa tɛ̧́rɛ̧́ mutárde, i ma sa hí̧ dii nɛ́ ɓá ké lú ka sɛ̧wké too a ké sé ew ɓil mbii lúkí lé, ké e lá nzáʼa a wǎyri.»

Péna niŋa a njukupéna

7«A gé a bazeŋ a wǎyri erú ka njukupéna a mɛ̌, ka kaw pá wâʼa malé kaw koro hɛ̧hɔ́la a mɛ̌ri̧ rá̧ pé a regí pû a bɔʼɔlêw, ké e sa hí̧ nɛ́ ɓá: Mɔ́ ta̧m gí ga kaw a siri a sɔ̧́lâʼa lé?» 8Tí yá! Tí ɓá ké e sa hí̧ nɛ́ ɓá: «Mɔ́ sé kara lâʼa a mǐ, a ŋgá̧ taʼa sâ̧ny nɔ́, a mɔ́ gí ɓá lâʼa hí̧ mí, a mí lâʼa a nzó, falké rá̧ mɔ́ sé lâʼa ɓala a mɔ̌ a nzó yá lé?» 9Dáy, ké tí zi awá hí̧ njukupéna, ɓay a péna a ké sa hí̧ nɛ́ a ké sé niŋ nyá. Tí nǎŋ nyá lé? 10Ná ɓá mbêwké hí̧ wǎyri kɔ́, gelka i ɔrɔ niŋ péna a kú vbí wǎyri ɓá í niŋ, í sa ɓá: Rú kaw ɓá njuku niŋ péna baa, rú niŋ ɓá péna a kú hí̧ rú, ɓá rú niŋ mbɛ́ŋ.

Zezú ŋgɛ́rɛ njuku ndɛ́ɓɛri bôo

11Zezú kaw sé Zerúzalɛ̂m, a mbí ŋgboro ka tá a bazeŋ a tísiri a Samarí rá̧ Galilê. 12Ké sé ka̧ ɓil pû a há̧na, njuku záŋmá ndɛ́ɓɛri tûl a kuriri bôo gí ziŋ nɛ́, a gí ew ɓá ɗínáké, 13a sa ɓá gbénáké: «Zezú, Gáŋnjuku, mɔ́ kósêe a ɓurú!» 14Dáy Zezú ɛ̧rɛ̧ kuriri a sa hí̧ kuriri ɓá: «Í sé tɔ́ʼɔ mûn a wǎyri hí̧ njuku nzáʼaká̧nari̧: Gelka, kú kaw séna a ŋgboro ɓáy, kú kó ɓá záŋmáké ɔ ka mûn a kuriri dá.» 15Dáy njuku mbêw a bazeŋ a kuriri, kó a ké ziŋ ŋgɛ́rɛ dáy, re ka tûl bɛʼɛ, ka ɗéla Gáŋvbôn ɓá gbénáké. 16Ké gí lé guku tísiri a mbɛl a Zezú, a zi awá hí̧ nɛ́. Njukuké, ɓá njuku a tísiri a Samarí. 17Dáy Zezú sa: «Tá wǎyri bôo too pé ziŋ ŋgɛ́rɛ yá lé? Dáy a njuku a zíndɔ̂ʼɔmbêwkéri e a sí̧ lé? 18Dáy njuku mbêw a bazeŋ a kuriri nɔ́, zi kɛrɛ ɓá ké regí zi awá hí̧ Gáŋvbôn nyá, ɓá gɔ́rɔ́ njuku nɛ́ mbêw yáŋ lé? 19Dáy, Zezú resa hí̧ nɛ́: Mɔ́ uru, a kála sé pû, láɓulaw a mɔ̌ pɛ̧́ mɔ́ dá.»

Káwa Mbây a Pû a Gáŋvbôn gí dɛ́ŋ dá

(Mat 24:23-28, 37-41)

20Fariziyɛ̧́ a há̧narí̧ vbí Zezú ɓá: «Sêe a sí̧ rá̧ káwa mbây a Pû a Gáŋvbôn e ka̧na lé?» Dáy Zezú sa hí̧ kuriri ɓá: «Káwa mbây a Pû a Gáŋvbôn, tí gí ɓá báŋa a hɛ̧ ka e kɔʼɔ ɛ̧rɛ̧ gel a njukuri yá. 21Kú e sa hí̧ wǎyri, ɓá ké e a gelé malé e a goló sá̧. Ɓayhí̧lé, i tu ɓá, káwa Mbây a Gáŋvbôn e a bazeŋ a wǎyri dá.» 22Falké Zezú sa hí̧ gunbɛʼɛri ɓáy ɓá: «Sêeké e gína, i zi ɓay a kó Gun a njuku ɓay a nâm mbɛ́ŋ, dáy i zi kó nɛ́ nyá. 23Njukuri e sa hí̧ wǎyri ɓá í kó, ké e a gelé, malé ké e a goló sá̧, i sé yá, a ŋgú sé gel a há̧na nyá. 24Ɓá báŋké nɔ́ ka mbɔ̂m vú hâa lé, táŋ magél too a nûnalê ka̧ kɔ́rɔ́ tísiri, nǎŋnɔ́ e ná ɛ́ŋ sé gína Gun a njuku. 25Dáy, ɗambɛlké belɓá Gun a njuku ké tɔ́ʼɔsêe mambá, njuku a ŋgɛŋnɛ́ nɛ́rí̧ ɓá ŋgɛ̧́náké e sáŋ nɛ́. 26Hɛ̧ri̧ ka niŋ a ɓil nâm a Nuwé, e niŋ ɓá báŋké nɔ́ a ɓil nâm ka Gun a njuku e gínay. 27Ka sêeké nɔ́, njukuri lâʼa, a nzó, a nyá wûny, ka ɓá gun a kuriri nyá wɔ̧rɔ̧́, ka̧ sêe ka Nuwé ri ɓil batô. Gáŋ mbɔ̂m tɔ́, mbii gí, ka nyá tísiri ka nduku njukuri too. 28Malé e ná ɓá báŋa hɛ̧ ka niŋ a ɓil nâm a Lót, njukuri lâʼa, a nzó, a zé hɛ̧ri̧, a kuma hɛ̧ a kuriri, a pá wâʼa, a zá vûnri̧, 29ka̧ sêe ka Lót, tɛ̧́ a tísiri a Sɔ́dôm, Gáŋvbôn ɗere hɔrɛ a nûnalê, ɓá báŋa mbɔ̂m ka tɔ́ ɓá báŋa súkú nzáʼa ndaw hɔrɛ, gí rɛ́ŋ njukuri too. 30Nǎŋnɔ́, e niŋ ɓá báŋké nɔ́, a sêe ka Gun a njuku e gínay.

31Sêeké nɔ́, njuku ka e a gelkáwa a kú mɔny ka tûl vûn, ké tí ná ɗere ɓay a gí fá̧ hɛ̧ a mɛ̌ri̧ a ɓil vûn, a njuku ka e a wâʼa, tí ná regí pû. 32Í kɛrɛ wûny a Lót. 33Njuku ka ɛ́ pɛ̧́ ndísɛ̌ʼɛ a mɛ̌, e ɓɔ́l ndísɛ̌ʼɛ a mɛ̌; a njuku ka ɓɔ́l ndísɛ̌ʼɛ a mɛ̌, e ziŋ ndísɛ̌ʼɛ a mɛ̌. 34Katína, mi sa hí̧ wǎyri, sû̧ŋké nɔ́, njukuri sére e ná tûl gel nâm mbêw, kú e mbí njuku mbêw a pɔŋ njuku mbêw. 35Wûnynjukuri sére e kaw náŋ hɛ̧ ka tûl niŋ, kú e mbí wûny mbêw ka pɔŋ wûny mbêw. [36Wɔ̧rɔ̧́njukuri sére e a ɓil wâʼa, kú e mbí wɔ̧rɔ̧́njuku mbêw a pɔŋ njuku mbêw.]» 37Gunbɔʼɔ a Zezúri vbí nɛ́ ɓá: «A gel sí̧ hɛ̧ nɔ́rí̧ e niŋa lé, Gáŋmbây?» Zezú sa hí̧ kuriri ɓá: «Gelka hûlhɛ̧ erú, goló pé Ta̧mari̧ e mára̧ gírúy.»

Currently Selected:

Luk 17: pnz

Highlight

Copy