Mak 13

Yeso ghayn umugə umi saʼa imbəŋ Nwiye

(Mat 24.1, 2; Luk 21.5, 6)

1Amaʼazənə Yeso mə́ duw ungɨŋ ambəŋ Nwiye, a məŋə-anó ma moʼ ghayn abú uŋwən kwi, “Ataʼa ba zən ukudu isoʼo atey nibi zən isoʼo na!”

2Yeso ghayn abú uŋwən kwi, “Ngwə zən ina kyayn təŋ? Cha itey moʼ mi chomo ma igun chini umbi tu atey zəŋ ajum asey.”

Mbə məŋə-anó Yeso umbi zəw ingəʼ u nibi nwini inya aghəw uma

(Mat 24.3-14; Luk 21.7-19)

3Amaʼazənə Yeso chomo igun Ugum Olif nu ú mə́ təmə iney imbəŋ Nwiye anjin zi, Pita, Jems, Jon foro Andrew ŋú biri abú uŋwən anjimə anjim kwi, 4“Ghayn ina, anó zəŋ ami du amaʼa ngiya? Anwini zənə ami tey kwi amaʼ si koʼ nu anó zəŋ ami ighəy amə ngiya?”

5Yeso ghayn abú úŋwən kwi, “Mbən num amaʼ ka wa moʼ tama ma ŋwen. 6Ba nanaʼ umbi zaʼa inum uŋu ukum yeŋ yə ghayn kwi amə wa ŋunə Nwiye zoʼ anigə umbi tama ba nanaʼ. 7Amaʼazənə mbən mi zəw kwi ubey mə maʼa berd nibi zəw inayn damugə ba mə kaba imaʼ berd mbən mə tumə ŋwen inyo unó wu mbi mə awu asɨmə akama kwi amə inwi zigə. 8Ubey mbi noʼ sə maʼa berd nə ubey chini. Ubey mbənə ifon mə tumə mbi maʼa berd nə ubey chini mbənə ifon mə tumə usin ujum mbi mə nyiʼire, anigə ajəgə yi mə ka unó mbəŋ umbi chomo nə amaʼazənə ayey mə ti imə nomo ibə́.”

9 # Mat 10.17-20; Luk 12.11, 12 “Anigə mbən num azom. Umbi ibiya ŋwen inaʼ abú ba mbənə umə saʼa abey, umbi som ngwən ungɨŋ na bumi ba Jû. Mbən yi təm ifigi gobuna nibi təm ifigi ufon akə uŋu ukum da ighayn ukən uchuŋ abú úŋwən. 10Mbən kyayn kwi umbi dey ghayn ukən uchuŋ ungɨŋ ubey ujum ki inwi si zaʼa. 11Amaʼazənə ubə ibiya ngwən num ŋuw ifigi mbə saʼa abey, mbən mə tumə ngwən inyo da anó zənə mbən mi ighayn, mbən ghayn aba anó zənə Nwiye ghayn inen akə maʼa wu, damugə amə Azugə zayn zayn amə inayn akama umbən. 12Unya umbi fənə unya kwi uzwere, mbaʼ umbi fənə buŋ kwi uzwere, boŋ mbi noʼ sə zoŋo umbaʼ uma anigə inaʼ kwi uzwere. 13#Mat 10.22Ba jum umbi bana ngwən da aŋu, asɨmə wa ŋunə u mi yimə fiŋ ŋu pey akə inwi, Nwiye yi chi uŋwən angəʼ.”

Awayn ghəy zənə amə nyimə imbəŋ Nwiye

(Mat 24.15-28; Luk 21.20-24)

14“Amaʼazənə mbən zən ‘Awayn ghəy zənə amə nyimə imbəŋ Nwiye’ nu u niŋi asin zənə cha a koʼo kwi usiy akuŋ” (Wa ŋunə u foŋ atəw ma zayn) Anigə ba mbənə u mə́ Judeya u noro koʼ iŋu igun ugum. 15#Luk 17.31Ka wa moʼ ŋunə umə idəm na swiʼi ma, kə inyi ungɨŋ na inum ghəy moʼ. 16Ka wa ŋunə umə ambayn gha ŋu ma ana boʼo iŋu num ndwi ma. 17Ingəʼ yi inyi igun ayey mbənə umə nə ibum nibi inyi igun ayey mbənə umə inow buŋ ungɨŋ uney wu. 18Mbən chara Nwiye kwi ka unó mbəŋ du ma maʼa uchiy. 19#Nwi 7.14Damugənə ingəʼ yi du ungɨŋ uney wu i chigə ingəʼ ujum tənə i si noʼo idu inoʼ ama zənə Nwiye tana isəg iŋu pey akinine. Cha ukudu ingəʼ chini umi noʼ gha du ni ingəʼ zəŋ. 20Anigə Nwiye di ki soboro ma unun uney wu ji cha wa moʼ umi tənə. Asɨmə da ba mbənə Nwiye si choʼo, yə soboro unun uney wu.

21“Wa moʼ bi ghayn inigə amaʼa wu kwi, ‘Zən, ney wa ŋunə Nwiye zoʼo uŋu’ kə kwi, ‘ney wa ŋunə Nwiye zoʼo uwiy’ mbən beni ngwən. 22Ba figə unó mbənə u ghayn kwi mba mə ba mbənə Nwiye zoʼo foro ba ukən Nwiye figə unó umbi du. Umbi ghəy unwini unó umbi nibi ghəy uyere unó boʼo inji bə mə́ awu, u tama ba mbənə Nwiye choʼo. 23Anigə mbən num amaʼ mə si ghayn unó ujum inen kə amaʼ wu sə koʼo.”

Ŋwə̂ Wa yi gha zaʼa

(Mat 24.29-31; Luk 21.25-28)

24 # Nwi 6.12 “Ungɨŋ uney awu, amaʼazənə ingəʼ kyayn wu si chigə, nyama chugi yi fid, cha úməg mi gha bigə, 25#Nwi 6.13itəni ti mə noʼo aney azobo ifwayn asey, Nwiye yi nyiʼiri u ghəy ujum mbənə umə azobo. 26#Nwi 1.7Amaʼa wu, ba mbi zən Ŋwə̂ Wa mə zaʼa ungɨŋ ipaʼ nə ikay nu i kweyi foro nə iwumini. 27U yi tom mbə angəd kwi u fere ba mbənə Nwiye choʼo akə uba isəg ikyugə umbi fere iti akə inwi isəg iŋu pey akə inwi azobo.”

Anó zənə ba mi kweme akə azad fig

28“Mbən kweme anó moʼ abú azad fig. Amaʼazənə itab ma mə zure anigə ati ni chiʼe mbən kyayn kwi imbəŋ chibey si tinə. 29Ayə ichin ichin kwi mbən bə zən unó wu u ghəy, mbən kyayn kwi amaʼazənə Ŋwə̂ Wa mi gha zaʼa si tinə. 30Ayə ghayn asiʼ inen kwi, cha ngwaʼ ba zəŋ mi iku ijum nu cha unó mbən di si num usin. 31Azobo ni isəg ayi chigə asɨmə inyi inayn yi tənə akə ighari feyn.”

Cha wa moʼ kyay ma aney kə amaʼazənə unó wu mi du

(Mat 24.36-44)

32 # Mat 24.36 “Cha wa moʼ kyay ma aney wu kə amaʼazənə unó mbəŋ mi du kaba mbə angəd mbənə umə azobo kə ŋwə̂ aba mbaʼ ma zeʼe ukyay. 33Anigə mbən num amaʼ ichomo ikiʼi damugə cha mbən kyay amaʼazənə Ŋwə̂ Wa mi wene izaʼa. 34#Luk 12.36-38#Luk 12.36-38Ayi mə ni wa ŋunə unoʼo iŋu igha isayn u ghəy ma abú ba faʼa kwi uni iney anigə inaʼ atəw faʼa wa feyn feyn kwi uni faʼ anigə ighayn abú uŋunə umə nəmə uchəw ukam kwi umə ikyiʼi. 35Anigə mbən chomo ikyiʼi damugə cha mbən kyay amaʼazənə wa na mi zaʼa, kwi kə umi zaʼa anjaʼ, kə uzimi, kə amaʼazənə ingɨ mə toŋo kə amaʼazənə isəg mə kiʼi. 36Ubə saʼa zaʼa, mbən ghəy ngwən kwi u pey yi kuw ngwən nu mbən mə bunə. 37Anigə anó zənə a ghayn inen yə tey kwi mə nibi ghayn abú ba jum. Ano wu mə kwi mbən chomo ikyiʼi ni nəmə.”

Currently Selected:

Mak 13: NGI

Highlight

Copy