Zâŋ 20

Lɔ̂ʼɔpâl ná baa

(Mat 28:1-8; Mrk 16:1-8; Luk 24:1-12)

1Típélé zaa a gel ná ŋgbem ɓáy, ka ɓá Dímasi#20:1 Zi ɓay a sa ɓá: «Nâm ɔʼɔ» a gel a pélé. , Marí a Makdala uru a sé tûlpâl. Ké gé kó ɓá gáŋ saw a kú ɓá ndi nzáʼa lɔ̂ʼɔpâl, lú gefal. 2Dáy, ké ré ka ŋgúna, sé ziŋ Simɔŋ Píyɛ́r rá̧ gunbɔʼɔ a ǎ̧w ka Zezú zi nɛ́ mambáy, a sa hí̧ kuriri: «Kú mbí hûl a Gáŋmbây ka lɔ̂ʼɔpâl, dáy rú zi tu gel a kú ɓá nɛ́ serúy yá!» 3Píyɛ́r rá̧ gunbɔʼɔ a mbêw ráy uru a sé tûlpâl. 4Kú sé sére too ka ŋgúna, dáy gunbɔʼɔ a mbêwké nɔ́ ŋgú ga tá Píyɛ́r, a tí gé ka̧ tûlpâl ɗambɛl hí̧ nɛ́. 5Ké pɔ a ɛ̧rɛ̧ ɓil lɔ̂ʼɔpâl, a kó ɓá laari ka kɔ̧ tísiri, dáy a zi ri ɓilké yá. 6Simɔŋ Píyɛ́r ka̧ tɔ́ŋ nɛ́, tá a gé ri ɓil lɔ̂ʼɔpâl, a gé kó ɓá laari a kú ku Zezú rúy ka kɔ̧ tísiri, 7ké kó laa ku tûl a Zezú kɔ́, laaké mára̧ kɔ̧ ɓórí a gel a féké, zi kɔ̧ mbêw kuu laa a ǎ̧wrí̧ nyá. 8Dáy gunbɔʼɔ a mbêwké nɔ́, ka tí ka̧ tûlpâl ɗambɛl, ri sé ɓilké mɛ̌ kɔ́, a gé kó, a zibɔʼɔké. 9Ɓayhí̧lé, ka̧ sêeké nɔ́, gunbɛʼɛri zi lá ɓil ɓay ka ɗé ka̧n ɓil Mbété a Gáŋvbôn ɓá Zezú e uru ka hûl yá ɓáy. 10Falké, kú rekála sére too, sé gel a kuriri.

Zezú tɔ́ʼɔ mûn nɛ́ hí̧ Marí a Makdala

(Mat 28:9-10; Mrk 16:9-11)

11Marí ew kála, a gbaŋ lɔ̂ʼɔpâl dɛ́ŋ, a kaw vúna. Ka ké kaw vúna, ké pɔ ɓay ɛ̧rɛ̧ ɓil lɔ̂ʼɔpâl; 12lé ké kó aŋnze sére ri laa a Pukí, kaw gel a kú ɓá hûl a Zezú ka̧nrú̧y, mbêw a ŋgboro a tûl rá̧ mbêw a ŋgboro a bɔʼɔ. 13Aŋnzekéri vbí Marí: «Ɓayhí̧rá̧ mɔ vú lé?» Ké fere a sa hí̧ kuriri: «Kú lú Gáŋmbây a mǐ, dáy mi zi tu gel a kú ɓá nɛ́ ka̧nrú̧ nyá.» 14A fal saɓay nɔ́, ké kí a kó Zezú ka ew, dáy a zi tu ɓá mɛ̌ nyá. 15Zezú vbí nɛ́: «wûny, ɓayhí̧ mɔ vú lé? Gé mɔ́ ɛ́ lé?» Marí kɛrɛ ɓá njuku koro ndûu, dáy a sa hí̧ nɛ́ ɓá: «Gáŋnjuku, mí ɓá mɔ̌, pé mbí hûl a Zezú lé, mɔ́ tɔ́ʼɔ mí gel ka mɔ ɓá nɛ́ ka̧nrú̧y, a mí sé mbí nɛ́.» 16Dáy Zezú ɗí nɛ́: «Marí!» Ké kí a sa hí̧ nɛ́ ka nzáʼa Hebiré: «Rabúni» (Zi ɓay a sa ɓá: «Njuku tɔ́ʼɔhɛ̧!») 17Zezú sa hí̧ nɛ́: «Mɔ́ ŋgbá mí nyá, ɓayhí̧lé mi zi he sé gel a Bâa a mǐ nyá ɓáy. Dáy, mɔ́ sé ziŋ nyîn nírí̧, a mɔ́ sa hí̧ kuriri ɓá mi e he sé gel a bâa a mǐ, ka ɓá Bâa a wǎyri kɔ́y. Mi e he sé gel a Gáŋvbôn a mǐ, ka ɓá Gáŋvbôn a wǎyri kɔ́y.» 18A goló, Marí a Makdala, sé sa hí̧ gunbɛʼɛri ɓá: «Mi kó Gáŋmbây!» Dáy, a sa hí̧ kuriri hɛ̧ ka Zezú sa hí̧ nɛ́y.

Zezú tɔ́ʼɔ mûn nɛ́ hí̧ gunbɛʼɛri

(Mat 28:16-20; Mrk 16:14-18; Luk 24:36-49)

19Sêeké nɔ́, a gel a bɔʼɔlêw, gunbɛʼɛri mára̧ kaw ɓil vûn a há̧na. Kú dara nzáʼaŋgboro ka kílé, ɓayhí̧lé kú ŋgú wɔ́w a mbây a Juyífri. Zezú gí tɛ̧́ a bazeŋ a kuriri, a sa hí̧ kuriri: «A vónáké ké kaw kuu wǎyri!» 20Fal saɓay nɔ́, ké tɔ́ʼɔ kuriri ndɔ̂ʼɛ rá̧ kazere nɛ́. Gelka gunbɛʼɛri kó Gáŋmbây, kú mbá a lawrína. 21Zezú resa hí̧ kuriri ɓáy: «A vónáké ké kaw kuu wǎyri! Ɓá báŋké ka Bâa a mǐ pé mí, mǐ kɔ́ mi pé wǎyri.» 22A fal ɓay nɔ́rí̧, Zezú ul kúna kɔ̧ tûl a kuriri, a sa hí̧ kuriri: «Í nyá Têm Pukí! 23Njukuri ka i vbá̧buma ɓéké a kuriri, Gáŋvbôn e vbá̧buma hí̧ kuriri, a njukuri ka i zi vbá̧buma ɓéké a kuriri nyáy, Gáŋvbôn tí vbá̧buma hí̧ kuriri yá.»

Zezú tɔ́ʼɔ mûn nɛ́ hí̧ Toma

24Toma a kú ɗí ɓá horó, ka ɓá mbêw a bazeŋ a gunbɛʼɛri, zi tí kuu kuriri, a sêeké nɔ́ ka Zezú gí tɔ́ʼɔ mûn nɛ́ hí̧ gunbɛʼɛri a ɓil vûn nyá. 25Gárá gunbɛʼɛri sa hí̧ Toma: «Rú kó Gáŋmbây!» Dáy Toma sa hí̧ kuriri: Mǐ, mi zi kó pélé nɔʼɔ pɔ́nde a ɓil ndɔ̂ʼɛ, a mí zi ɗá ka ndɔ̂ʼɔ ní nyá, a mi zi ɓá ndɔ̂ʼɔ ní ɗa pélé nɔʼɔ a kazere nɛ́ nyáy, mi zi ma láɓulaw rú yá. 26Nâm zíndɔ̂ʼɔsére a falké, gunbɛʼɛri mára̧ há̧narí̧ ɓáy kaw ɓil vûn, Toma e kuu kuriri kɔ́. Kú dara nzáʼaŋgboro ka̧nrú̧ ka kílé. Zezú tɛ̧́ a gí ew a bazeŋ a kuriri, a sa hí̧ kuriri: «A vónáké ké kaw kuu wǎyri!» 27Falké, ké sa hí̧ Toma: «Mɔ́ ɓá ndɔ̂ʼɔ ɗá gelé, a mɔ́ ɛ̧rɛ̧ ndɔ̂ʼɔ ní, mɔ́ ndara ndɔ̂ʼɔ a mɔ́ ɗá kazere ní. A mɔ́ pɔŋ manyɓay, a mɔ́ láɓulaw!» 28Toma fere a sa: «Gáŋmbây a mǐ rá̧ Gáŋvbôn a mǐ!» 29Zezú sa hí̧ nɛ́: «Mɔ́ láɓulaw ɓay hɛ̧ ka mɔ kó mí. Béla erú hí̧ njukuri ka zi kó mí nyá, ka a láɓulaw hí̧ mí!»

Nɛ́rɛ̧ a mbété nɛ́

30Zezú niŋ hɛ̧sáʼama a fékéri ɓáy ɓá ŋgɛ̧́náké ka nûn a gunbɛʼɛri, a kú zi ɗé ka̧n ɓil mbété nɛ́ nyáy. 31Dáy hɛ̧ nɔ́rí̧ ziŋ ɗéna rá̧lǒo í láɓulaw ɓá Zezú kaw ɓá Kiris, Gun a Gáŋvbôn, rá̧ a ɓil láɓulaw hí̧ nɛ́y, i ziŋ káwa a ndísɛ̌ʼɛ, ka ŋgboro a rɛŋɛ́.

Currently Selected:

Zâŋ 20: pnz

Highlight

Copy