Péna a Apotereri 11

Píyɛ́r gí rerú ka fal péna a mɛ̌ a Zerúzalɛ̂m

1Apotereri rá̧ njuku láɓulawri ka e ka Judé lá ɓá, njukuri ka zi tí ɓá Juyífri yáy, nyá ɓay a Gáŋvbôn kɔ́. 2Gelka Píyɛ́r regí Zerúzalɛ̂m, gun láɓulawri ka ɓá Juyífri#11:2 Njuku nɔ́rí̧ kɛrɛ ɓá, njukuri too ka zi ɓá Juyífri yáy ka a láɓulaw hí̧ Zezúy, kú ndá ganzá., gí deɓay ka̧n nzáʼa Píyɛ́r. 3Dáy, a sa: «Mɔ sé ri vûn a njukuri ka zi ndá ganzá yáy, a sɔ̧́lâʼa mbêw kuu kuriri!» 4Dáy Píyɛ́r, tí sa hí̧ kuriri hɛ̧ri̧ too ka tá, ka ŋgboroké, tí ka tí taʼaké, a sa hí̧ kuriri ɓá: 5«Mi e a ɓil pû Zopé, a kaw gɔ́ŋ Gáŋvbôn. Dáy, mi kó hɛ̧ a há̧na a ɓil lɔ́la, ɗere a nûnalê gí ɓá gél ní, a ɛ́ŋ ɓá gáŋ hîi, a kú ŋgá̧nzáʼaké nɛŋ too, a gí ka̧ mbɛl ní. 6Dáy, mi ɛ̧rɛ̧ ɓil hîiké ɓá táŋáké, a kó hɛ̧ ka erú ɓá, hɛ̧hɔ́lari, nâny a kpâari, sâ̧ny kóró a tûl ɓilri rá̧ ndoyri. 7Mi láɓay, ka njuku sa ɓá: “Píyɛ́r, mɔ́ uru, a mɔ́ í, a sɔ̧́!” » 8Mi zi nzɛ́ʼɛ a sa: «Mi zi yá Gáŋmbây! Mi zi sɔ̧́hɛ̧ a kú de malé hɛ̧ a belyáké bɔʼɔ mbêw yá.» 9Mi relá ɓáy a bɔʼɔ séreké ɓá: «Hɛ̧ ka Gáŋvbôn kó ɓá hɛ̧ a táŋáké, mɔ́ zi ná kó ɓá hɛ̧ a belyáké! 10Hɛ̧ké niŋ nǎŋnɔ́ bɔʼɔké sáy, falké lé, hɛ̧ké rehe sé nûnalê. 11Núnmbɛ̧́nɛ́ nɔ́, njukuri sáy gí ka̧ nzáʼa vûn ka mi nárú̧y. Kú pé kuriri gí a Sezaré, gí ɗí mí. 12Têm Pukí tí sa hí̧ mí, ɓá mí sé kuu kuriri, a mí zi ná many, dáy nyîn nírí̧ zêe, ka gí kuu mǐ nɛ́y, ɗa mí sé Sezaré. Rú gé ka̧ Sezaré, a gé ri ɓil vûn a Kɔrney too. 13Kɔrney, gé sa hí̧ rú báŋké a ké kó aŋnze a Gáŋvbôn, a ɓil vûn a mɛ̌, ka sa hí̧ nɛ́ ɓá: Mɔ́ pé njukuri sé Zopé, sé ɗí Símɔŋ Píyɛ́r. 14Ké e gí sa hí̧ mɔ́, ɓay ka e pɛ̧́ mɔ́, mɔ̌ rá̧ î̧n a mɔ̌ri̧ too. 15Gelka, mi tí saɓay, Têm Pukí ɗere kɔ̧ tûl a kuriri, ɓá báŋké a ké ɗere kɔ̧ tûl a manárí̧ kɔ́, ka títáʼaké. 16Nǎŋnɔ́, mi kɛrɛ ɓay ka Gáŋmbây sáy: “Zâŋ ɓá njukuri nyá batêm a mbii, dáy a wǎyri, i ziŋ nyá batêm a Têm Pukí.” 17Nǎŋnɔ́, Gáŋvbôn hí̧ kuriri hɛ̧hí̧na a mbêwké ɓá báŋké ka ná ziŋ ka sêe ka ná láɓulaw hí̧ Gáŋmbây Zezú Kiris. Dáy a mǐ, mi ɓá gé rá, a many Gáŋvbôn lé?» 18Fal láɓay nɔ́, kú kaw yím, a reɗel Gáŋvbôn, a sa: «Katína, Gáŋvbôn hí̧ njukuri ka zi tí ɓá Juyífri yáy, ŋgboro fere kaw a kuriri, ɓay a ziŋ gbát káwa a ndísɛ̌ʼɛ.»

Njukuri nyá ɓay a Gáŋmbây ka Aŋtiyós

19Tɔ́ʼɔsêe ka ka̧ a ɓil nâm a kú í Etíyɛ́n, niŋ njukuri ka láɓulaw ɓɛrɛ mbêw mbêw too. Njuku a há̧narí̧ ŋgú sé ka̧ Fenisí, Sípɛrɛ rá̧ Aŋtiyós, dáy kú tɔ́ʼɔ Bélaɓay a Gáŋmbây hí̧ ɓá Juyífri. 20Njuku láɓulaw a há̧narí̧ ka ɓá njuku a tísiri a Sípɛ́rɛ rá̧ Sirɛn, uru a sé Aŋtiyós, ka sé tɔ́ʼɔ Bélaɓay a Gáŋmbây Zezú hí̧ Juyífri, rá̧ njukuri ka zi tí ɓá Juyífri yáy kɔ́. 21Kpɔ́ŋa a Gáŋmbây e kuu kuriri, ɓayhí̧lé njukuri ɓá ŋgɛ̧́náké láɓulaw, a fere law a kuriri hí̧ Gáŋmbây Zezú. 22Ɓaykénɔ́, gelka mára̧ a gun láɓulaw a Zerúzalɛ̂mri̧ láɓayké, kú pé Barnabas sé Aŋtiyós. 23Barnabas gé ka̧ Aŋtiyós, a gé kó béla ka Gáŋvbôn tɔ́ʼɔ hí̧ gun láɓulawri. Ké ri mûn nɛ́, a hí̧ kuriri nzáʼa nzɛ́rɛ ɓá, kú kaw law mbêw kuu Gáŋmbây. 24Barnabas kaw ɓá béla njuku, ké mbá ka Têm Pukí rá̧ láɓulaw. Nǎŋnɔ́ njukuri ɓá ŋgɛ̧́náké ziŋ láɓulaw hí̧ Gáŋmbây Zezú Kiris.

25Barnabas retá sé Társe, ɓay a sé ɛ́ Sôl. 26Gelka, ké gé ziŋ Sôl, ké ɗa nɛ́ gí Aŋtiyós. Kú gí niŋ mbimbɔ̂m mbêw kuu Egilize a Aŋtiyós. Kú tɔ́ʼɔɓay a Gáŋvbôn hí̧ njukuri ɓá ŋgɛ̧́náké. Ɓá ka Aŋtiyós, pé ɗambɛlké kú tí ɗí gun láɓulawri ɓá Kɛrɛtiyɛn#11:26 Kɛrɛtiyɛn, zi ɓay a sa ka nzáʼa Girɛ́k ɓá: «Njuku a Kirisri». 27A ɓil nâmké nɔ́, porofɛ́t a há̧narí̧ uru ka Zerúzalɛ̂m gí Aŋtiyós. 28Dáy, njuku mbêw a bazeŋ a kuriri, rɛŋɛ́ ɓá Agabús, uru a sa ka ŋgboro a Têm Pukí ɓá, nâm tɛ̧́w lé, nzala e ŋgbá tísiri too. (Hɛ̧ké niŋ a ɓil nâm ka Kolode, kaw ɓá mbây lúkí a tísiri a Rɔm.) 29Nǎŋnɔ́ gun láɓulawri too ŋgá̧nzáʼa ɓá kú e hí̧ndɔ̂ʼɔ, njuku mbêw mbêw too, ké hí̧ ma ŋgɛ́rɛ a mɛ̌, ɓay kú pé hí̧ gun láɓulawri ka e ka tísiri a Judé. 30Dáy kú mára̧ hɛ̧ké, a pé hí̧ Barnabas rá̧ Sôl, ɓá kú sé ɓá hí̧ gáŋnjuku péna a Egilizeri ka Judé.

Currently Selected:

Péna a Apotereri 11: pnz

Highlight

Copy