Mak 16

Yeso si zəmə iwu

(Mat 28.1-8; Luk 24.1-12; Jon 20.1-10)

1Amaʼazənə aney ku ba Jû si chigə, Mari Magdalen, Mari ingwo mbi Jems foro Salome zon ungəd nyoʼoro nyoʼoro chuŋ iŋu zoʼ awu Yeso awu. 2Ama afəfəb aney sonde, umugə nyama chugi mə toʼo mbə ŋu awu atəw isey 3mbə́ mə́ yeŋ yə ghayn uma uma kwi amə ngwa umi ibiy itey ichi awu uchəw isey.

4Amaʼazənə mbə́ si tinə awu iyad, mbə ney izən kwi mbə́ sí imbiy itey wu ichi awu uchəw isey. 5Amaʼazənə mbə́ inyi awu ungɨŋ isey, mbə́ zən ajoŋ moʼ ni u chomo aba bugə jəgi. Wə zi ndwi fuw. Mbən zən nigə anó wu chigə úŋwən.

6Ajoŋ wu ghayn abú úŋwən kwi, “Mbən mə́ məŋərə ngwen, mə́ kyayn kwi mbən yə kaba Yeso wa Nazared ŋunə mbə́ komo azad abaʼaray. Cha uŋwən akəŋ yə si zəmə iwu mbən zən asin zənə mbə́ niŋi uŋwən akuŋ.” 7#Mat 26.32; Mak 14.28Mbən ŋu ghayn abú mbə məŋə-anó ma foro abú Pita kwi u yə ŋuw imbey uma ungɨŋ aba abey Galeli. Umbi zən uŋwən awu aba anji zənə yə ghayn abú úŋwən.

8Anigə, mbə́ ayey wu noʼ awu atəw isey ni noro. Mbə́ mə́ neŋere məŋərə uma. Cha mbə ghayn ma anó moʼ abú wa moʼ anji damugə mbə mə́ goro.

Yeso dey itey inyo ma abú Mari Magdalen

(Mat 28.9, 10; Jon 20.11-18)

9Amaʼazənə Yeso zəmə afəfəb aney sonde, yə ŋu itey inyo ma abú Mari Magdalen ŋunə yə chi uzugə iboŋ sambigə inyo ma. 10Umugə Mari magdalen zən uŋwən nigə, yə noʼ iŋu ghayn abú ba mbənə mbə mə nə Yeso nu mbə́ mə́ kənə adey 11Amaʼazənə mbə zəw kwi Yeso yi ikay, anigə ni zəw kwi Mari si zən uŋwən, cha mbə́ di beni.

Yeso ŋu tey inyo ma abú mbə məŋə-anó ubigə

(Luk 24.13-35)

12Amaʼazənə amaʼ moʼ si chigə, Yeso tey inyo ma abú mbə məŋə-anó bigə akə ukudu nji chini. Wə tey Amaʼazənə mbə́ mə́ ŋuw iyad abey. 13Amaʼazənə mbə zən kwi amə Yeso, mbə́ wene iŋu ghayn abú mbə́ məŋə-anó mbi. Asɨmə cha mbə́ di beni ma anó zənə mbə mə ghayn.

Yeso tey inyo ma abú mbə məŋə-anó ma ighum cho feyn

(Mat 28.16-20; Luk 24.36-49; Jon 20.19-23; Ifa 1.6-8)

14Asin naʼa Yeso nwi itey inyo ma abú mbə́ məŋə-anó ighum cho feyn Amaʼazənə mbə́ mə́ jəgə. Wə nya úŋwən damugə amə cha ibeni abú úŋwən foro damugə fiŋ ma si tu. Wə aghəy nigə damugə cha mbə beni ma unó mbənə ba mbənə mbə zən uŋwən Amaʼazənə yə si zəmə iwu mə́ ighayn. 15#Ifa 1.8Yə́ ghayn abú úŋwən kwi, “Mbən ŋuw ungɨŋ isəg ujum, iŋu ghayn ukən uchuŋ abú ba ujum. 16Wa ŋunə u beni inum une, u yi du angəʼ anigə wa ŋunə cha udi beni Nwiye yi zi usaʼa igun ma. 17Ba mbənə ubeni umbi naʼ ikay abú uŋwən imə aghəy u nwini unó moʼ. Umbi chi uzugə iboŋ inyo ba akə uŋu ukum, umbi nay akə inayn isoʼ. 18Umbi yimi ijugə akə ubugə ma, ubə nugə úníʼí, cha umi aghəy ma anó moʼ nə úŋwən. Umbi niŋe ubugə ma igun ba isɨgə u boro.”

Nwiye num Yeso azobo

(Luk 24.50-53; Ifa 1.9-11)

19 # Ifa 1.9-11 Amaʼazənə Asɨyisəg Yeso si inayn abú mbə məŋə-anó wu, Nwiye num uŋwən azobo. Wə pey yi chomo aba bugə jəgi Nwiye. 20Mbə məŋə-anó wu du iŋu ni ghayn ukən uchuŋ ungɨŋ usin ujum anigə Asɨyisəg mə faʼa nə úŋwən. Wə nibi beni kwi unó mbənə umə ghayn amə unó asiʼ numugə mbə mə aghəy uyere unoʼ.

Currently Selected:

Mak 16: NGI

Highlight

Copy