Péna a Apotereri 28

Hɛ̧ ka tá ka tûlkɔ̂ɔ a Malte

1Gelka rú pɛ̧́ dáy, rú lá ɓá tûlkɔ̂ɔké nɔ́ rɛŋké ɓá Malte. 2Njukuri ka ná tûlkɔ̂ɔké, gé nyá ɓurú ɓá béláké: Ka mbɔ̂m kaw tɔ́náy, gelvo mambá, dáy kú ndéré gáŋ hɔrɛ a ɓá rú kaw gbaŋké. 3Pôl sé fá̧ râw diiri, ɓay a gí ɓá kɔ̧ hɔrɛ. Dáy, mbérú e a ɓilké, hɔrɛ gé sáŋ nɛ́, ké tɛ̧́ a núŋ ndɔ̂ʼɔ Pôl a haʼa ɔ rú. 4Gelka, njuku pûkéri kó sôy ka haʼa ɔ ndɔ̂ʼɔ a Pôl, kú sa a bazeŋ a kuriri ɓá: «Njuku nɛ́ gbátké lé, ɓá njuku í hûl. Ɓayhí̧lé, a ké ziŋ pɛ̧́na a ɓil mbii nɛ́ too, walɓay a ndáráké a Gáŋvbôn, zi pɔŋ nɛ́ ɓay a ké kaw kála yá 5Dáy, Pôl mí mbérú ráy to vbú hɔrɛ, hɛ̧ há̧na zi niŋ nɛ́ nyá. 6Njuku a fékéri kɛrɛ ɓá mûn a Pôl e mbara malé ké e lé a núnmbɛ̧́nɛ́ nɔ́ a hú. Dáy, fal a kú zoko ɗiɓaŋ, kú kó ɓá, hɛ̧ a há̧na ka niŋ nɛ́ mbêw zi tí yá. Kú fere ɓay a goló a sa, njuku nɛ́ kaw ɓá vbôn a há̧na!»

7A gbaŋké nɔ́ ɗí yá, gel a gáŋnjuku a tûlkɔ̂ɔ nɔ́ erú, rɛŋɛ́ ɓá Pubiliyús. Ké gé nyá ɓurú ɓá béláké ná ɓil vûn a mɛ̌, nâm sáy. 8Bâa a Pubiliyús, záŋmá pélé rá̧ zɔʼɔ sêm, ŋgbá nɛ́, ké ná tûl gasáʼa. Pôl sé kó nɛ́, a gɔ́ŋ Gáŋvbôn, a ɓá ndɔ̂ʼɛ kɔ̧ tûlé, dáy ké ziŋ ŋgɛ́rɛ. 9Falké, njuku záŋmári̧ ka tûlkɔ̂ɔké nɔ́, gí gel a Pôl, dáy Pôl gí ŋgɛ́rɛ kuriri. 10Ɓaykénɔ́, njukuri ɓá ŋgɛ̧́náké hɛʼɛ rú, a nâm ka rú zi ɓay a kálay, kú gí hí̧ rú hɛ̧ri̧ ɓá ŋgɛ̧́náké ka rú ziy.

Pôl ka̧ Rɔm

11Fal fêw sáy a goló, rú uru a he batô a gí ka Alekzaŋndiri, a kú ɗí ɓá «Diyoskir.» Batôké, fêw gelvóna ziŋ nɛ́ a gel ewá a batô a tûlkɔ̂ɔ a há̧na a golóy. 12Rú kála a gé ka̧ Sirakize, a gé kaw goló nâm sáy. 13A goló, rú uru, a fɔ́ŋ lá gbaŋ kuŋna a gé ka̧ Regíyo. Típélé a féké, kúna uru ka ŋgboro a zabaw a kú gí, nǎŋnɔ́ rú niŋ nâm sére yáŋ pé a ka̧ Puzol. 14A ɓil pû puzɔl a goló, rú gé ziŋ gun láɓulawri. Dáy, kú vú hí̧ rú, ɓá rú ná kuu kuriri nâm zíndɔ̂ʼɔsáy. Nǎŋnɔ́, pé rú sé ka̧ Rɔm. 15Gun láɓulaw a Rɔmri̧, láɓay a ɓurú, a uru gí ziŋ rú a ŋgboro, a gel ku̧ma hɛ̧ a Apiyús, rá̧ gel Vûn Nyá gɔ́rɔ́ri sáy. Gelka Pôl gé kó kuriri, ké zi awá hí̧ Gáŋvbôn, mûn nɛ́ gí kpú a goló. 16Fal ka rú gé ka̧ Rɔm dáy, kú pɔŋ ŋgboro hí̧ Pôl ɓá ké ná ɓórí, kuu ŋgawbére mbêw, ɓay a koro nɛ́.

Pôl tɔ́ʼɔɓay a Rɔm

17Falké nâm sáy, Pôl ɗí gáŋnjuku a Juyífri ka e ka Rɔm gí gé lé. Gelka kú mára̧ gí dáy, Pôl gí sa hí̧ kuriri: «Nyîn nírí̧, mi zi niŋ ɓékéhɛ̧ a há̧na ziŋ njuku a manárí̧, malé ziŋ sáŋna a zîi a manárí̧ nyá. Dáy, njukuri ŋgbá mi a Zerúzalɛ̂m, pé a ɓá mi hí̧ Rɔmɛri̧. 18Falké a kú gí lá mí, kú zi ɓay a kú pɔŋ mí kála, ɓayhí̧lé kú zi ziŋ ɓékéhɛ̧ a há̧na, ka mi niŋ, ka ma hûl nyá. 19Dáy, gáŋnjuku a Juyífri ka Zerúzalɛ̂m zi zibɔʼɔké yá. Nǎŋnɔ́, ŋgboro a féké zi tí hí̧ mí nyá, pé mi sa ɓá, kú ɓá ɓay a mǐ, gí gel a mbây a lúkí Sezar. Mi zi tí ka kɛrɛ deɓay ka̧n tûl a wǎyri, njuku a mǐri̧ nyá. 20Ɓaykénɔ́, pé mi vbí ɓay a mí kó wǎyri, rá̧ a mí saɓayké hí̧ wǎyri. Dáy a ŋgɛŋnɛ́, mi e ka vûn sɛl, ɓay tûl a njuku ka gun Izirayɛ́lri, ɓá kɛrɛ a kuriri ka̧n tûlé.» 21Dáy, gáŋnjuku a Juyífri rerú hí̧ nɛ́ ɓá: «Rú zi ziŋ mbété a há̧na ka gí ka ŋgboro a Judé, malé, nyîn a ɓurú a há̧na mbêw, ka gí laŋ ɓay a mɔ̌ malé, ɓew ɓay a mɔ̌ hí̧ rú, zi tí yá. 22Dáy rú zi ɓá, rú lá a nzáʼa hɛ̧ ka mɔ kɛrɛ mɔ̌ ka mûn nɔ́, ɓay a sa hí̧ rú. Ɓayhí̧lé rú tu ɓá táŋáké, lá gélri too, njukuri ɓá ŋgɛ̧́náké, zi zibɔʼɔ mára̧ nɔ́ ka mɔ e a ɓilké yá.»

23Gáŋnjuku a Juyífri gí ŋgbá nâm a kú e regí ziŋ Pôl. Gelka nâmké gí ká̧y, kú gí ɓá ŋgɛ̧́náké gí ziŋ Pôl, a gel a ké nárú̧y. Tí a típélé sé ka̧ bɔʼɔlêw, Pôl kaw ten táŋa ɓayri: Ké tɔ́ʼɔ hí̧ kuriri ɓay ka kó Pû a Gáŋvbôn, a ɛ́ ŋgboro ɓá kuriri láɓulaw hí̧ Zezú, a tí kɛ̧́ a ɓil mbété a sáŋna a Mɔyíze rá̧ mbété a porofɛ́tri. 24Njuku a há̧narí̧ lá, a nyá ɓayké, dáy njuku a fékéri zi nyá ɓayké yá. 25Gelka kú uru ɓay a kála táŋ láhá̧narí̧ a bazeŋ a kuriri, Pôl sa hí̧ kuriri ɓá: «Têm Pukí sa gbátɓay, gelka ké sa hí̧ zîi a wǎyri ka ŋgboro a nzáʼa porofɛ́t Ezayí! 26Ké sa ɓá:

“Mɔ sé sa hí̧ njuku nɛ́rí̧:

I e láɓay ɓá béláké, dáy i tí lá ɓilké yá,

i e ɛ̧rɛ̧ gel ɓá béláké, dáy, a tí kó gel ɓá béláké yá.

27Ɓayhí̧lé law a njuku nɛ́rí̧ kpú mambá.

Kú tu súkú a kuriri,

a tu nûn a kuriri,

rá̧ kú de nûn a kuriri kó gel,

a kú ná láɓay ka súkú a kuriri,

rá̧ law a kuriri ké zi ná ŋgburu, a kú tuhɛ̧,

nǎŋnɔ́, kú tí regí gel ní rá̧ mí e ŋgɛ́rɛ kuriri yá, nǎŋnɔ́ pé Gáŋvbôn sa.#28:27 Ezayí 6: 9-10”

28Pôl resa ɓáy: I lá ɓá táŋáké, Gáŋvbôn pé nzáʼapéna ɓay a pɛ̧́ njukuri ka zi tí ɓá Juyífri yáy. Dáy, a kuriri, kú e láɓayké!»

[29A ké kaw saɓay nɔ́, kú kála ka manyɓay a ŋgɛ́rɛ a bazeŋ a kuriri.]

30Pôl, ná ɓil vûn nɔ́ a ké pú ka lari mbimbɔ̂m sére. Ké nyá njukuri too, ka gí kó nɛ́y. 31Ké tɔ́ʼɔɓay a Pû a Gáŋvbôn, ka tɔ́ʼɔɓay ka kó Gáŋmbây Zezú Kiris, táŋ wɔ́w a law mbêw.

Currently Selected:

Péna a Apotereri 28: pnz

Highlight

Copy