Luk 15

Galaɓay a gun mbólé ka ɓɔ́l a kú rezíŋ

(Mat 18:12-14)

1Njuku mára̧ lari lambô a Rɔmɛri̧ rá̧ ɓéké njukuri kɔ́, mára̧ gí gbaŋa a Zezú gí lá nɛ́. 2Dáy Fariziyɛ̧́ri̧ kuu njuku tɔ́ʼɔ sáŋnari̧ kaw ŋgɔ̧rɔ̧ a bazeŋ a kuriri a sa: «Njuku nɛ́, kaw ɓá kuu njukuri ka bɔʼɔséna a kuriri zi belyá, a sɔ̧́lâʼa kuu kuriri mbêw!» 3Dáy, Zezú sa galaɓay hí̧ kuriri ɓá: 4«Njuku a há̧na mbêw a bazeŋ a wǎyri erú ka mbólé ísɔ́t, dáy mbêw ɓɔ́l a ɓilké, a̧hí̧ ké e niŋáké lé, ké tí pɔŋ mbólé a bonzíndɔ̂ʼɔmbêw a zíndɔ̂ʼɔmbêwkéri kɔ̧ ɓil kpâa, ɓay a sé ɛ́ mbólé a mbêwké nɔ́ a ziŋ nyá lé?» 5Gelka ké mí gé ziŋ mbólékéy, ké e mbá ka mûnrína, a gé mbí mbóléké vbú tûl báŋsólé, 6a rekála sé pû mɛ̌, a gé ɗí mbáŋa a mɛ̌ri̧ rá̧ njuku gbaŋ vûn a mɛ̌ri̧, a sa hí̧ kuriri ɓá: Í gí rí mûn a wǎyri kuu mǐ, ɓayhí̧lé mbólé a mǐ rá̧y ka ɓɔ́l, mí ziŋ nɛ́ dá! 7Ɓá báŋa nɔ́, mi sa hí̧ wǎyri, mûnrína e ná mambá a nûnalê, ɓay tûl a njuku ɓéké mbêw, ka fere káwa a mɛ̌, tá njuku a fékéri ka bonzíndɔ̂ʼɔmbêw a zíndɔ̂ʼɔmbêw ka kó ɓá kú kaw ɓá njuku a ndárákéri, ka zi ɓay a ɛ́ ŋgboro fere káwa a kuriri yáy.

Mínya ka ɓɔ́l a kú rezíŋ

8«Malé, wûnynjuku a há̧na erú ka mínya bôo, rá̧ mínya mbêw a ɓilké mí ɓɔ́l, ké tí ɓá hɔrɛ ka̧n lámbe, ka táʼa ɓil vûn, ka ɛ́ záŋ záŋ, ka ziŋ rá̧ ka ɔʼɔ mûn nɛ́ nyá lé? 9Rá̧ gelka ké mí gé ziŋ dáy, ké e ɗí wûny mbáŋa a mɛ̌ri̧ rá̧ wûny gbaŋ vûn a mɛ̌ri̧, a sa hí̧ kuriri ɓá: Í gí rí mûn a wǎyri kuu mǐ, ɓayhí̧lé mi ziŋ mínya a mǐ rá̧y ka ɓɔ́l dá! 10Nǎŋnɔ́, mi sa hí̧ wǎyri, aŋnze a Gáŋvbônri̧ e kaw ka mûnrína, ɓay tûl a njuku ɓéké mbêw, ka fere káwa a mɛ̌.»

Galaɓay a gun ka ɓɔ́l a kú rezíŋ nɛ́y.

11Zezú sa galaɓay a féké ɓáy a sa: Njuku a há̧na e ka gun wɔ̧rɔ̧́njukuri sére. 12Gun a lelké sa hí̧ bâa a mɛ̌: «Bâa, mɔ́ sé lú a ɓil hɛ̧zíŋa a manárí̧, ɓala a mǐ hí̧ mí.» Nǎŋnɔ́ dáy, bâa a mɛ̌ sé wal hɛ̧zíŋáké hí̧ kuriri sére. 13Nâm kpay a falké, gun a lelké ráy fa̧ hɛ̧zíŋa a mɛ̌ri̧ too, a zé, a fá̧ lariké a kála sé ŋgboro a tísiri a féké ɓá ɗínáké. A sá̧, ké gé rí ɓil niŋ dala rá̧ nzó vôn, a ɓew lari a mɛ̌ too. 14Falké a ké ɓew lari ráy too dáy, nzala gí ŋgbá tísiriké, hɛ̧lâʼa mbêw zi tí hí̧ nɛ́ mbaa. 15Ké zi tu hɛ̧ niŋa mbaa, dáy a uru a sé ɛ́ péna a gel a njuku a há̧na ka tísiriké nɔ́. Njukuké, gé pé nɛ́ sé koro kɔsɔri a ɓil wâʼa a mɛ̌. 16Ké zi ɓay a ké ziŋ lâʼa a kɔsɔri#15:16 Péna a mɛ̌ ɓá fá̧ kɔsɔri há̧ra̧, a ɛ́ lâʼa a ɓil kpâa, bɔʼɔlêw ké re fá̧ kuriri regí pû lé, njuku ɓá lâʼa hí̧ kuriri ɓórí. a ké lâʼa, dáy njuku hí̧ nɛ́ zi tí nyá. 17Nǎŋnɔ́, ké kaw a kɛrɛ káwa a mɛ̌ a sa: Njukupéna a bâa a mǐri̧, kaw sɔ̧́lâʼa ɓá báŋké a kú ziy, lé mǐ, mi kaw hú ka nzala a gelé! 18Mi uru a rekála sé gel a bâa a mǐ, a gé sa hí̧ nɛ́ ɓá: Bâa, mi niŋ ɓéké ziŋ Gáŋvbôn, a niŋ ɓéké ziŋ mɔ́, 19nǎŋnɔ́, mi zi ma ɓay a mɔ́ kó mí ɓá báŋa gun a mɔ̌ mbaa. Mɔ́ mbí mí ɓá báŋa njukupéna a mɔ̌ mbêw. 20Dáy a uru, a rekála sé gel a bâa a mɛ̌. Gelka ké pa̧n ɓá ɗínáké ka pû a bâa a mɛ̌ ɓáy, lé bâa a mɛ̌ mbí nûn a kó nɛ́ sehaŋ, a uru, a ŋgú sé sí̧ŋ nɛ́ ka̧n lawɛ́. 21Dáy ké sa hí̧ bâa a mɛ̌ ɓá: Bâa, mi niŋ ɓéké ziŋ Gáŋvbôn, a niŋ ɓéké ziŋ mɔ́, mí zi ma ɓay a mɔ́ kó mí ɓá báŋa gun a mɔ̌ mbaa: 22Dáy, bâa a mɛ̌ sa hí̧ njukupéna a mɛ̌ri̧: Í sé ɓá gánáké sé ɛ́ béla gári gí ri nɛ́, a í ɓá ndɛrɛ gí ka̧n ndɔ̂ʼɛ, a í ɓá sabɔʼɔ kɔ̧ bɛʼɛ. 23Í sé ŋgbá gun nday ka mbára ɓá béláké gí, a í vbé, ka ná lâʼa, a ná záy, 24ɓayhí̧lé gun nɛ́ mǐ hú, pé a toma, ké ɓɔ́l, pé mi rezíŋ nɛ́. A goló kú tí rí mûn a kuriri.

25«Sêeké nɔ́, gáŋnjuku gun sé wâʼa, gelka ké regí ka̧ gbaŋ pûy, ké lá si̧ŋ rá̧ nday ka lɔŋ. 26Ké ɗí njukupéna a bâa a mɛ̌ mbêw, a vbí nɛ́, a̧hí̧ tá ka pû lé? 27Dáy, ké sa hí̧ nɛ́ ɓá: Nyîn nɔ́ pé regí, dáy bâa a mɔ̌, í nday a nɔ́ ka mbara bel mambáy, ɓay ka ké rezíŋ gun a mɛ̌ a ŋgɛ́rɛ ɓá bélákéy. 28Dáy gáŋnjuku gun gí ɗí hɛ́rɛ, a zi ri ɓil pû yá. Bâa a mɛ̌ tɛ̧́ gí ɔl nɛ́, ɓá ké ri ɓil pû. 29Dáy ké sa hí̧ bâa a mɛ̌ ɓá: Bâa, mbimbɔ̂m daw a̧ní rá̧ mi kaw niŋ péna hí̧ mɔ́, a zi many nzáʼa bɔʼɔké mbêw yá, mɔ zi hí̧ mí gun hwálá a há̧na mbêw ɓay a mí í, a rí mûn ní kuu gun mbáŋa a mǐri̧ yá. 30Dáy ɓay tûl a gun a mɔ̌, ka fá̧ hɛ̧zíŋa a mɔ̌, ka a sé ɓew kuu wûnynjukuri, ɓay a mɛ̌ lé, mɔ́ sé í gun nday ka ná mbé ɓá béláké hí̧ nɛ́! 31Bâa a mɛ̌ sa hí̧ nɛ́: Gun a mǐ, mɔ e dát kuu mǐ, hɛ̧zíŋa ka mi erú tooy, ɓá ɓála a mɔ̌. 32Dáy, belɓá ná lâʼa a ná záy, ɓayhí̧lé nyîn nɔ́ nɛ́, ké hú pé a toma, ké ɓɔ́l, pé mi rezíŋ nɛ́!»

Currently Selected:

Luk 15: pnz

Highlight

Copy