Luk 14

Zezú ŋgɛ́rɛ njuku záŋmá a há̧na ka sêe ɔʼɔ

1Sêe a há̧na, ɓá sêe ɔʼɔ a Juyífri, dáy Zezú sé pû a mbây a Fariziyɛ̧́ a há̧na, ɓay sé lâʼa hɛ̧. Njukuri ka e a gelké, kaw ka ɓɛʼɛ nɛ́. 2Njuku záŋmá mûn mbára a há̧na ew a mbɛlɛ́. 3Zezú mbí ɓay a vbí njuku tɔ́ʼɔ sáŋnari̧ rá̧ Fariziyɛ̧́ri̧ ɓá: Sáŋna a manárí̧ zi ɓá kú ŋgɛ́rɛ njuku záŋmá ka sêe ɔʼɔ malé, tí nǎŋ nyá lé? 4Dáy, kú kaw yím a zi saɓay yá. Nǎŋnɔ́, Zezú ndara ndɔ̂ʼɛ, a ɗa njuku záŋmá ráy, dáy a lú záŋmá ka mûn nɛ́, a sa hí̧ nɛ́ ɓá ké kála. 5Falké, ké vbí kuriri a sa: Njuku a sí̧ a bazeŋ a wǎyri, gun a mɛ̌, malé nday a mɛ̌ lé lɔ̂ʼɔ lé, ké zi sé tenáké ka sêe ɔʼɔ yáy lé? 6Dáy kú zi rerú ka vbí ɓayké yá.

Ɓay pɔtûl rá̧ niŋ béla

7Falké, Zezú kó njukuri a kú ɗí kuriri gí a kaw ŋgbá gelkáwa a bélákéri, dáy a sa galaɓay ɓá: 8«Sêe a há̧na, njuku mí ɗí mɔ́, sé gel nyá wûny, ɓay sé sɔ̧́lâʼa lé, mɔ́ zi ná sé kaw tûl gelkáwa a mbɛl. Ɓayhí̧lé njuku a há̧na ka ndé mɔ́ ka hɔ̧́na, ké zi ná gí ka fal, 9ka njuku ka ɗí wǎyri, ké zi ná gí sa hí̧ mɔ́ ɓá: Mɔ́ uru a pɔŋ gelkáwa hí̧ gáŋnjuku nɛ́. A goló e ná ɓá sɔ̧rɔ̧ hí̧ mɔ́, ɓay a mɔ́ uru a resé kaw gelkáwa ka fal. 10Dáy belɓá kú mí ɗí mɔ́ sé gel sɔ̧́lâʼa a há̧na lé, mɔ́ sé kaw tûl gelkáwa ka fal rá̧ njuku ka ɗí mɔ́y, mí gí sa hí̧ mɔ́ ɓá: Mbáŋa a mǐ, mɔ́ uru gí kaw tûl gelkáwa a mbɛl, e ná ɓá hɛ̧ hɛʼɛ mambá hí̧ mɔ́ ka nûn a njukuri too, a kú ɗí wǎyri gí sɔ̧́lâʼa mbêw. 11Ɓaykénɔ́, njuku ka hɔ̧́tûlé, Gáŋvbôn e ɗere nɛ́, a njuku ka pɔ tûlé, Gáŋvbôn e gbaŋ nɛ́ sé sâa.» 12Falké, Zezú resa hí̧ njuku ka ɗí kuriri gí ɓá: Sêe a há̧na, mɔ̌ mí zi ɓay ɗí njukuri ɓay a kú gí goló gí sɔ̧́lâʼa, ka tí pélé malé ka bɔʼɔlêw lé, mɔ́ ɗí mbáŋa a mɔ̌ri̧ nyá, malé nyîn nɔ́rí̧ malé njuku a ɓil a î̧n a mɔ̌ri̧ malé njuku hɛ̧zíŋári̧ ka gbaŋ vûn a mɔ̌ri̧ nyá, ɓayhí̧lé, kú zi ná ɗí mɔ́ ka sêe a há̧na kuriri kɔ́, a kú reniŋ hí̧ mɔ̌ ɓá báŋké nɔ́ ka mɔ niŋ hí̧ kuriri. 13Dáy, mɔ̌ mí zi ɓay a ɗí njukuri ɓay a kú gí sɔ̧́lâʼa a sêe záymûn a há̧na a goló lé, mɔ́ ɗí njuku fóyári, njuku kpɛrɛri, njuku bɔʼɔ belyári rá̧ râ̧wri̧. 14Nǎŋnɔ́, mɔ e ka law sáʼa, ɓay a kú zi ma rerú ka hɛ̧ ka mɔ niŋ hí̧ kuriri nyá, ɓayhí̧lé béláké, Gáŋvbôn e rerú hí̧ mɔ́ ka sêe a ké e toma njuku a ndárákéri ka hûl.

Galaɓay a sêe lâʼa a lúkí

(Mat 22:1-10)

15Fal láɓay nɔ́, njuku mbêw a bazeŋ a njukuri ka e a nzáʼa lâʼa kuu Zezú, sa hí̧ nɛ́ ɓá: Béla hí̧ njuku ka e ziŋ sɔ̧́lâʼa a ɓil Pû a Gáŋvbôn. 16Zezú rerú ka galaɓay hí̧ nɛ́ ɓá: «Njuku a há̧na kara lâʼa ɓá ŋgɛ̧́náké, dáy a ɗí njukuri ɓá ŋgɛ̧́náké ɓá kú gí sɔ̧́lâʼa a gé lé. 17Gelka lâʼari ná ɗɛ́ŋ dáy, ké pé njukupéna a mɛ̌, ɓá kú sé ɗí njuku rá̧yrí̧ ɓá lâʼa ná ɗɛ́ŋ dá. 18Dáy kuriri mbêw mbêw too, kú tí ŋgú há̧ra̧ hí̧ njukupéna, ɓayhí̧lé kú zi ɓay a gína nyá. Dáy titíla njuku sa ɓá: Mi zé wâʼa dáy, a zi ɓay a sé kónáké, mɔ́ sa hí̧ nɛ́ ɓá, mi tí ziŋ ŋgboro géna nyá: 19Njuku a séreké sa ɓáy ɓá: Mi zé nday pay ndíɓí dáy, a zi ɓay a sé lé kuriri, mɔ gé sa hí̧ nɛ́ ɓá, kɔʼɔrɔyá mi tí ziŋ ŋgboro géna nyá: 20Njuku a sáyké ɓáy, resa ɓá: Mi nyá wûny a ŋgɛŋnɛ́, kɔʼɔrɔyá mi tí ziŋ ŋgboro géna nyá. 21Njukupéna ráy rekála, a sé sa nzáʼa péna too hí̧ bákáwa a mɛ̌, gelka bákáwa a mɛ̌ láɓayké, ké ɗí hɛ́rɛ, a sa hí̧ nɛ́ ɓá: Mɔ́ sé ɓá gánáké sé laɓára rá̧ tûl ŋgborori a ɓil pû, a mɔ́ ɗí njuku fóyári, njuku kpɛrɛri, râ̧wri̧, rá̧ njuku bɔʼɔ belyári, kú gí kuu mɔ̌. 22Falké kpay lé, ké regí a sa: Bákáwa, mi sé ɗí njuku nɔ́rí̧ too gí dáy, gelkáwa rézi erú ɓáy: 23Bákáwa resa hí̧ nɛ́ ɓá: Mɔ́ sé ŋgboro wâʼari rá̧ ɓil kâ̧wpûri, njukuri too ka mɔ ziŋ, mɔ́ ɗá kuriri gí ɓá gánáké, gí mbá ɓil vûn a mǐ. 24Nǎŋnɔ́, mi sa hí̧ mɔ́ katína, njuku a há̧na mbêw a ɓil a njukuri ka mi tí ɗí kuriri, zi ma gí sɔ̧́lâʼa a mǐ nɛ́ nyá!»

Ŋgboro kaw ɓá gunbɔʼɔ a Zezú

(Mat 10:37-38)

25Sêe a há̧na, Zezú kaw séséna, dáy njukuri ɓá ŋgɛ̧́náké tɔ́ŋ nɛ́, ké kí a sa hí̧ kuriri ɓá: 26«Njuku mí zi ɓay a tɔ́ŋ mí lé, ké zi mí tá bâa a mɛ̌, rá̧ mâa a mɛ̌, tá wûny mɛ̌ rá̧ gun a mɛ̌ri̧, ké zi mi tá nyîn nɛ́rí̧, a ké zi mi tá hay mûn nɛ́. Tí nǎŋ nyá lé, ké zi ma kaw ɓá gunbɔʼɔ ní nyá. 27A njuku, mí zi hol dii vbatay a mɛ̌ ka mûn nɛ́, a mí zi tɔ́ŋ mí nyáy, zi ma kaw ɓá gunbɔʼɔ ní nyá. 28Njuku a sí̧ a bazeŋ a wǎyri, ka zi ɓay a mbó gáŋ vûn, a zi kaw, a kɛrɛ hɛ̧ a ké e zénáké rá̧ lari a ké erú, a kó lariké ma mbó vûnké, malé tí maná nyá léy? 29Ɓay ké zi ná mbó ɓá ndal vûnké, a zi tí ka lari ka ma ɔrɔ mbó gáŋ vûnké yá, dáy njukuri too ka e kónáké, kú zi ná sáʼa nɛ́, 30a sa ɓá: “Í kó, njuku nɛ́ tí mbó vûn, a zi ɔrɔ vûnké yá!” 31Malé mbây pû a sí̧, ka zi ɓay a sé rúbére kuu mbây pû a féké, tí kaw a kɛrɛ ɓá, ka ŋgawbére a mɛ̌ri̧ kumrá̧ké bôo, ma sé rúbére kuu mbây pû a féké, ka e gí rúbére kuu mɛ̌ ka ŋgawbéreri kumrá̧ké bôo a sére lé? 32Ké mí kó zi manyáy, ké tí pé njuku nzáʼapéna ɓá gánáké sé ziŋ mbây pû a ǎ̧w, ka e a ŋgboro ɓá ɗínáké ɓáy, ɓay a ŋgú há̧ra̧ hí̧ nɛ́, a ké tɔ́ʼɔ hɛ̧ volawɛ́, a kú láhá̧narí̧ yá lé. 33Nǎŋ dáy, njuku a sí̧ lé too a bazeŋ a wǎyri, mí zi pɔŋ hɛ̧zíŋa a mɛ̌ri̧ too yáy, zi ma kaw ɓá gunbɔʼɔ ní nyá.»

Tom ka nɛ́rɛ̧́ké tí yáy

(Mat 5:13; Mrk 9:50)

34«Tom ɓá béla hɛ̧, dáy núŋáké mí tɛ̧́ dáy, A̧hí̧ kú e niŋáké rú ɓáy, a ké renúŋ lé? 35Ké zi tí ka nɛ́rɛ̧ ɓay a tísiri malé ɓay tom hɛ̧pay mbaa, ɓá kú fere nɛ́ kɔ̧ kpâa. Í lá, a njuku mí erú a súkú lánáké lé, ké lá!»

Currently Selected:

Luk 14: pnz

Highlight

Copy