Zâŋ 21

Zezú tɔ́ʼɔ mûn hí̧ gunbɛʼɛri zíndɔ̂ʼɔsáy ka gbaŋ fâ̧w a Tiberiyád

1A falké nɔ́, Zezú tɔ́ʼɔ mûn nɛ́ ɓáy hí̧ gunbɛʼɛri a gbaŋ fâ̧w a Tiberiyád#21:1 Fâ̧w a Tiberiyád, ɓá fâ̧w a mbêwké a kú ɗí ɓá fâ̧w a Galilêy.. Í kó báŋké ka Zezú tɔ́ʼɔ mûn nɛ́ hí̧ kuriri. 2Simɔŋ Píyɛ́r rá̧ Toma a kú ɗí nɛ́ ɓá horó, rá̧ Natanayɛl a Kanaa a tísiri a Galilê, gun a Zebedéri rá̧ gunbɔʼɔ a fékéri sére, kú e mbêw. 3Dáy Simɔŋ Píyɛ́r sa hí̧ kuriri: «Mí sé ŋgbá nzwîy.» Dáy kú sa hí̧ nɛ́: «Rú e sé kuu mɔ̌.» Kú tɛ̧́ a kála sé he kumbôn, dáy sû̧ŋké nɔ́ kú zi ŋgbá nzwîy mbêw yá. 4A gel kaw táŋay, Zezú ew ka gbaŋ fâ̧w, dáy gunbɛʼɛri zi tu ɓá Zezú pɔ̧́nɔ́ nyá. 5Zezú sa hí̧ kuriri: «Gun a mǐri̧, i zi ŋgbá nzwîy yá lé?» Kú sa: «Háy!» 6Zezú sa hí̧ kuriri: «Í vbú rii sé ŋgboro a lâʼa a kumbôn dalé i e ziŋ nzwîy.» Kú vbú rii, a ŋgbá nzwîy ɓá ŋgɛ̧́náké dáy, kɔʼɔké tɛ̧́ kála ndé kuriri. 7A goló, gunbɔʼɔ a ǎ̧w ka Zezú zi nɛ́ mambáy sa hí̧ Píyɛ́r: «Gáŋmbây pɛ̧́nɛ́!» Gelka Simɔŋ Píyɛ́r lá ɓá: «Gáŋmbây pɛ̧́nɛ́», ké mbí laa a sâa a mɛ̌, a ri, ɓayhí̧lé mûn nɛ́ ná ɓǎŋ, dáy a zɔ vbú mbii. 8Gunbɛʼɛ a fékéri regí a kumbôn, a kɔʼɔ rii nzwîy mbá ɓilké. Kú zi ɗí ka helkála mbii yá, ɗínáké zaa ké niŋ bɔʼɔséna ísɔ́t mbêw. 9Gelka, kú ɗere kɔ̧ tísiri, kú kó hɛʼɛrɛ hɔrɛ ka nzwîy rá̧ biré kɔ̧ tûlké. 10Zezú sa hí̧ kuriri: «Í ɓá nzwîy ka i ŋgbá kpay gírú.» 11Dáy Simɔŋ Píyɛ́r he ɓil kumbôn, a kɔʼɔ rii ka nzwîy ísɔ́t mbêw ka bondíɓí a sáy ɓá hɔ̧́náké kɔ̧ tísiri. Ka nzwîyri mbá ɓil riiké nɔ́y too, riiké zi gɔ́rɔ́ yá. 12Zezú sa hí̧ gunbɛʼɛri: «I gí sɔ̧́lâʼa.» Dáy njuku a há̧na mbêw a bazeŋ a kuriri zi vbí nɛ́ ɓay ɓá: «Mɔ ɓá gé lé yá?» Ɓayhí̧lé kú tu ɓá a béláké ɓá Gáŋmbây pɔ̧́nɔ́. 13Dáy Zezú ta̧m gí mbí biré a hí̧ gunbɛʼɛri, a mbí nzwîy a wal hí̧ kuriri kɔ́. 14Ɓá tɔ́ʼɔ mûn a bɔʼɔ sáyké pɔ̧́nɔ́, ka Zezú tɔ́ʼɔ mûn nɛ́ hí̧ gunbɛʼɛri, ka fal toma a mɛ̌ ka hûl.

Zezú vbí Píyɛ́r ɓay

15A fal sɔ̧́lâʼa, Zezú vbí Simɔŋ Píyɛ́r: «Simɔŋ gun a Zâŋ, mɔ zi mí tá njuku nɛ́rí̧ too lé?» Píyɛ́r fere a sa: «Katína Gáŋmbây, mɔ tu ɓá mí zi mɔ́.» Zezú sa hí̧ nɛ́: «Mɔ́ koro gun mbólé a mǐri̧#21:15 Gelka Zezú sa ɓá Píyɛ́r ké koro gun mbólé a mɛ̌ri̧, zi ɓay a sa ɓá Píyɛ́r ké koro njukuri ka e láɓulaw hí̧ nɛ́y..» 16Zezú vbí nɛ́ a bɔʼɔ sére ɓáy: «Simɔŋ gun a Zâŋ, mɔ zi mí lé?» Píyɛ́r fere a sa: «Katína, Gáŋmbây, mɔ tu ɓá mi zi mɔ́» Zezú sa hí̧ nɛ́: «Mɔ́ koro mbólé a mǐri̧.» 17A bɔʼɔ sáyké, Zezú sa: «Simɔŋ gun a Zâŋ, mɔ zi mí lé?» Law a Píyɛ́r yírí, ɓayhí̧lé Zezú vbí nɛ́ ɓay bɔʼɔké sáy ɓá: «Mɔ zi mí lé?» Dáy a ké sa hí̧ Zezú: «Gáŋmbây, mɔ tu hɛ̧ too, dáy mɔ tu ɓá a béláké ɓá mi zi mɔ́.» Zezú sa hí̧ nɛ́ ɓáy: «Mɔ́ koro mbólé a mǐri̧. 18Katína mi sa gbátɓay hí̧ mɔ́: Gelka mɔ pa̧n ɓá kaban njuku ɓáy, mɔ ŋgá̧ hɔ́ʼɔ tûl gárí a mɔ̌ ka mûn nɔ́, a sé gelka mɔ ziy. Dáy mɔ kpɔʼɔrɔ dá lé, mɔ e gbaŋ ndɔ̂ʼɔ rá njuku a féké e ŋgá̧ hɔ́ʼɔ tûl gárí a mɔ̌, dalé, ké e ɓá mɔ́ sé gelka mɔ zi yáy.» 19(Zezú saɓay nɔ́rí̧ nǎŋ, ɓay tɔ́ʼɔ a̧ní Píyɛ́r e ziŋ hûl ɓay a hí̧ hɔ̧́na hí̧ Gáŋvbôn.) Falké Zezú sa hí̧ Píyɛ́r: «Mɔ́ tɔ́ŋ mí!»

Zezú saɓay ka kó Zâŋ

20Píyɛ́r kí nûn nɛ́ dáy, a kó gunbɔʼɔ a ǎ̧w ka Zezú zi nɛ́ mambáy ka fal a kuriri, ɓá mɛ̌ nɔ́ a kú kaw sɔ̧́lâʼa, a ké yɛrɛ sé gel a Zezú, ka a vbí nɛ́ ɓá: «Gáŋmbây, a gé ɓá njuku ka e zé mɔ́ lé?» 21Píyɛ́r kó nɛ́ dáy a vbí Zezú: «Gáŋmbây, ka mɛ̌, a̧hí̧ e ziŋ nɛ́ lé?» 22Zezú fere a sa: «Mǐ, mi zi ɓá ké kaw ka ndísɛ̌ʼɛ ka̧ réna a mǐ, a̧hí̧ kó mɔ́ a ɓilké lé? Mɔ̌, mɔ́ tɔ́ŋ mí!» 23Nǎŋnɔ́ ɓayké ma gelri too a bazeŋ a njukuri ɓá gunbɔʼɔké nɔ́ tí hûl yá. A tu ɓá Zezú zi sa hí̧ Píyɛ́r ɓá: «Ké tí hûl yá yá.» Ké sa ɓá: «Mǐ, mí zi ɓá ké kaw ka ndísɛ̌ʼɛ ka̧ réna a mǐ, a̧hí̧ kó mɔ́ a ɓilké lé?» 24Ɓá mɛ̌ gunbɔʼɔké nɔ́, pé ɓá njuku ka kó, ka tu hɛ̧ kéri too, ka a ɗé Mbété nɛ́. Nǎŋnɔ́ ná tu ɓá ɓayri a ké sáy ɓá gbátɓay.

25Zezú niŋ hɛ̧ a fékéri ɓá a ŋgɛ̧́náké ɓáy. Ɓá njuku ké ɗé hɛ̧kéri mbêw mbêw too lé, a kɛrɛ a mǐ, tísiri nɛ́ too, zi ma hol Mbétékéri a kú e ɗénáké yá.

Currently Selected:

Zâŋ 21: pnz

Highlight

Copy